Main Menu

Joomla Slide Menu by DART Creations

ສະຖິຕິຈຳນວນຜູ້ເຂົ້າຊົມ

mod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_counter
mod_vvisit_counterຜູ້ເຂົ້າຊົມ ວັນນີ້161
mod_vvisit_counterຜູ້ເຂົ້າຊົມ ມື້ວານ594
mod_vvisit_counterຜູ້ເຂົ້າຊົມ ອາທິດນີ້1871
mod_vvisit_counterຜູ້ເຂົ້າຊົມ ອາທິດ ຜ່ານມາ3692
mod_vvisit_counterຜູ້ເຂົ້າຊົມ ເດືອນນີ້8719
mod_vvisit_counterຜູ້ເຂົ້າຊົມ ເດືອນຜ່ານມາ10125
mod_vvisit_counterລວມທັງຫມົດ237791

Online (20 minutes ago): 8
Your IP: 54.91.137.223
,
Today: ກ. ຍ. 17, 2014
ສານຂອງ ທ່ານ ບົວສອນ ບຸບຜາວັນ, ນາຍົກລັດຖະມົນຕີ ແຫ່ງ ສ ປ ປ ລາວ PDF ພິມ ອີເມລ
ຂຽນໂດຍ ສົມອຸລາ ຍະພິຈິດ   
ວັນສຸກທີ່ 20 ມີນາ 2009 ເວລາ 12: 52

