ພິ​ທີ​ເຊັນ​ສັນ​ຍາ​ ສະ​ໜອງ​ທຶນ ໂດຍ​ຜ່ານ​ໂຄງ​ການ ​ສິ່ງ​ແວດ​ລ້ອມ ແລະ ສັງ​ຄົມ ຢູ່ ສ​ປ​ປ ລາວ ໄລ​ຍະ 2 ຂອງ ກອງ​ທຶນ​ປົກ​ປັກ​ຮັກ​ສາ​ສິ່ງ​ແວດ​ລ້ອມ(ກ​ປ​ສ)  ໂດຍ​ການ​ເປັນ​ກຽດ​ເຂົ້າ​ຮ່ວມ​ເປັນ​ສັກ​ຂີ​ພິ​ຍານ ​ຂອງ ທ່ານ ໄຊ​ນະ​ຄອນ ອິນ​ທະ​ວົງ, ຮອງ​ລັດ​ຖະ​ມົນ​ຕີ ກະ​ຊວງ ຊັບ​ພະ​ຍາ​ກອນ​ທຳ​ມະ​ຊາດ ແລະ ສິ່ງ​ແວດ​ລ້ອມ, ມີຫົວ​ໜ້າ​ຄະ​ນະ​ວິ​ຊາ​ການ​ສຳ​ລັບ​ໂຄງ​ການ ຄ​ສ​ລ 2, ມີ​ບັນ​ດາຜູ້​ຕາງ​ໜ້າ​ ຈາກ​ພາກ​ສ່ວນ​ທີ່​ກ່ຽວ​ຂ້ອງ ແລະ ຄະ​ນະ​ທີມ​ງານ​ຈາກ​ທະ​ນາ​ຄານ​ໂລກ ເຂົ້າ​ຮ່ວມ, ເຊິ່ງພິ​ທີ​​ແມ່ນ​ໄດ້​ຈັດ​ຂື້ນ​ຢ່າງ​ເປັນ​ທາງ​ການ ໃນ​ຕອນ​ບ່າຍ​ຂອງ​ວັນ​ທີ 21 ທັນ​ວາ 2018, ທີ່​ໂຮງ​ແຮມ ວຽງ​ຈັນ​ພ​ຣາ​ຊາ, ນະ​ຄອນຫຼວງວຽງ​ຈັນ.

     ພິ​ທີ​ເຊັນ​ສັນ​ຍາ​ດັ່ງ​ກ່າວ ​ແມ່ນ​ໃຫ້​ກຽດ​ລົງ​ນາມ ​ເຊັນ​ສັນ​ຍາ​ໂດຍ ​ທ່ານ ຄຳ​ປະ​ດິດ ຄຳ​ມູນ​ເຮືອງ, ຫົວ​ໜ້າ​ຫ້ອງ​ການ ກອງ​ທຶນ​ປົກ​ປັກ​ຮັກ​ສາ​ສິ່ງ​ແວດ​ລ້ອມ (ຕາງ​ໜ້າ​ຜູ້​ໃຫ້​ທຶນ) ແລະ ຕາງ​ໜ້າ​ຈາກ 5 ໂຄງ​ການ ປະ​ກອບ​ມີ ກົມ​ ແຜນ​ການ ແລະ ການ​ຮ່ວມ​ມື (ກ​ຊ​ສ), ສະ​ຖາ​ບັນ​ຄົ້ນ​ຄວ້າ ຊັບ​ພະ​ຍາ​ກອນ​ທຳ​ມະ​ຊາດ ແລະ ສິ່ງ​ແວດ​ລ້ອມ, (ກ​ຊ​ສ), ກົມ​ແຜນ​ການ ແລະ ການ​ເງິນ, ກະ​ຊວງ ກະ​ສິ​ກຳ ແລະ ປ່າ​ໄມ້, ກົມ ປ່າ​ໄມ້ ແລະ ກົມ ປ່າ​ໄມ້, ກະ​ຊວງ ກະ​ສິ​ກຳ ແລະ ປ່າ​ໄມ້.

