ໃນຕອນເຊົ້າຂອງວັນທີ 11 ມີນາ 2019, ຢູ່​ທີ່​ຫ້ອງ​ປະຊຸມ ສູນ​ຝຶກ​ອົບຮົມ ຊັບພະຍາກອນ​ທຳ​ມະ​ຊາດ ​ແລະ ສິ່ງ​ແວດ​ລ້ອມ ​ໄດ້​ຈັດ​​ໃຫ້​ມີ​ການ​ຝຶກ​ອົບຮົມ ວຽກ​ງານ​ກວດກາ​ພັກ-ລັດ ​ໃຫ້​ພະນັກງານ ລັດຖະກອນ ທີ່​​ເຮັດ​ວຽກ​ງານ​ກວດກາ​ຂອງ​ບັນດາ​ກົມ, ກອງ ພາຍ​ໃນ​ກະຊວງ ​ເຊິ່ງ​ໄດ້​ໄຂ​ຂື້ນ​ຢ່າງ​ເປັນ​ທາງ​ການ ​ໃນ​ທ່າມ​ກາງ​ບັນຍາກາດ​ທົ່ວ​ພັກ​ທົ່ວ​ກຳລັງ​ປະກອບ​ອາວຸດ ​ແລະ ທົ່ວ​ປວງ​ຊົນ​ທັງ​ຊາດ​ພວມ​ຕັ້ງໜ້າ​ຄົ້ນ​ຄວ້າ​ເຊື່ອມ​ຊືມ, ຜັນ​ຂະຫຍາຍ ​ແລະ ຈັດ​ຕັ້ງ​ປະຕິບັດ​ມະຕິ​ກອງ​ປະຊຸມ​ໃຫຍ່ ຄັ້ງ​ທີ X ຂອງ​ພັກ, ​ແຜນ​ພັດທະນາ​ເສດຖະກິດ-ສັງຄົມ​ແຫ່ງ​ລັດ 5 ປີ ຄັ້ງ​ທີ VIII ເຂົ້າສູ່ພາກຕົວຈິງຂອງ ແຕ່ລະຂະແໜງການ ແລະ ທ້ອງຖິ່ນ.

     ເປັນ​ກຽດ​ເຂົ້າ​ຮ່ວມ​​ໃນ​ພິທີ​ໄຂ​ຊຸດ​ຝຶກ​ອົບຮົມ​ຄັ້ງ​ນີ້​ໂດຍ​ມີ​ທ່ານ ບຸນ​ມີ ພຸດ​ທະ​ວົງ ຮອງ​ເລຂາ​ຄະນະ​ພັກ, ຮອງລັດຖະມົນຕີ ກະຊວງ ຊັບພະຍາກອນ​ທຳ​ມະ​ຊາດ ​ແລະ ສິ່ງ​ແວດ​ລ້ອມ, ມີຄະນະ​ກວດກາ​ສູນ​ກາງ​ພັກ, ນັກ​ວິທະຍາກອນ, ຄະນະ​ພັກ, ຄະນະ​ນຳ, ຄະນະ​ກົມ ອ້ອມ​ຂ້າງ​ກະຊວງ ​ແລະ ນັກ​ສຳ​ມະ​ນາກ​ອນ ເຂົ້າ​ຮ່ວມ.

     ຈຸດປະສົງ ຊຸດ​ຝຶກ​ອົບຮົມ ​​ຄັ້ງ​ນີ້ ​ເພື່ອ​ເປັນ​ການ​ສ້າງ​ ຄວາມ​ສາມາດ ​ໃຫ້​ພະນັກງານ ​ທີ່​ເຮັດ​ວຽກ​ງານ​ກວດກາ ​ຕະຫຼອດເຖິງ ປະທານ​ກວດກາ ​ບັນດາ​ໜ່ວຍ​ພັກ ພາຍໃນກະຊວງ ​ໃຫ້​ມີ​ຄວາມ​ຮູ້​ຄວາມ​ເຂົ້າ​ໃຈ​ຕໍ່​ວຽກ​ງານ​ກວດກາ​ພັກ-ລັດ ຢ່າງ​ເລິກ​ເຊິ່ງ, ທ່ານ ບຸນມີ ພຸດທະວົງ ໄດ້ກ່າວວ່າ: ​ໄລຍະ​ຜ່ານ​ມາ​ພາຍ​ໃຕ້​ການ​ນຳພາ​ຂອງ​ພັກ, ​ໂດຍ​ຄວາມ​ຮັບຜິດຊອບ​ຂອງ​ຄະນະ​ພັກ​ທຸກ​ຂັ້ນ​ພວກ​ເຮົາ​ສາມາດ​ບັນລຸ​ໄດ້​ບັນດາ​ຄາດໝາຍ​ທີ່​ກອງ​ປະຊຸມ​ໃຫຍ່​ຄັ້ງ​ທີ X ຂອງ​ພັກ​ວາງ​ອອກ ​ເຮັດ​ໃຫ້​ກະຊວງ​ເຮົາ​ມີ​ສະຖຽນ​ລະ​ພາບ​ທາງ​ດ້ານ​ການ​ເມືອງ​ໜັກ​ແໜ້ນ, ມີ​ຄວາມ​ສະຫງົບ ​ແລະ ​ເປັນ​ລະບຽບຮ້ຽບຮ້ອຍ, ພ້ອມ​ດຽວ​ກັນ​ນັ້ນ​ວຽກງານ​ຕິດຕາມ-ກວດກາ ​ກໍ່​ໄດ້​ສ້ອດຫ້ອຍ ​ແລະ ນຳ​ເນີນ​ໄປ​ທຸກ​ຂົງ​ເຂດ​ວຽກ​ງານ, ຄະນະ​ພັກ ​ແລະ ຄະນະ​ກວດກາ ​ໄດ້​ເອົາ​ໃຈ​ໃສ່​ຫຼາຍ​ຂື້ນ​ຕື່ມ​ຕໍ່​ວຽກ​ງານ​ກວດກາ ​ໂດຍ​ເລັ່ງ​ເຫັນ​ຄວາມ​ສຳຄັນ​ວຍກງານ​ນີ້ ​ເຊິ່ງ​ໃນ​ປີ 2013 ຈຶ່ງ​ໄດ້​ຈັດ​ຝຶກ​ອົບຮົມ​ວຽກ​ງານ​ພັກ-ລັດ ຂື້ນ​ເປັນ​ຊຸດ​ທຳ​ອິດ ​ໂດຍ​ຈັດ​ຝຶກ​ໃຫ້​ພະນັກງານ-ລັດຖະກອນ ທີ່​ເຮັດ​ວຽກ​ງານ​ກວດກາ ​ໃນ​ຂະ​ແໜງ ຊັບພະຍາກອນ​ທຳ​ມະ​ຊາດ ​ແລະ ສິ່ງ​ແວດ​ລ້ອມ ທັງ​ສູນ​ກາງ ​ແລະ ທ້ອງ​ຖິ່ນ ​ເຊິ່ງການ​ຝຶກ​ອົບຮົມ​ເປັນ​ການ​ເພີ່ມ​ທະວີ​ຄວາມ​ຮັບຜິດຊອບ​ຂອງ​ຄະນະ​ພັກ ​ແລະ ການ​ນຳ​ທຸກ​ຂັ້ນ​ຕໍ່​ການ​ແກ້​ໄຂ​ຜົນ​ຂອງ​ການ​ກວດກາ​ໃຫ້​ທັນ​ການ, ​ເຂັ້ມ​ງວດ, ສັກສິດ​ຕາມ​ກົດ​ລະບຽບຂອງ​ພັກ, ກົດໝາຍ ​ແລະ ລະບຽບ​ການ​ຕ່າງໆ​ຂອງ​ລັດ; ​ເພີ່ມ​ຄວາມ​ເອົາ​ໃຈ​ໃສ່​ຕື່ມ​ອິກ ຕໍ່​ການ​ປັບປຸງ​ກົງຈັກ​ການຈັດ​ຕັ້ງ​ຄະນະ​ກວດກາ​ພັກ​ແຕ່ລະ​ຂັ້ນ ​ແລະ ກໍ່ສ້າງ, ບຳລຸງ​ພະນັກງານ​ກວດກາ ​ໃນ​ຂະ​ແໜງ ຊັບພະຍາກອນ​ທຳ​ມະ​ຊາດ ​ແລະ ສິ່ງ​ແວດ​ລ້ອມ ພ້ອມ​ທັງ​ສ້າງ​ເງື່ອນ​ໄຂ​ໃຫ້​ພະນັກ​ງານ​ກວດກາ ​ແຕ່ລະ​ຂັ້ນ ​ປະຕິບັດ​ ພາລະ​ບົດບາດ​ຂອງ​ຕົນ​ມີ​ປະສິດທິພາບ​ສູງ​ຂື້ນ; ພັກ​ເຮົາ​ຍາມ​ໃດ​ກໍ່​ຢືນຢັນ​ວ່າ​ວຽກ​ງານ​ກວດກາ ​ແມ່ນ​ວຽກ​ໜຶ່ງ​ໃນ​ພາລະ​ບົດບາດ ​ແລະ ​ແບບ​ແຜນການ​ນຳພາ​ທີ່​ສຳຄັນ​ຂອງ​ພັກ ຕາມຄຳຂວັນທີ່ວ່າ: ບໍ່​ມີ​ການ​ກວດກາ ກໍ່​ໝາຍວ່າ​ບໍ່​ມີ​ການ​ນຳພາ, ​ໃນ​ເງື່ອນ​ໄຂ​ເສດຖະກິດ​ຕະຫຼາດ ​ແລະ ການ​ເປີດ​ກວ້າງ​ການ​ພົວພັນ​ຮ່ວມ​ມື-​ເຊື່ອ​ມ​ໂຍງ​ກັບ​​ສາກົນ​ນັ້ນ ຄະນະ​ພັກ​ແຕ່ລະ​ຂັ້ນ ຕ້ອງ​ເພີ່ມ​ທະວີ​ການ​ນຳພາ​-ຊີ້ນໍາ​ການ​ຕິດຕາມ​ກວດກາ ຂອງ​ຂັ້ນ​ເທິງ​ຕໍ່​ຂັ້ນ​ລຸ່ມ, ຂອງ​ການຈັດ​ຕັ້ງ​ຕໍ່​ບຸກຄົນ ຕາມ​ຫຼັກ​ການ​ຂອງ​ພັກ ​ແລະ ກົດໝາຍ​ຂອງ​ລັດ.

