ໃນຕອນເຊົ້າຂອງວັນທີ 07 ສິງຫາ 2020 ທີ່ໂຮງແຮມເສດຖາພາເລດ, ນະຄອນຫຼວງວຽງຈັນ ໄດ້ມີການຈັດກອງປະຊຸມ ເປີດກວ້າງເຜີຍແຜ່ບົດປະເມີນຜົນກະທົບຕໍ່ສິ່ງແວດລ້ອມແບບລະອຽດ ແລະ ແຜນການຄຸ້ມຄອງ ແລະ ຕິດຕາມກວດກາສິ່ງແວດລ້ອມ ໂຄງການໄຟຟ້າພະລັງງານຄວາມຮ້ອນຖ່ານຫີນ ເມືອງຊຳເໜືອ ແຂວງຫົວພັນ ຂຶ້ນ, ໂດຍການໃຫ້ກຽດເປັນປະທານຮ່ວມຂອງ ທ່ານ ນາງ ບຸນຄຳ ວໍລະຈິດ ຮອງລັດຖະມົນຕີ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ, ທ່ານ ຈັນສອນ ແສນບຸດຕະລາດ ຮອງລັດຖະມົນຕີ ກະຊວງ ພະລັງງານ ແລະ ບໍ່ແຮ່, ທ່ານ ພັນທອງ ເພັດໄຊສົມພັນ ຮອງເຈົ້າແຂວງ ແຂວງຫົວພັນ ແລະ ທ່ານ ມະນີໂສ ຊາມຸນຕີ ຮອງປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ, ສະພາແຫ່ງຊາດ ແລະ ມີຫົວໜ້າກົມ, ຮອງກົມ, ເຈົ້າເມືອງ, ຮອງເຈົ້າເມືອງ, ຫົວໜ້າພະແນກການທີ່ກ່ຽວຂ້ອງຂອງແຂວງ, ກະຊວງທີ່ກ່ຽວຂ້ອງ, ຜູ້ຕາງໜ້າຈາກອົງການຈັດຕັ້ງສາກົນ, ຕາງໜ້າເຈົ້າຂອງໂຄງການ ກໍຄື ບໍລິສັດ ໄຟຟ້າຄວາມຮ້ອນຖ່ານຫີນ ຫົວພັນ ຈຳກັດ ແລະ ຕາງໜ້າ ກຸ່ມບໍລິສັດທີ່ປຶກສາສິ່ງແວດລ້ອມແຫ່ງຊາດ ເຂົ້າຮ່ວມ.

ໂຄງການດັ່ງກ່າວ ຕັ້ງຢູ່ ທິດຕາເວັນຕົກສ່ຽງໃຕ້ ຂອງ ແຂວງຫົວພັນ ໃນເຂດເມືອງຊຳເໜືອ ມີໄລຍະຫ່າງແຕ່ໂຮງງານ ຫາ ເທດສະບານແຂວງ 28 ກມ, ທາງອາກາດ 15 ກມ, ມີເນື້ອທີ່ສຳຫຼວດຂຸດຄົ້ນ 26,35 ກມ2 ຊຶ່ງກວມເອົາ 6 ບ້ານ: ບ້ານສະເຫຼີຍ, ບ້ານໂພນໄຊ, ບ້ານຫຼັກຊາວ, ບ້ານດອນ, ບ້ານເມືອງຢອນ ແລະ ບ້ານຫ້ວຍຄົງ ແລະ ນອນໃນເຂດປ່າຜະລິດແຫ່ງຊາດ ພູລິວ ຈໍານວນ 480 ເຮັກຕາ. ໂຮງງານໄຟຟ້າພະລັງງານຄວາມຮ້ອນຖ່ານຫີນຫົວພັນ ຈະມີກໍາລັງການຕິດຕັ້ງໄຟຟ້າ 600 ເມກາວັດ (ມີເຕົາເຜົາ 2 ໜ່ວຍ, ໜ່ວຍລະ 300 ເມກາວັດ).

ໃນກອງປະຊຸມ ໄດ້ຮັບຟັງການລາຍງານໂດຍຕາງໜ້າກຸ່ມບໍລິສັດທີ່ປຶກສາສິ່ງແວດລ້ອມແຫ່ງຊາດ ກ່ຽວກັບ ແຜນການກໍ່ສ້າງໂຄງການ, ເນື້ອໃນບົດປະເມີນຜົນກະທົບຕໍ່ສິ່ງແວດລ້ອມແບບລະອຽດ, ແຜນຄຸ້ມຄອງ ແລະ ຕິດຕາມກວດກາສິ່ງແວດລ້ອມ ເປັນຕົ້ນ: ເຕັກໂນໂລຊີທີ່ຈະນໍາໃຊ້ໃນການຜະລິດໄຟຟ້າ, ກິດຈະກໍາຂອງໂຄງການ, ຂໍ້ມູນພື້ນຖານທາງດ້ານສິ່ງແວດລ້ອມສັງຄົມ ແລະ ທຳມະຊາດ ເຂດໂຄງການ ແລະ ເຂດໃກ້ຄຽງ, ຜົນກະທົບທີ່ອາດເກີດຂຶ້ນຈາກກິດຈະກໍາຕ່າງໆ, ມາດຕະການປ້ອງກັນ, ຫຼຸດຜ່ອນ ແລະ ແກ້ໄຂຜົນກະທົບ ຕໍ່ສິ່ງແວດລ້ອມສັງຄົມ ແລະ ທໍາມະຊາດ, ການຈໍາລອງການກະຈາຍຕົວຂອງມົນລະພິດທາງອາກາດ.

ກອງປະຊຸມໄດ້ປຶກສາຫາລື ແລະ ປະກອບຄໍາເຫັນຮ່ວມກັນ ຢ່າງກົງໄປກົງມາ ແລະ ໃນຕອນທ້າຍ ຄະນະປະທານກໍ່ໄດ້ໃຫ້ທິດຊີ້ນໍາ ເພື່ອໃຫ້ເຈົ້າຂອງໂຄງການ ນໍາຄໍາເຫັນຂອງກອງປະຊຸມໄປຄົ້ນຄວ້າ ແລະ ປັບປຸງບົດລາຍງານການປະເມີນຜົນກະທົບຕໍ່ສິ່ງແວດລ້ອມແບບລະອຽດ ແລະ ແຜນຄຸ້ມຄອງຕິດຕາມກວດກາສິ່ງແວດລ້ອມ ເພື່ອໃຫ້ມີເນື້ອໃນທີ່ຄົບຖ້ວນສົມບູນ, ໄດ້ຕາມມາດຕະຖານສາກົນ ແລະ ສາມາດນຳໄປຈັດຕັ້ງປະຕິບັດໄດ້ ຢ່າງມີປະສິດທິຜົນສູງ, ທັງນີ້ກໍ່ເພື່ອຮັບປະກັນໃຫ້ການພັດທະນາ ໄປຕາມທິດສີຂຽວ ແລະ ຍືນຍົງ ຕາມທິດທີ່ລັດຖະບານກຳນົດໄວ້.