ຕອນເຊົ້າ ວັນທີ 3 ກັນຍາ 2020 ເວລາ 9:30 ຢູ່ທີ່ສະໂມສອນ ຫ້ອງວ່າການ ກະຊວງ ປ້ອງກັນປະເທດ ໄດ້ຈັດຕັ້ງພິທີປະດັບຫຼຽນກາ 70 ປີ ຂອງກອງທັບ ໃຫ້ການນໍາ, ອະດິດການນໍາ, ຫົວຫນ້າຫ້ອງການ, ຮອງຫົວຫນ້າຫອ້ງການ ແລະ ບັນດາທ່ານຫົວຫນ້າ ແລະ ຮອງຫົວຫນ້າກົມກອງ ຂອງຫ້ອງວ່າການປະທານປະເທດ ແລະ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມຂຶ້ນ ໂດຍການໃຫ້ກຽດເຂົ້າຮ່ວມເປັນປະທານປະດັບຫລຽນກາຄັ້ງນີ້ ຂອງສະຫາຍ ພົນໂທ ປອ. ທອງລອຍ ສຸລິວົງ, ກໍາມະການສູນກາງພັກ, ຮອງລັດຖະມົນຕີ ກະຊວງ ປ້ອງກັນປະເທດ, ຫົວໜ້າກົມໃຫຍ່ການເມືອງກອງທັບ ແລະ ການເຂົ້າຮ່ວມຮັບການປະດັບຫລຽນກາ 70 ປີ ຂອງກອງທັບ ນໍາພາໂດຍສະຫາຍ ຄຳເມິງ ພົງທະດີ, ກຳມະການສູນກາງພັກ, ລັດຖະມົນຕີ, ຫົວໜ້າຫ້ອງວ່າການປະທານປະເທດ; ສະຫາຍ ສົມມາດ ພົລເສນາ, ກຳມະການສູນກາງພັກ, ລັດຖະມົນຕີ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ, ພ້ອມດ້ວຍບັນດາທ່ານຮອງລັດຖະມົນຕີ, ອະດິດຮອງລັດຖະມົນຕີ, ບັນດາທ່ານຫົວຫນ້າ ແລະ ຮອງຫົວຫນ້າກົມກອງ, ບັນດາທ່ານອະດິດຫົວຫນ້າກົມກອງຂອງ ທັງສອງພາກສ່ວນເຂົ້າຮ່ວມ.

ໃນພິທີດັ່ງກ່າວ, ກ່ອນອື່ນຫມົດ ສະຫາຍ ພົນຈັດຕະວາ ສີທາ ດວງມາລາ, ຫົວໜ້າ ກົມນະໂຍບາຍ, ກົມໃຫຍ່ການເມືອງກອງທັບ ໄດ້ຂຶ້ນຜ່ານຂໍ້ຕົກລົງຂອງ ກະຊວງ ປ້ອງກັນປະເທດ ວ່າດ້ວຍ ການມອບຫຼຽນກາລະນຶກ 70 ປີ ກອງທັບປະຊາຊົນລາວ ໃຫ້ແກ່ການນຳ, ອະດິດການນໍາ, ຫົວຫນ້າຫ້ອງການ, ບັນດາທ່ານຮອງຫົວຫນ້າຫ້ອງການ, ບັນດາທ່ານຫົວຫນ້າ ແລະ ຮອງຫົວຫນ້າກົມກອງ ກະຊວງ ຊັບພະຍາກອນ ແລະ ສິ່ງແວດລ້ອມ ຈຳນວນ 75 ທ່ານ ແລະ ການນໍາ, ຫົວຫນ້າຫ້ອງການ, ຮອງຫົວຫນ້າຫ້ອງການ ແລະ ບັນດາທ່ານຫົວຫນ້າ ແລະ ຮອງຫົວຫນ້າກົມກອງ ຫ້ອງວ່າການປະທານປະເທດ ຈຳນວນ 15 ທ່ານ.

ການຈັດຕັ້ງພິທີປະດັບຫລຽນກາ 70 ປີ ຂອງກອງທັບ ໃນຄັ້ງນີ້ ແມ່ນເພື່ອເປັນການຍ້ອງຍໍສັນລະເສີນຜົນງານ, ຄຸນງາມຄວາມດີຂອງ ການນຳ ແລະ ພະນັກງານຫລັກແຫລ່ງ ຂອງຫ້ອງວ່າການປະທານປະເທດ ແລະ ກະຊວງ ຊັບພະຍາກອນ ແລະ ສິ່ງແວດລ້ອມ ທີ່ມີຜົນງານຢ່າງ ຕັ້ງໜ້າ ປະກອບສ່ວນເຂົ້າໃນວຽກງານປ້ອງກັນຊາດ-ປ້ອງກັນຄວາມສະຫງົບໃນໄລຍະຜ່ານມາ ໂອກາດດັ່ງກ່າວ ສະຫາຍ ພົນໂທ ປອ ທອງລອຍ ສຸລິວົງ ກໍ່ໄດ້ໃຫ້ກຽດຂຶ້ນປະດັບຫຼຽນກາລະນຶກ 70 ປີ ຂອງກອງທັບປະຊາຊົນລາວ ໃຫ້ແກ່ການນຳ ແລະ ພະນັກງານທັງສອງອົງການຈັດຕັ້ງ ຢ່າງສົມກຽດ. ພ້ອມທັງມີຄໍາເຫັນຕໍ່ພິທີດັ່ງກ່າວຄື: : ຕະຫຼອດໄລຍະ 70 ປີ ທີ່ຜ່ານມາ ກອງທັບປະຊາຊົນລາວ ໂດຍໄດ້ຮັບການອຸ້ມຊູ ຊ່ວຍເຫຼືອ ຈາກປະຊາຊົນບັນດາເຜົ່າ ແລະ ທຸກພາກສ່ວນຂອງສັງຄົມ ກອງທັບເຮົາ ໄດ້ເຕີບໃຫຍ່ເຂັ້ມແຂງ ແລະ ສາມາດເຮັດລ້ອນຫນ້າທີ່ອັນມີກຽດຂອງຕົນ ໃນການປົກປັກຮັກສາຄວາມສະຫງົບເປັນລະບຽບຮຽບຮ້ອຍ, ຮັກສາໄດ້ສັນຕິພາບ, ເອກະລາດ, ອະທິປະໄຕ ແລະ ພື້ນແຜ່ນດິນອັນຄົບຖ້ວນໄວ້ໄດ້ຢ່າງຫມັ້ນຄົງ ພາຍໃຕ້ການຊີ້ນໍາເດັດຂາດໂດຍກົງຂອງພັກປະຊາຊົນປະຕິວັດລາວ ເຊີ່ງໄດ້ສ້າງເງື່ອນໄຂອັນສະດວກໃຫ້ແກ່ການສ້າງສາ ແລະ ພັດທະນາປະເທດຊາດຂອງພວກເຮົາ. ພ້ອມດຽວກັນນີ້, ສະຫາຍ ພົນໂທ. ປອ. ທອງລອຍ ສຸລິວົງ ຍັງໄດ້ສະເຫນີມາຍັງຫ້ອງວ່າການປະທານປະເທດ ກໍ່ຄື ກະຊວງ ຊັບພະຍາກອນທໍາມະຊາດ ແລະ ສິ່ງແວດລ້ອມ ໃຫ້ສຶບຕໍ່ໃຫ້ການຊ່ວຍເຫລືອກອງທັບປະຊາຊົນລາວ ໃນຕໍ່ຫນ້າ.