ພິທີປິດຊຸດຝຶກອົບຮົມ ທິດສະດີການເມືອງ ແລະ ການປົກຄອງ ໄລຍະສັ້ນ 45 ວັນ ຊຸດທີ V ຂອງ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ (ກຊສ), ໂດຍການໃຫ້ກຽດເປັນປະທານຂອງ ສະຫາຍ ໄຊຍະເວດ ວິໄຊ, ຄະນະປະຈຳພັກກະຊວງ, ຫົວໜ້າກົມສິ່ງແວດລ້ອມ, ກະຊວງ ຊັບພະຍາກອນ ທໍາມະຊາດ ແລະ ສິ່ງແວດລ້ອມ ໄດ້ຈັດຂຶ້ນໃນຕອນເຊົ້າຂອງວັນທີ 19 ມີນາ 2021, ທີ່ຫ້ອງປະຊຸມ ກົມອຸຕຸນິຍົມ ແລະ ອຸທົກກະສາດ, ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ.

ບັ້ນຝຶກອົບຮົມທິດສະດີການເມືອງ ແລະ ການປົກຄອງ ໄລຍະສັ້ນ 45 ວັນ ຊຸດທີ V ປະຈໍາປີ 2020 ໄດ້ດໍາເນີນມາແຕ່ວັນທີ 11 ມັງກອນ 2021 ຫາ 12 ມີນາ 2021 ລວມ 45 ວັນ ຕາມຫຼັກສູດ, ໃນນີ້ໄດ້ເພີ່ມອີກ 5 ວັນ ເພື່ອໃຫ້ນັກຝຶກອົບຮົມໄດ້ຮຽນຮູ້ກ່ຽວກັບວຽກງານປ້ອງກັນຊາດ, ປ້ອງກັນຄວາມສະຫງົບ, ວຽກງານພົວພັນຕ່າງປະເທດໃນໄລຍະໃໝ່ ແລະ ບົດຮຽນການຊີ້ນໍານໍາພາ ຂອງຄະນະນໍາກະຊວງ, ຂອງບັນດາກົມກອງ ຈໍານວນໜຶ່ງ ທີ່ໄດ້ຈັດຕັ້ງປະຕິບັດຕາມພາລະບົດບາດ ຫຼັກຂອງຕົນ ເຊິ່ງລວມການຝຶກອົບຮົມທັງໝົດ 50 ວັນ ມີຈຳນວນນັກຝຶກອົບຮົມທັງໝົດ 40 ສະຫາຍ, ຍິງ 12 ສະຫາຍ. ໃນນີ້ມາຈາກກົມກອງອ້ອມຂ້າງກະຊວງ 29 ສະຫາຍ, ຍິງ 10 ສະຫາຍ, ຈາກພະແນກຊັບພະຍາກອນທໍາມະຊາດ ແລະ ສິ່ງແວດລ້ອມ ນະຄອນຫຼວງວຽງຈັນ ແລະ ຫ້ອງການ ຊັບພະຍາກອນທໍາມະຊາດ ແລະ ສິ່ງແວດລ້ອມ 8 ເມືອງ, ມີ 11 ສະຫາຍ, ຍິງ 02 ສະຫາຍ, ການຝຶກອົບຮົມທິດສະດີການເມືອງ ແລະ ການປົກຄອງ ໄລຍະສັ້ນ 45 ວັນ ຊຸດທີ V ແມ່ນແນໃສ່ການຍົກລະດັບທາງດ້ານທິດສະດີພື້ນຖານໃຫ້ສະມາຊິກພັກ, ພະນັກງານຫຼັກແຫຼ່ງ ໄດ້ຮັບຮູ້, ທັງເປັນການສ້າງ ແລະ ຝຶກຝົນຫລໍ່ຫຼອມຕົນເອງໃຫ້ມີຄຸນທາດການເມືອງທີ່ໜັກແໜ້ນ, ມີຄຸນສົມບັດສິນທໍາປະຕິວັດ ແລະ ສາມາດກໍາແໜ້ນແນວທາງນະໂຍບາຍຂອງພັກວາງອອກ ໃນແຕ່ລະໄລຍະ ອັນທີ່ສໍາຄັນແມ່ນສາມາດໝູນໃຊ້ທິດສະດີທີ່ໄດ້ຜ່ານການຝຶກອົບຮົມໃນຄັ້ງນີ້ ເຂົ້າສູ່ ວຽກງານວິຊາສະເພາະທີ່ຕົນຮັບຜິດຊອບ.

