ໃນວັນທີ 18 ພະຈິກ 2020 ຄະນະຊາວໜຸ່ມປະຊາຊົນປະຕິວັດລາວ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ຈັດພິທີເປີດການແຂ່ງຂັນກິລາບານເຕະຍິງ-ຊາຍ ຊິງຂັນ ເລຂາຄະນະພັກກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ ຄັ້ງທີ VII ປະຈຳປີ 2020 ຂຶ້ນທີ່ເດີ່ນ ເຟີຣາຣີ, ບ້ານຮ່ອງແກ, ເມືອງ ໄຊເສດຖາ, ນະຄອນຫຼວງວຽງຈັນ. ໂດຍເປັນກຽດເຂົ້າຮ່ວມຂອງ ສະຫາຍ ບຸນມີ ພຸດທະວົງ ຮອງເລຂາຄະນະພັກ, ຮອງລັດຖະມົນຕີ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ ແລະ ການເຂົ້າເຂົ້າຮ່ວມຂອງບັນດາ ສະຫາຍເລຂາຄະນະພັກຮາກຖານ, ບັນດາເລຂາໜ່ວຍພັກ ທີ່ຂຶ້ນກັບຄະນະພັກຮາກຖານ ແລະ ອົງຄະນະພັກກະຊວງ, ປະທານກຳມະບານ, ປະທານສະຫະພັນແມ່ຍິງ ກຊສ ພ້ອມທັງບັນດາຄະນະບໍລິຫານງານ ຊາວໜຸ່ມປະຊາຊົນປະຕິວັດລາວ ກຊສ, ຄະນະໜ່ວຍຊາວໜຸ່ມ, ແຂກຖືກເຊີນ, ພະນັກງານ ແລະ ນັກກິລາທັງໝົດເຂົ້າຮ່ວມ.

ໃນວິທີ, ສະຫາຍ ວິລະສັກ ຈູນດາລາ ເລຂາຄະນະບໍລິຫານງານຊາວໜຸ່ມປະຊາຊົນປະຕິວັດລາວ ກຊສ, ໄດ້ຂຶ້ນລາຍງານວ່າ: ການນຈັດການແຂ່ງຂັນກິລາບານເຕະຍິງຊາຍຄັ້ງນີ້ແມ່ນ ອີງຕາມແຜນການເຄື່ອນໄຫວວຽກງານປະຈໍາປີ. ຂອງ ຄະນະບໍລິຫານງານຊາວໜຸ່ມກະຊວງ ໂດຍສະເພາະແມ່ນ ການສ້າງຂະບວນການຄຳນັບຊົມເຊີຍ 02 ວັນປະຫວັດສາດ ຂອງຊາດ ຄື: ວັນຊາດທີ 2 ທັນວາຄົບຮອບ 45 ປີ ແລະ ວັນສ້າງຕັ້ງພັກປະຊາຊົນປະຕິວັດລາວຄົບຮອບ 65 ປີ, ທັງເປັນການສ້າງຂະບວນການຄຳນັບຮັບຕ້ອນກອງປະຊຸມໃຫຍ່ ຄັ້ງທີ II ຂອງອົງຄະນະພັກກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ ແລະ ທັງຊົມເຊີຍກອງໃຫຍ່ ຄັ້ງທີ II ຜູ້ແທນຊາວໜຸ່ມ ກຊສ ພິເສດແມ່ນ ເພື່ອເປັນການສືບຕໍ່ປຸກລະດົມ ແລະ ຊຸກຍູ້ຈິດໃຈຄວາມຫ້າວຫັນຂອງບັນດາສະຫາຍສະມາຊິກຊາວໜຸ່ມ ໃນທົ່ວອົງຄະນະພັກກະຊວງ ເລັງໃສ່ແຂ່ງຂັນກັນສ້າງຜົນງານໃນການຈັດຕັ້ງປະຕິບັດກອງປະຊຸມໃຫຍ່ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VII (2016-2020) ໃນໄລຍະທ້າຍສະໄໝ ທັງເປັນການສ້າງຄວາມຮັກແພງສາມັກຄີກັນ ຄັ້ງທີ X ລະຫວ່າງສະມາຊິກຊາວໜຸ່ມ ພະນັກງານທັງໝົດຢູ່ພາຍໃນກະຊວງ ຊັບພະຍາກອນທຳ ມະຊາດ ແລະ ສິ່ງແວດລ້ອມ.

ສໍາລັບປີນີ້, ທີມເຕະບານປະກອບມີທັງໝົດ 19 ທີມ, ຍິງ 8 ທີມ, ຫຼຸດຈາກປີຜ່ານມາ 3 ທີມ, ການແຂ່ງຂັນດັ່ງກ່າວແມ່ນຈະໄດ້ດຳເນີນການແຂ່ງຂັນທັງໝົດ 21 ນັດ, ເລີ່ມແຕ່ວັນທີ 18 ພະຈິກ ຫາ 01 ທັນວາ 2020. ຈາກນັ້ນ ສະຫາຍ ບຸນມີ ພຸດທະວົງ ຮອງເລຂາຄະນະພັກ, ຮອງລັດຖະມົນຕີ ກຊສ ກໍ່ໄດ້ຂຶ້ນກ່າວເປີດພິທີຢ່າງເປັນທາງການ ແລະ ລັ່ນຄ້ອງ 9 ບາດ.