ເພື່ອຕ້ອນຮັບກອງປະຊຸມໃຫຍ່ຜູ້ແທນແມ່ຍິງທົ່ວປະເທດ ຄັ້ງທີ 8 ທີ່ຈະໄຂຂຶ້ນໃນຕໍ່ໜ້ານີ້ ເວົ້າລວມ, ເວົ້າສະເພາະ ກໍ່ເພື່ອຕ້ອນຮັບ ກອງປະຊຸມໃຫຍ່ຄັ້ງທີ 2 ຂອງອົງຄະນະພັກ ກະຊວງ ຊັບພະຍາກອນ ທຳມະຊາດ ແລະ ສິ່ງແວດລ້ອມ ແລະ ເນື່ອງໃນໂອກາດວັນແມ່ຍິງສາກົນ 8 ມີນາ 2021 ຄົບຮອບ 111 ປີ (8/3/1910- 8/3/2021) ສະຫະພັນແມ່ຍິງ ກະຊວງ ຊັບພະຍາກອນທໍາມະຊາດ ແລະ ສິ່ງແວດລ້ອມ ໄດ້ຈັດຕັ້ງກອງປະຊຸມເລົ່າມູນເຊື້ອຟັງປາຖະກະຖາຂຶ້ນ ໃນຕອນເຊົ້າ ເວລາ 8:30 ໂມງ ຂອງວັນທີ 5 ມີນາ 2021, ທີ່ຫ້ອງປະຊຸມ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ ໂດຍການໃຫ້ກຽດເຂົ້າຮ່ວມຂອງ ທ່ານ ສົມມາດ ພົລເສນາ ກຳມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ, ສະຫາຍ ນາງ ບຸນຄໍາ ວໍລະຈິດ ກໍາມະການສູນກາງພັກ, ຄະນະປະຈໍາພັກກະຊວງ, ຮອງລັດຖະມົນຕີ ກະຊວງ ຊັບພະຍາກອນທໍາມະຊາດ ແລະ ສິ່ງແວດລ້ອມ; ທ່ານ ນາງ ສິລິກິດ ບຸບຜາ ຮອງປະທານຄະນະບໍລິຫານງານສະຫະພັນແມ່ຍິງລາວ, ທ່ານ ນາງ ທອງຈັນ ອະຄະມາເຂດ ປະທານສະຫະພັນແມ່ຍິງ ກະຊວງ ພ້ອມດ້ວຍຄະນະ, ຕາງໜ້າຄະນະພັກຮາກຖານ, ຄະນະໜ່ວຍພັກ, ຄະນະຊາວໜຸ່ມ, ກໍາມະບານ, ພະນັກງານບໍານານ  ແລະ ບັນດາສະມາຊິກແມ່ຍິງ ພາຍໃນ ກະຊວງ ເຂົ້າຮ່ວມມີຈໍານວນທັງໝົດ 202 ທ່ານ, ຊາຍ 23 ທ່ານ.

ໃນກອງປະຊຸມຄັ້ງນີ້ ໄດ້ຮັບຟັງການເລົ່າປະຫວັດຄວາມເປັນມາຂອງວັນແມ່ຍິງສາກົນ ໂດຍທ່ານ ນາງ ສິລິກິດ ບຸບຜາ ຮອງປະທານຄະນະບໍລິຫານງານສະຫະພັນແມ່ຍິງລາວ,  ໄດ້ຮັບຟັງການລາຍງານຫຍໍ້ ກ່ຽວກັບ ຜົນງານການເຄື່ອນໄຫວການຈັດຕັ້ງປະຕິບັດ ວຽກງານພົວພັນຮ່ວມມື ສາກົນ ໃນ 1 ປີ ຜ່ານມາ ແລະ ທິດທາງແຜນການໃນຕໍ່ໜ້າ ໂດຍ ທ່ານ ນາງ ພັກກາວັນ ພິດສະໄໝ ຮອງປະທານສະຫະພັນແມ່ຍິງ ກຊສ, ກອງປະຊຸມໄດ້ຮັບຊົມວິດີໂອ ກິດຈະກໍາການເຄື່ອນໄຫວຂອງແມ່ຍິງ ໃນໄລຍະ 2 ປີຜ່ານມາ. ນອກຈາກນັ້ນ, ກອງປະຊຸມຍັງໄດ້ ຜ່ານຂໍ້ຕົກລົງຍ້ອງຍໍຜົນງານການຈັດຕັ້ງ ປະຕິບັດຂໍ້ແຂ່ງຂັ້ນສາມດີ ປະຈຳປີ 2020 ແລະ ມອບໃບຍ້ງຍໍ ໃຫ້ບັນດາສະຫະພັນແມ່ຍິງຮາກຖານ ແລະ ໜ່ວຍແມ່ຍິງ ພາຍໃນ ກຊສ.


