ໃນ​ຕອນ​ເຊົ້າ​ຂອງວັນ​ທີ 21-22 ພະ​ຈິກ 2018 ກົມ ອຸ​ຕຸ​ນິ​ຍົມ ແລະ ອຸ​ທົກ​ກະ​ສາດ ໄດ້​ຈັດ​ກອງ​ປະ​ຊຸມ ເຜີຍ​ແຜ່ ກົດ​ໝາຍ​ວ່າ​ດ້ວຍ ອຸ​ຕຸ​ນິ​ຍົມ ແລະ ອຸ​ທົກ​ກະ​ສາດ ຂັ້ນ​ທ້ອງ​ຖິ່ນ​ພາກ​ເໜືອ ຂື້ນ​ທີ່​ຫ້ອງ​ປະ​ຊຸມ ພະ​ແນກ ກະ​ສິ​ກຳ ແລະ ປ່າ​ໄມ້ ແຂວງ ຜົ້ງ​ສາ​ລີ, ພາຍ​ໃຕ້​ການ​ເປັນ​ປະ​ທານ​ຂອງ​ທ່ານ ຂັນ​ມະ​ນີ ຂຸນ​ພົນ ຫົວ​ໜ້າ​ກົມ ອຸ​ຕຸ​ນິ​ຍົມ ແລະ ອຸ​ທົກ​ກະ​ສາດ , ມີ​ທ່ານ ບຸນ​ຕີ ເດດ​ວົງ​ສອນ ຫົວ​ໜ້າ​ກົມ ນິ​ຕິ​ກຳ, ກົມ​ການ​ເງິນ ພ້ອມ​ທັງ ຫົວ​ໜ້າ​ພະ​ແນກ, ຮອງ​ພະ​ແນກ ແຂວງ ບໍ່ແກ້ວ, ແຂວງ ອຸດົມໄຊ, ແຂວງ ໄຊຍະບູລີ, ແຂວງ ຫົວພັນ, ແຂວງ ຫຼວງພະບາງ, ແຂວງ ຫຼວງນໍ້າທາ ແລະ ແຂວງ ຜົ້ງສາລີ ພ້ອມ​ທັງ​ຂະ​ແໜງ​ການ​ທີ່​ກ່ຽວ​ຂ້ອງ​ພາຍ​ໃນ​ແຂວງ ຜົ້ງ​ສາ​ລີ ແລະ ພະ​ນັກ​ງານ​ວິ​ຊາ​ການ​ເຂົ້າ​ຮ່ວມ.

      ວຽກງານດ້ານ ອຸຕຸນິຍົມ ແລະ ອຸທົກກະສາດ ແມ່ນວຽກງານ ວິທະຍາສາດຂະແໜງ ການໜຶ່ງທີ່ດຳເນີນການປະຕິບັດວຽກງານຢ່າງເປັນເອກະພາບໃນຂອບເຂດທົ່ວປະເທດ ແລະ ມີຄວາມຈຳເປັນຮອບດ້ານໃນການປະກອບສ່ວນເຂົ້າໃນວຽກງານພັດທະນາ ເສດຖະກິດ-ສັງຄົມ ໂດຍສະເພາະ ກໍ່ສ້າງພື້ນຖານໂຄງລ່າງ ແລະ ທັງເປັນການແຈ້ງເຕືອນໄພລ່ວງໜ້າ ໃຫ້ແກ່ສັງຄົມ ໃຫ້ທັນກັບສະພາບການ ເພື່ອຫຼຸດຜ່ອນຜົນເສຍຫາຍທີ່ເກີດຂຶ້ນຈາກ ໄພທຳມະຊາດ ຊຶ່ງໃນປັດຈຸບັນສະພາບອາກາດໄດ້ມີການປ່ຽນແປງ ເປັນຕົ້ນ ໄພນໍ້າຖ້ວມ (ຖ້ວມຊຸ, ຖ້ວມຍຶ່ງ), ໄພແຫ້ງແລ້ງ, ລົມພາຍຸ, ໄພໜາວ ແລະ ອື່ນໆ ນັບມື້ນັບຮຸນແຮງ ແລະ ຖີ່ຂຶ້ນເລື່ອຍໆ ຊຶ່ງປະເທດເຮົາ ແລະ ບັນດາປະເທດຢູ່ໃນໂລກ ພວມປະເຊີນໜ້າກັບໄພຂົ່ມຂູ່ດັ່ງກ່າວ. ດ້ວຍເຫດນີ້ ພັກ-ລັດ ຈຶ່ງເຫັນຄວາມສຳຄັນ ຕ້ອງມີນິຕິກຳ ຮັບໃຊ້ໃຫ້ແກ່ວຽກງານນີ້ ເພື່ອ ເຮັດໃຫ້ວຽກງານນີ້ດຳເນີນໄປ ຢ່າງສອດຄ່ອງກັບສະພາບຕົວຈີງ. ກົດໝາຍວ່າດ້ວຍອຸຕຸນິຍົມ ແລະ ອຸທົກກະສາດນີ້ແມ່ນ​ເຄື່ອງມືໜຶ່ງທີ່ສຳຄັນ ເປັນນິຕິກຳໃນ​ການ​ຕອບ​ໂຕ້ ​ແລະ ຫຼຸດຜ່ອນ​ຜົນ​ເສຍ​ຫາຍ​ຈາກ​ໄພພິບັດ​ດັ່ງກ່າວ​ນັ້ນ. ນອກຈາກນີ້, ຍັງ​ສະໜັບສະໜູນ ການປະຕິບັດ​ໃຫ້​ຖືກຕ້ອງ​ຕາມ​ມາດຕະຖານ​ສາກົນ ກໍ​ຄື​ໃຫ້​ຖືກ ຕ້ອງ​ຕາມ​ຂໍ້​ກຳນົດ ​ແລະ ລະບຽບ​ຫຼັກການຂອງ​ອົງການ ​ອຸຕຸນິຍົມ​ໂລກ ທີ່ ສປປ ລາວ ​ໄດ້​ເຂົ້າ​ເປັນ​ສະມາຊິກ​ຖາວອນ​ ນັບ​ແຕ່​ປີ 1955, ​ປະຕິບັດ​ພັນທະ​ຂອງ​ຄະນະ​ກຳມະການ ​ໄຕ້​ຝຸ່ນ​ທີ່ ສປປ ລາວ​ ໄດ້​ເຂົ້າ​ເປັນ​ສະມາຊິກ​ໃນ​ປີ 1973, ​ເປັນ​ການ​ປະຕິບັດ​ພັນທະ​ການ​ຫັນ​ຄວາມ​ຮັບຜິດຊອບ​ໃຫ້​ແກ່ ​ບັນດາ​ປະ​ເທດ​ສະມາຊິກ​ພາຄີ​ການ​ປະຕິບັດ​ສັນຍາ​ແມ່​ນ້ຳຂອງປີ 1995 ​ແລະ ຍັງປະກອບ​ສ່ວນ​ໃຫ້​ແກ່​ການ​ສ້າງ​ໃຫ້ ສປປ ລາວ​ ເປັນ​ລັດທີ່​ຄຸ້ມຄອງດ້ວຍ​ກົດໝາຍ. ກົດໝາຍ ສະບັບດັ່ງກ່າວ ໄດ້ຖືກຮັບຮອງໃນກອງປະຊຸມສະພາແຫ່ງຊາດສະ ໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ 8 ຄັ້ງວັນທີ 13 ພະ ຈິກ 2017  ແລະ ປະທານປະເທດ ອອກລັດຖະດໍາລັດປະກາດໃຊ້ ໃນວັນທີ 21 ທັນວາ 2017 ເປັນຕົ້ນມາ,

      ເຊິ່ງ​ສະ​ເໜີ​ໂດຍ​ທ່ານ ສຸ​ວັນ​ນະ​ກອນ ແກ້ວດວງ​ເດດ ຮອງ​ພະ​ແນກ​ສັງ​ລວມ ກົມ ອຸ​ຕຸ​ນິ​ຍົມ ແລະ ອຸ​ທົກ​ກະ​ສາດ, ເຊິ່ງ ກົດ​ໝາຍ​ສະ​ບັບ​ດັ່ງ​ກ່າວນີ້ ປະ​ກອບ​ດ້ວຍ 11 ພາກ, 6 ໝວດ, 69 ມາດ​ຕາ, ກອງ​ປະ​ຊຸມໃນ​ຄັ້ງ​ນີ້​ບັນ​ດາ​ຜູ້​ເຂົ້າ​ຮ່ວມກອງ​ປະ​ຊຸມ​ຍັງ​ໄດ້​ປະ​ກອບ​ຄຳ​ຄິດ​ ຄຳເຫັນ​ກັນ ເພື່ອ​ນຳໄປຈັດຕັ້ງປະຕິບັດຕົວຈີງໃຫ້​ຜົນສຳ​ເລັດ​ຢ່າງ​ສູງ.