ໃນຕອນເຊົ້າວັນທີ 17 ທັນວາ 2020 ນີ້ ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ໄດ້ໃຫ້ກຽດລົງຢ້ຽມຢາມ ກົມທີ່ດິນ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ໂດຍໄດ້ຮັບການຕ້ອນຮັບຈາກ ທ່ານ ສົມມາດ ພົລເສນາ ລັດຖະມົນຕີ ກຊສ, ທ່ານ ນາງ ບຸນຄໍາ ວໍລະຈິດ, ຮອງລັດຖະມົນຕີ ກຊສ ພ້ອມດ້ວຍບັນດາທ່ານຫົວຫນ້າກົມທີ່ກ່ຽວຂ້ອງ.
 
 
ຈຸດປະສົງຂອງການລົງມາຢ້ຽມຢາມຄັ້ງນີ້ ເພື່ອຕິດຕາມຄວາມຄືບໜ້າການຂຶ້ນທະບຽນອອກໃບຕາດິນ, ການປັບປຸງລະບົບຄຸ້ມຄອງທີ່ດິນທັນສະໄຫມ, ຜົນການທົດລອງເຊື່ອມລະບົບກັບທະນາຄານການຄ້າຕ່າງປະເທດລາວມະຫາຊົນ ແນໃສ່ເກັບພາສີທີ່ດິນແບບທັນສະໄໝ ໂດຍເຊື່ອມກັບລະບົບຄຸ້ມຄອງທີ່ດິນຂອງກົມທີ່ດິນ. ໂອກາດນີ້ທ່ານຮອງນາຍົກໄດ້ກ່າວສະແດງຄວາມຊົມເຊີຍຕໍ່ຜົນງານທີ່ຍາດມາໄດ້ ແລະ ຊີ້ນໍາໃຫ້ກົມວິຊາການຂອງ 2 ກະຊວງສືບຕໍ່ເຮັດວຽກຮ່ວມກັນເພື່ອເຊື່ອມລະບົບ ລະຫວ່າງ ກົມທີ່ດິນ, ກົມສ່ວຍສາອາກອນ, ທະນາຄານການຄ້າຕ່າງປະເທດລາວມະຫາຊົນ ໃຫ້ສໍາເລັດກ່ອນວັນທີ 28 ກຸມພາ 2021 ທີ່ຈະມາເຖິງ.