ສານຂອງ ທ່ານ ບົວສອນ ບຸບຜາວັນ, ນາຍົກລັດຖະມົນຕີ ແຫ່ງ ສ ປ ປ ລາວ

ເນື່ອງໃນໂອກາດ ວັນນ້ຳໂລກ, 22 ມີນາ 2009

ບັນດາທ່ານ ທີ່ນັບຖື,
ພີ່ນ້ອງຮ່ວມຊາດ ທີ່ຮັກແພງ ທັງຫລາຍ,
ໃນທ່າມກາງ ທີ່ທົ່ວພັກ, ທົ່ວກອງທັບ ແລະ ທົ່ວປວງຊົນລາວທັງຊາດ ກຳລັງເບີກບານມ່ວນຊື່ນ ສະເຫລີມສະຫລອງ ວັນສ້າງຕັ້ງ ພັກປະຊາຊົນ ປະຕິວັດລາວ ວັນທີ 22 ມີນາ ຄົບຮອບ 54 ປີ, ປະຊາຊົນລາວ ບັນດາເຜົ່າ ຮ່ວມກັບປະຊາຄົມໂລກ ພ້ອມກັນ ສະເຫລີມສະຫລອງ ວັນນ້ຳໂລກ ວັນທີ 22 ມີນາ 2009 ຊຶ່ງໃນປີນີ້ ໄດ້ດຳເນີນໄປ ພາຍໃຕ້ຄຳຂວັນ "ນ້ຳ-ໄຫຼຜ່ານຊາຍແດນ: ໃຊ້ນ້ຳຮ່ວມກັນ-ຮ່ວມກັນມີ ກາລະໂອກາດ".
ຄືໄດ້ຮູ້ນຳກັນແລ້ວວ່າ ນ້ຳ ເປັນອົງປະກອບ ພື້ນຖານ ທີ່ຂາດບໍ່ໄດ້ ຂອງ ສິ່ງທີ່ມີຊີວິດໃນໂລກ. ຍິ່ງໄປກວ່ານັ້ນ ນ້ຳ ຍັງເປັນຫນື່ງ-ໃນຊັບພະຍາກອນ ຍຸດທະສາດ ທີ່ປະກອບສ່ວນ ເຂົ້າໃນການເຕີບໂຕ ຂອງເສດຖະກິດແຫ່ງຊາດ ເພື່ອບັນລຸເປົ້າໝາຍ ການພັດທະນາ ເສດຖະກິດ-ສັງຄົມ, ແນໃສ່ເຮັດໃຫ້ ຊີວິດການເປັນຢູ່ ຂອງ ປະຊາຊົນ ບັນດາເຜົ່າດີຂຶ້ນ ເທື່ອລະກ້າວ. ພ້ອມດຽວກັນນີ້, ຍ້ອນປະຊາກອນໂລກ ໄດ້ມີການເພີ່ມຂຶ້ນ ຢ່າງໄວວາ, ຊັບພະຍາກອນນ້ຳ ສະເລ່ຍຕໍ່ຫົວຄົນ ກໍຫລຸດໜ້ອຍຖອຍລົງ ອັນໄດ້ກໍ່ໃຫ້ເກີດ ບັນຫາຂາດແຄນນ້ຳ ຢູ່ຫລາຍແຫ່ງ ໃນທົ່ວໂລກ. ຄຽງຄູ່ກັນນີ້ ນ້ຳ ກໍຍັງເປັນສາເຫດ ແຫ່ງໄພພິບັດ ທາງທຳມະຊາດ ເຊັ່ນ ໄພນ້ຳຖ້ວມ ແລະ ໄພແຫ້ງແລ້ງ ຊຶ່ງ ເປັັນການຂົ່ມຂູ່ ຕໍ່ ການດຳລົງຊີວິດ ຂອງມະນຸດຊາດ. ດ້ວຍເຫດຜົນຄືດັ່ງກ່າວ ພວກເຮົາ ຈຶ່ງໃຫ້ ຄວາມສຳຄັນ ເປັນພິເສດ ຕໍ່ ການສະເຫລີມສະຫລອງ ວັນ ນ້ຳໂລກ ເພື່ອ ໃຫ້ເຫັນໄດ້ ບົດບາດ ແລະ ຄວາມສຳຄັນ ຂອງ ຊັບພະຍາກອນນ້ຳ.
ບັນດາທ່ານ ທີ່ມີກຽດ,
ອ່າງ ແມ່ນ້ຳຂອງ ເປັນໜຶ່ງ ໃນ ອ່າງແມ່ນ້ຳ ລະຫວ່າງປະເທດ ທີ່ໃຫຍ່ທີ່ສຸດ ແລະ ມີລະບົບ ນິເວດ ທີ່ອຸດົມຮັ່ງມີ, ແມ່ນ້ຳຂອງ ແລະ ສາຂາ ໄດ້ສ້າງພື້ນຖານ ໃນການດຳ ລົງຊີວິດ ທີ່ອຸດົມສົມບູນ ແລະ ຮີດຄອງປະເພນີ ອັນຫລາກຫລາຍ ແກ່ ປະຊາຊາດ ທີ່ອາໄສ ຢູ່ໃນ ອ່າງແມ່ນ້ຳຂອງ. ພ້ອມດຽວກັນນີ້ ແມ່ນ້ຳຂອງ ຍັງໄດ້ສ້າງ ກາລະໂອກາດ ໃຫ້ແກ່ ບັນດາປະເທດ ທີ່ຮ່ວມໃຊ້ ແມ່ນ້ຳຂອງ ນຳກັນ ໄດ້ຂະຫຍາຍການຮ່ວມມື ດ້ານເສດຖະກິດ-ສັງຄົມ ແລະ ການປົກ ປັກຮັກສາ ສິ່ງແວດລ້ອມ ເປັນຢ່າງດີ.
