ໃນຕອນເຊົ້າຂອງວັນທີ 18 ກຸມພາ 2019, ຢູ່​ທີ່​ຫ້ອງ​ປະຊຸມ ສູນ​ຝຶກ​ອົບຮົມ ຊັບພະຍາກອນ​ທຳ​ມະ​ຊາດ ​ແລະ ສິ່ງ​ແວດ​ລ້ອມ ​ໄດ້​ຈັດ​​ໃຫ້​ມີ​ການ​ຝຶກ​ອົບຮົມ ສ້າງ​ຄວາມ​ເຂັ້ມ​ແຂງ​ໃຫ້​ແກ່​ພະນັກງານ ວິຊາ​ການ ທີ່​ເປັນ​ຄູ​ຝຶກ ຂອງ​ຂະ​ແໜງ ຊັບພະຍາກອນ​ທຳ​ມະ​ຊາດ ​ແລະ ສິ່ງ​ແວດ​ລ້ອມ ທ້ອງ​ຖິ່ນ ຂັ້ນ​ແຂວງ ​ໃນ 18 ​ແຂວງ ທົ່ວ​ປະ​ເທດ.

​ເປັນ​ກຽດ​ເຂົ້າ​ຮ່ວມ​​ໃນ​ພິທີ​ໄຂ​ຊຸດ​ຝຶກ​ອົບຮົມ​ຄັ້ງ​ນີ້ ​ໂດຍ​ມີ​ທ່ານ ຈັນ​ສຸກ ມຸກດາ​ວັນ, ຮອງ​ຫົວໜ້າ​ກົມ​ຈັດ​ຕັ້ງ ​ແລະ ພະນັກງານ ກຊສ, ນອກ​ນັ້ນ​ຍັງ​ມີ​ທ່ານ ລັດດາ​ພອນ ສີສະ​ອາດ ຮອງ​ສູນ​ຝຶກ​ອົບຮົມ​ຊສ, ພ້ອມ​ດ້ວຍ​ນັກ​ວິທະຍາກອນ​ຈາກ ກະຊວງ ພາຍ​ໃນ ​ແລະ ນັກ​ຝຶກ​ອົບຮົມ ຈາກ 18 ​ແຂວງ ທົ່ວ​ປະ​ເທດ​ເຂົ້າ​ຮ່ວມ.

ຈຸດປະສົງ​ຊຸດ​ຝຶກ​ອົບຮົມ​​ຄັ້ງ​ນີ້ ກໍ່​ເພື່ອ​ຍົກ​ລະດັບ​ຄວາມ​ຮູ້ ສ້າງ​ຄວາມ​ເຂັ້ມ​ແຂງ ​ໃຫ້​ແກ່​ພະນັກງານ​ວິຊາ​ການ ທີ່​ເປັນ​ຄູ​ຝຶກ​ຢູ່​ທ້ອງ​ຖິ່ນ ຂັ້ນ​ແຂວງ ​ໃຫ້​ມີ​ຄວາມ​ເຂັ້ມ​ແຂງ, ມີ​ຄວາມ​ຮູ້​ຄວາມ​ສາມາດ, ມີ​ຄວາມ​ຊຳນິ​ຊຳນານ ​ແລະ ທັງ​ເປັນ​ການ​ເພີ່ມ​ທັກ​ສະ, ​ໃນ​ການ​ເປັນ​ຄູ​ຝຶກ​ທີ່​ດີ, ​ໂດຍ​ສະ​ເພາະ​ແມ່ນ​ຮຽນ​ຮູ້​ທາງ​ດ້ານ​ທິດ​ສະ​ດີ, ຫຼັກການ, ວິທີ​ການ ​ແລະ ຂັ້ນ​ຕອນ​ຕ່າງໆ ​ໃນ​ການ​ດຳ​ເນີນ​ການ​ຝຶກ​ອົບຮົມ, ການ​ເປັນ​ຄູ​ຝຶກ ຫຼື ວິທະຍາກອນ​ນັ້ນ ​ໃຜໆ​ກໍ່​ເປັນ​ໄດ້, ​ແຕ່​ການຈະ​ເປັນ​ຄູ​ຝຶກ ຫຼື ນັກ​ປາຖະກະຖາ​ທີ່​ດີ ອາດ​ຈະ​ບໍ່​ງາຍພໍ​ປານ​ໃດ.

