ກອງ​ປະ­ຊຸມ​ໃຫຍ່ ​ຄັ້ງ​ທີ I ຂອງ​ໜ່ວຍ​ພັກ​ ພະແນກ ສັງລວມ, ກົມຄວບຄຸມ ແລະ ຕິດຕາມກວດກາມົນລະພິດ ໄດ້​ຈັດ​ຂຶ້ນໃນຕອນເຊົ້າຂອງ ວັນ​ທີ 30 ກໍ­ລະ­ກົດ 2020​ ທີ່​ຫ້ອງປະຊຸມ ກົມຄວບຄຸມ ແລະ ຕິດຕາມກວດກາມົນລະພິດ, ໂດຍ​ໃຫ້​ກຽດ​ເຂົ້າ​ຮ່ວມຂອງ ສະ­ຫາຍ ໄຊຍະເວດ ວິໄຊ, ຄະນະປະຈຳພັກ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ, ມີ​ແຂກ​ຖືກ​ເຊີນຈາກບັນດາຫນ່ວຍພັກອື່ນໆ ອ້ອມຂ້າງ ກຊສ ແລະ ສະ​ມາ​ຊິກ​ພັກຢູ່ພາຍໃນຫນ່ວຍ​ເຂົ້າ​ຮ່ວມ ທັງຫມົດ 16 ສະຫາຍ, ຍິງ 7 ສະຫາຍ.

     ກອງ​ປະ­ຊຸມ​ຄັ້ງ​ນີ້​ ໄດ້​ຜ່ານ​ບົດ​ລາຍ​ງານ​ການ­ເມືອງ ປະກອບ​ມີສອງ​ພາກ ​ຄື: ​ພາກ​ທີ I ສະ­ຫຼຸບ​ການ­ເຄື່ອນ­ໄຫວ​ຊີ້​ນຳ​-​ນຳ­ພາ​ ວຽກ​ງານ ​ຂອງ​ຄະນະໜ່ວຍ​ພັກ ​ພະແນກ ສັງລວມ  ໄລຍະ 5 ປີ­ຜ່ານ­ມາ ແລະ ພາກ​ທີ II ທິດ​ທາງ​ແຜນ­ການ­ເຄື່ອນ­ໄຫວ​ຊີ້ນໍາ-ນຳພາ ຂອງຄະນະໜ່ວຍພັກ ພະແນກ ສັງລວມ ຊຸດໃຫມ່ ແຕ່ປີ 2021-2025 ສະ­ເໜີ​ໂດຍ ສະຫາຍ ນາງ ບຸນຍາແສງ ແສງຄຳມີ ເລຂາໜ່ວຍພັກ ພະແນກ ສັງລວມ,  ກົມຄວບຄຸມ ແລະ ຕິດຕາມກວດກາມົນລະພິດ  ເຊິ່ງໄດ້​ຍົກ​ໃຫ້​ເຫັນ​ວ່າ:

     ໃນ​ໄລຍະຜ່ານມາ ໜ່ວຍ​ພັກ ພະແນກສັງລວມ ​ໄດ້ປະ​ຕິ​ບັດ​ຕາມ​ສິດ​, ໜ້າ​ທີ່ ແລະ ພາ​ລະ​ບົດ​ບາດ​ຂອງຕົນ, ໄດ້ເອົາ​ໃຈ​ໃສ່​ສຸມ​ໃສ່​ນຳ​ພາ​ການ​ເຄື່ອນ​ໄຫວ​ວຽກ​ງານ​ວິ​ຊ​າ​ສະ​ເພາະ ຊຶ່ງ​ສະ​ແດງ​ອອກ​ໃຫ້​ເຫັນ​ຜົນ​ສຳ​ເລັດ​ອັນພົ້ນເດັ່ນ ດັ່ງ​ລາຍ​ລະ​ອຽດ​ລຸ່ມ​ນີ້:

