ກອງ​ປະ­ຊຸມ​ໃຫຍ່ ​ຄັ້ງ​ທີ I ຂອງ​ໜ່ວຍ​ພັກ​ ພະແນກ ງົບປະມານ ແລະ ລາຍຮັບວິຊາການ, ກົມແຜນການ ແລະ ການເງິນ ໄດ້​ຈັດ​ຂຶ້ນໃນ ຕອນເຊົ້າ ຂອງວັນທີ 23 ກໍລະກົດ 2020, ທີ່ຫ້ອງປະຊຸມ ກົມທີ່ດິນ, ໂດຍ​ໃຫ້​ກຽດ​ເຂົ້າ​ຮ່ວມຂອງ ສະຫາຍ ໄຊນະຄອນ ອິນທະວົງ ຄະນະປະຈຳພັກ, ຮອງລັດຖະມົນຕີ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ ມີ​ແຂກ​ຖືກ​ເຊີນ ຈາກບັນດາຫນ່ວຍພັກອື່ນໆ ອ້ອມຂ້າງ ກຊສ ແລະ ສະ​ມາ​ຊິກ​ພັກຢູ່ພາຍໃນຫນ່ວຍ​ເຂົ້າ​ຮ່ວມ ທັງຫມົດ 23 ສະຫາຍ, ຍິງ 7 ສະຫາຍ.

     ໃນກອງປະຊຸມ ສະຫາຍ ບົວລົມພອນ ຄຳວົງສາ ຮອງເລຂາໜ່ວຍພັກ ພະແນກ ງົບປະມານ ແລະ ລາຍຮັບວິຊາການ, ກົມແຜນການ ແລະ ການເງິນ, ໄດ້ຂຶ້ນຜ່ານບົດລາຍງານການເມືອງ ການຈັດຕັ້ງປະຕິບັດວຽກງານທີ່ຜ່ານມາວ່າ: ໜ່ວຍພັກໄດ້ຍຶດໝັ້ນຫຼັກການ ແລະ ແບບແຜນວິທີນຳພາຂອງພັກ ໃນການຜັນຂະຫຍາຍ ແລະ ການຫັນເອົາແນວທາງ ລະບຽບການຕ່າງໆ ທີ່ກະຊວງການເງິນວາງອອກ ໃນການຄຸ້ມຄອງງົບປະມານແຫ່ງລັດ ໂດຍສະເພາະ ເອົາໃຈໃສ່ ຂຶ້ນແຜນງົບປະມານ ຂອງກະຊວງໃນແຕ່ລະປີ, ຕິດຕາມການອະນຸມັດແຜນງົບປະມານ ປະຈໍາປີ, 6 ເດືອນ ແລະ ແຕ່ລະງວດ ຈາກກະຊວງການເງິນ ເພື່ອມາຈັດສັນ ໃຫ້ ຫ້ອງການ, ກົມ, ກອງ ແລະ ສະຖາບັນ, ເອົາໃຈໃສ່ ກວດຜ່ານແຜນງົບປະມານ ເພື່ອຈັດຕັ້ງປະຕິບັດຕົວເລກແຜນການ ທີ່ກະຊວງການເງິນອະນຸມັດ ແຕ່ລະງວດ ແຕ່ລະປີບໍ່ຫຼຸດ 92-95%,  ເອົາໃຈໃສ່ຕິດຕາມ ແກ້ໄຂເງິນເດືອນ ເງິນອຸດໜູນນະໂຍບາຍໃຫ້ພະນັກງານ-ລັດຖະກອນ ກຊສ ແລະ ກອງທຶນປົກປັກຮັກສາສິ່ງແວດລ້ອມ ໄດ້ທັນກຳນົດເວລາ ທີ່ກະຊວງການເງິນວາງອອກຄື: ວັນທີ 25-30 ຂອງທຸກເດືອນ ໃຫ້ສາມາດເບີກຈ່າຍ, ໄດ້ຊຸກຍູ້ແກ້ໄຂເງິນນະໂຍບາຍພິເສດຕໍ່ພະນັກງານ-ລັດຖະກອນ ທີ່ເຈັບເປັນນອນໂຮງໝໍປິ່ນປົວຍາວນານ. ນອກຈາກນັ້ນ ໄດ້ແບ່ງງານ ແບ່ງຄວາມຮັບຜິດຊອບ ພາຍໃນຄະນະພະແນກ ແລະ ວິຊາການທີ່ຂຶ້ນກັບ, ປັບປຸງກົນໄກປະສານງານ ວຽກງານລະຫວ່າງ ບັນດາພະແນກພາຍໃນ ແລະ ພາກສ່ວນກ່ຽວຂ້ອງ ເພື່ອເຮັດໃຫ້ວຽກງານຄຸ້ມຄອງງົບປະມານ, ລາຍຮັບວິຊາການ ໃຫ້ມີຄວາມຮັດກຸມ ເຂັ້ມງວດດ້ານລະບຽບການ ມີປະສິດທິຜົນ ສ້າງສິ່ງອໍານວຍຄວາມສະດວກຕອບສະໜອງທາງດ້ານງົບປະມານ ເພື່ອຮັບໃຊ້ວຽກງານຕ່າງໆ ໃຫ້ແກ່ຄະນະນຳ ກໍຄືບັນດາກົມ ກອງ ພາຍໃນກະຊວງໃຫ້ນັບມື້ນັບດີຂຶ້ນ ມີຄວາມຈັດເຈນ, ໂປ່ງໃສ ແລະ ສາມາດກວດກາໄດ້.

