ໃນຕອນເຊົ້າຂອງວັນທີ 21 ກຸມພາ 2019 ທີ່ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ຈັດໃຫ້ມີການປະກາດການຈັດຕັ້ງ ຊັບຊ້ອນຄະນະນຳຂັ້ນຫ້ອງການ ແລະ ກົມຈຳນວນໜຶ່ງ. ເປັນກຽດເຂົ້າຮ່ວມ ໃນພິທີດັ່ງກ່າວມີ ທ່ານ ສົມມາດ ພົລເສນາ ກຳມະການສູນກາງພັກ, ເລຂາຄະນະພັກກະຊວງ, ລັດຖະມົນຕີ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ. ນອກນັ້ນ ຍັງມີບັນດາຮອງລັດຖະມົນຕີ, ບັນດາເລຂາໜ່ວຍພັກ ແລະ ຕາງໜ້າແຕ່ລະກົມກອງພາຍໃນກະຊວງເຂົ້າຮ່ວມຢ່າງພ້ອມພຽງ.

ຈຸດປະສົງໃນການປະກາດການຈັດຕັ້ງໃນຄັ້ງນີ້ ແມ່ນເພື່ອຊັບຊ້ອນພະນັກງານປ່ຽນແທນຜູ້ທີ່ໄປຮັບໜ້າທີ່ ໃໝ່ ແລະ ພະນັກງານການນຳຂັ້ນເລຂາໜ່ວຍພັກ, ຂັ້ນຫ້ອງການ ແລະ ຂັ້ນກົມທີ່ພັກຜ່ອນເຂົ້າຮັບບຳນານ. ໃນພິທີ ທ່ານ ໄຊຍະເວດ ວິໄຊ ຄະນະປະຈຳພັກກະຊວງ, ຫົວໜ້າ ກົມຈັດ​ຕັ້ງ ແລະ ພະນັກງານ, ໄດ້ຂຶ້ນຜ່ານ ຂໍ້ຕົກລົງ:

  1. ອີງຕາມມະຕິຕົກລົງ ສະບັບເລກທີ 032/ອຄພ.ກຊສ, ລົງວັນທີ 21 ກຸມພາ 2019 ແລະ ຂໍ້ຕົກລົງ ສະບັບເລກທີ 0724/ກຊສ, ລົງວັນທີ 21 ກຸມພາ 2019 ເຫັນດີແຕ່ງຕັ້ງ: ທ່ານ ພູວົງ ຫຼວງໄຊຊະນະ ຫົວໜ້າ ກົມນະໂຍບາຍ ຊັບພະຍາກອນທຳມະຊາດ ແລະ ສິ່ງແວດລ້ອມ ເປັນ ວ່າການແທນ ເລຂາໜ່ວຍພັກ, ຫົວໜ້າກົມແຜນການ ແລະ ການຮ່ວມມື ປ່ຽນແທນ ທ່ານ ປອ ໄຊນະຄອນ ອິນທະວົງ ຫົວໜ້າກົມແຜນການ ແລະ ການຮ່ວມມື ຜູ້ເກົ່າ ທີ່ໄປຮັບໜ້າທີ່ໃໝ່.
  2. ອີງຕາມມະຕິຕົກລົງ ສະບັບເລກທີ 031/ອຄພ.ກຊສ, ລົງວັນທີ 21 ກຸມພາ 2019 ແລະ ຂໍ້ຕົກລົງ ສະບັບເລກທີ 0723/ກຊສ, ລົງວັນທີ 21 ກຸມພາ 2019. ເຫັນດີແຕ່ງຕັ້ງ: ທ່ານ ນາງ ບົວຄຳ ສຸລິວັນ ຮອງໜ້າກົມແຜນການ ແລະ ການຮ່ວມມື ເປັນຮັກສາການ ເລຂາໜ່ວຍພັກ, ຫົວໜ້າຫ້ອງການ ປ່ຽນແທນ ທ່ານ ຄຳພັນ ນັນທະວົງ ຫົວໜ້າຫ້ອງການຜູ້ເກົ່າ ທີ່ພັກຜ່ອນເຂົ້າ ບຳນານ.
  3. ອີງຕາມຂໍ້ຕົກລົງ ສະບັບເລກທີ 0722/ກຊສ, ລົງວັນທີ 21 ກຸມພາ 2019. ເຫັນດີແຕ່ງຕັ້ງ: ທ່ານ ນາງ ພັກກາວັນ ພິດສະໄໝ ຮອງຫົວໜ້າ ກົມນະໂຍບາຍ ຊັບພະຍາກອນທຳມະຊາດ ແລະ ສິ່ງແວດລ້ອມ ຂຶ້ນເປັນຮັກສາການ ຫົວໜ້າ ກົມນະໂຍບາຍ ຊັບພະຍາກອນທຳມະຊາດ ແລະ ສິ່ງແວດລ້ອມ ປ່ຽນແທນຜູ້ເກົ່າ ທີ່ໄປຮັບໜ້າທີ່ໃໝ່.

ໃນໂອກາດນີ້ ທ່ານ ເລຂາພັກ, ລັດຖະມົນຕີ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ ກໍໄດ້ສະແດງຄວາມຊົມເຊີຍ ພ້ອມທັງ ຮຽກຮ້ອງໃຫ້ບັນດາທ່ານຜູ້ທີ່ໄດ້ຮັບໜ້າທີ່ໃໝ່ ຈົ່ງເອົາໃຈໃສ່ປະຕິບັດໜ້າທີ່ ວຽກງານ, ສືບຕໍ່ປະຕິບັດໜ້າທີ່ການເມືອງ ແລະ ຍົກສູງຄວາມຮັບຜິດຊອບ ຂອງຕົນຕາມທີ່ຂັ້ນເທິງກໍຄືການຈັດຕັ້ງ ມອບໝາຍໃຫ້ໄດ້ຮັບຜົນດີ ແລະ ໃຫ້ມີຜົນສຳເລັດຍິ່ງໆຂຶ້ນ.

 

                             ທ່ານ ຄຳພັນ ນັນທະວົງ                                                               ທ່ານ ພູວົງ ຫຼວງໄຊຊະນະ

                           ຫົວໜ້າຫ້ອງການ (ຜູ້ເກົ່າ)                                                    ວ່າການ ຫົວໜ້າ ກົມແຜນການ ແລະ ການຮ່ວມມື

                      ທ່ານ ນ. ບົວຄຳ ສຸລິວັນ                                                                   ທ່ານ ນ. ພັກກາວັນ ພິດສະໄໝ

                  ຮັກສາການ ຫົວໜ້າ ຫ້ອງການ                                   ຮັກສາການ ຫົວໜ້າກົມນະໂຍບາຍຊັບພະຍາກອນທຳມະຊາດ ແລະ ສິ່ງແວດລ້ອມ