ອີງໃສ່ ຫົວຂໍ້ ຂອງ ວັນນ້ຳໂລກ ໃນປີນີ້, ຂ້າພະເຈົ້າ ຂໍເນັ້ນເຖິງ ຄວາມສຳຄັນ ໃນ "ການນຳໃຊ້ນ້ຳຮ່ວມກັນ - ຮ່ວມກັນມີ ກາລະໂອກາດ" ລະຫວ່າງປະເທດ ໃນ ອ່າງແມ່ນ້ຳຂອງ ເພື່ອ ຮ່ວມກັນ ພັດທະນາຊັບພະຍາກອນນ້ຳ ແບບຍືນຍົງ ໂດຍ ຕິດພັນ ຢ່າງສະໜິດແໜ້ນ ກັບ ຄວາມຮັບຜິດຊອບ ຕໍ່ ຜົນກະທົບຕ່າງໆ ທີ່ອາດຈະເກີດຂຶ້ນ ຈາກ ການພັດທະນາ. ຍ້ອນເຫັນໄດ້ ຄວາມສຳຄັນ ຄືດັ່ງກ່າວ, ໃນ ປີ 1995, ລັດຖະບານ ຂອງ ສີ່ປະເທດ ທີ່ນອນ ຢູ່ໃນ ອ່າງແມ່ນ້ຳຂອງ ຕອນລຸ່ມ ຄື ສາທາລະນະລັດ ປະຊາທິປະໄຕ ປະຊາຊົນລາວ, ລາຊະອານາຈັກ ໄທ, ລາຊະອາ ນາຈັກ ກຳປູເຈຍ ແລະ ສາທາລະນະລັດ ສັງຄົມນິຍົມ ຫວຽດນາມ ໄດ້ຕົກລົງກັນ ສ້າງຕັ້ງຄະນະ ກຳມາທິການ ແມ່ນ້ຳຂອງ ສາກົນຂຶ້ນ ເພື່ອ ເຮັດບົດບາດ -ໃນການຄຸ້ມຄອງ ແລະ ນຳໃຊ້ ຊັບພະຍາ ກອນນ້ຳ ໃນ ອ່າງແມ່ນ້ຳຂອງ ໃຫ້ມີຄວາມກົມກຽວ ແລະ ຍືນຍົງ ກໍຄື ການສ້າງ ຄວາມເຂັ້ມແຂງ ດ້ານບຸກຄະລາກອນ, ການຈັດຕັ້ງ ແລະ ລະບຽບການ ໃຫ້ບັນດາປະເທດພາຄີ. ພ້ອມນີ້ ສອງປະເທດ ທີ່ນອນຢູ່ອ່າງແມ່ນ້ຳຂອງ ຕອນເທິງ ຄື ສາທາລະນະລັດ ປະຊາຊົນ ຈີນ ແລະ ສະຫະພາບ ມຽນມາ ກໍໄດ້ເຂົ້າຮ່ວມ ເປັນ ຄູ່ເຈລະຈາ ໃນປີ 1996 ເປັນຕົ້ນມາ ຊຶ່ງ ການຮ່ວມມື ກັບ ປະເທດ ທັງສອງ ໃນ ຂອບເຂດ ອ່າງແມ່ນ້ຳຂອງ ກໍ່ນັບມື້ນັບຫລາຍຂື້ນ.
ເພື່ອຮັບປະກັນ ການປະສານງານ ການພັດທະນາ ຊັບພະຍາກອນນ້ຳ ຢູ່ພາຍໃນປະເທດ ໃຫ້ມີປະສິດທິຜົນ ແລະ ຍືນຍົງ, ສປປ ລາວ ໄດ້ຫັນໄປສູ່ ການຄຸ້ມຄອງ ຊັບພະຍາກອນນ້ຳ ແບບປະ ສົມປະສານ ໂດຍມີ ການເຂົ້າຮ່ວມ ຂອງ ທຸກພາກສ່ວນ ທີ່ກ່ຽວຂ້ອງ ໃນຂອບເຂດ ອ່າງແມ່ນ້ຳ. ຢາກເຮັດໄດ້ຄືແນວນັ້ນ ຈະຕ້ອງໄດ້ໃຫ້ຄວາມສຳຄັນ ເປັນພິເສດ ຕໍ່ ການປົກປັກຮັກສາ ຍອດນ້ຳ ໃນ ຂອບເຂດ ຂອງ ການຟື້ນຟູ ແລະ ປູກປ່າ ໃຫ້ໄດ້ 70 ສ່ວນຮ້ອຍ ຂອງ ເນື້ອທີ່ທົ່ວປະເທດ ໃນ ປີ 2020. ຄຽງຄູ່ກັນນີ້ ພວກເຮົາ ກໍໄດ້ເອົາໃຈໃສ່ ໃນ ການປັບປຸງ ລະບົບ ຂໍ້ມູນ-ຂ່າວສານ ອຸຕຸນິຍົມ ແລະ ອຸທົກກະສາດ ເພື່ອ ເປັນພື້ນຖານ ໃຫ້ແກ່ ການວາງ ແຜນ ພັດທະນາ ເສດຖະກິດ-ສັງຄົມ ກໍຄື ການສ້າງລະບົບເຕືອນໄພພິບັດ ທີ່ເກີດຈາກນ້ຳ. ການບັນລຸເປົ້າໝາຍ ເຫລົ່ານັ້ນ ຈະເປັນການປະ ກອບສ່ວນ ຢ່າງຕັ້ງໜ້າ ເຂົ້າໃນ ການສະໜອງ ຄວາມຕ້ອງການ ຂັ້ນພື້ນຖານ ຂອງ ປະຊາຊົນ ແລະ ການຫລຸດຜ່ອນ ຄວາມທຸກຍາກ ຂອງປະເທດ ລົງເທື່ອລະກ້າວ.
 
