ໃນວັນທີ 4-6 ມີນາ 2019 ຂະແຫນງການ ຊັບພະຍາກອນທໍາມະຊາດ ແລະ ສິ່ງແວດລ້ອມ ໄດ້ຈັດປະຊຸມສະຫຼຸບວຽກງານ ຊັບພະຍາກອນທຳມະຊາດ ແລະ ສິ່ງແວດລ້ອມ ປະຈຳປີ 2018 ແລະ ທິດທາງແຜນ¬ການປີ 2019 ຂຶ້ນ ທີ່ສູນການຮ່ວມມືສາກົນ ແລະ ຝຶກອົບຮົມ (ICTC) ໂດຍພາຍໃຕ້ ການເປັນປະ¬ທານ ຂອງ ທ່ານ ສົມມາດ ພົລເສນາ, ລັດຖະມົນຕີ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ, ມີບັນດາຮອງລັດຖະມົນຕີ, ຮອງເຈົ້າແຂວງ, ຮອງເຈົ້າຄອງນະຄອນຫລວງ, ເຈົ້ານະຄອນ, ເຈົ້າເມືອງ, ຫົວຫນ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມນະຄອນຫລວງ/ ແຂວງ 17 ແຂວງ, ຫົວຫນ້າ ຫ້ອງການ ຊັບພະຍາກອນທຳມະຊາດ ແລະ ສິ່ງແວດລ້ອມ 148 ເມືອງ ແລະ ພ້ອມດ້ວຍພະນັກງານ ທີ່ກ່ຽວຂ້ອງເຂົ້າຮ່ວມລວມທັງຫມົດ 400 ກວ່າທ່ານ.

ກອງປະຊຸມຄັ້ງນີ້ ໄດ້ສະຫລຸບຕີລາຄາການຈັດຕັ້ງປະຕິບັດວຽກງານຜ່ານມາຂອງຂະແຫນງການ ຊັບພະຍາກອນທໍາມະຊາດ ແລະ ສິ່ງແວດລ້ອມ ປະຈຳປີ 2018 ແລະ ວາງທິດທາງແຜນການ ປະຈໍາປີ 2019 ໂດຍຍົກໃຫ້ເຫັນຜົນສຳເລັດຜ່ານມາ ພ້ອມທັງຄົ້ນຄ້ວາ ປຶກສາລືບັນຫາທີ່ພົ້ນເດັ່ນ, ຂໍ້ຄົງຄ້າງ ແລະ ປະກົດ ການຫຍໍ້ທໍ້ ກ່ຽວກັບ ຂົງເຂດທີ່ດິນ, ສິ່ງແວດລ້ອມ, ແຜນການ-ການເງິນ, ວຽກງານຈັດຕັ້ງ ແລະ ກວດກາ ແລະ ບັນຫາອື່ນໆ ທີ່ຕິດພັນກັບວຽກງານຊັບພະຍາກອນທຳມະຊາດ ແລະ ສິ່ງແວດລ້ອມ.