  1. ໂຄງ​ການ​ສ້າງ​ຄວາມ​ເຂັ້ມ​ແຂງ ໃນ​ການ​ວາງ​ແຜນ ແລະ ປະ​ສານ​ງານ ໃນ​ຂະ​ແໜງ ຊ​ສ ພາກ​ເພີ່ມ​ງົບ​ປະ​ມານຂອງ ກົມ​ ແຜນ​ການ ແລະ ການ​ຮ່ວມ​ມື (ກ​ຊ​ສ).
  2. ໂຄງ​ການ ສ້າງ​ຄວາມ​ເຂັ້ມ​ແຂງ​ຂະ​ແໜງ​ ຊ​ສ ໃນ​ການ​ວິ​ໃຈ​ຄຸນ​ນະ​ພາບ​ອາ​ກາດ ແລະ ສຽງ, ການ​ນຳ​ໃຊ້​ຊັບ​ພະ​ຍາ​ກອນ​ທີ່​ມີ​ປະ​ສິດ​ທິ​ຜົນ ແລະ ການ​ຖ່າຍ​ທອດ​ເຕັກ​ໂນ​ໂລ​ຊີ ທີ່​ເໝາະ​ສົມ ໃນ​ການ​ຄຸ້ມ​ຄອງ​ສິ່ງ​ເສດ​ເຫຼືອ ສຳ​ລັບ ວິ​ສາ​ຫະ​ກິດ​ຂະ​ໜາດ​ກາງ ແລະ ຂະ​ໜາດ​ນ້ອຍ ພາກ​ເພີ່ມ​ງົບ​ປະ​ມານ​ຂອງ ສະ​ຖາ​ບັນ​ຄົ້ນ​ຄວ້າ​ຊັບ​ພະ​ຍາ​ກອນ​ທຳ​ມະ​ຊາດ ແລະ ສິ່ງ​ແວດ​ລ້ອມ (ກ​ຊ​ສ).
  3. ໂຄງ​ການ​ສ້າງ​ຄວາມ​ເຂັ້ມ​ແຂງ ດ້ານ​ການ​ວາງ​ແຜນ, ການ​ປະ​ສານ​ງານ, ການ​ຕິດ​ຕາມ ແລະ ປະ​ເມີນ​ຜົນ ຂອງ​ໂຄງ​ການ​ລົງ​ທຶນ​ໃນ​ຂະ​ແໜງ​ກະ​ສິ​ກຳ ແລະ ປ່າ​ໄມ້ ໂດຍ​ສຸມ​ໃສ່​ໂຄງ​ການ​ທີ່​ນອນ​ໃນ ໂຄງ​ການຫຼັກ ຄ​ສ​ລ 2 ຂອງ ກົມ​ແຜນ​ການ ແລະ ການ​ເງິນ, ກະ​ຊວງ ກະ​ສິ​ກຳ ແລະ ປ່າ​ໄມ້.
  4. ໂຄງ​ການ​ສ້າງ​ຄວາມ​ສາ​ມາດ​ດ້ານ​ການ​ຈັດ​ຕັ້ງ ເພື່ອ​ການ​ຄຸ້ມ​ຄອງ​ປ່າ​ສະ​ຫງວນ ແລະ ອະ​ນຸ​ລັກ​ສັດ​ປ່າ PICE-LENS2-001 ຂອງ ກົມ ປ່າ​ໄມ້, ກະ​ຊວງ ກະ​ສິ​ກຳ ແລະ ປ່າ​ໄມ້.
  5. ໂຄງ​ການ​ເສີມ​ສ້າງ​ຄວາມ​ສາ​ມາດ ແລະ ການ​ຄຸ້ມ​ຄອງ​ປ່າ​ສະ​ຫງວນ​ແຫ່ງ​ຊາດ ນ້ຳ​ແອດ-ພູ​ເລີຍ CBI-LENS2-020 ຂອງ ​ກົມ ປ່າ​ໄມ້, ກະ​ຊວງ ກະ​ສິ​ກຳ ແລະ ປ່າ​ໄມ້.

     ບັນ​ດາ ໂຄງ​ການ​ທີ່​ໄດ້​ຮັບ​ທຶນ​ຈາກ ກອງ​ທຶນ​ປົກ​ປັກ​ຮັ​ກ​ສາ​ສິ່ງ​ແວດ​ລ້ອມ ແມ່ນ​ຈະ​ໄດ້​ຈັດ​ຕັ້ງ​ປະ​ຕິ​ບັດ​ຕາມ​ແຜນ​ ທີ່​ໄດ້ວາງ​ໄວ້ ເພື່ອ​ແນ​ໃສ່ຫຼຸດ​ຜ່ອນ​ຜົນ​ກະ​ທົບ​ຕໍ່​ສີ່ງ​ແວດ​ລ້ອມ, ປະ​ຕິ​ບັດ​ຕາມ​ພັນ​ທະ ແລະ ພາ​ລະ​ບົດ​ບາດ​ຂອງ​ຕົນ ຈັດ​ຕັ້ງ​ຜັນ​ຂະ​ຫ​ຍາຍ​ທິດ​ທາງ​ນະ​ໂຍ​ບາຍ​ຂອງ​ລັດ​ຖະ​ບານ ດ້ານ​ຊັບ​ພະ​ຍາ​ກອນ​ທຳ​ມະ​ຊາດ ແລະ ສິ່ງ​ແວດ​ລ້ອມ, ປະ​ກອບ​ສ່ວນ​ເຮັດ​ໃຫ້​ແຜນ​ພັດ​ທະ​ນາ​ເສດ​ຖະ​ກິດ ແລະ ສັງ​ຄົມ 5 ປີ ຄັ້ງ​ທີ 8 ໄປ​ຕາມ​ທິດ​ສີ​ຂຽວ ແລະ ຍືນ​ຍົງ.