ໃນຕອນເຊົ້າຂອງວັນທີ 28 ທັນວາ 2018 ຫ້ອງການ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ຈັດກອງປະຊຸມ ສະຫຼຸບ ວຽກງານ ປະຈໍາປີ 2018 ແລະ ທິດທາງແຜນການ ປະຈໍາປີ 2019 ຂອງຫ້ອງການ ຂຶ້ນ ທີ່ ຫ້ອງປະຊຸມ ຫ້ອງການ ກຊສ, ໂດຍພາຍໃຕ້ ການເປັນປະທານຂອງທ່ານ ຄຳພັນ ນັນທະວົງ, ຫົວໜ້າຫ້ອງການ ແລະ ເປັນກຽດເຂົ້າຮ່ວມ ຂອງທ່ານ ສົມມາດ ພົລເສນາ ລັດຖະມົນຕີ ກະຊວງ ຊັບພະຍາກອນທໍາມະຊາດ ແລະ ສິ່ງແວດລ້ອມ, ມີບັນດາທ່ານ ຄະນະຫ້ອງການ, ບັນດາ ຜູ້ຕາງໜ້າກົມ, ກອງ ອ້ອມຂ້າງ ກຊສ, ຫົວໜ້າພະແນກ ພ້ອມດ້ວຍ ພະນັກງານ ພາຍໃນ ຫ້ອງການເຂົ້າຮ່ວມ.

ໃນພິທີທ່ານ ບຸນເນື່ອງ ນຸດປາທອງ, ຮອງຫົວໜ້າຫ້ອງການ, ກໍ່ໄດ້ຂຶ້ນຜ່ານ ບົດສະຫຼຸບວຽກງານ ປະຈໍາປີ 2018 ແລະ ທິດທາງ ແຜນການ ປະຈໍາປີ 2019 ຂອງຫ້ອງການ ແລະ ທ່ານ ສີສະເຫວີຍ ຈິດຕະສຸພາ, ຫົວໜ້າ ພະແນກ ສົ່ງເສີມຄວາມກ້າວໜ້າຂອງແມ່ຍິງ ແລະ ແມ່-ເດັກ, ຫ້ອງການ ໄດ້ຂຶ້ນຜ່ານ ຂໍ້ຕົກລົງ ວ່າດ້ວຍການຍ້ອງຍໍ ແລະ ຊົມເຊີຍ ພະນັກງານ ລັດຖະກອນ ຫ້ອງການ ກຊສ ປະຈຳປີ 2018, ຈາກນັ້ນກໍເປັນພິທີມອບໃບຍ້ອງຍໍ ໃບຊົມເຊີຍ ຜົນງານ ຂອງພະນັກງານທີ່ໄດ້ປະກອບສ່ວນທາງດ້ານ ເຫື່ອແຮງ ແລະ ສະຕິປັນຍາ ເຂົ້າໃນ ການເຄື່ອນໄຫວປະຕິບັດໜ້າທີ່ວຽກງານວິຊາສະເພາະ ຕະຫຼອດໄລຍະ 1 ປີ ຜ່ານມາ ເຊິ່ງໃຫ້ກຽດຂຶ້ນມອບ ໃບຍ້ອງຍໍ ໃຫ້ພະນັກງານ 27 ທ່ານ ໂດຍທ່ານ ຄຳພັນ ນັນທະວົງ, ຫົວໜ້າຫ້ອງການ ແລະ ມອບໃບຊົມເຊີຍ ໃຫ້ພະນັກງານ 10 ທ່ານ ໂດຍທ່ານ ບຸນເນື່ອງ ນຸດປາທອງ, ຮອງຫົວໜ້າ ຫ້ອງການ.

ທ້າຍກອງປະຊຸມ ທ່ານ ສົມມາດ ພົລເສນາ ລັດຖະມົນຕີ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ ກໍໄດ້ຂຶ້ນໂອ້ລົມ ແລະ ຊີ້ທິດເຍືອງທາງ ໃຫ້ແກ່ພະນັກງານຫ້ອງການ ໃນການປະຕິບັດໜ້າທີ່ວຽກງານໃນຕໍ່ໜ້າໃຫ້ມີຜົນສໍາເລັດ ແລະ ຍິ່ງໃຫຍ່ກວ່າເກົ່າ.