ກອງ​ປະ­ຊຸມ​ໃຫຍ່ ​ຄັ້ງ​ທີ I ຂອງ​ໜ່ວຍ​ພັກ​ ພະແນກ ຄົ້ນຄວ້າຊັບພະຍາກອນທໍາມະຊາດ ແລະ ສິ່ງແວດລ້ອມ, ສະຖາບັນ ຄົ້ນຄວ້າ ແລະ ສະຖິຕິ ຊັບພະຍາກອນທຳມະຊາດ ແລະ ສິ່ງແວດລ້ອມ(ສຄສຊສ) ໄດ້​ຈັດ​ຂຶ້ນໃນຕອນເຊົ້າຂອງ ວັນ​ທີ 24 ກໍ­ລະ­ກົດ 2020​ ທີ່​ຫ້ອງປະຊຸມ ກົມສິ່ງແວດລ້ອມ ໂດຍ​ໃຫ້​ກຽດ​ເຂົ້າ​ຮ່ວມຂອງ ສະ­ຫາຍ ໄຊຍະເວດ ວິໄຊ ຄະນະປະຈຳພັກ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ, ມີ​ແຂກ​ຖືກ​ເຊີນຈາກບັນດາຫນ່ວຍພັກອື່ນໆ ອ້ອມຂ້າງ ກຊສ ແລະ ສະ​ມາ​ຊິກ​ພັກຢູ່ພາຍໃນຫນ່ວຍ​ເຂົ້າ​ຮ່ວມ ທັງຫມົດ 31 ສະຫາຍ, ຍິງ 7 ສະຫາຍ.

ກອງ​ປະ­ຊຸມ​ຄັ້ງ​ນີ້​ ໄດ້​ຜ່ານ​ບົດ​ລາຍ​ງານ​ການ­ເມືອງ ປະກອບ​ມີສອງ​ພາກ ​ຄື: ​ພາກ​ທີ I ສະ­ຫຼຸບ​ການ­ເຄື່ອນ­ໄຫວ​ຊີ້​ນຳ​-​ນຳ­ພາ​ ວຽກ​ງານ ​ຂອງ​ຄະນະໜ່ວຍ​ພັກ ​ພະແນກ ຄົ້ນຄວ້າຊັບພະຍາກອນທຳມະຊາດ ແລະ ສິ່ງແວດລ້ອມ  ໄລຍະ 5 ປີ­ຜ່ານ­ມາ ແລະ ພາກ​ທີ II ທິດ​ທາງ​ແຜນ­ການ­ເຄື່ອນ­ໄຫວ​ຊີ້ນໍາ-ນຳພາ ຂອງຄະນະໜ່ວຍພັກ ​ພະແນກຄົ້ນຄວ້າ ຊັບພະຍາກອນທຳມະຊາດ ແລະ ສິ່ງແວດລ້ອມ ຊຸດໃຫມ່ ແຕ່ປີ 2021-2025 ສະ­ເໜີ​ໂດຍ ສະຫາຍ ຄຳຮູ້ ຕຸນາລົມ, ເລຂາໜ່ວຍພັກ ພະແນກ ຄົ້ນຄວ້າຊັບພະຍາກອນທຳມະຊາດ ແລະ ສິ່ງແວດລ້ອມ  ເຊິ່ງໄດ້​ຍົກ​ໃຫ້​ເຫັນ​ວ່າ: ໜ່ວຍພັກພະແນກ ຄົ້ນຄວ້າຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ສ້າງຕັ້ງຂຶ້ນໃຫມ່ ພາຍຫຼັງທີ່ມີການໂຮມເຂົ້າກັນ ຂອງໜ່ວຍພັກສະຖາບັນຄົ້ນຄວ້າ ຊັບພະຍາກອນທໍາມະຊາດ ແລະ ສິ່ງແວດລ້ອມ ແລະ ສູນຂໍ້ມູນຂ່າວສານ ຊັບພະຍາກອນທໍາມະຊາດ ແລະ ສິ່ງແວດລ້ອມ ເປັນຄະນະພັກຮາກຖານ ສະຖາບັນຄົ້ນຄວ້າ ແລະ ສະຖິຕິຊັບພະຍາກອນທຳມະຊາດ ແລະ ສິ່ງແວດລ້ອມ. ໜ່ວຍພັກ ພະແນກ ຄົ້ນຄວ້າຊັບພະຍາກອນ ທຳມະຊາດ ແລະ ສິ່ງແວດລ້ອມ ແມ່ນໜ່ວຍພັກໜຶ່ງ ໃນ 6 ໜ່ວຍພັກ ທີ່ຂຶ້ນກັບຄະນະພັກຮາກຖານ ສຄສຊສ ກະຊວງ ຊັບພະຍາກອນ ທຳມະຊາດ ແລະ ສິ່ງແວດລ້ອມ ມີສະມາຊິກພັກທັງໝົດ 5 ສະຫາຍ ຍິງ 1 ສະຫາຍ, ມີ​ພະ­ນັກ­ງານ​ລວມ​ທັງ​ໝົດ​ພາຍ​ໃນ​ພະແນກ 13 ສະຫາຍ (ຍິງ 7 ສະ­ຫາຍ).

