ໃນຕອນບ່າຍ ຂອງວັນທີ 2 ເມສາ 2021 ຢູ່ທີ່ຫ້ອງປະຊຸມໃຫຍ່ ກະຊວງ ຊັບພະຍາກອນທໍາມະຊາດ ແລະ ສິ່ງແວດລ້ອມ ໄດ້ຈັດພິທີມອບ-ຮັບໜ້າທີ່ ລັດຖະມົນຕີ ກະຊວງ ຊັບພະຍາກອນທໍາມະຊາດ ແລະ ສິ່ງແວດລ້ອມ ລະຫວ່າງ ສະຫາຍ ສົມມາດ ພົລເສນາ, ກໍາມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງຊັບພະ ຍາກອນທໍາມະຊາດ ແລະ ສິ່ງແວດລ້ອມ (ຜູ້ເກົ່າ) ແລະ ສະຫາຍ ນາງ ບຸນຄໍາ ວໍລະຈິດ, ກໍາມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ (ຜູ້ໃໝ່) ໂດຍການໃຫ້ກຽດເຂົ້າຮ່ວມ ຂອງ ສະຫາຍ ສອນໄຊ ສີພັນດອນ, ກໍາມະການກົມການເມືອງສູນກາງພັກ, ຮອງນາຍົກລັດຖະ ມົນຕີ, ລັດຖະມົນຕີ ກະຊວງ ແຜນການ ແລະ ການລົງທຶນ, ມີແຂກຖືກເຊີນ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ໃນໂອກາດດັ່ງກ່າວ, ສະຫາຍ ສອນໄຊ ສີພັນດອນ ໄດ້ໂອ້ລົມບາງຕອນວ່າ: ຄືບັນດາທ່ານໄດ້ຮັບຮູ້ແລ້ວວ່າ ການຊັບຊ້ອນປ່ຽນແທນພະນັກງານການນໍາຂັ້ນສູງຂອງພັກ-ລັດ ແມ່ນປະຕິບັດຕາມຫຼັກການ ແລະ ລະບຽບການສັບຊ້ອນປ່ຽນແທນການນໍາແບບປົກກະຕິຢູ່ຂັ້ນສູນກາງ ແລະ ທ້ອງຖີ່ນ. ພ້ອມນີ້, ທ່ານ ຮອງນາຍົກ ໄດ້ໃຫ້ທິດຊີ້ນໍາທ່ານລັດຖະມົນຕີຜູ້ໃຫມ່ ກໍ່ຄືສາມະຊິກພັກ-ພະນັກງານລັດຖະກອນຫຼັກແຫຼ່ງທົ່ວກະຊວງຊັບພຍາ ກອນທໍາມະຊາດ ແລະ ສິ່ງແວດລ້ອມດັ່ງນີ້:
1. ເພີ່ມທະວີເອົາໃຈໃສ່ວຽກງານການເມືອງແນວຄິດ ໃຫ້ແຂງແຮງ, ຄະນະພັກທຸກຂັ້ນ ຖືເປັນຄວາມຮັບຜິດຊອບຂອງຕົນ ໃນການສຶກສາອົບຮົມພະນັກງານ ສະມາຊິກພັກ, ລັດຖະກອນ ຢ່າງເປັນປະຈຳ ເລິກເຊິ່ງ ແນໃສ່ສ້າງໃຫ້ເຂົາເຈົ້າມີທັດ ສະນະຫຼັກໝັ້ນການເມືອງ ອັນໜັກແໜ້ນ, ມີຄວາມຈົງຮັກພັກດີ, ມີຄຸນສົມບັດສິນທຳປະຕິວັດອັນສູງສົ່ງ, ມີສະຕິຕື່ນຕົວ ເຮັດສຳເລັດໜ້າທີ່ວຽກງານ ດ້ວຍຄວາມໂປ່ງໃສ; ເພີ້ມທະວີຄວາມສາມັກຄີເປັນເອກະພາບພາຍໃນພັກ ແລະ ການ ຈັດຕັ້ງທຸກຂັ້ນ, ເປັນເອກະພາບສູງຕໍ່ແນວທາງນະໂຍບາຍ, ມະຕິຄຳສັ່ງຕ່າງໆຂອງພັກ, ລະບຽບກົດໝາຍຂອງລັດ, ເສີມຂະຫຍາຍນ້ຳໃຈຮັກຊາດ, ເຊີດຊູສະຕິເອກະລາດ ເປັນເຈົ້າຕົນເອງ ສ້າງບາດກ້າວບຸກທະລຸອັນໜັກແໜ້ນ ທາງດ້ານຈິນຕະນາການ;