     ສະ​ນັ້ນ ​ເພື່ອ​ສ້າງ​ພະນັກງານ​ກວດກາ​ຂອງ ກະຊວງ ສາມາດ​ກາຍ​ເປັນ​ພະນັກງານ​ກວດກາ ​ອາ​ຊີ​ບ ຈຶ່ງ​ໄດ້​ຈັດ​ຝຶກ​ອົບຮົມ​ນີ້​ຂື້ນ ​ເຊິ່ງຄັ້ງ​ນີ້​ເປັນ​ການຈັດ​ຂື້ນ​ເປັນ​ຊຸດ​ທີ II ຂອງກະຊວງ ຊັບພະຍາກອນ​ທຳ​ມະ​ຊາດ ​ແລະ ສິ່ງ​ແວດ​ລ້ອມ, ຊຸດ​ຝຶກ​ອົບຮົມ​ດັ່ງກ່າວ​ນີ້ ກໍ່​ເພື່ອ​ປະກອບສ່ວນ​ເຂົ້າ​ໃນ​ການ​ປັບປຸງ​ລະບົບ​ການ​ເມືອງ ​ແລະ​ ວຽກ​ງານ​ສ້າງ​ພັກ-ພະນັກງານ​ໃຫ້​ມີ​ຄວາມ​ໜັກ​ແໜ້ນ​ເຂັ້ມ​ແຂງ​ເຮັດ​ໃຫ້​ຖັນ​ແຖວ​ພະນັກງານ, ສະມາຊິກ​ພັກ ກໍ່​ຄື​ການ​ນຳພາ​ຂອງ​ຄະນະ​ພັກ ​ແລະ ການ​ຄຸ້ມ​ຄອງ​ຂອງ​ລັດ​ໄດ້​ຮັບ​ການ​ປັບປຸງ​ດີ​ຂື້ນ​ເປັນ​ກ້າວໆ. ​ໃນ​ເງື່ອນ​ໄຂ​ທີ່​ພວກ​ເຮົາ​ມີ​ການ​ພັດທະນາ​ປະ​ເທດ​ ​ໃນ​ປັດຈຸບັນ​ຍິ່ງ​ຕ້ອງ​ເພີ່ມ​ທະວີ​ວຽກ​ງານ​ຕິດຕາມ-ກວດກາ, ສະກັດ​ກັ້ນ ​ແລະ ຕ້ານ​ການ​ສໍ້​ລາດ​ບັງ​ຫຼວງ ດ້ວຍ​ເຫດ​ນັ້ນ​ຊຸດ​ຝຶກ​ອົບຮົມ​ວຽກ​ງານ​ກວດກາ ນັກ​ສຳ​ມະ​ນາກ​ອນຈະ​ໄດ້​ຄົ້ນຄວ້າ​ຮໍ່າຮຽນ​ບັນດາ​ເອກະສານ​ວຽກ​ງານ​ກວດກາ ທີ່​ໄດ້​ອະ​ທິບາຍ​ຢ່າງ​ເປັນ​ລະບົບກ່ຽວ​ວິຊາສະ​ເພາະ​ວຽກ​ງານກວດກາ​ພັກ, ກວດກາ​ລັດ, ຕ້ານ​ການ​ສໍ້​ລາດ​ບັງ​ຫຼວງ ​ແລະ ​ແກ້​ໄຂ​ຄຳ​ຮ້ອງ-ຄຳ​ສະ​ເໜີ, ລວມທັງ​ບັນດາ​ບົດ​ສອນ​ຕ່າງໆ​, ຊຸດ​ຝຶກ​ອົບຮົມ ວຽກ​ງານ​ກວດກາ​ພັກ-ລັດ ຂອງ​ຂະ​ແໜງ ຊັບພະຍາກອນ​ທຳ​ມະ​ຊາດ ແລະ ສິ່ງ​ແວດ​ລ້ອມ ໃນ​ຄັ້ງ​ນີ້ ​ແມ່ນ​ຈະ​ໄດ້​ດຳ​ເນີນ​ໄປ​ເປັນ​ເວລາ 12 ວັນ​ເຕັມ​ຈຶ່ງ​ຈະ​ໄດ້​ອັດ​ລົງ.