ທ່ານ ສົມມາດ ພົລເສນາ, ລັດຖະມົນຕີ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ກ່າວວ່າ: ກອງປະຊຸມຄັ້ງນີ້ ເປັນກອງປະຊຸມຄັ້ງປະຫວັດສາດ ທີ່ໄດ້ເຕົ້າໂຮມ ສາຍຕັ້ງຂອງຂະແໜງການ ຊັບພະຍາກອນທຳມະຊາດ ແລະ ສິ່ງແວດລ້ອມ ທີ່ກວມເອົາ ທັງ 18 ແຂວງ ແລະ 148 ເມືອງ ໃນທົ່ວ ປະເທດເພື່ອພ້ອມກັນມາປຶກສາຫາລື ແລະ ຄົ້ນຄວ້າບັນຫາທີ່ພົ້ນເດັ່ນ ກ່ຽວກັບ ວຽກງານຊັບພະຍາ ກອນທຳມະຊາດ ແລະ ສິ່ງແວດລ້ອມ. ພ້ອມກັນນີ້, ກໍຈະໄດ້ຄົ້ນຄວ້າຈັດຕັັ້ງຜັນຂະຫຍາຍເນື້ອໃນຈິດ ໃຈມະຕິ 7 ສະໄໝທີ X ຂອງຄະນະບໍລິຫານງານສູນກາງພັກ ໃນຂະແໜງຂອງພວກເຮົາໃຫ້ປະກົດຜົນເປັນຈິງ, ພ້ອມທັງວາງວິທີການ ແລະ ມາດຕະການຕ່າງໆທີ່ເໝາະສົມ ໃນການຄຸ້ມຄອງທີ່ດິນ, ການປົກປັກຮັກສາ ແລະ ຟື້ນຟູບູລະນະຊັບພະຍາກອນທຳມະຊາດ ແລະ ສິ່ງແວດລ້ອມ ໃຫ້ບັນລຸການພັດທະນາ ແບບຍືນຍົງກໍ່ຄືການພັດທະນາ ຕາມທິດສີຂຽວ ແລະ ຍືນຍົງ ເທື່ອລະກ້າວ, ສົ່ງເສີມສ້າງຄຸນນະພາບຕົວ ເມືອງ ຂຽວສະອາດງາມຕາ, ຫັນໄປຕາມທິດສ້າງບາດກ້າວບຸກທະລຸ 4 ດ້ານ, ທິດສາມສ້າງ, ອັນສໍາຄັນ ຈະມີການສຸມໃສ່ ການປຶກສາຫາລືວຽກງານກໍ່ສ້າງວັດທະນະທໍາໃໝ່ ໃນຮາກຖານສາຍຕັ້ງຂອງກະຊວງ ຊັບພະຍາກອນທໍາມະຊາດ ແລະ ສິ່ງແວດລ້ອມ ເວົ້າລວມ ເວົ້າສະເພາະ ກໍ່ແມ່ນສາຍຕັ້ງ ຂອງບັນດາ ກົມກອງ ອ້ອມຂ້າງ ກະຊວງ ຕິດພັນກັບການພັດທະນາຊົນນະບົດຮອບດ້ານ ໃຫ້ປະກົດຜົນເປັນຈິງ ໃນສະເພາະໜ້າ ແລະ ຍາວນານ. 

ໃນໄລຍະ 1 ປີທີ່ຜ່ານມາ ຂະແຫນງ ຊັບພະຍາກອນທໍາມະຊາດ ແລະ ສິ່ງແວດລ້ອມ  ພວກເຮົາ ກໍໄດ້ສ້າງຜົນສຳເລັດຫຼາຍດ້ານ. ໃນນີ້, ຜົນສຳເລັດອັນພົ້ນເດັ່ນ ກໍແມ່ນການສຳເລັດການອອກໃບຕາດິນໃນຂອບເຂດທົ່ວປະເທດ ທີ່ສາມາດບັນລຸໄດ້ເຖີງ 132.000 ຕອນ ຊຶ່ງປະຕິບັດໄດ້ລື່ນແຜນການ ໂດຍປະຕິບັດໄດ້ 132 ເປີເຊັນ ທຽບໃສ່ແຜນການປີ ຈໍານວນ 100.000 ຕອນ.  