ໄລຍະທີ່ຜ່ານມາ ຄະນະໜ່ວຍ​ພັກ​ ພະແນກ ຄົ້ນຄວ້າຊັບພະຍາກອນທໍາມະຊາດ ແລະ ສິ່ງແວດລ້ອມ  ໄດ້​ຖື​ເອົາ​ການ​ກໍ່­ສ້າງ​ສະມາຊິກພັກ ແລະ ພະນັກງານ ຢູ່ພາຍໃນພະແນກ ໂດຍຖືເອົາວຽກງານການສຶກສາອົບຮົມ​ທາງ​ດ້ານ​ການ​ເມືອງ​-​ແນວ​ຄິດ ເປັນກົກ, ຖືເອົາ ​ ການຈັດ​ຕັ້ງ​ຜັນ​ຂະ­ຫຍາຍ​ບັນ­ດາ​ມະ­ຕິ, ຄຳ​ສັ່ງ​ແນວ­ທາງ​ນະ­ໂຍ­ບາຍ​ຂອງ​ພັກ, ວິໄສທັດ, ຍຸດທະສາດ ແລະ ແຜນການ 5 ປີ (2016-2020) ຂອງກະຊວງ ເວົ້າລວມ ເວົ້າສະເພາະແມ່ນແຜນການ 5 ປີ ຂອງກົມ ກໍ່ຄືຂອງພະແນກ ເປັນສໍາຄັນ ແນໃສ່ເພື່ອຈັດຕັ້ງປະຕິບັດບັນດາຄາດຫມາຍສູ້ຊົນໃນໄລຍະ 5 ປີຜ່ານມາ ໃຫ້ໄດ້ຮັບຜົນສໍາເລັດຕາມແຜນການ  ເຊິ່ງຜ່ານການຈັດຕັ້ງຕິບັດວຽກງານວິຊາສະເພາະຕົວຈິງ ສາມາດສະຫລຸບໄດ້ບັນດາຜົນສໍາເລັດທີ່ພົ້ນເດັ່ນດັ່ງນີ້:

1)  ສໍາເລັດການຈັດກອງປະຊຸມສໍາມະນາ ເຜີຍແຜ່ເຕັກນິກການບໍາບັດນໍາເປື້ອນຈາກໂຮງງານອຸດສາຫະກໍາຜະລິດຢາງ ພາລາ ຢູ່ແຂວງບໍລິຄໍາໄຊ ແລະ ໂຮງງານຜະລິດກາເຟ ຢູ່ແຂວງຈໍາປາສັກ ເພື່ອສ້າງຄູ່ມືການນຳໃຊ້ເຕັກໂນໂລຊີທີ່ສະອາດ ໃນການຄຸ້ມຄອງສິ່ງແວດລ້ອມຢູ່ໂຮງງານຂ້າສັດ ແລະ ຟາມລ້ຽງໝູ ຢູ່ເຂດນະຄອນຫລວງວຽງຈັນ ແລະ ການສ້າງຄູ່ມືແນະນໍາ ກ່ຽວກັບ ລະບົບບໍາບັດນໍ້າເປື້ອນ 15 ປະເພດ ສໍາລັບຂະແໜງວິສາຫະກິດຂະໜາດນ້ອຍ ແລະ ຂະໜາດກາງ;

2)  ໄດ້ສໍາເລັດການເກັບກຳຂໍ້ມູນ ກ່ຽວກັບ ສະພາບການປ່ອຍນໍ້າເປື້ອນຕາມຮ່ອງລະບາຍນໍ້າ ຢູ່ນະຄອນຫລວງວຽງຈັນ 15 ຈຸດ, 30 ຈຸດ ແລະ 45 ຈຸດ ກໍາລັງຮ່າງບົດສຶກສາຄົ້ນຄວ້າ;

