ກອງ​ປະ­ຊຸມ​ໃຫຍ່ ​ຄັ້ງ​ທີ I ຂອງ​ໜ່ວຍ​ພັກ​ ພະແນກ ຄຸ້ມຄອງໂຄງການ, ກົມ ແຜນການ ແລະ ການເງິນ ໄດ້​ຈັດ​ຂຶ້ນໃນ ຕອນບ່າຍ ຂອງວັນທີ 23 ກໍລະກົດ 2020, ທີ່ຫ້ອງປະຊຸມ ກົມທີ່ດິນ, ໂດຍ​ໃຫ້​ກຽດ​ເຂົ້າ​ຮ່ວມຂອງ ສະຫາຍ ໄຊນະຄອນ ອິນທະວົງ ຄະນະປະຈຳພັກ, ຮອງລັດຖະມົນຕີ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ ມີ​ແຂກ​ຖືກ​ເຊີນ ຈາກບັນດາຫນ່ວຍພັກອື່ນໆ ອ້ອມຂ້າງ ກຊສ ແລະ ສະ​ມາ​ຊິກ​ພັກຢູ່ພາຍໃນຫນ່ວຍ​ເຂົ້າ​ຮ່ວມ ທັງຫມົດ 21 ສະຫາຍ, ຍິງ 7 ສະຫາຍ.

     ໃນກອງປະຊຸມ ສະຫາຍ ສຸກສະໝອນ ປະຖັມມະວົງ ເລຂາໜ່ວຍພັກ ພະແນກ ຄຸ້ມຄອງໂຄງການ, ກົມ ແຜນການ ແລະ ການເງິນ, ໄດ້ຂຶ້ນຜ່ານບົດລາຍງານການເມືອງ ການຈັດຕັ້ງປະຕິບັດວຽກງານທີ່ຜ່ານມາວ່າ: ໜ່ວຍພັກ ພະແນກຄຸ້ມຄອງໂຄງການ ເປັນໜ່ວຍພັກໜຶ່ງທີ່ຖືກແຕ່ງຕັ້ງບົ່ງໂຕຕາມມະຕິຕົກລົງ ສະບັບເລກທີ122/ຄພ.ກຊສ, ລົງວັນທີ 01 ມິຖຸນາ 2020 ທີ່ຂື້ນກັບຄະນະພັກຮາກຖານ ກົມແຜນການ ແລະ ການເງີນ, ມີສະມາຊິກ​ພັກ​ທັງ​ໝົດ 7 ສະຫາຍ (ຍິງ 1 ສະຫາຍ) ​ ສໍາຮອງ 2 ຍິງ 1;  ເຊີ່ງມີພາລະບົດບາດເປັນເສນາທິການ ໃຫ້ແກ່ ຄະນະພັກຮາກຖານ ໃນການປະສານງານ ແລະ ອໍານວຍຄວາມສະດວກວຽກງານຕ່າງໆ ເປັນຕົ້ນແມ່ນ ກວດຜ່ານບັນດາເອກະສານໂຄງການ ຂອງບັນດາກົມ ແລະ ສະຖາບັນ ພາຍໃນ ກຊສ, ໄລຍະຜ່ານມາແຕ່ສົກປີ 2016-2020, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ຮັບງົບປະມານການລົງທຶນຂອງລັດພາກ 67 ທັງໝົດຈໍານວນ 115 ໂຄງການ ໃນນີ້, ເປັນທຶນສົມທົບຕ່າງປະເທດຈຳນວນ 42 ໂຄງການ.

 

     ຈາກນັ້ນ ກອງ​ປະ­ຊຸມ​ ​ໄດ້​ຜ່ານ​ບົດ​ສຳ­ຫຼວດ​ການ​ນຳ­ພາ​ຂອງ​ຄະ­ນະ​ໜ່ວຍ​ພັກຊຸດເກົ່າ ແລະ ປ່ອນ​ບັດ​ເລືອກ​ຕັ້ງ​ເອົາ​ຄະນະ​ໜ່ວຍພັກ​ຊຸດ​ໃໝ່ ເຊິ່ງມີຜູ້ລົງສະຫມັກ ຈໍານວນ 3 ສະຫາຍ. ກອງ​ປະ­ຊຸມ​ຄັ້ງ​ປະຖົມ​ມະ­ລືກ ໄດ້​ເປັນ​ເອ­ກະ​ພາບ​ເລືອກ​ເອົາ:

           1. ສະຫາຍ ສຸກສະໝອນ ປະຖັມມະວົງ ເປັນເລຂາໜ່ວຍພັກ.

        2. ສະຫາຍ ຄຳພວງ ຄຳມູນຕີ ເປັນຮອງເລຂາໜ່ວຍພັກ, ເປັນປະທານກວດກາ.

     ໃນໂອກາດດັ່ງກ່າວ ສະຫາຍ ໄຊນະຄອນ ອິນທະວົງ ຄະນະປະຈຳພັກ, ຮອງລັດຖະມົນຕີ ກໍ່ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານການຊີ້ນຳ-ນຳພາ ຂອງໜ່ວຍພັກ ທີ່ຍາດມາໄດ້ ໃນໄລຍະ 5 ປີຜ່ານມາ, ພ້ອມກັນນັ້ນ ສະຫາຍ ກໍ່ໄດ້ເນັ້ນ​ບາງ​ຄຳ​ເຫັນ​ຕື່ມ​ອີກບາງ​ດ້ານດັ່ງ​ນີ້: ໃຫ້ຮີບຮ້ອນໃນການເອົາທິດທາງແຜນການ ຂອງໜ່ວຍພັກ ໄປຈັດຕັ້ງປະຕິບັດທິດທາງອັນຕໍ່ໜ້າ ໃນຂົງເຂດຄຸ້ມຄອງໂຄງການ; ຕ້ອງເພີ່ມຄວາມຮັບຮູ້ ແລະ ຄວາມເຂົ້າໃຈໃນການເຄື່ອນໄຫວພັກໃນໄລຍະໃໝ່ ເນັ້ນໃຫ້ມີຄຸນນະພາບ ເອົາປະສິດທິພາບ; ໃຫ້ເອົາຈິດໃຈອັນທີ່ໄດ້ຮຽນ ມາປະສານສົບທົບ ໂດຍສະເພາະ ຈະມີສິ່ງທ້າທາຍ, ວຽກຈະຫຼາຍຂື້ນ, ຜູ້ໜຶ່ງຕ້ອງຫຼາຍໜ້າວຽກ, ພຶດຕິກຳສະແດງອອກ ຈະມີແລ້ວໃນລະບຽບພັກ ມີແລ້ວໃນເອກະສານ ສະນັ້ນຕ້ອງໄດ້ເຊື່ອມຊືມ ແລະ ປະຕິບັດຢ່າງເຂັ້ມງວດ ເພື່ອການສ້າງມະຫາຊົນກ້າວໜ້າ ໃຫ້ການເປັນສະມາຊິກ ທີ່ມີຄຸນນະພາບ.