ໃນ​ຕອນ​ເຊົ້າວັນ​ທີ 16 ມີນາ 2019 ທີ່​ ກະ​ຊວງ ຊັບ​ພະ​ຍາ​ກອນ ທຳ​ມະ​ຊາດ ແລະ ສິ່ງ​ແວດ​ລ້ອມ​ ໄດ້​ຈັດ​ພິ​ທີ ແຂ່ງຂັນສິນລະປະວັນນະຄະດີ (ຮ້ອງເພງ) ແລະ ຕະຫຼາດນັດ ຂອງແມ່ຍິງ ກຊສ ຂຶ້ນ ເພື່ອເປັນການຈາລຶກ ແລະ ທົບທວນຄືນ ວັນປະຫວັດສາດອັນສຳຄັນ ຂອງແມ່ຍິງ ກໍຄື ວັນແມ່ຍິງສາກົນ ວັນທີ 8 ມີນາ ຄົບຮອບ 109 ປີ ທີ່ໄດ້ໝູນວຽນມາເຖິງນີ້ ໃຫ້ເປັນຂະບວນຟົດຟື້ນ ແລະ ເພື່ອເປັນການສະ​ເຫລີມສະ​ຫລອງ ທີ່ອົງຄະນະພັກ ກະຊວງ ຊັບພະຍາກອນທໍາມະຊາດ ແລະ ສິ່ງແວດລ້ອມ ໄດ້ສໍາເລັດ ກອງປະຊຸມຄົບຄະນະບໍລິຫານງານພັກ ກະຊວງ ຄັ້ງທີ 8  (ເປີດກວ້າງຄັ້ງທີ 3 ) ສະໄໝທີ I.

ໂດຍ​ການ​ເປັນ​ກຽດ​ເຂົ້າ​ຮ່ວມ ຂອງ​ທ່ານ ສົມ​ມາດ ພົ​ລ​ເສ​ນາ ກຳ​ມະ​ການ​ສູນ​ກາງ​ພັກ, ເລ​ຂາ​ຄະ​ນະ​ພັກ, ລັດ​ຖະ​ມົນ​ຕີ ກະ​ຊວງ ຊັບ​ພະ​ຍາ​ກອນ ທຳ​ມະ​ຊາດ ແລະ ສິ່ງ​ແວດ​ລ້ອມ, ມີ​ຄະ​ນະ​ພັກ​ຄະ​ນະ​ນຳ​ກະ​ຊວງ, ມີ​ບັນດາ​ເລຂາ​ໜ່ວຍ​ພັກ ພ້ອມ​ດ້ວຍ​ສະມາຊິກ​ພັກ, ພະນັກງານ​ບໍານານ, ຕາງ​ໜ້າ 2 ອົງການ​ຈັດ​ຕັ້ງ​ມະຫາຊົນ, ພ້ອມ​ດ້ວຍ​ຕາງໜ້າ​ຈາກ​ສູນ​ກາງ​ສະຫະພັນ​ແມ່ຍິງ​ລາວ, ກອງ​ສິນລະປະ​ກອນ​ແຫ່ງ​ຊາດ, ຄະນະສະຫະພັນ​ແມ່ຍິງ ພ້ອມ​ດ້ວຍ​ສະມາຊິກ ​ແມ່ຍິງ ກຊສ ​ເຂົ້າ​ຮ່ວມ​ຢ່າງ​ພ້ອມພຽງ.