ສະຫະພັນແມ່ຍິງ ກຊສ ສາມາດຕີລາຄາໄດ້ວ່າບັນດາສະມາຊິກແມ່ຍິງ ພາຍໃນ ກະຊວງ ຊັບພະຍາກອນ ທຳມະຊາດ ແລະ ສິ່ງແວດລ້ອມ ມີຄວາມສາມັກຄີປຸ້ມລຸມກັນໃນການປະຕິບັດວຽກງານ ທີ່ໄດ້ຮັບການມອບໝາຍໃຫ້, ເຮັດລ້ອນໜ້າທີ່ຂອງຕົນ, ມີບົດບາດເທົ່າທຽມກັບເພດຊາຍ ໃນການ ປະຕິບັດໜ້າທີ່ວຽກງານວິຊາສະເພາະ ໄປຄຽງຄູ່ກັບການປະຕິບັດຂໍ້ແຂ່ງຂັນ 3 ດີ ກໍຄືການສ້າງ ຂະບວນການຕ້ອນຮັບກອງປະຊຸມໃຫຍ່ຜູ້ແທນອົງຄະນະພັກ ກະຊວງ ຊັບພະຍາກອນ ທຳມະຊາດ ແລະ ສິ່ງແວດລ້ອມ ຄັ້ງທີ II ທີ່ຈະໄຂຂຶ້ນໃນໄວໆ ນີ້ ແລະ ມີຄວາມຮັບຜິດຊອບ ໃນການປ້ອງກັນ ພະຍາດໂຄວິ-19 ພາຍໃຕ້ຄຳຂວັນ ການນຳເພດຍິງ: ການບັນລຸຄວາມສະເໝີພາບ ໃນໄລຍະໂຄວິດ 19.  ກອງປະຊຸມໄດ້ສໍາເລັດໃນ ເວລາ 12.00 ໂມງຂອງວັນດຽວກັນ.

ນອກຈາກນັ້ນ, ໃນຕອນບ່າຍຂອງພິທີ ຍັງໄດ້ມີງານຕະຫຼາດນັດວາງສະແດງສິນຄ້າ ຂອງບັນດາສະຫະພັນ ແມ່ຍິງຮາກຖານ ແລະ ໜ່ວຍແມ່ຍິງ ພາຍໃນ ກຊສ ແລະ ໄດ້ມີການປະກວດ ການຕົກແຕ່ງຮ້ານ, ການຈັດວາງສິນຄ້າໜ້າສົນໃຈ, ສິນຄ້າມີລັກສະນະສ້າງສັນ, ຄຳນຶງເຖິງການປົກປັກຮັກສາສິ່ງແວດລ້ອມ ແລະ ອື່ນໆ. ເຊິ່ງໜ່ວຍທີ່ໄດ້ຮັບລາງວັນຊະນະເລີດ ອັນດັບທີ 1 ແມ່ນ ສະຫະພັນແມ່ຍິງຮາກຖານ ກົມແຜນການ ແລະ ການເງິນ; ລາງວັນຊະນະເລີດ ອັນດັບທີ 2 ແມ່ນ ສະຫະພັນແມ່ຍິງຮາກຖານ ກົມສິ່ງແວດລ້ອມ ແລະ ລາງວັນຊະນະເລີດອັນດັບທີ 3 ແມ່ນ ສະຫະພັນແມ່ຍິງຮາກຖານ ກົມທີ່ດິນ.