ກອງ​ປະ­ຊຸມ​ໃຫຍ່ ​ຄັ້ງ​ທີ I ຂອງ​ໜ່ວຍ​ພັກ​ ພະແນກນະໂຍບາຍ,  ກົມຄວບຄຸມ ແລະ ຕິດຕາມກວດກາມົນລະພິດ ໄດ້​ຈັດ​ຂຶ້ນໃນຕອນບ່າຍຂອງ ວັນ​ທີ 30 ກໍ­ລະ­ກົດ 2020​ ທີ່​ຫ້ອງປະຊຸມ ກົມຄວບຄຸມ ແລະ ຕິດຕາມກວດກາມົນລະພິດ, ໂດຍ​ໃຫ້​ກຽດ​ເຂົ້າ​ຮ່ວມຂອງ ສະ­ຫາຍ ບຸນມີ ພຸດທະວົງ ຮອງເລຂາຄະນະພັກ ກະຊວງ, ຮອງລັດຖະມົນຕີ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ມີ​ແຂກ​ຖືກ​ເຊີນຈາກບັນດາຫນ່ວຍພັກອື່ນໆ ອ້ອມຂ້າງ ກຊສ ແລະ ສະ​ມາ​ຊິກ​ພັກຢູ່ພາຍໃນຫນ່ວຍ​ເຂົ້າ​ຮ່ວມ ທັງຫມົດ 28 ສະຫາຍ, ຍິງ 7 ສະຫາຍ.

     ໃນກອງປະຊຸມ ສະຫາຍ ສີວັນນະກອນ ມາລີວັນ ເລຂາໜ່ວຍພັກ ພະແນກ ນະໂຍບາຍ,  ກົມຄວບຄຸມ ແລະ ຕິດຕາມກວດກາມົນລະພິດ ໄດ້ຂຶ້ນຜ່ານບົດສະຫຼຸບ ການນຳພາການເຄື່ອນໄຫວວຽກງານໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ, ໜ່ວຍພັກ ພະແນກ ພະແນກນະໂຍບາຍ ມີສະມາຊິກພັກ ທັງໝົດ 6 ສະຫາຍ, ຍິງ 1 ສະຫາຍ, ໜ່ວຍພັກ ພະແນກໄດ້ເອົາໃຈໃສ່ຊີ້ນໍາ-ນໍາພາ ການຈັດຕັ້ງປະຕິບັດວຽກງານສ້າງນະໂຍບາຍ, ຍຸດທະສາດ ແລະ ລະບຽບການຕ່າງໆ ລວມທັງ ການຜັນຂະຫຍາຍບັນດາສົນທິສັນຍາ ແລະ ອະນຸສັນຍາ ທີ່ ສປປ ລາວ ເປັນພາຄີ ໃຫ້ມາເປັນ ແຜນງານ, ແຜນການ ແລະ ໂຄງການລະອຽດ ແນໃສ່ປ້ອງກັນ, ຄວບຄຸມມົນລະພິດ, ຄຸ້ມຄອງສານເຄມີ​ເປັນພິດ, ສິ່ງເສດເຫຼືອອັນຕະລາຍ, ສິ່ງເສດເຫຼືອທົ່ວໄປ ແລະ ວຽກງານການຕິດຕາມກວດກາການນໍາໃຊ້ຊັບພະຍາກອນທໍາມະຊາດ ທີ່ກໍ່ໃຫ້ເກີດບັນຫາມົນລະພິດ ແລະ ສົ່ງຜົນກະທົບຕໍ່ສິ່ງແວດລ້ອມສັງຄົມ ແລະ ທໍາມະຊາດ ມາ​ເປັນ​ແຜນ​ຍຸດ​ທະ​ສາດ, ​ແຜນການ, ແຜນ​ງານ​ ແລະ ​ໂຄງການລະອຽດຂອງ​ຕົນ ໃນການຈັດ​ຕັ້ງ​ປະຕິບັດວຽກງານ ​ຕາມລະບຽບ​ຫຼັກການທັງພາຍ​ໃນ ແລະ ສາກົນ ​ໃຫ້ໄດ້​ຮັບໝາກຜົນເປັນຢ່າງດີ ຊຶ່ງເປັນຜົນງານອັນພົ້້ນເດັ່ນ ແລະ ສໍາເລັດໃນຫຼາຍດ້ານດັ່ງນີ້:

  1. ສໍາເລັດ ການປັບປຸງ ມາດຕະຖານສິ່ງແວດລ້ອມແຫ່ງຊາດ ໃນປີ 2017 ທີ່ນອນໃນກອບນະໂຍບາຍການເຕີບໂຕສີຂຽວ ເຊິ່ງໄດ້ເຜີຍແຜ່ ແລະ ແຈກຢາຍປື້ມດັ່ງກ່າວ ໃຫ້ກັບ ພາກລັດ, ເອກະຊົນ, ໂຄງການ ແລະ ບໍລິສັດບໍລິການດ້ານສິ່ງແວດລ້ອມ ໃນຂອບເຂດທົ່ວປະເທດ;
  2. ສໍາເລັດການສ້າງຄູ່ມືແນະນໍາວ່າດ້ວຍ ການຄຸ້ມຄອງ ແລະ ກໍາຈັດຂີ້ເຫຍື້ອ ໃນປີ 2019; ກຽມຈັດພີມເຜີຍແຜ່ແລະ ແຈກຢາຍ ໃນທົ່ວປະເທດ;
  3. ກຳລັງສ້າງ ຮ່າງຂໍ້ຕົກລົງ ວ່າດ້ວຍການຄວບຄຸມມົນລະພິດ; ຮ່າງວິໄສທັດ ຮອດປີ 2030, ຍຸດທະສາດ 10 ປີ ແລະ ແຜນດໍາເນີນງານ ວ່າດ້ວຍ ການຄວບຄຸມມົນລະພິດ; ຮ່າງສ້າງບົດລາຍງານສະພາບມົນລະພິດ ຂອງ ສປປ ລາວ ໃຫ້ສໍາເລັດປີ 2020; ສ້າງຄວາມເຂັ້ມແຂງທາງດ້ານການຄວບຄຸມມົນລະພິດ, ການຄຸ້ມຄອງສິ່ງເສດເຫຼືອ ແລະ ສານເຄມີອັນຕະລາຍ ລວມທັງ ການສ້າງເຄື່ອຂ່າຍຜູ້ຮັບຜິດຊອບວຽກງານ ການຄວບຄຸມມົນລະພິດ, ການຄຸ້ມຄອງສິ່ງເສດເຫຼືອ ແລະ ການຄຸ້ມຄອງສານເຄມີທີ່ເປັນອັນຕະລາຍ ໃຫ້ແກ່ພະນັກງານສູນກາງ ແລະ ທ້ອງຖິ່ນ ໃນຂອບເຂດທົ່ວປະເທດ; ຈັດຕັ້ງປະຕິບັດໂຄງການສ້າງຄວາມເຂັ້ມແຂງໃຫ້ແກ່ ກຄມ ໃນການຄວບຄຸມມົນລະພິດ, ການຄຸ້ມຄອງສິ່ງເສດເຫຼືອ, ສິ່ງເສດເຫຼືອ ອັນຕະລາຍ ຂອງ ທະນາຄານໂລກ ໂດຍຜ່ານກອງທຶນປົກປັກຮັກສາສິ່ງແວດລ້ອມ ແລະ ໂຄງການສະໜັບສະໜູນທາງດ້ານວິຊາການຈາກຜູ້ໃຫ້ທຶນຕ່າງໆ ເປັນຕົ້ນ ກອງທຶນສິ່ງແວດລ້ອມໂລກ (GEF), ອົງການສະຫະປະຊາຊາດ, ທະນາຄານໂລກ, ທະນາຄານພັດທະນາອາຊີ ແລະ ອື່ນໆ; ຈັດຕັັັັັ້ງປະຕິບັດ-ຮ່ວມມື ພາຍໃຕ້ສົນທິສັນຍາ ບາໂຊວ, ຣ໋ອດເຕີດໍາ, ສະຕ໋ອກໂຮມ, ມິນາມາຕະ ແລະ ອະນຸສັນຍາ ມົງເຣອານ ແລະ ຍຸດທະສາດການຄຸ້ມຄອງສານເຄມີສາກົນ ເພື່ອຜັນຂະຫຍາຍເປັນແຜນການ, ແຜນງານ ແລະ ໂຄງການ ໃນການຈັດຕັ້ງປະຕິບັດ.