ບັນດາທ່ານ ທີ່ນັບຖື,
ເນື່ອງໃນໂອກາດ ວັນສະເຫລີມສະຫລອງ ວັນນ້ຳໂລກ ທີ່ໄດ້ໝູນວຽນມາຮອດ ອີກວາ ລະໜຶ່ງ, ໃນນາມ ລັດຖະບານ ແຫ່ງ ສປປ ລາວ, ຂ້າພະເຈົ້າ ຂໍສະແດງ ຄວາມຍ້ອງຍໍຊົມເຊີຍ ມາຍັງ ປະຊາຊົນລາວບັນດາເຜົ່າ, ຂະແໜງການ ທີ່ກ່ຽວຂ້ອງ, ອຳນາດການປົກຄອງ ທ້ອງຖິ່ນ, ຫົວໜ່ວຍ ທຸລະກິດ ແລະ ທຸກພາກສ່ວນ ໃນສັງຄົມ, ລວມທັງ ອົງການຈັດຕັ້ງສາກົນ ແລະ ບັນດາປະເທດ ເພື່ອນມິດ ໂດຍສະເພາະແມ່ນ ບັນດາປະເທດ ທີ່ນອນຢູ່ໃນ ອ່າງແມ່ນ້ຳຂອງ, ທີ່ໄດ້ພ້ອມກັນ ອອກແຮງສູ້ຊົນ ແລະ ປະສານສົມທົບ ໃນ ການຄຸ້ມຄອງ ແລະ ນຳໃຊ້ ຊັບພະຍາກອນນ້ຳ ຮ່ວມກັນ, ແນໃສ່ ເຮັດໃຫ້ ສປປ ລາວເຮົາ ກໍຄື ຂົງເຂດ ອ່າງແມ່ນ້ຳຂອງ ມີ ສັນຕິພາບ, ສະເຖຍລະພາບ ແລະ ວັດທະນະຖາວອນ, ປະຊາຊົນ ໄດ້ຮັບຜົນປະໂຫຍດສູງສຸດ.
ທ້າຍສຸດນີ້ ຂ້າພະເຈົ້າ ຂໍຮຽກຮ້ອງ ມາຍັງປວງຊົນລາວ ທັງຊາດ ຈົ່ງເພີ່ມທະວີ ຄວາມສາ ມັກຄີ ເປັນເອກກະພາບ ສືບຕໍ່ ເຂົ້າຮ່ວມ ຂະບວນການສ້າງປະເທດລາວ ໃຫ້ເປັນປະເທດ ສີຂຽວ, ສະອາດ ແລະ ງາມຕາ ເພື່ອປະກອບສ່ວນ ເຂົ້າໃນການຍົກສູງ ຄຸນນະພາບຊີວິດ ຂອງ ປວງຊົນ ທັງຊາດ ພ້ອມທັງ ປົກປັກຮັກສາ ສິ່ງແວດລ້ອມ ໃຫ້ມີຄວາມປອດໃສ ຕະຫລອດໄປ. ຂ້າພະເຈົ້າ ຂໍອວຍພອນ ໃຫ້ການສະເຫລີມ ສະຫລອງ ວັນນ້ຳໂລກ ທີ່ຕິດພັນ ກັບ ຂະບວນການຕ່າງໆ ຈົ່ງໄດ້ ຮັບຜົນສຳເລັດ ຕາມລະດັບ ຄາດໝາຍ ທີ່ວາງໄວ້.
ນາຍົກລັດຖະມົນຕີ ແຫ່ງ ສປປ ລາວ
ບົວສອນ ບຸບຜາວັນ