ໄດ້ສຳເລັດການສ້າງ ແລະ ປັບປຸງນິຕິກໍາທີ່ສໍາຄັນຫຼາຍຢ່າງ ໃນຂົງເຂດທີ່ດິນ, ສິ່ງແວດລ້ອມ , ນ້ຳ, ການປ່ຽນແປງດິນຟ້າອາກາດ,  ອຸຕຸນິຍົມ ແລະ ອຸທົກກະສາດ ເປັນຕົ້ນແມ່ນ (1) ສໍາເລັດ ຮ່າງກົດໝາຍວ່າດ້ວຍທີ່ດິນ ຊຶ່ງໄດ້ຜ່ານການທາບທາມໃນກອງປະຊຸມສະພາ ແຫ່ງຊາດໃນທ້າຍເດືອນ ທັນວາ 2018 ທີ່ຜ່ານມາ ແລະ ຈະໄດ້ນໍາສະເໜີ ພິຈາລະນາຮັບຮອງໃນກອງປະຊຸມສະພາແຫ່ງຊາດ ໃນມໍ່ໆນີ້; (2) ສຳເລັດ ການສ້າງແຜນແມ່ບົດຈັດສັນທີ່ດິນແຫ່ງຊາດ; (3) ຂໍ້ຕົກລົງຂອງທ່ານນາຍົກລັດຖະມົນຕີ ໃນການຈັດຕັ້ງປະຕິບັດແຜນແມ່ບົດຈັດສັນທີ່ດິນແຫ່ງຊາດ ຊຶ່ງເປັນການ ຈັດຕັ້ງຜັນຂະຫຍາຍມະຕິຂອງຄະນະບໍລິຫານງານສູນກາງພັກ ວ່າດ້ວຍການເພີ່ມທະວີວຽກງານຄຸ້ມຄອງ ແລະ ພັດທະນາທີ່ດິນ ໃນໄລຍະໃຫມ່ທີ່ເປັນຮູບປະທໍາ ແລະ ເປັນນິຕິກໍາທີ່ສໍາຄັນ ໃນການປະກອບສ່ວນໃນການແກ້ໄຂຂໍ້ຂັດແຍ່ງຈາກທີ່ດິນ; (4) ສຳເລັດ ກົດໝາຍ ວ່າດ້ວຍ ນໍ້າ ແລະ ຊັບພະຍາກອນນໍ້າ ສະບັບປັບປຸງ ປີ 2017 ແລະ ສ້າງນິຕິກໍາໃຕ້ກົດໝາຍ ວ່າດ້ວຍ ນ້ຳ ແລະ ຊັບພະຍາກອນນ້ຳ ຈຳນວນ 6 ສະບັບ; (5) ສຳເລັດ ກົດໝາຍ ວ່າດ້ວຍ ອຸຕຸນິຍົມ ແລະ ອຸທົກກະສາດ ປີ 2018. ນອກນີ້, ກໍສຳເລັດດໍາລັດ ວ່າດ້ວຍການປະເມີນຜົນກະທົບຕໍ່ສິ່ງແວດລ້ອມ ຊຶ່ງໄດ້ປະກາດໃຊ້ໃນຕົ້ນປີ 2019,  ສໍາເລັດການປັບປຸງ ບາງມາດຕາຂອງດຳລັດວ່າດ້ວຍ ການທົດແທນຄ່າເສຍຫາຍ ແລະ ຈັດສັນຍົກຍ້າຍປະຊາຊົນ ຈາກໂຄງການພັດທະນາ ໃນປີ 2018 ຊຶ່ງເປັນນິຕິກໍາທີ່ສໍາຄັນ ໃນການກັ່ນກອງໂຄງການພັດທະນາຕ່າງໆ ແນໃສ່ຮັບປະກັນການຫລຸດຜ່ອນຜົນກະທົບ ຕໍ່ສິ່ງແວດລ້ອມ ແລະ ສັງຄົມ ແລະ ການພັດທະນາເສດຖະກິດສັງຄົມແຫ່ງຊາດ ຕາມທິດຍືນຍົງ ແລະ ສີຂຽວ ເທື່ອລະກ້າວ.