ໃນພິທີຄັ້ງນີ້, ສະຫາຍ ຈັນສຸກ ມຸກດາວັນ ຮອງເລຂາໜ່ວຍພັກ, ຮອງຫົວໜ້າກົມຈັດຕັ້ງ ແລະ ພະນັກງານ, ກຊສ ໄດ້ຂຶ້ນຜ່ານບົດສະຫຼຸບການຕີລາຄາ ໃນການຈັດຝຶກອົບຮົມໃນຄັ້ງນີ້ ເຊິ່ງດ້ານດີໄດ້ ມີການແຕ່ງຕັ້ງຄະນະຮັບຜິດຊອບຂັ້ນກະຊວງ, ຂັ້ນນັກຝຶກອົບຮົມ, ມີລະບຽບການພາຍໃນ,​ ນັກຝຶກອົບຮົມໄດ້ເອົາໃຈໃສ່ຕັ້ງໜ້າໃນການຄົ້ນຄວ້າຮໍ່າຮຽນ, ມີການສົນທະນາ ແລກປ່ຽນກັບຄູອາຈານ, ນັກຝຶກອົບຮົມດ້ວຍກັນ ແລະ ການຂຶ້ນຫ້ອງສິດສອນຂອງຄູອາຈານແມ່ນ ໄປຕາມວາລະຂອງຕາຕະລາງຮຽນຂອງຫຼັກສູດໄດ້ເປັນຢ່າງດີ, ໃນແຕ່ລະທ້າຍອາທິດໄດ້ມີການຮັບ ສ່ອງແສງລາຍງານຈາກຄະນະຫ້ອງ ພ້ອມທັງໄດ້ມີການເຄື່ອນໄຫວ ກິດຈະກໍາທາງນອກ ຄື: ໄປທັດສະນະສຶກສາຢູ່ບ້ານ ທ່າຊ້າງ ເມືອງປາກງື່ມ ນະຄອນຫຼວງວຽງຈັນ ທີ່ເປັນບ້ານແບບຢ່າງຮອບດ້ານທໍາອິດຂອງ ເມືອງປາກງື່ມ; ດ້ານທີ່ຍັງຄົງຄ້າງ ການປະກອບຄໍາເຫັນ ໃນເວລາຄົ້ນຄວ້າສົນທະນາຕໍ່ກັບການຕັ້ງ-ຕອບບັນຫາຄໍາຖາມ ຍັງບໍ່ທັນກວ້າງຂວາງ, ເລິກເຊິ່ງ ຍ້ອນນັກຝຶກອົບຮົມສ່ວນໃຫຍ່ເປັນສະມາຊິກພັກທີ່ໜຸ່ມນ້ອຍ ແລະ ຮັບຜິດຊອບວຽກງານວິຊາການ ຫຼາຍກວ່າວຽກງານເສນາ, ສໍາລັບບົດຮຽນທີ່ຖອດຖອນໄດ້ ຄະນະພັກແຕ່ລະຂັ້ນຕ້ອງມີຄວາມ ເປັນເອກະພາບຕໍ່ກັບເປົ້າໝາຍເຂົ້າຮ່ວມ ແລະ ນັກຝຶກອົບຮົມກໍຕ້ອງເປັນເຈົ້າການໃນເວລາຄົ້ນຄວ້າ ແລກປ່ຽນບົດຮຽນກັບຄູອາຈານ ແລະ ເຫັນຄວນໃຫ້ມີການສືບຕໍ່ຝຶກອົບຮົມທິດສະດີການເມືອງ ແລະ ການປົກຄອງ ໄລຍະສັ້ນ ຫຼື ຕາມຫຼັກສູດຂອງສະຖາບັນການເມືອງ ແລະ ການປົກຄອງແຫ່ງຊາດ.