 

     ຈາກນັ້ນ ກອງ​ປະ­ຊຸມ​ ​ໄດ້​ຜ່ານ​ບົດ​ສຳ­ຫຼວດ​ການ​ນຳ­ພາ​ຂອງ​ຄະ­ນະ​ໜ່ວຍ​ພັກຊຸດເກົ່າ ແລະ ປ່ອນ​ບັດ​ເລືອກ​ຕັ້ງ​ເອົາ​ຄະນະ​ໜ່ວຍພັກ​ຊຸດ​ໃໝ່ ເຊິ່ງມີຜູ້ລົງສະຫມັກ ຈໍານວນ 3 ສະຫາຍ. ກອງ​ປະ­ຊຸມ​ຄັ້ງ​ປະຖົມ​ມະ­ລືກ ໄດ້​ເປັນ​ເອ­ກະ​ພາບ​ເລືອກ​ເອົາ:

  1. ສະຫາຍ ນາງ ຄຳຟອງ ໂສຕາປະເສີດ ເປັນເລຂາໜ່ວຍພັກ.
  2. ສະຫາຍ ບົວລົມພອນ ຄຳວົງສາ ເປັນຮອງເລຂາໜ່ວຍພັກ, ເປັນປະທານກວດກາ.

     ໃນໂອກາດດັ່ງກ່າວ ສະຫາຍ ໄຊນະຄອນ ອິນທະວົງ ຄະນະປະຈຳພັກ, ຮອງລັດຖະມົນຕີ ກໍ່ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານການຊີ້ນຳ-ນຳພາ ຂອງໜ່ວຍພັກ ທີ່ຍາດມາໄດ້ ໃນໄລຍະ 5 ປີຜ່ານມາ, ພ້ອມກັນນັ້ນ ສະຫາຍ ກໍ່ໄດ້ເນັ້ນ​ບາງ​ຄຳ​ເຫັນ​ຕື່ມ​ອີກບາງ​ດ້ານດັ່ງ​ນີ້: ໃຫ້ຮີບຮ້ອນຜັນຂະຫຍາຍວຽກງານແຜນການໃນຕໍ່ໜ້າ; ການຊີ້ນໍາ-ນໍາພາຂອງຄະນະຊຸດໃໝ່ ຕ້ອງຮັບປະກັນຄວາມເປັນເອກະພາບ ທົ່ວເຖິງໂດຍສະເພາະໃນຖັນແຖວຂອງສະມາຊິກພັກ ເສີມຂະຫຍາຍດ້ານດີ ແລະ ສືບຕໍ່ກໍ່ສ້າງມະຫາຊົນ ພ້ອມທັງ ສ້າງວັດທະນະທຳໃນການຮຽນຮູ້ຝຶກຝົນຕົນເອງ ເພື່ອນໍາມາໃຊ້ເຂົ້າໃນວຽກງານທີ່ໄດ້ຮັບຜິດຊອບໃຫ້ປະສົບຜົນສຳເລັດຫຼາຍຂຶ້ນກວ່າເກົ່າ.