  • ຈັດຕັ້ງຜັນຂະຫຍາຍບັນດານະໂຍບາຍ, ຍຸດທະສາດ, ກົດໝາຍ, ລະບຽບການ ມາເປັນແຜນການ, ແຜນງານ, ໂຄງການ ລະອຽດ;
  • ຂຶ້ນແຜນກໍານົດກໍ່ສ້າງພະນັກງານ, ຍົກລະດັບຄວາມຮູ້ຄວາມສາມາດທາງດ້ານວິຊາການ ກ່ຽວກັບ ວຽກງານຄວບຄຸມ ແລະ ຕິດຕາມກວດກາມົນລະພິດ; ຄຸ້ມຄອງ, ກໍ່ສ້າງ, ຊັບຊ້ອນພະນັກງານ-ລັດຖະກອນ ລວມທັງ ການສົ່ງເສີມບົດບາດຍິງ-ຊາຍ, ການປະຕິບັດນະໂຍບາຍເລື່ອນຊັ້ນ, ເລື່ອນຂັ້ນ, ຍ້ອງຍໍ ຫຼື ປະຕິບັດວິໄນ ຕໍ່ພະນັກງານ-ລັດຖະກອນຂອງກົມ ຢ່າງເປັນປົກກະຕິ;
  • ສ້າງຖານຂໍ້ມູນ ແລະ ເວັບໄຊຂອງກົມ, ຄຸ້ມຄອງ ແລະ ເຜີຍແຜ່ຂໍ້ມູນ ກ່ຽວກັບ ຜົນການຕິດຕາມກວດກາສິ່ງແວດລ້ອມຂອງໂຄງການລົງທຶນ ແລະ ກິດຈະການຕ່າງໆ;
  • ສະຫຼຸບລາຍງານການເຄື່ອນໄຫວຂອງ ກົມ ປະຈຳເດືອນ, 6 ເດືອນ, ປະຈຳປີ ແລະ ແຜນການເຄື່ອນໄຫວປະຈຳໄຕມາດ, ປະຈຳປີ, ແຜນການເຄື່ອນໄຫວ 5 ປີ (2021-2025) ຂອງ ກຄມ;
  • ເຂົ້າຮ່ວມເຄື່ອນໄຫວຊຸກຍູ້ສ້າງຄວາມເຂັ້ມແຂງໃຫ້ທ້ອງຖິ່ນ ໃນການຝຶກອົບຮົມກັບທີ່ ທັງທາງດ້ານທິດສະດີ ແລະ ການປະຕິບັດຕົວຈິງ ໃນເວລາຕິດຕາມກວດກາ ກ່ຽວກັບ ກົນໄກ, ສະຫຼຸບ ແລະ ການນຳໃຊ້ງົບປະມານຕິດຕາມກວດກາ ໃຫ້ແກ່ ພະແນກ ຊສ ແຂວງ/ນະຄອນຫຼວງ ແລະ ຫ້ອງການ ຊສ ເມືອງ/ນະຄອນ ຈຳນວນ 9 ແຂວງ ແລະ ຫ້ອງການ ຊສ ເມືອງ 45 ເມືອງ, ມີຜູ້ເຂົ້າຮ່ວມລວມທັງໝົດ ຈໍານວນ 207 ​ເທື່ອ​ຄົນ, ຍິງ 77 ເທື່ອຄົນ;
  • ສັງລວມບັນຊີໂຄງການລົງທຶນ ​ແລະ ກິດຈະການ​ຕ່າງໆ ທີ່​ໄດ້​ຮັບ​​ໃບ​ຢັ້ງ​ຢືນ ກ່ຽວ​ກັບ ສິ່ງ​ແວດ​ລ້ອມ ​​ແຕ່​ປີ 2009-2019 ລວມມີທັງໝົດ 331 ​ໂຄງການ, ພ້ອມນັ້ນ ປະສານສົມທົບກັບບັນດາແຂວງ/ນະຄອນຫຼວງ ໃນການສັງລວມບັນຊີໂຄງການລົງທຶນ ​ແລະ ກິດຈະການ​ຕ່າງໆ ທີ່ບັນດາແຂວງໄດ້ອອກໃບ​ຢັ້ງ​ຢືນ ກ່ຽວ​ກັບ ສິ່ງ​ແວດ​ລ້ອມທີ່ຜ່ານມາ ເພື່ອເປັນຂໍ້ມູນໃນການຕິດຕາມກວດກາ ແລະ ຄຸ້ມຄອງການນຳໃຊ້ງົບປະມານ;
  • ແຈ້ງໃຫ້ຜູ້ພັດທະນາໂຄງການ ເພື່ອປະຕິບັດພັນທະທາງສິ່ງແວດລ້ອມດ້ານງົບປະມານ ທີ່ກໍານົດໄວ້ໃນແຜນການຄຸ້ມຄອງ ແລະ ຕິດຕາມກວດກາສິ່ງແວດລ້ອມສັງຄົມ ແລະ ທໍາມະຊາດ ໄດ້ຈໍານວນ 94 ໂຄງການ, ໄດ້ຮັບງົບປະມານ ຈໍານວນ 59 ໂຄງການ, ບໍ່ໄດ້ຮັບງົບປະມານ ຈໍານວນ 35 ໂຄງການ;
  • ຄຸ້ມຄອງ, ບໍລິຫານການເງິນ, ຊັບສິນ, ເອກະສານຂອງກົມ ຢ່າງເປັນປົກກະຕິ ພ້ອມທັງ ສະຫຼຸບ ແລະ ຂຶ້ນແຜນການ, ແຜນນໍາໃຊ້ງົບປະມານແຫ່ງລັດ, ງົບປະມານຊ່ວຍເຫຼືອ ແລະ ລາຍຮັບວິຊາການຄຸ້ມຄອງໂຄງການລົງທຶນຂອງລັດ ຈຳນວນ 2 ໂຄງການ (ພາກ 67 ແລະ ພາກ 63) ນອກນັ້ນ, ຍັງຄຸ້ມຄອງງົບປະມານສະໜັບສະໜູນພາກລັດ ​ໃນການຕິດຕາມກວດກາການຈັດຕັ້ງປະຕິບັດແຜນຄຸ້ມຄອງສິ່ງແວດລ້ອມສັງຄົມ ແລະ ທໍາມະຊາດ ຂອງໂຄງການລົງທຶນ ແລະ ກິດ​ຈະ​ການ​ຕ່າງໆ;

     ຈາກນັ້ນ ກອງ​ປະ­ຊຸມ​ ​ໄດ້​ຜ່ານ​ບົດ​ສຳ­ຫຼວດ​ການ​ນຳ­ພາ​ຂອງ​ຄະ­ນະ​ໜ່ວຍ​ພັກຊຸດເກົ່າ ແລະ ປ່ອນ​ບັດ​ເລືອກ​ຕັ້ງ​ເອົາ​ຄະນະ​ໜ່ວຍພັກ​ຊຸດ​ໃໝ່ ເຊິ່ງມີຜູ້ລົງສະຫມັກ ຈໍານວນ 3 ສະຫາຍ. ກອງ​ປະ­ຊຸມ​ຄັ້ງ​ປະຖົມ​ມະ­ລຶກ ໄດ້​ເປັນ​ເອ­ກະ​ພາບ​ເລືອກ​ເອົາ:

  1. ສະຫາຍ ນາງ ບຸນຍາແສງ ແສງຄຳມີ ເປັນເລຂາ;
  2. ສະຫາຍ ສົມເພັດ ສາຍສີດາວົງ         ເປັນຮອງເລຂາ, ປະທານກວດກາ.

     ໃນ​ໂອ­ກາດ​ດັ່ງ­ກ່າວ, ສະ­ຫາຍ ໄຊຍະເວດ ວິໄຊ, ຄະນະປະຈຳພັກ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ, ໄດ້​ສະ­ແດງ​ຄວາມ​ຍ້ອງ­ຍໍຊົມ­ເຊີຍ​ຕໍ່​ຄະ­ນະໜ່ວຍພັກ ພະແນກ ສັງລວມ  ​ຊຸດ​ເກົ່າ ​ທີ່ໄດ້​ຊີ້​ນໍາ - ນໍາ​ພາ​ສະ­ມາຊິກ​ພັກ, ພະ­ນັກ­ງານ ​ປະ­ຕິ­ບັດ​ໜ້າ­ທີ່​ການ­ເມືອງ ສາ­ມາດ​ຍາດ​ໄດ້ ­ຜົນ​ງານ​ໃນ​ຫຼາຍໆ​ດ້ານ ແລະ ມີ​ທິດ​ຊີ້​ນໍາ​ໃນ​ແຕ່​ລະ​ວຽກ​ງານ​ຢ່າງ​ພາ­ວະ​ວິ­ໄສ ແລະ ມີ​ຈຸດ​ສຸມ. ນອກ­ຈາກ​ນີ້, ສະ­ຫາຍ ຄະນະປະຈຳພັກກະຊວງ, ຍັງໄດ້ຢໍ້າໃຫ້ຄະ­ນະ​ໜ່ວຍພັກ​ຊຸດ​ໃໝ່ ຈົ່ງສືບຕໍ່ຝຶກຝົນຫຼໍ່ຫຼອມຕົນເອງ ເຮັດໜ້າທີ່ການເມືອງ ສາມາດເປັນເຈົ້າການໃນການຊີ້ນໍາ-ນໍາພາສະ­ມາ­ຊິກ​ພັກ ແລະ ​​ພະ­ນັກ­ງານລັດຖະກອນ ທັງຫມົດຢູ່ພາຍໃນພະແນກ ດ້ວຍຄວາມຮັບຜິດຊອບສູງ ເພື່ອ ໃຫ້ກາຍເປັນ ໜ່ວຍພັກປອດໃສ, ເຂັ້ມແຂງ, ໜັກແໜ້ນ, ຈັດຕັ້ງຜັນຂະຫຍາຍ​ມະ­ຕິ​ກອງ​ປະ­ຊຸມ​ໃຫຍ່ ຄັ້ງທີ I ຂອງໜ່ວຍພັກ ໃຫ້ປະກົດຜົນເປັນຈິງ.