3)  ສໍາເລັດການສຶກສາຄົ້ນຄວ້າ ກ່ຽວກັບ ວິໄຈເຄື່ອງຫຼີ້້ນເດັກປະເພດຢາງພາສສະຕິກ ຢູ່ນະຄອນຫຼວງວຽງຈັນ, ຫຼວງພະບາງ, ອຸດົມໄຊ ແລະ ຫຼວງນ້ຳທາ ເພື່ອສຶກສາ ກ່ຽວກັບ ການຕົກຄ້າງຂອງທາດໂລຫະໜັກເຊັ່ນ: ສານ Bromine (Br), Cadmium (Cd), Chlorine (Cl), Chromium (Cr), Mercury (Hg), Lead (Pb);

4)  ສຳເລັດການສຶກສາຄົ້ນຄວ້າ ກ່ຽວກັບ ຜົນກະທົບຂອງສະໜາມຂີ້ເຫຍື້ອຕໍ່ກັບ ສະພາບແວດລ້ອມ ແລະ ສັງຄົມ ຢູ່ ສປປ ລາວ (ນະຄອນຫລວງວຽງຈັນ, ນະຄອນຫລວງພະບາງ, ນະຄອນໄກສອນ, ນະຄອນປາກເຊ ແລະ ແຂວງບໍລິຄຳໄຊ); ສຳເລັດການຄົ້ນຄວ້າ ກ່ຽວກັບ ການນຳໃຊ້ເຕັກໂນໂລຊີທີ່ສະອາດ ແລະ ເປັນມິດກັບສິ່ງແວດລ້ອມ ໃນການຜະລິດ ແລະ ປຸງແຕ່ງຊີມັງ (ໂຮງງານຊີມັງວັງວຽງຫລັງທີ 1, 2 ແລະ 3);

5)  ສໍາເລັດຈັດກອງປະຊຸມວິທະຍາສາດ ໃນຂະແໜງວຽກງານ ຂໍ້ມູນຂ່າວສານ ຊັບພະຍາກອນທໍາມະຊາດ ແລະ ສິ່ງແວດລ້ອມ ແລະ ຖອດຖອນບົດຮຽນວຽກງານຫໍສະໝຸດ ນໍາສະຖາບັນການເມືອງການປົກຄອງແຫ່ງຊາດ ແລະ  ມະຫາວິທະຍາໄລແຫ່ງຊາດ;

6)  ສໍາເລັດການຂຽນ ບົດສະເໜີໂຄງການ ໃນຫົວຂໍ້ ຄົ້ນຄວ້າ ກ່ຽວກັບ ການຂຶ້ນບັນຊີຊັບພະຍາກອນທໍາມະຊາດ ແລະ ຫົວຂໍ້ ການປ່ຽນແປງການນໍາໃຊ້ທີ່ດິນ.

7)  ປະສານງານກັບ ອົງການສະຫະປະຊາຊາດ ເພື່ອການພັດທະນາອຸດສາຫະກໍາ UNIDO ເພື່ອຈັດຕັ້ງປະຕິບັດໂຄງການສາທິດການນຳໃຊ້ເຕັກໂນໂລຊີທີ່ດີເລີດ ແລະ ເປັນມິດຕໍ່ສິ່ງແວດລ້ອມ ຂອງບັນດາກິດຈະກຳການເຜົາໄໝ້ ທີ່ບໍ່ມີການຄວບຄຸມ ພາຍໃຕ້ ສົນທິສັນຍາ ສະຕັອກໂຮມ ວ່າດ້ວຍ ສານເຄມີອົງຄະທາດ ທີ່ເປັນພິດຕົກຄ້າງ; ສໍາເລັດ ການສະໜອງ ແລະ ຕິດຕັ້ງເຄື່ອງຈັກຜະລິດ ແລະ ປຸງແຕ່ງເສດປລາສຕິກ ເປັນຜະລິດຕະພັນໃໝ່. ສືບຕໍ່ປະສານກັບ ອພບຕ ແຂວງຄໍາມ່ວນ ກ່ຽວກັບ ການສະໜອງກົນຈັກແຍກຂີ້ເຫຍື້ອ;

