ກອງ​ປະ­ຊຸມ​ໃຫຍ່ ​ຄັ້ງ​ທີ I ຂອງ​ໜ່ວຍ​ພັກ​ ພະແນກສະຖິຕິ ແລະ ຂໍ້ມູນຂ່າວສານ, ສະຖາບັນ ຄົ້ນຄວ້າ ແລະ ສະຖິຕິ ຊັບພະຍາກອນທຳມະຊາດ ແລະ ສິ່ງແວດລ້ອມ(ສຄສຊສ) ໄດ້​ຈັດ​ຂຶ້ນໃນຕອນບ່າຍຂອງ ວັນ​ທີ 23 ກໍ­ລະ­ກົດ 2020​ ທີ່​ຫ້ອງປະຊຸມ ກົມສິ່ງແວດລ້ອມ ໂດຍ​ໃຫ້​ກຽດ​ເຂົ້າ​ຮ່ວມຂອງ ສະ­ຫາຍ ໄຊຍະເວດ ວິໄຊ ຄະນະປະຈຳພັກ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ມີ​ແຂກ​ຖືກ​ເຊີນຈາກບັນດາຫນ່ວຍພັກອື່ນໆ ອ້ອມຂ້າງ ກຊສ ແລະ ສະ​ມາ​ຊິກ​ພັກຢູ່ພາຍໃນຫນ່ວຍ​ເຂົ້າ​ຮ່ວມ ທັງຫມົດ 30 ສະຫາຍ, ຍິງ 8 ສະຫາຍ.

ກອງ​ປະ­ຊຸມ​ຄັ້ງ​ນີ້​ ໄດ້​ຜ່ານ​ບົດ​ລາຍ​ງານ​ການ­ເມືອງ ປະກອບ​ມີສອງ​ພາກ ​ຄື: ​ພາກ​ທີ I ສະ­ຫຼຸບ​ການ­ເຄື່ອນ­ໄຫວ​ຊີ້​ນຳ​-​ນຳ­ພາ​ ວຽກ​ງານ ​ຂອງ​ຄະນະໜ່ວຍ​ພັກ ​ພະແນກສະຖິຕິ ແລະ ຂໍ້ມູນຂ່າວສານ  ໄລຍະ 5 ປີ­ຜ່ານ­ມາ ແລະ ພາກ​ທີ II ທິດ​ທາງ​ແຜນ­ການ­ເຄື່ອນ­ໄຫວ​ຊີ້ນໍາ-ນຳພາ ຂອງຄະນະໜ່ວຍພັກ ​ພະແນກສະຖິຕິ ແລະ ຂໍ້ມູນຂ່າວສານ ຊຸດໃຫມ່ ແຕ່ປີ 2021-2025 ສະ­ເໜີ​ໂດຍ ສະຫາຍ ຈັນທະລາດ ສີຫາພົນ, ເລຂາໜ່ວຍພັກ ພະແນກສະຖິຕິ ແລະ ຂໍ້ມູນຂ່າວສານ  

ເຊິ່ງໄດ້​ຍົກ​ໃຫ້​ເຫັນ​ວ່າ: ໜ່ວຍພັກພະແນກສະຖິຕິ ແລະ ຂໍ້ມູນຂ່າວສານ, ສຄສຊສ ໄດ້ສ້າງຕັ້ງຂຶ້ນໃຫມ່ ພາຍຫຼັງທີ່ມີການໂຮມເຂົ້າກັນ ຂອງໜ່ວຍພັກສະຖາບັນຄົ້ນຄ້ວາ ຊັບພະຍາກອນທໍາມະຊາດ ແລະ ສິ່ງແວດລ້ອມ ແລະ ສູນຂໍ້ມູນຂ່າວສານ ຊັບພະຍາກອນທໍາມະຊາດ ແລະ ສິ່ງແວດ ລ້ອມ ເປັນຄະນະພັກຮາກຖານ ສະຖາບັນຄົ້ນຄ້ວາ ແລະ ສະຖິຕິຊັບພະຍາກອນທຳມະຊາດ ແລະ ສິ່ງແວດລ້ອມ. ໜ່ວຍພັກ ພະແນກສະຖິຕິ ແລະ ຂໍ້ມູນຂ່າວສານ ແມ່ນໜ່ວຍພັກໜຶ່ງ ໃນ 6 ໜ່ວຍພັກ ທີ່ຂຶ້ນກັບຄະນະພັກຮາກຖານ ສະຖາບັນກະຊວງ ຊັບພະຍາກອນ ທຳມະຊາດ ແລະ ສິ່ງແວດລ້ອມ ມີສະມາຊິກພັກທັງໝົດ 5 ສະຫາຍ, ສະມາຊິກພັກສໍາຮອງ 1 ສະຫາຍ (ຍິງ 1 ສະຫາຍ), ມີ​ພະ­ນັກ­ງານ​ລວມ​ທັງ​ໝົດ​ພາຍ​ໃນ​ພະແນກ 12 ສະຫາຍ (ຍິງ 3 ສະ­ຫາຍ).

