ໃນ​ວັນ​ທີ 18 ທັນວາ 2018 ຢູ່ທີ່ຫ້ອງປະຊຸມ ສະພາແຫ່ງຊາດ, ທ່ານ ສົມ​ມາດ ພົລ​ເສນາ ລັດຖະມົນຕີ​ ກະຊວງ​ ຊັບພະຍາກອນ​ທຳ​ມະ​ຊາດ ​ແລະ ສິ່ງ​ແວດ​ລ້ອມ ​ໄດ້​ສະ​ເໜີຮ່າງ​ກົດໝາຍ ວ່າ​ດ້ວຍ​ທີ່​ດິນສະບັບ​ປັບປຸງ ​ຕໍ່ກອງ​ປະຊຸມ ສະ​ໄໝສາມັນ​ ເທື່ອ​ທີ 6 ຂອງ​ສະພາ​ແຫ່ງ​ຊາດ ​ຊຸດ​ທີ VIII ​ເພື່ອ​ເປັນ​ການ ​ທາ​ບທາມ ​ແລະ ​ເປີດ​ໂອກາດໃຫ້​ບັນດາ​ສະມາຊິກ ​ສະພາ​ແຫ່ງ​ຊາດ (ສສຊ) ປະກອບຄຳ​ຄິດ​ຄຳ​ເຫັນ ຢ່າງ​ເລິກ​ເຊິ່ງ ​ແລະ ກົງ​ໄປ​ກົງ​ມາຕໍ່ຮ່າງ​ກົດໝາຍ ສະບັບ​ນີ້ ແຕ່​ຈະ​ບໍ່ທັນ​ໄດ້​ຮັບຮອງ​ເອົາ​ໃນກອງປະຊຸມ ​ເທື່ອ​ນີ້.

ທ່ານ ສົມມາດ ພົລເສນາ ໄດ້ກ່າວວ່າ ກົດ​ໝາຍ ​ວ່າດ້ວຍ ທີ່​ດິນສະ​ບັບ​ປັດ​ຈຸ​ບັນ ​ໄດ້​ປະ​ກາດ​ໃຊ້ ​ແຕ່​ປີ 2003 ເປັນ​ຕົ້ນ​ມາ ເຊິ່ງ​​ໄດ້​ປະ​ກອບ​ສ່ວນ​ເຮັດ​ໃຫ້​ ການ​ຄຸ້​ມຄອງ, ບໍ​ລິ​ຫານ​ທີ່​ດິນ​ໄດ້​ດີ​ພໍ​ສົມ​ຄວນ ແລະ ມີ​ຜົນ​ສຳ​ເລັດຫຼາຍ​ດ້ານ ເຊັ່ນ: ການ​ພັດ​ທະ​ນາ​ເສດ​ຖະກິດ-ສັງ​ຄົມ​ ຂອງ​ປະ​ເທດ​ໄດ້​ມີ​ບາດ​ກ້າວ​ຂະ​ຫຍາຍ​ຕົວ​ໄວ, ທັງຕອບສະໜອງ ຄວາມ​ຕ້ອງ​ການ​ນຳ​ໃຊ້​ທີ່​ດິນ ​ເຂົ້າ​ໃນ​ການ​ດຳ​ລົງ​ຊີ​ວິດ, ທຳ​ມາ​ຫາ​ກິນ ແລະ ການ​ພັດ​ທະ​ນາ​ເສດ​ຖະ​ກິດ​-ສັງ​ຄົມ. ປະ​ຊາ​ຊົນລາວບັນ​ດາ​ເຜົ່າ ມີ​ຄວາມ​ຕື່ນ​ຕົວ​ເປັນ​ເຈົ້າ​ຕໍ່​ດິນດອນ​ຕອນ​ຫຍ້າ, ປົກ​ປັກ​ຮັກ​ສາ, ນຳ​ໃຊ້ ແລະ ມີ​ການ​ພັດ​ທະ​ນາ​ທີ່​ດິນ ຫຼາຍ​ຂຶ້ນ ເພື່ອ​ນຳ​ຜົນ​ປະ​ໂຫຍດ​ໃຫ້​ຄອບ​ຄົວ ແລະ ປະ​ເທດ​ຊາດ. ລັດ ແລະ ປະ​ຊາ​ຊົນ ໄດ້​ນຳ​ໃຊ້​ທີ່​ດິນ​ ເຂົ້າ​ໃນ​ເປົ້າ​ໝາຍ​ຕ່າງໆ​ ເຊັ່ນ: ​ທີ່​ດິນສຳ​ລັບ​ກະ​ສິ​ກຳ, ເປັນ​ດິນ​ປ່າ​ໄມ້, ອຸດ​ສາ​ຫ​ະ​ກຳ, ປຸກ​ສ້າງ ແລະ ມີ​ການ​ ຊື້​-ຂາຍ ແລກ​ປ່ຽນເປັນຫຼັກ​ຊັບ​ຄ້ຳ​ປະ​ກັນ, ການ​ເຊົ່າ ແລະ ການ​ສຳ​ປະ​ທານ​ທີ່​ດິນ​ເຮັດ​ໃຫ້​ລາຍ​ຮັບຈາກ​ທີ່​ດິນ​ເພີ່ມ​ຂຶ້ນ; ລະ​ບົບ​ການ​ຈັດ​ຕັ້ງ ແລະ ການ​ຄຸ້ມ​ຄອງ ​ທີ່​ດິນ​ໄດ້​ຮັບ​ການ​ປັບ​ປຸງ​ດີ​ຂຶ້ນ ດ້ວຍ​ການ​ແບ່ງ​ຂັ້ນ​ຄຸ້ມ​ຄອງ ລະ​ຫວ່າງ​ສູນ​ກາງ​ກັບ​ທ້ອງ​ຖິ່ນໂດຍ​ກຳ​ນົດ​ຂອບເຂດ​ສິດໜ້າ​ທີ່ ​ໃນ​ການ​ຄຸ້ມ​ຄອງ​ ລະ​ຫວ່າງ​ຂະ​ແໜງ​ການ ​ແຕ່​ລະ​ຂັ້ນ​ຈະ​ແຈ້ງ​ສົມ​ຄວນ. ຜ່ານ​ການ​ຈັດ​ຕັ້ງ​ປະ​ຕິ​ບັດກົດ​ໝາຍ​ ວ່າ​ດ້ວຍ​ທີ່​ດິນ​ ມາເປັນເວລາ 15 ປີ ເຫັນ​ໄດ້ວ່າ ໂຄງ​ສ້າງ ແລະ ເນື້ອ​ໃນ​ຂອງ​ກົດ​ໝາຍ​ມາ​ຮອດ​ປັດ​ຈຸ​ບັນ ຍັງ​ມີ​ຊ່ອງ​ຫວ່າງ ບໍ່​ທັນ​ຄົບ​ຖ້ວນ ແລະ ຈະ​ແຈ້ງ, ມີ​ບັນ​ຫາ​ໃໝ່ຫຼາຍ​ປະ​ການ​ເກີດ​ຂຶ້ນ ຈຶ່ງ​ເຮັດ​ໃຫ້ມີ​ຄວາມ​ເຂົ້າ​ໃຈ​ແຕກ​ຕ່າງ​ກັນ ເປັນ​ສາ​ເຫດ​ໃຫ້​ການ​ນຳ​ເອົາ​ກົດ​ໝາຍ​ໄປ​ຈັດ​ຕັ້ງ​ປະ​ຕິ​ບັດ ​ບໍ່​ເປັນ​ເອ​ ກະ​ພາບ​ກັນໃນຫຼາຍ​ດ້ານ. ຈາກສະພາບດັ່ງກ່າວ ຈຶ່ງ ເຫັນວ່າ ມີຄວາມຈຳເປັນຕ້ອງໄດ້ມີການປັບປຸງ ກົດໝາຍວ່າດ້ວຍ ທີ່ດິນ ປີ 2003 ໃຫ້ມີເນື້ອໃນລະອຽດ, ຈະແຈ້ງ ເພື່ອໃຫ້ສອດຄ່ອງກັບສະພາບ ການຂະຫຍາຍ ຕົວເສດຖະກິດ-ສັງຄົມໃນໄລຍະໃໝ່.

