ພະແນກ ຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ຈັດພິທີ ປະກາດການແຕ່ງຕັ້ງຮອງຫົວໜ້າ ພະແນກ ຊັບພະຍາກອນທຳມະຊາດ ແລະ ສິ່ງແວດລ້ອມ ຂຶ້ນໃນວັນທີ 15 ກຸມພາ 2019 ທີ່ຫ້ອງປະຊຸມ ພຊສ ນະຄອນຫຼວງ​ວຽງຈັນ. ໂດຍເປັນກຽດເຂົ້າຮ່ວມຂອງ ທ່ານ ​ແກ້ວ​ພິລາ​ວັນ ອາ​ໄພ​ລາດ ຮອງ​ເລຂາ​ຄະນະ​ພັກ, ຮອງ​ເຈົ້າ​ຄອງ​ນະຄອນຫຼວງ​ວຽງ​ຈັນ, ມີຮອງ​ຫົວໜ້າ​ກົມ ຈັດ​ຕັ້ງ ​ແລະ ພະນັກງານ ກຊສ, ຮອງ​ຫົວໜ້າ​ຄະນະ​ຈັດ​ຕັ້ງ ນະຄອນຫຼວງ, ຄະນະ​ບໍລິຫານ​ງານ​ພັກ​ນະຄອນຫຼວງ ຫົວໜ້າ​ພະ​ແນ​ກ ຊສ ນະຄອນຫຼວງ​ວຽງ​ຈັນ, ທ່ານ​ເຈົ້າ​ເມືອງ, ຮອງ​ເຈົ້າ​ເມືອງ, ຄະນະ​ພັກ​ຮາກ​ຖານ, ຄະນະ​ພະ​ແນ​ກ ຊສ ນະຄອນຫຼວງ, ຫົວໜ້າ​ຂະ​ແໜງ, ຫົວໜ້າ​ຫ້ອງການ ຊສ, ຮອງ​ຫົວໜ້າ ຫ້ອງການ ຊັບພະຍາກອນທຳມະຊາດ ແລະ ສິ່ງແວດລ້ອມ 9 ຕົວ​ເມືອງ​ເຂົ້າ​ຮ່ວມ.

   

 

      ໃນພິທີ ທ່ານ ​ແສງ​ພອນ ສຸວັນ​ນີ ຮອງຫົວໜ້າ ຄະນະ​ຈັດ​ຕັ້ງ ນະຄອນຫຼວງ​ວຽງ​ຈັນ, ໄດ້ຂຶ້ນຜ່ານ  ຂໍ້ຕົກລົງສະບັບເລກທີ 0095/ຈນວ, ລົງວັນທີ 24 ມັງກອນ 2019. ວ່າດ້ວຍການແຕ່ງຕັ້ງ ຮອງຫົວໜ້າ ພະແນກ ຊັບພະຍາກອນທຳມະຊາດ ແລະ ສິ່ງແວດລ້ອມ ນະຄອນຫຼວງ​ວຽງ​ຈັນ ໂດຍອີງໃສ່ຄວາມຮຽກຮ້ອງຕ້ອງການ ຂອງໜ້າທີ່ວຽກງານ ຢູ່ ພະແນກ ຊສ ນະ​ຄອນ​ຫຼວງ​ວຽງ​ຈັນ ເພື່ອຮັບປະກັນໃນການເຄື່ອນໄຫວ ປະຕິບັດຕາມພາລະບົດບາດ, ໜ້າທີ່ ທີ່ພັກ-ລັດ ມອບໝາຍໃຫ້ ໂດຍສະເພາະແມ່ນການປັບປຸງວຽກງານ ຂອງ​ພະ​ແນ​ກ ຊສ ນະ​ຄອນ​ຫຼວງ ໃຫ້ມີແບບແຜນ ແລະ ທັນສະໄໝຍິ່ງຂຶ້ນ ໂດຍໄດ້ແຕ່ງຕັ້ງ ທ່ານ ຄໍາ​ຕັນ ​ແກ້ວ​ຫາ​ວົງ ກໍາມະການ​ພັກ​ເມືອງ, ຫົວໜ້າ​ ຫ້ອງການ ຊັບພະຍາກອນ​ທຳ​ມະ​ຊາດ ​ແລະ ສິ່ງ​ແວດ​ລ້ອມ ​ເມືອງ ນາ​ຊາຍ​ທອງ, ເປັນຮອງຫົວໜ້າ ພະ​ແນ​ກ ຊັບພະຍາກອນທຳມະຊາດ ແລະ ສິ່ງແວດລ້ອມ ນະ​ຄອນ​ຫຼວງ​ວຽງ​ຈັນ.

