ໃນຕອນເຊົ້້າຂອງວັນທີ 10 ມັງກອນ 2019 ຜ່ານມານີ້ ພະແນກ ຊັບພະຍາກອນທຳມະຊາດ ແລະ ສິ່ງແວດລ້ອມ ແຂວງຫຼວງນ້ຳທາ ໄດ້ຈັດກອງປະຊຸມສະຫຼຸບ ການເຄື່ອນໄຫວຈັດຕັ້ງປະຕິບັດວຽກງານປະຈຳປີ 2018 ແລະ ທິດທາງແຜນການປະຈຳປີ 2019, ຢູ່ທີ່ຫ້ອງປະຊຸມຂອງ ພະແນກຊັບພະຍາກອນທຳມະຊາດ ແລະ ສິ່ງແວດລ້ອມ, ໃຫ້ກຽດເປັນປະທານກອງປະຊຸມໂດຍ ທ່ານ ຮສ ປອ ຄຳເຫຼັກ ໄຊດາລາ ກຳມະການພັກແຂວງ, ເລຂາຄະນະພັກຮາກຖານ, ຫົວໜ້າ ພະແນກຊັບພະຍາກອນທຳມະຊາດ ແລະ ສິ່ງແວດລ້ອມ; ເປັນກຽດເຂົ້າຮ່ວມກອງປະຊຸມຄັ້ງນີ້ມີ ທ່ານ ສົມມາດ ພົລເສນາ ກຳມະການສູນກາງພັກ, ລັດຖະມົນຕີ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ, ມີຫົວໜ້າກົມ, ຮອງຫົວໜ້າກົມ ຈາກ ກະຊວງ ຊັບພະຍາກອນທຳມະຊາດ ແລະສິ່ງແວດລ້ອມ, ມີຮອງຫົວໜ້າ ພຊສ, ຫົວໜ້າຫ້ອງການ, ຮອງຫົວໜ້າຫ້ອງການ ຊັບພະຍາກອນ ທຳມະຊາດ ແລະ ສິ່ງແວດລ້ອມ 5 ເມືອງ ພາຍໃນແຂວງຫຼວງນ້ຳທາ ຕະຫຼອດຮອດບັນດາຫົວໜ້າຂະແໜງ, ຮອງຂະແໜງ ພາຍໃນ ພຊສ ເຂົ້າຮ່ວມ ທັງໝົດ 48 ທ່ານ, ຍິງ 5 ທ່ານ.

ໃນກອງປະຊຸມ ທ່ານ ກົງທອງ ແອເຫຼັກ ຄະນະພັກຮາກຖານ ພຊສ, ຫົວໜ້າ ຂະແໜງແຜນການ, ສະຖິຕິ ແລະ ຂໍ້ມູນ-ຂ່າວສານ ພຊສ ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດວຽກງານວິຊາການປະຈຳປີ 2018 ແລະ ທິດທາງແຜນການປະຈຳປີ 2019 ໂດຍທ່ານໄດ້ລາຍງານໃຫ້ຮູ້ກ່ຽວກັບ ໂຄງປະກອບ ການຈັດຕັ້ງຂອງ ພະແນກ ຊັບພະຍາກອນທຳມະຊາດ ແລະ ສິ່ງແວດລ້ອມ ແຂວງຫຼວງນ້ຳທາ, ການປະຕິບັດ ໜ້າວຽກວິຊາສະເພາະ ຂອງພະນັກງານພາຍໃນ, ການພົວພັນຮ່ວມມືກັບຕ່າງປະເທດ ທາງດ້ານການອະນຸລັກ ຊັບພະຍາກອນ ທຳມະຊາດ ແລະ ສິ່ງແວດລ້ອມ ໃນໄລຍະຜ່ານມາ. ສຸດທ້າຍກໍໄດ້ລາຍງານກ່ຽວກັບ ຜົນສຳເລັດ, ຄາດໝາຍສູ່ຊົນ ແລະ ທິດທາງແຜນການທີ່ຈະດຳເນີນການໃນຕໍ່ໜ້າ.