2. ໃຫ້ຮີບຮ້ອນກຳນົດທິດທາງ ແຜນການການນຳພາ ຂອງອົງຄະນະພັກຕົນ ສົມທົບແຫນ້ນກັບເນື້ອໃນມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ແຜນພັດທະນາເສດຖະກິດ-ສັງຄົມຂອງລັດ 5 ປີ ຄັ້ງທີ IX, ໂດຍຫັນເປັນແຜນລະອຽດຂອງຂະແໜງການ ແລ້ວນຳໄປຈັດຕັ້ງເຊື່ອມຊຶມ ແລະ ຄົ້ນຄວ້າຜັນຂະຫຍາຍ ໃຫ້ແກ່ສະມາຊິກພັກ, ພະນັກງານ, ລັດຖະ ກອນ ໃນທົ່ວຂະແໜງການຂອງຕົນ ໄດ້ຮັບຮູ້, ເຊື່ອມຊຶມໃຫ້ເລິກເຊິ່ງ, ທົ່ວເຖິງ; ຊີ້ນຳການຈັດຕັ້ງຜັນຂະຫຍາຍ ໃນຂອບເຂດຄວາມຮັບຜິດຊອບ ຂອງແຕ່ລະພາກສ່ວນ ໂດຍໄວ ແລະ ໃຫ້ເກີດຜົນຕົວຈິງ. ເອົາໃຈໃສ່ ຈັດຕັ້ງຜັນຂະ ຫຍາຍ ເປັນໂຄງການ, ແຜນງານລະອຽດ ເຂົ້າໃນການເຄື່ອນໄຫວ ໃນພາກສ່ວນຂອງຕົນ ຢ່າງສອດຄ່ອງ ແລະ ມີການຊີ້ນຳກວດກາການຈັດຕັ້ງປະຕິບັດ ໃນແຕ່ລະໄລຍະ ເປັນຢ່າງດີ;
3. ໃຫ້ເອົາໃຈໃສ່ວຽກງານການສ້າງ ແລະ ປັບປຸງການຈັດຕັ້ງພັກ ໃຫ້ເຕີບໃຫຍ່ເຂັ້ມແຂງທາງດ້ານການເມືອງ ແລະ ໜັກ ແໜ້ນທາງດ້ານການຈັດຕັ້ງ ໂດຍໃຫ້ຮີບຮ້ອນກະກຽມດໍາເນີນກອງປະຊຸມໃຫຍ່ ຄັ້ງທີ II ຂອງອົງຄະນະພັກ ຂັ້ນຂອງຕົນ ໃຫ້ສໍາເລັດຕາມແຜນດໍາເນີນງານທີ່ໄດ້ກະກຽມໄວ້ແລ້ວນັ້ນ, ທັງນີ້ ກໍເພື່ອສ້າງໃຫ້ພັກປອດໃສ, ເຂັ້ມແຂງ, ໜັກ ແໜ້ນ ຕາມ 4 ເນື້ອໃນ 4 ຄາດໝາຍ ແລະ 4 ບາດກ້າວບຸກທະລຸ, ບົນພື້ນຖານຫຼັກການສຶກສາອົບຮົມ, ຕໍ່ສູ້ ແລະ ການນໍາພາ. ໃຫ້ຖືສໍາຄັນວຽກງານການປັບປຸງກົງຈັກການຈັດຕັ້ງໃຫ້ກະທັດຮັດ, ສອດຄ່ອງກັບໜ້າທີ່ການເມືອງໃນໄລຍະໃໝ່, ປັບປຸງດ້ານຄຸນນະພາບ ແລະ ປະລິມານຂອງສະມາຊິກພັກ, ປັບປຸງ ແລະ ຂະຫຍາຍພັກໃຫ້ເຕີບໃຫຍ່ ແລະ ເຂັ້ມແຂງໃນທຸກດ້ານ, ດ້ວຍການຕີລາຄາແບ່ງປະເພດສະມາຊິກພັກ-ພະນັກງານ, ເພື່ອເລືອກເຟັ້ນເອົາມະຫາຊົນຜູ້ດີເດັ່ນກ້າວໜ້າ ແລະ ມີເງື່ອນໄຂຄົບຖ້ວນເຂົ້າການຈັດຕັ້ງພັກ ແລະ ອື່ນໆ;
4. ຕ້ອງເອົາໃຈໃສ່ ປັບປຸງ ຊຸກຍູ້ ອົງການຈັດຕັ້ງມະຫາຊົນ ໃຫ້ໜັກແໜັ້ນເຂັ້ມແຂງ ເປັນຕົ້ນ ອົງການຈັດຕັ້ງກຳມະບານ, ອົງການຈັດຕັ້ງຊາວໜຸ່ມ ແລະ ອົງການຈັດຕັ້ງແມ່ຍິງ, ສ້າງຂະບວນການ ວຽກດີຄົນເດັ່ນ, ຂະບວນການແຂ່ງຂັນຮັກຊາດ ແລະ ພັດທະນາ ເພື່ອຊ່ວຍຄະນະພັກກະຊວງ ແກ້ໄຂວຽກງານອັນຈຳເປັນ ອັນພາໃຫ້ຂະບວນການລວມຈັດຕັ້ງປະຕິບັດ ໄດ້ຮັບຄາດໝາຍ.
