ພິທີປະກາດພະນັກງານການນຳຂັ້ນສູງ ອອກພັກການ-ຮັບອຸດໜຸນບຳນານ ແລະ ການ ປະດັບຫຼຽນໄຊແຮງງານໃຫ້ແກ່ບຸກຄົນ ທີ່ໄດ້ປະກອບສ່ວນເຂົ້າໃນການປັບປຸງກົດໝາຍທີ່ດິນ, ກົດໝາຍວ່າດ້ວຍນ້ຳ ແລະ ຊັບພະຍາກອນນ້ຳ ແລະ ສ້າງກົດໝາຍ ອຸຕຸນິຍົມ ແລະ ອຸທົກກະສາດ.
 
ໃນຕອນເຊົ້າຂອງ ວັນທີ 11 ມິຖຸນາ 2021 ຢູ່ທີ່ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ມີການຈັດພິທີປະກາດພະນັກງານການນຳຂັ້ນສູງ ອອກພັກການ-ຮັບອຸດໜຸນບຳນານ ແລະ ໄດ້ມີການ ປະດັບຫຼຽນໄຊແຮງງານໃຫ້ແກ່ບຸກຄົນ ທີ່ໄດ້ປະກອບສ່ວນເຂົ້າໃນການປັບປຸງກົດໝາຍທີ່ດິນ, ກົດໝາຍວ່າດ້ວຍນ້ຳ ແລະ ຊັບພະຍາກອນນ້ຳ ແລະ ສ້າງກົດໝາຍອຸຕຸນິຍົມ ແລະ ອຸທົກກະສາດ ໂດຍພາຍໃຕ້ການເປັນປະທານຂອງ ທ່ານ ນາງ ບຸນຄຳ ວໍລະຈິດ ກຳມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ພິທີດັ່ງກ່າວ ມີຜູ້ເຂົ້າຮ່ວມ ຂັ້ນຫົວໜ້າພະແນກຂຶ້ນໄປ ໃນນີ້ໄດ້ມີຜູ້ ຕາງໜ້າຈາກຄະນະຈັດຕັ້ງສູນການພັກ, ຫ້ອງວ່າການສຳນັກງານນາຍົກລັດຖະມົນຕີ, ກະຊວງພາຍໃນ ລວມທັງໝົດ 79 ທ່ານ, ຍິງ 6 ທ່ານ, ໃນການດຳເນີນແມ່ນໄດ້ປະຕິບັດຕາມວາລະຄື: ທ່ານ ນາງ ທອງຈັນ ອະຄະມາເຂດ ຫົວໜ້າກົມຈັດຕັ້ງ ແລະ ພະນັກງານ ກຊສ ໄດ້ຂຶ້ນອ່ານ ລັດຖະດຳລັດຂອງປະທານປະເທດ, ດຳລັດຂອງນາຍົກລັດຖະມົນຕີ ວ່າດ້ວຍການປະດັບຫຼຽນໄຊແຮງງານ, ຫຼຽນກາ, ໃບຍ້ອງຍໍລັດຖະບານ ແລະ ຂໍ້ຕົກລົງ ລັດຖະມົນຕີ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ວ່າດ້ວຍການຍ້ອງຍໍໃຫ້ແກ່ບຸກຄົນ ທີ່ປະກອບສ່ວນເຂົ້າໃນການປັບປຸງກົດໝາຍທີ່ດິນ, ກົດໝາຍວ່າດ້ວຍນ້ຳ ແລະ ຊັບພະຍາກອນນ້ຳ ແລະ ສ້າງກົດໝາຍ ອຸຕຸນິຍົມ ແລະ ອຸທົກກະສາດ ລວມມີຈຳນວນທັງໝົດ 157 ທ່ານ, ຍິງ 39 ທ່ານ ແລະ ມີ 3 ກົມກອງລວມໝູ່, ໃນນັ້ນ ໄດ້ຮັບຫຼຽນໄຊແຮງງານ ຊັ້ນ II ມີ 39 ທ່ານ, ຍິງ 6 ທ່ານ, ຫຼຽນໄຊແຮງານຊັ້ນ III ມີ 17 ທ່ານ, ຍິງ 3 ທ່ານ, ຫຼຽນກາແຮງງານ ມີ 14 ທ່ານ, ຍິງ 4 ທ່ານ, ໃບຍ້ອງຍໍລັດຖະບານ ມີ 20 ທ່ານ, ຍິງ 8 ທ່ານ, ຍ້ອງຍໍ ຂັ້ນກະຊວງມີ 67 ທ່ານ, ຍິງ 18 ທ່ານ ແລະ ມີ 3 ກົມກອງ, ໃນພິທີຄັ້ງນີ້ໄດ້ປະດັບຫຼຽນໄຊແຮງງານຊັ້ນ II ແລະ ຊັ້ນ III ໃຫ້ຄະນະນຳຂັ້ນກົມກອງ ຂຶ້ນໄປ ມີຈຳນວນທັງໝົດ 12 ທ່ານ ໃຫ້ກຽດຂຶ້ນປະດັບໂດຍ ທ່ານ ນາງ ບຸນຄຳ ວໍລະຈິດ ກຳມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ.
 
ຈາກນັ້ນໄດ້ກ່າວເຂົ້າສູ່ວາລະ ປະກາດພະນັກງານຂັ້ນສູງ ອອກພັກການຮັບອຸດໜຸນບຳນານ ໂດຍແມ່ນທ່ານ ສຸລິຍາ ພົມມິສິດ ຮອງຫົວໜ້າກົມຄຸ້ມຄອງພະນັກງານ, ຄະນະຈັດຕັ້ງສູນກາງພັກ ຂຶ້ນອ່ານດຳລັດ ວ່າດ້ວຍການອະນຸມັດໃຫ້ພະນັກງານການນຳຂັ້ນສູງ ອອກພັກການ-ຮັບອຸດໜຸນບຳນານ ຄື ທ່ານ ບຸນມີ ພຸດທະວົງ ຮອງເລຂາຄະນະພັກກະຊວງ, ຮອງລັດຖະມົນຕີກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ພາຍຫຼັງສຳເລັດການອ່ານດຳລັດ ເປັນທາງການແລ້ວ ທ່ານ ບຸນມີ ພຸດທະວົງ ພະນັກງານບຳນານ ກໍໄດ້ຂຶ້ນກ່າວມີຄຳເຫັນ ຕໍ່ກັບບົດຮຽນຂອງການຊີ້ນຳ-ນຳພາ ແລະ ປະສົບການໃນໄລຍະເຮັດການປະຕິວັດຜ່ານມາ, ຈາກນັ້ນ ທ່ານ ນາງ ບຸນຄຳ ວໍລະຈິດ ກຳມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ກໍໄດ້ຂຶ້ນໃຫ້ການໂອ້ລົມຕໍ່ພິທີ ຊຶ່ງທ່ານໄດ້ຍ້ອງຍໍຊົມເຊີຍ ຜົນງານການເຄື່ອນໄຫວເຮັດໜ້າທີ່ ການປະຕິວັດຂອງທ່ານ ບຸນມີ ພຸດທະວົງ ໃນໄລຍະຜ່ານມາໄດ້ມີບົດຮຽນ ແລະ ຕັດສິນໃຈແກ້ໄຂບັນຫາທີ່ຖືກຕ້ອງຕາມລະບຽບການ, ແທດເໝາະກັບຕົວຈິງ, ບົດຮຽນເຫຼົ່ານັ້ນ ຈະເຮັດໃຫ້ພະນັກງານພາຍໃນກະຊວງ ຄືຂະແໜງ ຊສ ໄດ້ສືບສານເຂົ້າໃນວຽກງານຕົວຈິງ ໃນຕໍ່ໜ້າ ຕໍ່ກັບບົດຮຽນປະສົບການ ໃນໄລຍະຜ່ານມາ.