ຈຸດ​ປະ​ສົງ​ຂອງ​ຂະ​ບວນການ ໃນ​ຄັ້ງ​ນີ້ ​ເພື່ອປະ​ກວດ ​ແຂ່ງ​ຂັນ​ສິນ​ລະ​ປະ​ວັນ​ນະ​ຄະ​ດີ (ຮ້ອງ​ເພງ) ລະ​ຫວ່າງ​ ບັນ​ດາ​ ໜ່ວຍ​ແມ່​ຍິງ ຫ້ອງ​ການ, ກົມ, ກອງ, ສະ​ຖາ​ບັນ ແລະ ສູນ ພາຍ​ໃນ ກ​ຊ​ສ ພ້ອມ​ທັງ​ເປັນ​ການ​ສ້າງ​ຄວາມ​ສາ​ມັກ​ຄີ ຮັກ​ແພງ ເຊິ່ງ​ກັນ ແລະ ກັນ ໂດຍ​ການ​ ເຂົ້າຮ່ວມ​ການ​​ແຂ່ງ​ຂັນ ​ມີ 18 ພາກ​ສ່ວນ, ນອກ​ນັ້ນ​ຍັງ​ມີງານຕະຫລາດນັດ ຂາຍສິນຄ້າ ເພື່ອເປັນ​ການ​ຫາ​ລາຍ​ໄດ້​ເຂົ້າ​ຄັງ​ຂອງ ​ສະ​ຫະ​ພັນ​ແມ່​ຍິງ ກ​ຊ​ສ ​ແລະ ຂອງບັນ​ດາ​ໜ່ວຍ​ແມ່​ຍິງ ພາຍ​ໃນ ກ​ຊ​ສ.

ຜ່ານ​ການ​ປະ​ກວດ​ແຂ່ງ​ຂັນ​ສິນ​ລະ​ປະ​ວັນ​ນະ​ຄະ​ດີ (ຮ້ອງ​ເພງ) ເຫັນ​ໄດ້​ວ່າ​ ລາງວັນ​​ທີ 1 ໄດ້​ແກ່ ໜ່ວຍ​ແມ່​ຍິງ ກົມຈັດຕັ້ງ ແລະ ພະນັກງານ ​ໃນ​ບົດ​​ເພງ “ງາມເມືອງລາວ” ໄດ້​ຮັບ​ເງິນ​ລາງວັນ 1,000,000 ກີບ, ເປັນກຽດຂຶ້ນມອບລາງວັນໂດຍ ທ່ານ ສົມມາດ ພົລເສນາ ກຳ​ມະ​ການ​ສູນ​ກາງ​ພັກ, ເລ​ຂາ​ຄະ​ນະ​ພັກ, ລັດ​ຖະ​ມົນ​ຕີ ກະ​ຊວງ ຊັບ​ພະ​ຍາ​ກອນ ທຳ​ມະ​ຊາດ ແລະ ສິ່ງ​ແວດ​ລ້ອມ, ລາງວັນ​ທີ 2 ໄດ້​ແກ່ ໜ່ວຍ​​ແມ່​ຍິງ ສູນຂໍ້ມູນ-ຂ່າວສານ ຊັບພະຍາກອນທຳມະຊາດ ແລະ ສິ່ງແວດລ້ອມ, ໃນບົດ​​ເພງ “ເດືອນສາມຄ້ອຍ” ໄດ້​ຮັບ​ເງິນ​ລາງວັນ 800,000 ກີບ, ເປັນກຽດມອບໂດຍ ທ່ານ ປອ ໄຊນະຄອນ ອິນທະວົງ ຄະນະປະຈຳ ພັກກະຊວງ, ຮອງລັດຖະມົນຕີ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ, ​ລາງວັນທີ 3 ແມ່ນ​ໜ່ວຍ​ແມ່​ຍິງ ກອງທຶນປົກປັກຮັກສາສິ່ງແວດລ້ອມ ໃນ​ບົດ​​ເພງ​ “ທີ່ນີ້ເມືອງລາວ” ໄດ້​ຮັບ​ເງິນ​ລາງວັນ 500,000  ກີບ, ມອບໂດຍທ່ານ ນາງ ມອນມະນີ ຍອຍບົວກ່ອງ ອະດິດ ຮອງລັດຖະມົນຕີ ກຊສ, ແລະ ອີກ 15 ໜ່ວຍ​​ແມ່​ຍິງ ແມ່ນ​ໄດ້​ຮັບ​ເງິນ​ລາງວັນຊົມ​ເຊີຍ ໜ່ວຍ​ລະ 200,000 ກີບ.