  

ພາຍຫຼັງມອບ-ຮັບ ໃບຢັ້ງຢືນໃຫ້ນັກຝຶກອົບຮົມແລ້ວ ສະຫາຍ ໄຊຍະເວດ ວິໄຊ,  ຄະນະປະຈໍາພັກກະຊວງ, ຫົວໜ້າກົມສິ່ງແວດລ້ອມ ໃນນາມປະທານພິທີ ກໍໄດ້ມີຄຳເຫັນ ແລະ ສະແດງຄວາມຍ້ອງຍໍຊົມເຊີຍ ຕໍ່ນັກຝຶກອົບຮົມ ທີ່ໄດ້ສຳເລັດການຝຶກອົບຮົມໃນຫຼັກສູດດັ່ງກ່າວ. ສະຫາຍໄດ້ກ່າວວ່າ: ການຝຶກອົບຮົມທິດສະດີການເມືອງ ໃນຄັ້ງນີ້ ແມ່ນໄລຍະເວລາທີ່ ກຊສ ພວມກະກຽມກອງປະຊຸມໃຫຍ່ ຄັ້ງ ທີ II ຂອງອົງຄະນະພັກ ກຊສ ແລະ ຢູ່ຊ່ວງໄລຍະແຫ່ງການກະກຽມເປີດກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ XI ຂອງພັກ, ການກະກຽມໃຫ້ແກ່ການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາຂັ້ນແຂວງ ຊຸດທີ II ຊຶ່ງໄລຍະດັ່ງກ່າວລ້ວນແຕ່ແມ່ນເຫດການທີ່ສໍາຄັນ ຂອງພັກ-ລັດ, ເຖິງແມ່ນວ່າຈະຢູ່ໃນຊ່ວງເຫດການດັ່ງກ່າວ ນັກຝຶກອົບຮົມ ແລະ ຄູອາຈານ ຈະພົບກັບຄວາມຫຍຸ້ງຍາກກໍຕາມ ແຕ່ກໍສາມາດຜ່ານຜ່າອຸປະສັກ ແລະ ເຮັດໃຫ້ການຝຶກອົບຮົມ ໃນຄັ້ງນີ້ປະສົບຜົນສຳເລັດໄດ້. ສະຫາຍ ໄດ້ເນັ້ນໜັກໃຫ້ນັກຝຶກອົບຮົມ ກໍຄື ສະມາຊິກພັກ, ພະນັກງານຫຼັກແຫຼ່ງຂອງ ຂະແໜງ ຊສ ເມື່ອໄດ້ຮັບການປະກອບອາວຸດທາງດ້ານແນວຄິດ ທິດສະດີການເມືອງ-ການປົກຄອງ ໂດຍສະເພາະ ແມ່ນທິດສະດີມາກ-ເລນິນ, ແນວຄິດໄກສອນ ພົມວິຫານ ແລະ ບັນດາມະຕິຄຳສັ່ງຂອງພັກເຮົາ ເພື່ອເປັນແວ່ນແຍງເຂົ້າໃນການປັບປຸງແບບແຜນ ວິທີເຮັດວຽກງານຂອງຕົນ, ແບບແຜນແນວຄິດ-ການດຳລົງຊີວິດ ເພື່ອເຮັດໃຫ້ກາຍເປັນສະມາຊິກພັກ ທີ່ເຂັ້ມແຂງ ປອດໃສ,    ໜັກແໜ້ນ ແລະ ຈະໄດ້ເປັນພະນັກງານຫຼັກແຫຼ່ງໃນແຕ່ລະໜ່ວຍງານ ຢູ່ແຕ່ລະກົມ, ກອງ, ສະຖາບັນ, ຫ້ອງການ ຂອງຕົນເອງ ແລະ ຈະຕ້ອງໄດ້ສືບຕໍ່ຊ່ວຍສ້າງມະຫາຊົນ ເພື່ອໃຫ້ກາຍເປັນມະຫາຊົນທີ່ກ້າວໜ້າ ແລະ ສາມາດກ້າວເຂົ້າຢູ່ໃນຖັນແຖວສະມາຊິກພັກໄດ້ ແລະ ເຊື່ອໝັ້ນວ່າ ຜ່ານການຝຶກອົບຮົມທິດສະດີການເມືອງ ແລະ ການປົກຄອງ ໄລຍະສັ້ນ 45 ວັນ ຄັ້ງນີ້, ບັນດານັກຝຶກອົບຮົມຈະສ້າງໄດ້ທັດສະນະທີ່ເປັນການຫັນປ່ຽນໄປທາງທີ່ດີຂຶ້ນຈະແມ່ນການຝຶກຝົນຫຼໍ່ຫຼອມຕົນເອງ, ກາຍເປັນເສນາທິການຄົ້ນຄວ້າຂີດຂຽນຊ່ວຍຄະນະພັກ ຄະນະນໍາ ຂອງການຈັດຕັ້ງທີ່ຕົນສັງກັດ ໃຫ້ມີຄວາມໜັກແໜ້ນ, ວ່ອງໄວ, ຖືກຕ້ອງ ແລະ ມີອັນດີຂຶ້ນເປັນກ້າວໆ.