​ໃນ​ການ​ຝຶກ​ຊຸດ​ນີ້ ນັກ​ຝຶກ​ອົບຮົມ​ຈະ​ໄດ້​ຮຽນ​ຮູ້​ກ່ຽວ​ກັບ​ບົດບາດ​ຂອງ​ນັກ​ວິທະຍາກອນ, ການ​ຮຽນຮູ້​ແບບ​ຜູ້​ໃຫຍ່ ການ​ສ້າງ​ຄວາມ​ເຊື່ອ​ໝັ້ນສຳລັບ​ນັກ​ວິທະຍາກອນ, ​ເຕັກນິກ​ການ​ຝຶກ​ອົບຮົມ ລວມ​ໄປ​ເຖິງ​ການ​ກະກຽມ​ການ​ຝຶກ​ອົບຮົມ ​ແລະ ຫ້ອງ​ປະຊຸມ, ຫຼັກການ​ໃນ​ການ​ເວົ້າ-ການ​ຟັງ ​ແລະ ການ​ຝຶກ​ພາກ​ປະຕິບັດ​ຕົວ​ຈິງ.

ມາ​ຮອດ​ປະຈຸ​ບັນ​ໂລກ​ເຮົາ​ມີ​ການ​ປ່ຽນ​ແປງ ​ການ​ພັດທະນາ​ ທາງ​ດ້ານ​ເຕັກ​ໂນ​ໂລ​ຊີ​ຢ່າງ​ວ່ອງ​ໄວ ສະ​ນັ້ນ​ເພື່ອ​ຕອບ​ສະໜອງ ​ແລະ ກຽມ​ຄວາມ​ພ້ອມ​ໃນ​ການ​ຮັບ​ມື ຕໍ່​ບັນຫາ​ດັ່ງກ່າວ ​ໃຫ້​ທັນ​ກັບ​ສະພາບ​ການ ​ໃນ​ປະຈຸ​ບັນ ​ແມ່ນ​ຍິ່ງ​ມີ​ຄວາມ​ຈຳ​ເປັນ ຕ້ອງ​ໄດ້​ສ້າງ ​ແລະ ພັດທະນາ ບຸກຄະລາ​ກອນ ​ໃຫ້​ມີ​ຄວາມ​ຮູ້​ຄວາມ​ສາມາດ​ທີ່​ແນ່ນອນ ທາງ​ດ້ານ​ປະລິມານ ​ແລະ ຄຸນ​ນະພາ​ບ ທັງ​ນີ້​ກໍ່​ເພື່ອ​ເຮັດ​ໃຫ້ ວຽກ​ງານ​ຝຶກ​ອົບຮົມ ​ໃນ​ຂະ​ແໜງ ຊັບພະຍາກອນ​ທຳ​ມະ​ຊາດ ​ແລະ ສິ່ງ​ແວດ​ລ້ອມ ​ສູນ​ກາງ ຮອດ​ທ້ອງ​ຖິ່ນ​ໃຫ້​ໄດ້​ຮັບ​ການ​ພັດທະນາ​ຄວາມ​ອາດ​ສາມາດ ​ໃນ​ການ​ນຳ​ໃຊ້​ເຕັກນິກ ​ແລະ ວິທີ​ການສິດສອນ​ຕ່າງໆ ຢ່າງ​ມີ​ປະສິດທິພາບ ​ແລະ ປະສິດທິ​ຜົນຍິ່ງໆ​ຂື້ນ ຊຸດ​ຝຶກ​ອົບຮົມ ​ໃນ​ຫົວ​ຂໍ້​ເປັນ​ຄູ​ຝຶກ​ທີ່​ດີ ​ໃນ​ຄັ້ງ​ນີ້ ​ແມ່ນ​ຈະ​ໄດ້​ດຳ​ເນີນ​ໄປ​ເປັນ​ເວລາ 5 ວັນ​ເຕັມ​ຈຶ່ງ​ຈະ​ໄດ້​ອັດ​ລົງ.