ໃນວັນທີ 15 ຕຸລາ 2020 ຢູ່ທີ່ ຫ້ອງປະຊຸມ ກົມທີ່ດິນ, ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ຈັດພິທີປິດການຝຶກອົບຮົມ ວຽກງານການຄຸ້ມຄອງ-ບໍລິຫານທີ່ດິນ ດ້ວຍລະບົບດິຈິຕອລ ໃຫ້ພະນັກງານ ວິຊາການທີ່ດິນ ຫ້ອງການ ຊັບພະຍາກອນທໍາມະຊາດ ແລະ ສິ່ງແວດລ້ອມ 07 ເມືອງ (ເມືອງ ຈັນທະບູລີ, ເມືອງ ໄຊເສດຖາ, ເມືອງ ສີສັດຕະນາກ, ເມືອງ ສີໂຄດຕະບອງ, ເມືອງ ໄຊທານີ, ເມືອງ ຫາດຊາຍຟອງ ແລະ ເມືອງ ນາຊາຍທອງ) ພາຍໃນນະຄອນຫຼວງວຽງຈັນ ໂດຍການເປັນປະທານຂອງ ທ່ານ ບຸນມີ ພຸດທະວົງ, ຮອງລັດຖະມົນຕີ ກະຊວງ ຊັບພະຍາກອນທໍາມະຊາດ ແລະ ສິ່ງແວດລ້ອມ ແລະ ການເຂົ້າຮ່ວມຂອງຄະນະກົມທີ່ດິນ, ຄະນະພະແນກ ຊັບພະຍາກອນທຳມະຊາດ ແລະ ສິ່ງແວດລ້ອມ ນະຄອນຫຼວງວຽງຈັນ, ຄະນະນຳຫ້ອງການ ຊັບພະຍາກອນທຳມະຊາດ ແລະ ສິ່ງແວດລ້ອມເມືອງ ແລະ ວິຊາການຫ້ອງການ ຊັບພະຍາກອນທຳມະຊາດ ແລະ ສິ່ງແວດລ້ອມເມືອງ ເຂົ້າຮ່ວມ ລວມທັງໝົດມີ 55 ທ່ານ.

ໃນພິທີ ທ່ານ ນ. ຈັນສະໄຫມ ກົມມະນີວັນ ຕາງຫນ້າຄະນະຄູຝຶກໄດ້ຂຶ້ນລາຍງານກ່ຽວກັບ ຈຸດປະສົງຂອງການຝຶກອົບຮົມແມ່ນເພື່ອສ້າງຄວາມເຂັ້ມແຂງໃຫ້ທ້ອງຖິ່ນ ແນໃສ່ຮັບປະກັນການຈັດຕັ້ງປະຕິບັດ ກົດຫມາຍ ວ່າດ້ວຍທີ່ດິນ ສະບັບປັບປຸງ ສະບັບເລກທີ 70/ສພຊ, ລົງວັນທີ 21 ມິຖຸນາ 2019 ໃຫ້ປະກົດຜົນເປັນຈິງ ໃນການຫັນວຽກງານຄຸ້ມຄອງບໍລິຫານທີ່ດິນໃຫ້ຂັ້ນເມືອງຮັບຜິດຊອບ ເປັນຕົ້ນ: ວຽກງານການຂຶ້ນທະບຽນ, ຈົດທະບຽນປະເມີນລາຄາທີ່ດິນ, ຫັນເປັນລະບົບທັນສະໄຫມຈາກລະບົບເຈ້ຍສູ່ລະບົບດິຈິຕອລ ເພື່ອຕອບສະໜອງການບໍລິການທາງສັງຄົມໃຫ້ມີຄວາມວ່ອງໄວ, ໂປ່ງໃສ, ກວດສອບໄດ້.

ການຝຶກອົບຮົມໃນຄັ້ງນີ້ ໄດ້ເລີ່ມແຕ່ວັນທີ 07 ກັນຍາ ເຖິງ 15 ຕຸລາ 2020 ເຊິ່ງໄດ້ແບ່ງອອກເປັນ 2 ພາກຄື: ພາກທິດສະດີ ໄດ້ຮຽນຮູ້ ກ່ຽວກັບ ການນໍາສະເໜີບັນດານິຕິກຳ, ລະບຽບການ, ຄູ່ມືທີ່ຕິດພັນກັບການຈັດຕັ້ງປະຕິບັດວຽກງານ ແລະ ພາກຈັດຕັ້ງປະຕິບັດວຽກງານຕົວຈິງ ແມ່ນຄະນະຄູຝຶກໄດ້ນໍາພານັກສໍາມະນາກອນ ທົດລອງໃຫ້ມີຄວາມຊຳນິຊຳນານແລ້ວຈຶ່ງໄດ້ນໍາພາຈັດຕັ້ງປະຕິບັດວຽກງານຕົວຈິງໃນແຕ່ລະດ້ານ.

ໃນຕອນທ້າຍ ທ່ານ ບຸນມີ ພຸດທະວົງ, ຮອງລັດຖະມົນຕີ ກະຊວງ ຊັບພະຍາກອນທໍາມະຊາດ ແລະ ສິ່ງແວດລ້ອມ ໄດ້ໃຫ້ກຽດມອບໃບຢັ້ງຢືນ ໃຫ້ແກ່ນັກສໍາມະນາກອນ ຈໍານວນ 45 ທ່ານ. ພ້ອມນັ້ນ, ທ່ານຮອງລັດຖະມົນຕີຍັງໄດ້ໂອ້ລົມ ແລະ ໃຫ້ທິດຊີ້ນໍາຕໍ່ນັກສໍາມະນາກອນ ໃຫ້ສືບຕໍ່ນໍາເອົາຜົນສຳເລັດໃນການຝຶກອົບຮົມຄັ້ງນີ້ໄປຜັນຂະຫຍາຍເຂົ້າໃນວຽກງານຕົວຈິງໃຫ້ມີປະສິດທິພາບ ແລະ ປະສິດທິຜົນ ດ້ວຍຄວາມຮັບຜິດຊອບສູງ.