ກອງ​ປະ­ຊຸມ​ ສະມາຊິກ​ໜ່ວຍ​ພັກ​ ພະແນກ ຫ້ອງທົດລອງສິ່ງແວດລ້ອມ, ສະຖາບັນ ຄົ້ນຄວ້າ ແລະ ສະຖິຕິ ຊັບພະຍາກອນທຳມະຊາດ ແລະ ສິ່ງແວດລ້ອມ (ສຄສຊສ) ໄດ້​ຈັດ​ຂຶ້ນ ໃນຕອນເຊົ້າ ຂອງວັນທີ 27 ກໍລະກົດ 2020, ທີ່​ຫ້ອງປະຊຸມ ກົມສິ່ງແວດລ້ອມ, ໂດຍ​ໃຫ້​ກຽດ​ເຂົ້າ​ຮ່ວມຂອງ ສະຫາຍ ປອ ໄຊນະຄອນ ອິນທະວົງ ຄະນະປະຈຳພັກ, ຮອງລັດຖະມົນຕີ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ, ມີ​ແຂກ​ຖືກ​ເຊີນຈາກບັນດາຫນ່ວຍພັກອື່ນໆ ອ້ອມຂ້າງ ກຊສ ແລະ ສະ​ມາ​ຊິກ​ພັກຢູ່ພາຍໃນຫນ່ວຍ​ເຂົ້າ​ຮ່ວມ ທັງຫມົດ 32 ສະຫາຍ, ຍິງ 9 ສະຫາຍ.

     ໃນກອງປະຊຸມ ສະຫາຍ ນາງ ເຊຕຸວັນ ພັນທະວົງສາ ເລຂາໜ່ວຍ​ພັກ​ ພະແນກ ຫ້ອງທົດລອງສິ່ງແວດລ້ອມ ໄດ້ຂຶ້ນຜ່ານບົດສະຫຼຸບ ການນໍາພາເຄື່ອນໄຫວວຽກງານໃນໄລຍະຜ່ານມາ ແລະ ທິດທາງແຜນການເຄື່ອນໄຫວໃນ 5 ປີ ຕໍ່ໜ້າຂອງໜ່ວຍພັກ ຫ້ອງທົດລອງສິ່ງແວດລ້ອມ, ໜ່ວຍພັກ ຫ້ອງທົດລອງສິ່ງແວດລ້ອມ, ມີສະມາຊິກພັກສົມບູນທັງໝົດ 05 ສະຫາຍ, ຍິງ ..... ສະຫາຍ, ຮຽນກົດລະບຽບ 01 ສະຫາຍ ແລະ ເປົ້າໝາຍມະຫາຊົນກ້າວໜ້າ 02 ສະຫາຍ (ຍິງ 02 ສະຫາຍ) , ໜ່ວຍພັກຫ້ອງທົດລອງສິ່ງແວດລ້ອມ ​ໄດ້​ເອົາ​ໃຈ​ໃສ່ ຕໍ່ວຽກງານ​ຊີ້ນຳ-ນຳ​ພາ ວຽກງານບໍລິຫານ, ​ການ​ເຄື່ອນ​ໄຫວ​ວຽກງານ​ວິຊາ​ສະ​ເພາະ ຕາມໜ້າ​ທີ່​ການ​ເມືອງທີ່​ຖືກມອບ​ໝາຍ ​ພາ​ລະ​ບົດ​ບາດທີ່​ໄດ້​ກຳ​ນົດ​ໄວ້​. ໄດ້​ປະ​ກອບ​ສ່ວນ​ຢ່າງ​ຕັ້ງ​ໜ້າ​ໃນ​ການ​ຈັດ​ຕັ້ງ​ປະ​ຕິ​ບັດ ແລະ ຜັນ​ຂະ​ຫ​ຍາຍມະ​ຕິ​ຄຳ​ສັ່ງ ກໍ​ຄືແນວ​ທາງ​ນະ​ໂຍ​ບາຍ​ຂອງພັກ ແລະ ລັດ​ຖະ​ບານໃນ​ການ​ປົກ​ປັກຮັກ​ສາ​ສິ່ງ​ແວດ​ລ້ອມ​ຕາມ​ທິດ​ສີ​ຂຽວ ແລະ ຍືນ​ຍົງ ຊຶ່ງ​ສະ​ແດງ​ອອກ​ໃນ​ວຽກ​ງານ​ພົ້ນ​ເດັ່ນ ຕ່າງໆ ທີ່​ເປັນ​ອັນ​ສະ​ເພາະ ແລະ ອັນ​ລວມ​​ຄື: ໄດ້​ສຳ​ເລັດ​ການ​ກຳ​ນົດວິ​ໄສ​ທັດ, ຍຸດ​ທະ​ສາດ ແລະ ແຜນ​ການ​ເຄື່ອນ​ໄຫວ​ 5 ປີ ແຕ່​ປີ 2016-2019 ແລະ 2020-2025 ເພື່ອ​ເປັນ​ບ່ອນ​ອີງ​ ໃຫ້ການ​ເຄື່ອນ​ໄຫວ​ວຽກ​ງານ​ວິ​ຊາ​ສະ​ເພາະຄື:  

  1. ສຳເລັດການກໍ່ສ້າງຫ້ອງວິໄຈສິ່ງແວດລ້ອມສູນກາງ ພາຍ​ໃຕ້​ການ​ຊ່ວຍ​ເຫລືອ ຂອງ ທະ​ນາ​ຄານ​ໂລກ ຊຶ່ງເປັນອາຄານ 2 ຊັ້ນ, ທີ່ມີຂະໜາດ 18 x 28 ແມັດ ຊຶ່ງເປັນ​ອາ​ຄານ​ຫ້ອງ​ທົດ​ລອງ ທີ່​ໄດ້ອອກແບບຕາມມາດຕະຖານ​ສາ​ກົນ ທາງ​ດ້ານ​ຄວາມ​ປອດ​ໄພຫ້ອງທົດລອງ. ສໍາ​ເລັດ​ການ​ຕິດ​ຕັ້ງ ຫ້ອງ​ແລັບ​ເຟິ​ນິ​ເຈີ ແລະ ປະ​ກອບ​ເຄື່ອງ​ມື​ ແລະ ອຸ​ປະ​ກອນ​​ທີ່ທັນ​ສະ​ໄໝ ສຳ​ລັບ​ວິ​ໄຈ​ຈຳນວນຫ​ນຶ່ງ;
  2. ສຳ​ເລັດ​ການ​ສ້າງ ແລະ ຂໍ​ການຮັບຮອງມາດຕະຖານສາກົນຂອງຫ້ອງທົດລອງ ISO/IEC 17025 : 2015 ສໍາລັບຕົວວັດແທກ COD ແລະ ໂລຫະໜັກ 5 ຕົວວັດແທກ ຄື: ທອງ, ໂກຣມ, ແຄດມຽມ, ນິແກນ ແລະ ຊືນ;
  3. ສຳເລັດການສ້າງຫ້ອງທົດລອງປະຈຳພາກ ຢູ່ ແຂວງຫລວງພະບາງ, ຊຽງຂວາງ ແລະ ຈຳປາສັກ ພ້ອມທັງປະກອບອຸປະກອນວັດແທກ ໂດຍພື້ນຖານຈຳນວນໜຶ່ງໃຫ້​ຫ້ອງ​ທົດ​ລອງ​ດັ່ງ​ກ່າວ , ສະ​ໜອງ​ເຄື່ອງ​ມື​ວິ​ໄຈພາກ​ສະ​ໜາມໃຫ້ 18 ແຂວງ;