ສຳລັບຮ່າງກົດໝາຍວ່າດ້ວຍທີ່ດິນສະບັບປັບປຸງນີ້, ປະກອບ​ມີ 15 ພາກ 28 ໝວດ ​ແລະ 160 ມາດຕາ​ ໃນນີ້ຮັກສາເນື້ອໃນມາດຕາເກົ່າໄວ້ພຽງແຕ່ 1 ມາດຕາ, ປັບປຸງທັງໝົດ 68 ມາດຕາ ແລະ ສ້າງຂຶ້ນໃໝ່ ມີ 91 ມາດຕາ  ເຊິ່ງເຫັນວ່າມີການປັບປຸງໃຫຍ່. ສະນັ້ນ, ຈຶ່ງສະເໜີໃຫ້ບັນດາ ສສຊ ພິຈາລະນາຕື່ມ ວ່າການກຳນົດໂຄງຮ່າງຂອງຮ່າງກົດໝາຍສະບັບປັບປຸງນີ້ ເຫັນວ່າຄົບຖ້ວນ, ເໝາະສົມແລ້ວບໍ, ຄວນຈະຕັດ ຫຼື ເພີ່ມບັນຫາໃດເຂົ້າຕື່ມ ເພື່ອເຮັດໃຫ້ຮ່າງກົດໝາຍ ສະບັບນີ້ ມີຄວາມສົມບູນ ແລະ ຮັດກຸມ.

ເຊິ່ງບັນດາ ສສຊ  ກໍໄດ້ສຸມໃສ່ປະກອບຄຳເຫັນໃສ່ ຫຼາຍບັນຫາທີ່ສຳຄັນ ຄື: ການກໍານົດ ກໍາມະສິດ ກ່ຽວກັບທີ່ດິນ, ນະໂຍບາຍຂອງລັດ ແລະ ຫຼັກການ ກ່ຽວກັບ ວຽກງານທີ່ດິນ, ການກຳນົດ ແຜນຍຸດທະສາດ ການນຳໃຊ້ທີ່ດິນຂັ້ນສູນກາງ, ການກຳນົດແຜນຈັດສັນທີ່ດິນທ້ອງຖິ່ນ, ການຈັດປະເພດທີ່ດິນ, ການກຳນົດສິດຫັນປ່ຽນແຕ່ລະປະເພດທີ່ດິນ, ການ ຄຸ້ມຄອງນຳໃຊ້ທີ່ດິນ ແຕ່ລະປະເພດ ຕາມຂະແໜງການ, ການກຳນົດຂອບເຂດດິນກະສິກຳ ແລະ ດິນປຸກສ້າງ, ການໃຫ້ສິດນຳໃຊ້ທີ່ດິນ ຂອງລັດແກ່ບຸກຄົນ, ການກຳນົດ ກ່ຽວກັບ ຂັ້ນຕອນການຂຶ້ນທະບຽນ ອອກໃບຕາດິນ, ການຊື້-ຂາຍ ສິດນຳໃຊ້ທີ່ດິນຂອງລັດ ແບບມີກຳນົດເວລາ ແລະ ບັນຫາອື່ນໆ ເພື່ອ ເຮັດໃຫ້ເນື້ອໃນມີຄວາມຈະແຈ້ງ, ລະອຽດຊັດເຈນ, ຮັດກຸມ ແລະ ສອດຄ່ອງກັບສະພາບຕົວຈິງ ແນໃສ່ຮັບປະກັບ ການນຳໃຊ້ທີ່ດິນຖືກຕ້ອງຕາມເປົ້າໝາຍ, ເຮັດໃຫ້ຊີວິດການເປັນຢູ່ ຂອງປະຊາຊົນ ດີຂຶ້ນ ແລະ ສັງຄົມມີຄວາມເປັນລະບຽບຮຽບຮ້ອຍ.