 

ໃນໂອກາດດັ່ງກ່າວ, ທ່ານ ຮອງ​ເລຂາ​ຄະນະ​ພັກ, ຮອງ​ເຈົ້າ​ຄອງ​ນະຄອນຫຼວງ​ວຽງ​ຈັນ ກໍໄດ້ສະແດງຄວາມຊົມເຊີຍພ້ອມກັບເນັ້ນໜັກໃຫ້ ທ່ານຮອງ ພ​ະ​ແນ​ກ ຄົນໃໝ່ ຈົ່ງສືບຕໍ່ປະຕິບັດໜ້າທີ່ການເມືອງ ແລະ ຍົກສູງຄວາມຮັບຜິດຊອບຂອງຕົນຕາມທີ່ ພັກ-ລັດ ມອບໝາຍໃຫ້ໄດ້ຮັບຜົນດີ. ໂດຍສະເພາະ ແມ່ນການຍົກສູງ ຄວາມຮັບຜິດຊອບໃນການຮັບໃຊ້ຊາດ, ຮັບໃຊ້ປະຊາຊົນ ເວົ້າລວມ, ເວົ້າສະເພາະແມ່ນການປະກອບສ່ວນເຂົ້າໃນການຈັດຕັ້ງ ປະຕິບັດວຽກງານຂອງ ຂະແໜງ ຊັບພະຍາກອນ​ທໍາ​ມະ​ຊາດ ​ແລະ ສິ່ງ​ແວດ​ລ້ອມ  ໃຫ້ສຳເລັດຕາມລະດັບຄາດໝາຍທີ່ວາງໄວ້.

 

 

   ຈາກ​ນັ້ນ ທ່ານ ຄໍາ​ຕັນ ​ແກ້ວ​ຫາ​ວົງ ໄດ້ຂຶ້ນກ່າວຮັບຄຳໂອວາດ ເຊິ່ງໄດ້ສະແດງຄວາມຮູ້ບຸນຄຸນ, ສະແດງຄວາມຂອບໃຈຕໍ່ການນຳພັກ-ລັດ ແລະ ພະນັກງານພາຍໃນກົມ ທີ່ໄດ້ໃຫ້ການສະໜັບສະໜູນ, ໃຫ້ໂອກາດໃນການຮຽນຮູ້ ເຝິກຝົນຫຼໍ່ຫຼອມຕົນເອງ ແລະ ໃຫ້ການຮ່ວມມື ໃນການປະຕິບັດໜ້າທີ່ວຽກງານ ດ້ວຍດີສະເໝີມາ. ຄຽງຄູ່ກັນນັ້ນກໍຈະສືບຕໍ່ ທຸ້ມເທ ສະຕິປັນຍາ, ຄວາມຮູ້, ຄວາມສາມາດ, ເຫື່ອແຮງຂອງຕົນ ເຂົ້າໃນການປະຕິບັດໜ້າທີ່ ວຽກງານທີ່ຂັ້ນເທິງໄດ້ມອບໝາຍໃຫ້ ດ້ວຍຄວາມຮັບຜິດຊອບສູງ ແລະ ມີຜົນສຳເລັດເປັນກ້າວໆ.