  4. ສຳເລັດການລົງສຳຫລວດຈຸດຕິດຕາມຄຸນນະພາບອາກາດ ຢູ່ເຂດເທດສະບານແຂວງ ໃນ 18 ແຂວງທົ່ວປະເທດ ຈຳນວນ 102 ຈຸດ ແລະ ໄດ້ກໍານົດເປັນຈຸດຕິດຕາມວັດແທກ 32 ຈຸດ ແລະ ການລົງສຳ​ຫລວດ ແລະ ວິໄຈຄຸນນະພາບອາກາດ ໃນ​ເຂດ​ເທດ​ສະ​ບານ ໃນ 18 ແຂວງ ຂອບ​ເຂດ​ທົ່ວ​ປະ​ເທດ;
  5. ເອົາ​ໃຈ​ໃສ່ ຕິດຕາມວິໄຈຄຸນນະພາບອາກາດໃນ​ນະ​ຄອນ​ຫລວງວຽງ​ຈັນ ປະ​ຈຳ​ປີ ຈຳ​ນວນ 4ຈຸດ ແລະ ຝຸ່ນ​ລະ​ອອງ5 ແບບຕໍ່​ເນື່ອງ 24 ຊົ່ວໂມງ ຢູ່ນະຄອນຫຼວງວຽງຈັນ ແລະ ລາຍ​ງານ​ຜົນ​ການ​ວິ​ໄຈ ທາງ​ສື່​ສັງ​ຄົມ ອອນ​ລາຍ ໃນ​ແຕ່​ລະ​ວັນ;
  6. ໄດ້ປະ​ສານ​ສົມ​ທົບ​ກັບ​ພາກ​ສ່ວນ​ທີ່​ກ່ຽວ​ຂ້ອງ​ໃນ​ການ​ລົງ​ແກ້​ໄຂ​ກໍ​ລະ​ນີ​ສຸກ​ເສີນເຊັ່ນ: ລົງວັດແທກ ແລະ ເກັບກໍາຂໍ້ມູນເຫດສຸກເສີນ ເຫດການໄຟໄໝ້ກອງຂີ້ເຫຍື້ອ ຫລັກ 32 ເມືອງໄຊທານີ, ນະຄອນຫລວງວຽງຈັນ, ເກັບ​ກຳ​ຂໍ້​ມູນ ແລະ ວິໄຈຕົວຢ່າງນໍ້າ ຈາກການປ່ອຍນໍ້າເປື້ອນຢູ່ຄິວລົດສາຍໃຕ້ ນະຄອນຫລວງວຽງຈັນ; ບໍລິສັດຊັນເປເປີ້ໂຮນດິ້ງລາວ ຈຳກັດ, ແຂວງສະຫວັນນະເຂດ; ໂຄງການຂຸດຄົ້ນແຮ່ກົ່ວ ບ້ານຊາວ, ເມືອງຫີນບູນ, ແຂວງຄໍາມ່ວນ; ໂຮງງານສະກັດຝຸ່ນເຄືອແຮມຈັນສ່ອງຟ້າ ບ້ານທ່າສີ, ເມືອງບໍລິຄັນ, ແຂວງ ບໍລິຄໍາໄຊ; ການລົງເກັບຕົວຢ່າງ ແລະ ວິໄຈສານເຄມີຕົກຄ້າງໃນນ້ຳ ແລະ ດິນຈາກໂຄງການປູກກ້ວຍ ແຂວງບໍ່ແກ້ວ ແລະ ອຸດົມໄຊ;
  7. ສໍາເລັດການຈັດຊື້ອຸປະກອນຕິດຕາມກວດກາມົນລະພິດທາງອາກາດ (PM10, PM2.5,TSP, SOX, NOX), ສຽງ ພາຍໃຕ້ໂຄງການຍ່ອຍ LENs2 .