ໄລຍະທີ່ຜ່ານມາ ຄະນະໜ່ວຍ​ພັກ​ ພະແນກສະຖິຕິ ແລະ ຂໍ້ມູນຂ່າວສານ  ໄດ້​ຖື​ເອົາ​ການ​ກໍ່­ສ້າງ​ສະມາຊິກພັກ ແລະ ພະນັກງານ ຢູ່ພາຍໃນພະແນກ ໂດຍຖືເອົາວຽກງານການສຶກສາອົບຮົມ​ທາງ​ດ້ານ​ການ​ເມືອງ​-​ແນວ​ຄິດ ເປັນກົກ, ຖືເອົາ ​ ການຈັດ​ຕັ້ງ​ຜັນ​ຂະ­ຫຍາຍ​ບັນ­ດາ​ມະ­ຕິ, ຄຳ​ສັ່ງ​ແນວ­ທາງ​ນະ­ໂຍ­ບາຍ​ຂອງ​ພັກ, ວິໄສທັດ, ຍຸດທະສາດ ແລະ ແຜນການ 5 ປີ (2016-2020) ຂອງກະຊວງ ເວົ້າລວມ ເວົ້າສະເພາະແມ່ນແຜນການ 5 ປີ ຂອງກົມ ກໍ່ຄືຂອງພະແນກ ເປັນສໍາຄັນ ແນໃສ່ເພື່ອຈັດຕັ້ງປະຕິບັດບັນດາຄາດຫມາຍສູ້ຊົນໃນໄລຍະ 5 ປີຜ່ານມາ ໃຫ້ໄດ້ຮັບຜົນສໍາເລັດຕາມແຜນການ  ເຊິ່ງຜ່ານການຈັດຕັ້ງຕິບັດວຽກງານວິຊາສະເພາະຕົວຈິງ ສາມາດສະຫລຸບໄດ້ບັນດາຜົນສໍາເລັດທີ່ພົ້ນເດັ່ນດັ່ງນີ້:

  1. ໜ່ວຍພັກໄດ້ຫັນເອົາທິດທາງແຜນການດ້ານວິຊາສະເພາະມາຈັດຕັ້ງຜັນຂະຫຍາຍເປັນແຜນການ, ໂຄງການ ແລະ ວິທີການຈັດຕັ້ງປະຕິບັດອັນລະອຽດໂດຍໄດ້ມອບໜ້າທີ່ຮັບຜິດຊອບ ໃຫ້ແຕ່ລະສະຫາຍ ສະມາຊິກພັກເອົາໃຈໃສ່ລົງເລິກຊີ້ນຳວຽກງານແຕ່ລະຂົງເຂດ; ເສີມຂະຫຍາຍຫົວຄິດປະດິດສ້າງໃນ ວຽກງານວິຊາການ ເຮັດໃຫ້ວຽກງານຂໍ້ມູນ-ຂ່າວສານ ໄດ້ມີການຂະຫຍາຍຕົວແຕ່ລະດ້ານສຳເລັດ ເປັນກ້າວໆມາ.
  2. ກຳນົດທິດທາງພັດທະນາວຽກງານຂໍ້ມູນ-ຂ່າວສານ, ການພັດທະນາລະບົບຖານຂໍ້ມູນຕ່າງໆ, ກຳນົດປະເພດຂໍ້ມູນ ແລະ ວາງແຜນການຂຶ້ນບັນຊີ ແລະ ຂຶ້ນທະບຽນ ຊັບພະຍາກອນທຳມະຊາດ ແລະ ສິ່ງແວດລ້ອມ.
  3. ຄົ້ນຄວ້າ ບັນດານິຕິກຳ, ລະບຽບການໃນຄຸ້ມຄອງ ແລະ ສ້າງຄູ່ມືວິຊາການຕ່າງໆ ເພື່ອເປັນບ່ອນອີງໃນ ການຈັດຕັ້ງປະຕິບັດວຽກງານຂໍ້ມູນ-ຂ່າວສານ ສຳເລັດຈຳນວນໜຶ່ງ.
  4. ປັບປຸງເຕັກໂນໂລຊີຂໍ້ມູນ-ຂ່າວສານ ຊັບພະຍາກອນທຳມະຊາດ ແລະ ສິ່ງແວດລ້ອມ.
  5.  ຄົ້ນຄວ້າວຽກງານສະຖິຕິ-ຕົວຊີ້ບອກແຕ່ລະດ້ານໃນຂົງເຂດຊັບພະຍາກອນທຳມະຊາດ ແລະ ສິ່ງແວດ ລ້ອມ.
  6. ຜະລິດ ປຶ້ມ ສະຖິຕິປະຈຳປີ 2018 ສໍາເລັດ ໃນ5 ຂົງເຂດ ເຊັ່ນ: ຂົງເຂດທີ່ດິນ, ຂົງເຂດ ຊັບພະຍາກອນນ້ໍາ, ອຸຕຸນິຍົມ-ອຸທົກກະສາດ, ຂົງເຂດປ່າໄມ້ ແລະ ຊີວະນາໆພັນ, ຂົງເຂດທໍລະນີສາດແຮ່ທາດ ແລະ ຂົງເຂດສິ່ງແວດລ້ອມ ແລະ ການປ່ຽນແປງດິນຟ້າອາກາດ.
  7. ປັບປຸງຫ້ອງສະໝຸດ ເພື່ອສັງລວມ, ເກັບຮັກສາ ບັນດາປື້ມອ່ານ, ວາລະສານ, ບັນດານິຕິກຳ ແລະ ບັນດາ ເອກະສານຕ່າງໆກ່ຽວກັບ ຊັບພະຍາກອນທຳມະຊາດ ແລະ ສິ່ງແວດລ້ອມຢ່າງເປັນລະບົບ.
  8. ເກັບກຳຂໍ້ມູນ 8 ປະເພດ ການນໍາໃຊ້ທີ່ດີນ ເຂົົ້າ ລະບົບແຜນທີ່ດຽວ ສໍາເລັດ ແຂວງ ໄຊສົມບູນ, ແຂວງບໍລິຄຳໄຊ ສາມ ເມືອງ ແລະ ສຳເລັດການເກັບກຳຂໍ້ມູນ ການວາງແຜນກນນໍາໃຊ້ທີ່ດີນ ແລະ ຄຸ້ມຄອງສີ່ງແວດລ້ອມ ແບບຮອບດ້ານ ຂັ້ນເມືອງ 18 ແຂວງ