8)  ປະສານງານກັບ ກອງທຶນປົກປັກຮັກສາສິ່ງແວດລ້ອມ ໂດຍໄດ້ຮັບການສະໜັບສະໜູນງົບປະມານ ຈາກທະນາຄານໂລກ ເພື່ອສ້າງຄວາມເຂັ້ມແຂງ ຂະແໜງການ ຊັບພະຍາກອນທໍາມະຊາດ ແລະ ສິ່ງແວດລ້ອມ ໃນການຕິດຕາມວິໄຈຄຸນນະພາບອາກາດ ແລະ ສຽງ ແລະ ການນໍາໃຊ້ຊັບພະຍາກອນທີ່ມີປະສິດທິຜົນ ແລະ ການຖ່າຍທອດເຕັກໂນໂລຊີທີ່ເໝາະສົມໃນການຄຸ້ມຄອງສິ່ງເສດເຫຼືອ ສຳລັບ ວິສາຫະກິດຂະໜາດກາງ ແລະ ຂະໜາດນ້ອຍ; 

9)  ສໍາເລັດ ການສ້າງແຜນວຽກ ຮ່ວມມື ລາວ-ຈີນ ລະຫວ່າງ ສະພາບັນດິດວິທະຍາສາດ ສປ ຈີນ ກັບ ກະຊວງ ຊັບພະຍາກອນທໍາມະຊາດ ແລະ ສິ່ງແວດລ້ອມ. 

ຈາກນັ້ນ ກອງ​ປະ­ຊຸມ​ ​ໄດ້​ຜ່ານ​ບົດ​ສຳ­ຫຼວດ​ການ​ນຳ­ພາ​ຂອງ​ຄະ­ນະ​ໜ່ວຍ​ພັກຊຸດເກົ່າ ແລະ ປ່ອນ​ບັດ​ເລືອກ​ຕັ້ງ​ເອົາ​ຄະນະ​ໜ່ວຍພັກ​ຊຸດ​ໃໝ່ ເຊິ່ງມີຜູ້ລົງສະຫມັກ ຈໍານວນ 3 ສະຫາຍ.

ກອງ​ປະ­ຊຸມ​ຄັ້ງ​ປະຖົມ​ມະ­ລຶກ ໄດ້​ເປັນ​ເອ­ກະ​ພາບ​ເລືອກ​ເອົາ:

  1. ສະຫາຍ ຄຳຮູ້ ຕຸນາລົມ ເປັນເລຂາ;
  2. ສະຫາຍ ວຽງສຸກ ຫຼ້າສຸກັນ ເປັນຮອງເລຂາ, ປະທານກວດກາ.

 

ໃນ​ໂອ­ກາດ​ດັ່ງ­ກ່າວ, ສະຫາຍ ໄຊຍະເວດ ວິໄຊ ຄະນະປະຈຳພັກ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້​ສະ­ແດງ​ຄວາມ​ຍ້ອງ­ຍໍຊົມ­ເຊີຍ​ຕໍ່​ຄະ­ນະໜ່ວຍພັກ ພະແນກ ຄົ້ນຄວ້າຊັບພະຍາກອນທຳມະຊາດ ແລະ ສິ່ງແວດລ້ອມ  ​ຊຸດ​ເກົ່າ ​ທີ່ໄດ້​ຊີ້​ນໍາ - ນໍາ​ພາ​ສະ­ມາຊິກ​ພັກ, ພະ­ນັກ­ງານ ​ປະ­ຕິ­ບັດ​ໜ້າ­ທີ່​ການ­ເມືອງ ສາ­ມາດ​ຍາດ​ໄດ້ ­ຜົນ​ງານ​ໃນ​ຫຼາຍໆ​ດ້ານ ແລະ ມີ​ທິດ​ຊີ້​ນໍາ​ໃນ​ແຕ່​ລະ​ວຽກ​ງານ​ຢ່າງ​ພາ­ວະ​ວິ­ໄສ ແລະ ມີ​ຈຸດ​ສຸມ. ນອກ­ຈາກ​ນີ້, ສະ­ຫາຍ ຄະນະປະຈຳພັກກະຊວງ, ຍັງໄດ້ຢໍ້າໃຫ້ຄະ­ນະ​ໜ່ວຍພັກ​ຊຸດ​ໃໝ່ ຈົ່ງສືບຕໍ່ເປັນເຈົ້າການໃນການຊີ້ນໍາ-ນໍາພາສະ­ມາ­ຊິກ​ພັກ ແລະ ​​ພະ­ນັກ­ງານລັດຖະກອນທັງຫມົດຢູ່ພາຍໃນພະແນກ ດ້ວຍຄວາມຮັບຜິດຊອບສູງ ເພື່ອຈັດຕັ້ງຜັນຂະຫຍາຍ​ມະ­ຕິ​ກອງ​ປະ­ຊຸມ​ໃຫຍ່ 5 ປີ ຄັ້ງທີ 2 (2021-2025) ໃຫ້ປະກົດຜົນເປັນຈິງ.