  8. ໄດ້ລົງຕິດຕາມ ແລະ ວິ​ໄຈຄຸນນະພາບນໍ້າຕາມລໍາແມ່ນໍ້າຂອງ 11 ຈຸດຊຶ່ງມີຈຸດເກັບຕົວຢ່າງຢູ່ໃນ 5 ແຂວງ (ຫລວງນໍ້າທາ, ຫລວງພະບາງ, ນະຄອນຫລວງວຽງຈັນ, ສະຫວັນນະເຂດ ແລະ ຈໍາປາສັກ) ແລະ ການ​ຕິດ​ຕາມ​ວິ​ໄຈ ຄຸນ​ນະ​ພາບ​ນ້ຳ ຢູ່ ອ່າງຮັບນ້ຳເຊກອງ, ອ່າງຮັບນ້ຳງື່ມຕອນເທິງ, ເຂດດິນບໍລິເວນນ້ຳເຊຈຳພອນ;
  9. ສໍາເລັດການສ້າງນິຕິກໍາລຸ່ມກົດໝາຍຈໍານວນໜຶ່ງ ຄື: ຄູ່ມືແນະນໍາ ກ່ຽວກັບ ມາດຕະຖານການວິໄຈ ຄຸນນະ ພາບນໍ້າ, ຄູ່ມືແນະນໍາ ກ່ຽວກັບ ມາດຕະຖານການວິໄຈ ຄຸນນະພາບອາກາດ, ຄູ່ມືແນະນໍາ ກ່ຽວກັບຄວາມປອດໄພໃນຫ້ອງທົດລອງ, ຄູ່ມືແນະນໍາ ກ່ຽວກັບ ການກໍາຈັດສິ່ງເສດເຫລືອ ໃນຫ້ອງທົດລອງ ແລະ ລະບຽບການ ວ່າດ້ວຍ ການຂຶ້ນທະບຽນຫ້ອງທົດລອງ ພາກລັດ ແລະ ເອກະຊົນ;
  10. ສ້າງຄວາມເຂັ້ມແຂງດ້ານວິຊາການ ໃນການຕິດຕາມ ແລະ ວັດແທກຄຸນນະພາບນ້ຳພາກສະໜາມ ໃຫ້ແກ່ ພຊສ 18 ແຂວງ.

     ໃນ​ໂອ­ກາດ​ດັ່ງ­ກ່າວ, ສະ­ຫາຍ ປອ ໄຊນະຄອນ ອິນທະວົງ ຄະນະປະຈຳພັກ, ຮອງລັດຖະມົນຕີ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້​ສະ­ແດງ​ຄວາມ​ຍ້ອງ­ຍໍຊົມ­ເຊີຍ​ຕໍ່​ຄະ­ນະໜ່ວຍພັກ ພະແນກ ຫ້ອງທົດລອງສິ່ງແວດລ້ອມ, ພະ­ນັກ­ງານ ​ທີ່ປະ­ຕິ­ບັດ​ໜ້າ­ທີ່​ການ­ເມືອງ ສາ­ມາດ​ຍາດ​ໄດ້ ­ຜົນ​ງານ​ໃນ​ຫຼາຍໆ​ດ້ານ ແລະ ມີ​ທິດ​ຊີ້​ນໍາ​ໃນ​ແຕ່​ລະ​ວຽກ​ງານ​ຢ່າງ​ພາ­ວະ​ວິ­ໄສ ແລະ ມີ​ຈຸດ​ສຸມ, ສະຫາຍ ຄະນະປະຈຳພັກ ຍັງໄດ້ ໃຫ້ທິດຊີ້ນໍາ ແລະ ຕັກເຕືອນ ຕໍ່ໜ່ວຍພັກພະແນກ ຫ້ອງທົດລອງສິ່ງແວດລ້ອມ ເອົາໃຈໃສ່ສຶກສາອົບຮົມການເມືອງແນວຄິດ ໃຫ້ສະມາຊິກພັກພະນັກງານ ໃຫ້ມີຄວາມອຸ່ນອ່ຽນທຸ່ນທ່ຽງ, ເຊື່ອໝັ້ນຕໍ່ການຊີ້ນໍາ-ນຳພາຂອງພັກແຕ່ລະຂັ້ນ ເພື່ອເຮັດໃຫ້ໜ່ວຍພັກ ພະແນກ ຫ້ອງທົດລອງສິ່ງແວດລ້ອມ ມີພື້ນຖານການເມືອງທີ່ໜັກແໜ້ນ, ສະມາຊິກພັກ ພະນັກງານ ມີຄວາມຫ້າວຫັນໃນການ ຈັດຕັ້ງປະຕິບັດວຽກງານສຳເລັດດ້ວຍດີ.