ໃນວັນທີ 23-25 ມັງກອນ 2019 ທ່ານ ນາງ ບຸນຄຳ ວໍລະຈິດ ຮອງລັດຖະມົນຕີ ກຊສ ພ້ອມດ້ວຍທ່ານຮອງຫົວໜ້າຫ້ອງການ, ຮອງຫົວໜ້າກົມທີ່ດິນ, ກົມກວດກາ, ກົມນະໂຍບາຍ ຊສ, ກອງຕິດຕາມກວດກາ ຊສ ແລະ ຜູ້ຕິດຕາມ ທັງໝົດ 9 ທ່ານ ໄດ້ໄປເຄື່ອນໄຫວຢູ່ແຂວງບໍ່ແກ້ວ. ຈຸດປະສົງຂອງການໄປເຄື່ອນໄຫວ ຄັ້ງນີ້ ແມ່ນເພື່ອເຂົ້າຮ່ວມງານເທດສະການດອກງິ້ວບານ ແລະ ປີທ່ອງທ່ຽວລາວ-ຈີນ 2019 ທີ່ດອນຊາວ, ເຂດເສດຖະກິດພິເສດ ສາມຫຼ່ຽມຄຳ, ເມືອງຕົ້ນເຜິ້ງ ແຂວງບໍ່ແກ້ວ ແລະ ເພື່ອໄປຢ້ຽມຢາມ ພຊສ ແຂວງບໍ່ແກ້ວ ແລະ ໂຄງການກໍ່ສ້າງເຂື່ອນໄຟຟ້າ ນ້ຳທາ 1.

ໃນວັນທີ 23 ມັງກອນ 2019 ທ່ານ ນາງ ບຸນຄຳ ວໍລະຈິດ ຕາງໜ້າ ກຊສ ໄດ້ເຂົ້າຮ່ວມຕັດແຖບຜ້າໃນພິທີເປີດຢ່າງເປັນທາງການ ຂອງງານເທດສະການດອກງິ້ວບານ ປະຈຳປີ 2019, ໄດ້ຮ່ວມຊົມລາຍການສະແດງສິລະປະວັນນະຄະດີ 4 ປະເທດ (ລາວ, ຈີນ, ໄທ ແລະ ມຽນມາ) ແລະ ຊົມການປະກວດນາງສາວດອກງິ້ວບານ ຢູ່ທີ່ດອນຊາວ, ເຂດເສດຖະກິດພິເສດສາມຫຼ່ຽມຄຳ.

ໃນວັນທີ 24 ມັງກອນ 2019 ທ່ານ ນາງ ບຸນຄຳ ວໍລະຈິດ ພ້ອມດ້ວຍຄະນະ ໄດ້ເດີນທາງໄປຢ້ຽມຢາມເຂດຍົກຍ້າຍຈັດສັນຂອງໂຄງການກໍ່ສ້າງເຂື່ອນໄຟຟ້ານ້ຳທາ 1 ທີ່ບ້ານ ຫາດໝວກ ເມືອງຜາອຸດົມ ແຂວງບໍ່ແກ້ວ, ໄດ້ຮັບຟັງການລາຍງານຂອງອົງການປົກຄອງທ້ອງຖິ່ນ ກ່ຽວກັບ ສະພາບການດຳລົງຊີວິດຂອງປະຊາຊົນ  ພາຍຫຼັງ ທີ່ໄດ້ຖືກຍົກຍ້າຍມາໂຮມກັນຢູ່ເຂດຈັດສັນ ບ້ານຫາດໝວກ, ເຊິ່ງທ່ານ ຮອງລັດຖະມົນຕີ ກໍໄດ້ຊີ້ນຳໃຫ້ອົງການປົກຄອງທ້ອງຖິ່ນ ແລະ ບໍລິສັດ ຮ່ວມກັນຊຸກຍູ້ ໃນການພັດທະນາຊີວິດການເປັນຢູ່ຂອງປະຊາຊົນໃຫ້ດີຂຶ້ນ ເປັນຕົ້ນ ການສ້າງສະຫະກອນ, ກຸ່ມຜະລິດຕະພັນ ທີ່ເປັນຈຸດພິເສດຂອງທ້ອງຖິ່ນ ເພື່ດຂາຍເປັນສິນຄ້າ ແລະ ອາດກ້າວໄປເຖິງການພັດທະນາເປັນເຂດທ່ອງທ່ຽວທຳມະຊາດ. ນອກຈາກນັ້ນ ທາງແຂວງບໍ່ແກ້ວ ກໍໄດ້ປະກອບສ່ວນມອບເຄື່ອງໃຊ້ທີ່ຈຳເປັນ ເປັນຕົ້ນ ເຄື່ອງນຸ່ງຫົ່ມ, ອຸປະກອນການຮຽນ ແລະ ເຄື່ອງແຫ້ງຈຳນວນໜຶ່ງ ເພື່ອຊ່ວຍຊຸກຍູ້ໃຫ້ປະຊາຊົນເຂດດັ່ງກ່າວ.