5. ນຳພາການພັດທະນາ ຂະແໜງວຽກງານຊັບພະຍາກອນທຳມະຊາດ ແລະ ສິ່ງແວດລ້ອມ ໂດຍສົ່ງເສີມການນຳໃຊ້ທີ່ດິນ, ປ່າໄມ້, ນ້ຳ ແລະ ຊັບພະຍາກອນທຳມະຊາດອື່ນໆ ໄປພ້ອມໆກັບການປົກປັກຮັກສາ ຕາມທິດຮັບປະກັນປະສິດທີພາບທີ່ຍາວນານ, ຍືນຍົງ ແລະ ມີໝາກມີຜົນໃນລະດັບສູງ, ຜົນກະທົບນ້ອຍ ຕໍ່ສິ່ງແວດລ້ອມ ແລະ ສັງຄົມ; ເຮັດໃຫ້ພົນລະເມືອງລາວ ມີສິດນຳໃຊ້ທີ່ດິນ ເພື່ອດຳລົງຊີວິດ, ສ້າງທີ່ຢູ່ອາໃສ ແລະ ການຜະລິດ ຕາມກົດໝາຍ. ປະກອບສ່ວນ ໃນການສ້າງບາດກ້າວບຸກທະລຸ ດ້ານການແກ້ໄຂຄວາມທຸກຍາກ ຂອງປະຊາຊົນ ນຳເອົາປະເທດເຮົາອອກຈາກຄວາມດ້ອຍພັດທະນາ. ສ້າງຄວາມກຽມພ້ອມ ໃນການຮັບມື ກັບການປ່ຽນແປງດິນຟ້າອາກາດ ແລະ ໄພພິບັດທາງທໍາມະຊາດ.
6. ຄົ້ນຄວ້າທຸກແຫຼ່ງທຶນຮອນ ທັງພາຍໃນ ແລະ ຕ່າງປະເທດ, ຍາດແຍ່ງເອົາການຊ່ວຍເຫຼືອ ເພື່ອຮັບໃຊ້ໃນຂົງເຂດຊັບພະຍາກອນທຳມະຊາດ ແລະ ສິ່ງແວດລ້ອມ ພ້ອມທັງ ການນຳໃຊ້ທຶນຮອນ ໃຫ້ມີປະສິດທິຜົນ, ນໍາຜົນປະໂຫຍດສູງສຸດໃຫ້ແກ່ປະເທດຊາດ, ຕ້ານການຕົກເຮ່ຍເສຍຫາຍ, ນຳໃຊ້ຊັບພະຍາກອນ ທີ່ຊາດເຮົາມີ, ເຊີດຊູຈິດໃຈເອກະລາດ ເປັນເຈົ້າຕົນເອງ ແລະ ສ້າງຄວາມເຂັ້ມແຂງ ດວ້ຍຄົນລາວເຮົາເອງໃຫ້ນັບມື້ສູງຂຶ້ນ.
7. ສໍາລັບພະນັກງານ-ລັດຖະກອນ, ສະມາຊິກພັກເຮົາ ຕ້ອງໄດ້ເອົາໃຈໃສ່ເຝິກຝົນຕົນເອງ ເພື່ອໃຫ້ຕົນ ສາມາດກ້າວຂຶ້ນ ທຽມທັນກັບຄວາມຮຽກຮ້ອງຕ້ອງການ ຂອງໜ້າທີ່ວຽກງານ. ໃນນີ້, ຕ້ອງເອົາໃຈໃສ່ທີ່ສຸດ ຕໍ່ການເຝິກຝົນຕົນເອງດ້ານທັດສະນະແນວຄິດ, ດ້ານຄວາມຮູ້ຄວາມສາມາດ, ດ້ານຄວາມຮັບຜິດຊອບ ແລະຄວາມເປັນແບບຢ່າງນຳໜ້າ ຕໍ່ໜ້າທີ່ວຽກງານ ແລະຄຸນສົມບັດສິນທຳປະຕິວັດ, ແບບແຜນການດຳລົງຊີວິດ. ຕ້ອງບຸກທະລຸທາງດ້ານຈິນທະນາການ ເຊີ່ງພະນັກງານ, ສະມາຊິກພັກເຮົາ ຕ້ອງປົດປ່ອຍແນວຄິດ, ເປັນຕົ້ນ ແມ່ນ ປົດປ່ອຍອອກຈາກແນວຄິດທັດສະນະຄຳພີ, ຂີ້ຄ້ານມັກງ່າຍ, ເອື່ອຍອີງ, ບໍ່ມັກຮ່ຳຮຽນ ຍົກລະດັບ ແລະອື່ນໆ... ພະນັກງານ, ສະມາຊິກພັກ ຕ້ອງມີສະຕິສະເໝີ ຕໍ່ປະກົດການເສື່ອມຖອຍດ້ານຄຸນສົມບັດ, ຕ້ອງພະຍາຍາມ ປັບປຸງຕົນເອງ ໃຫ້ເປັນຜູ້ປອດໄສຂາວສະອາດ, ເຮັດວຽກ ເພື່ອປະຊາຊົນ, ເຄື່ອນໄຫວນຳພາ ໃຫ້ຖືກຕາມລະບຽບ ກົດໝາຍ.