ຈາກນັ້ນ ກອງ​ປະ­ຊຸມ​ ​ໄດ້​ຜ່ານ​ບົດ​ສຳ­ຫຼວດ​ການ​ນຳ­ພາ​ຂອງ​ຄະ­ນະ​ໜ່ວຍ​ພັກຊຸດເກົ່າ ແລະ ປ່ອນ​ບັດ​ເລືອກ​ຕັ້ງ​ເອົາ​ຄະນະ​ໜ່ວຍພັກ​ຊຸດ​ໃໝ່ ເຊິ່ງມີຜູ້ລົງສະຫມັກ ຈໍານວນ 3 ສະຫາຍ. ກອງ​ປະ­ຊຸມ​ຄັ້ງ​ປະຖົມ​ມະ­ລຶກ ໄດ້​ເປັນ​ເອ­ກະ​ພາບ​ເລືອກ​ເອົາ:

  1. ສະຫາຍ ອິດທິພົນ ຈັນທະມາລິນ ເປັນເລຂາ;
  2. ສະຫາຍ ຈັນທະລາດ ສີຫາພົນ ເປັນຮອງເລຂາ, ປະທານກວດກາ.

 

ໃນ​ໂອ­ກາດ​ດັ່ງ­ກ່າວ, ສະຫາຍ ໄຊຍະເວດ ວິໄຊ ຄະນະປະຈຳພັກ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້​ສະ­ແດງ​ຄວາມ​ຍ້ອງ­ຍໍຊົມ­ເຊີຍ​ຕໍ່​ຄະ­ນະໜ່ວຍພັກ ພະແນກສະຖິຕິ ແລະ ຂໍ້ມູນຂ່າວສານ  ​ຊຸດ​ເກົ່າ ​ທີ່ໄດ້​ຊີ້​ນໍາ - ນໍາ​ພາ​ສະ­ມາຊິກ​ພັກ, ພະ­ນັກ­ງານ ​ປະ­ຕິ­ບັດ​ໜ້າ­ທີ່​ການ­ເມືອງ ສາ­ມາດ​ຍາດ​ໄດ້ ­ຜົນ​ງານ​ໃນ​ຫຼາຍໆ​ດ້ານ ແລະ ມີ​ທິດ​ຊີ້​ນໍາ​ໃນ​ແຕ່​ລະ​ວຽກ​ງານ​ຢ່າງ​ພາ­ວະ​ວິ­ໄສ ແລະ ມີ​ຈຸດ​ສຸມ. ນອກ­ຈາກ​ນີ້, ສະ­ຫາຍ ຄະນະປະຈຳພັກກະຊວງ, ຍັງໄດ້ຢໍ້າໃຫ້ຄະ­ນະ​ໜ່ວຍພັກ​ຊຸດ​ໃໝ່ ຈົ່ງສືບຕໍ່ເປັນເຈົ້າການໃນການຊີ້ນໍາ-ນໍາພາສະ­ມາ­ຊິກ​ພັກ ແລະ ​​ພະ­ນັກ­ງານລັດຖະກອນທັງຫມົດຢູ່ພາຍໃນພະແນກ ດ້ວຍຄວາມຮັບຜິດຊອບສູງ ເພື່ອຈັດຕັ້ງຜັນຂະຫຍາຍ​ມະ­ຕິ​ກອງ​ປະ­ຊຸມ​ໃຫຍ່ 5 ປີ ຄັ້ງທີ 2 (2021-2025) ໃຫ້ປະກົດຜົນເປັນຈິງ.