ນອກນັ້ນ, ຍັງມີຜົນສໍາເລັດ ໃນວຽກງານການຄຸ້ມຄອງ ແລະ ຕິດຕາມກວດກາສິ່ງແວດລ້ອມ ເປັນຕົ້ນ ສຳເລັດການເກັບກໍາຂໍ້ມູນ ແລະ ປະເມີນລາຍງານສະພາບ ສິ່ງແວດລ້ອມແຫ່ງຊາດ ກ່ຽວກັບ ສະພາບຂີ້ເຫຍື້ອ, ຄຸນນະພາບນໍ້າ, ຄຸນນະພາບອາກາດ, ສານເຄມີຕົກຄ້າງໃນດິນ ຈາກຂະບວນການ ກະສິກໍາ, ເນື້ອທີ່ປົກຫຸ້ມຂອງປ່າໄມ້, ການສູນເສຍຊີວະນາໆພັນ ແລະ ການປັບຕົວເຂົ້າກັບສະພາບ ການປ່ຽນແປງດິນຟ້າອາກາດ, ທາງດ້ານອຸຕຸນິຍົມ ແລະ ອຸທົກກະສາດ ກໍໄດ້ມີການປັບປຸງໃຫ້ມີຄວາມ ຊັດເຈນ ແລະ ທັນກັບສະພາບການ ພ້ອມດຽວກັນນັ້ນ ກໍ່ສ່ອງແສງໃຫ້ເຫັນຜົນງານໃນການວາງກົນໄກ ຄຸ້ມຄອງ ແລະ ຕິດຕາມກວດກາຊັບພະຍາກອນທໍາມະຊາດ ແລະ ສິ່ງແວດລ້ອມ ໃນຂະບວນການພັດທະນາເສດຖະກິດ-ສັງຄົມ ແຫ່ງຊາດ, ແຂວງ, ເມືອງ ໂດຍສະເພາະກໍ່ແມ່ນ ໃນບັນດາໂຄງການລົງທຶນ ແລະ ກິດຈະການພັດທະນາຕ່າງໆ ຕິດພັນກັບການສູ້ຊົນສ້າງວັດທະນະທໍາໃໝ່ທີ່ເຂັ້ມແຂງ ໃນຮາກຖານຂອງຕົນ ຊຶ່ງທັງໝົດນີ້ເປັນການຢັ້ງຢືນເຖິງຜົນສໍາເລັດ ໃນການຈັດຕັ້ງປະຕິບັດຂໍ້ແຂ່ງຂັນ ຮັກຊາດພັດທະນາຂອງ ຂະແຫນງຊັບພະຍາກອນທຳມະຊາດ ແລະ ສິ່ງແວດລ້ອມ ໂດຍສະເພາະ ຂະແໜງທີ່ດິນ ໃນການປະຕິບັດຄໍາຂວັນ ເຮັດໃຫ້ດີ, ເຮັດໃຫ້ໄວ, ເຮັດໃຫ້ຫຼາຍ ແລະ ເຮັດໃຫ້ຖືກ ຕ້ອງຕາມກົດໝາຍ ຊຶ່ງໄດ້ຮັບຮອງໃນກອງປະຊຸມວຽກງານທີ່ດິນທົ່ວປະເທດໃນທ້າຍ ເດືອນທັນວາ 2017 ທີ່ຜ່ານມາ.

ໄປຄຽງຄູ່ກັບຜົນສຳເລັດທີ່ຍາດມາໄດ້ນັ້ນ, ກໍຍັງມີຂໍ້ຄົງຄ້າງຫຼາຍຢ່າງທີ່ຂະແໜງຊັບພະຍາກອນ ທຳມະຊາດ ແລະ ສິ່ງແວດລ້ອມ ພວກເຮົາຕ້ອງສືບຕໍ່ເອົາໃຈໃສ່ ແລະ ອອກແຮງແກ້ໄຂຢ່າງເດັດຂາດ ເປັນຕົ້ນການແກ້ໄຂປະກົດການຫຍໍ້ທໍ້ ແລະ ບັນຫາຫາງສຽງສັງຄົມ ທີ່ຕິດພັນກັບວຽກງານ ທີດິນ,ສິ່ງແວດລ້ອມ, ນ້ຳ ລວມທັງ ການຮັບມືກັບການປ່ຽນແປງດິນຟ້າອາກາດ. ສະນັ້ນ, ກອງປະຊຸມຄັ້ງນີ້ ຈະໄດ້ສຸມໃສ່ຄົ້ນຄວ້າບັນຫາຂໍ້ຄົງຄ້າງຕ່າງໆ ໂດຍຊອກໃຫ້ໄດ້ສາເຫດຕົ້ນຕໍ ພ້ອມທັງວາງ ວິທີການ ແລະ ມາດຕະການແກ້ໄຂທີ່ເໝາະສົມ.