     ຈາກນັ້ນ ກອງ​ປະ­ຊຸມ​ ​ໄດ້​ຜ່ານ​ບົດ​ສຳ­ຫຼວດ​ການ​ນຳ­ພາ​ຂອງ​ຄະ­ນະ​ໜ່ວຍ​ພັກຊຸດເກົ່າ ແລະ ປ່ອນ​ບັດ​ເລືອກ​ຕັ້ງ​ເອົາ​ຄະນະ​ໜ່ວຍພັກ​ຊຸດ​ໃໝ່ ເຊິ່ງມີຜູ້ລົງສະຫມັກ ຈໍານວນ 3 ສະຫາຍ. ກອງ​ປະ­ຊຸມ​ຄັ້ງ​ປະຖົມ​ມະ­ລຶກ ໄດ້​ເປັນ​ເອ­ກະ​ພາບ​ເລືອກ​ເອົາ:

  1. ສະຫາຍ ສີວັນນະກອນ ມາລີວັນ ເປັນເລຂາ;
  2. ສະຫາຍ ແກ້ວສັງຄົມ ພົມມະແສງ     ເປັນຮອງເລຂາ, ປະທານກວດກາ.

     ໃນໂອກາດດັ່ງກ່າວ ສະຫາຍ ບຸນມີ ພຸດທະວົງ ຮອງເລຂາຄະນະພັກ, ຮອງລັດຖະມົນຕີ ກໍ່ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານການຊີ້ນຳ-ນຳພາ ຂອງໜ່ວຍພັກ ທີ່ຍາດມາໄດ້ ໃນໄລຍະຜ່ານມາ, ຄວາມສຳຄັນຂອງການເປີດກອງປະຊຸມໜ່ວຍພັກທີ່ຕິດພັນກັບການເປີດກອງປະຊຸມໃຫຍ່ຂອງຄະນະພັກຮາກຖານ ແລະ ກອງປະຊຸມໃຫຍ່ຄັ້ງທີ II ຂອງຄະນະບໍລິຫານງານພັກ ກຊສ, ຄະນະພັກຊຸດໃໝ່ໃຫ້ເນັ້ນວຽກງານການເມືອງ-ແນວຄິດ ໃນການຊີ້ນຳ-ນຳພາ ເພື່ອຮັບປະກັນໃຫ້ມີຄວາມສາມັກຄີ, ສຶກສາອົບຮົມສະມາຊິກພັກ-ພະນັກງານ ໃຫ້ປະຕິບັດຕາມແນວທາງນະໂຍບາຍຂອງພັກ ຮັບປະກັນໃຫ້ມີການຂະຫຍາຍພັກຢ່າງມີຄຸນນະພາບ, ປັບປຸງແບບແຜນວິທີເຮັດວຽກໃຫ້ຈະແຈ້ງໃຫ້ທຸກໆສະຫາຍມີໜ້າທີ່ຮັບຜິດຊອບ ແລະ ຄົ້ນຄວ້າພາລະບົດບາດໃຫ້ຈະແຈ້ງ, ພ້ອມກັນຈັດຕັ້ງປະຕິບັດ ທິດທາງແຜນການ ໃນແຕ່ລະດ້ານ ໃຫ້ປະກົດຜົນເປັນຈິງ.