ໃນຕອນບ່າຍຂອງວັນດຽວກັນ ທ່ານ ນາງ ບຸນຄຳ ວໍລະຈິດ ພ້ອມດ້ວຍຄະນະ ໄດ້ເດີນທາງໄປຢ້ຽມຢາມເຂດກໍ່ສ້າງຂອງເຂື່ອນໄຟຟ້ານ້ຳທາ 1, ໄດ້ຮັບຟັງການລາຍງານ ຂອງຜູ້ຕາງໜ້າໂຄງການ ກ່ຽວກັບ ລາຍລະອຽດໂດຍຫຍໍ້ ຂອງໂຄງການ ແລະ ທ່ານ ຮອງລັດຖະມົນຕີ ໄດ້ຊີ້ນຳໃຫ້ບໍລິສັດເອົາໃຈໃສ່ໃນການຟື້ນຟູຊີວິດການເປັນຢູ່ ຂອງປະຊາຊົນ ຕາມແຜນທີ່ໄດ້ກຳນົດໄວ້ ໂດຍໃຫ້ຮ່ວມມືກັບທ້ອງຖິ່ນເພື່ອໃຫ້ສຳເລັດໂດຍໄວ, ໃຫ້ເອົາໃຈໃສ່ໃນດ້ານຄວາມປອດໄພຂອງເຂື່ອນ ແລະ ກຽມພ້ອມຮັບມື ຕໍ່ເຫດການຕ່າງໆທີ່ອາດຈະເກີດຂຶ້ນ ເປັນຕົ້ນ ເຂື່ອນແຕກ ທີ່ຈະສົ່ງຜົນກະທົບໂດຍກົງຕໍ່ປະຊາຊົນເຂດລຸ່ມເຂື່ອນ, ເອົາໃຈໃສ່ດ້ານເຕັກນິກ ການແຈ້ງເຕືອນໄພ, ການຝຶກ ອົບຮົມ ແລະ ໄດ້ສະເໜີໃຫ້ບໍລິສັດ ເຜີຍແຜ່ຂໍ້ມູນຂ່າວສານຜ່ານເວບໄຊ ແລະ ສື່ອອນລາຍຕ່າງໆ.

ໃນວັນທີ 25 ມັງກອນ 2019 ຢູ່ຫ້ອງປະຊຸມຂອງ ພຊສ ແຂວງບໍ່ແກ້ວ ໄດ້ມີການຈັດກອງປະຊຸມ ເພື່ອຮັບຟັງການລາຍງານ ການຈັດຕັ້ງປະຕິບັດວຽກງານ ຂອງຂະແໜງ ຊັບພະຍາກອນທຳມະຊາດ ແລະ ສິ່ງແວດລ້ອມ ຂອງແຂວງບໍ່ແກ້ວ ໂດຍການເປັນປະທານຂອງ ທ່ານ ນາງ ບຸນຄຳ ວໍລະຈິດ ຮອງລັດຖະມົນຕີ ກຊສ ແລະ ທ່ານ ຄຳໝັ້ນ ຈັນທະລິດ ຫົວໜ້າ ພຊສ ແຂວງບໍ່ແກ້ວ ແລະ ການເຂົ້າຮ່ວມຂອງຄະນະຕິດຕາມຈາກສູນກາງ, ບັນດາທ່ານຮອງຫົວໜ້າພະແນກ ຊສ, ຫົວໜ້າ ແລະ ຮອງຫົວໜ້າ ຫຊສ ທັງ 5 ເມືອງ (ເມືອງ ຫ້ວຍຊາຍ, ເມືອງ ຕົ້ນເຜິ້ງ, ເມືອງ ເມິງ, ເມືອງ ຜາອຸດົມ ແລະ ເມືອງ ປາກທາ) ແລະ ວິຊາການກ່ຽວຂ້ອງ ທັງໝົດປະມານ 60 ທ່ານ. ພາຍຫຼັງໄດ້ຮັບຟັງການລາຍງານ, ທ່ານ ຮອງລັດຖະມົນຕີ ພ້ອມດ້ວຍທ່ານຮອງຫົວໜ້າຫ້ອງການ, ກົມກອງ ຈາກສູນກາງ ກໍໄດ້ໂອ້ລົມ ແລະ ໃຫ້ທິດຊີ້ນຳໃນການຈັດຕັ້ງປະຕິບັດວຽກງານ ກ່ຽວກັບ ທີ່ດິນ, ສິ່ງແວດລ້ອມ, ວຽກງານກວດກາ, ວຽກງານສົ່ງເສີມຄວາມກ້າວໜ້າຂອງແມ່ຍິງ, ວຽກງານ ສາມສ້າງ ແລະ ອື່ນໆ.