ໃນຕອນເຊົ້າຂອງວັນທີ 10 ມີນາ 2020, ສະຫະພັນແມ່ຍິງ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ (ກຊສ) ໄດ້ຈັດກອງປະຊຸມສໍາມະນາວິທະຍາສາດ ໃນຫົວຂໍ້: “ວຽກງານ 3 ດີ ແລະ ຜົນງານການຈັດຕັ້ງເຄື່ອນໄຫວວຽກແມ່ຍິງ ກຊສ ໃນໄລຍະຜ່ານມາ” ເນື່ອງໃນໂອກາດສະເຫຼີມສະຫຼອງວັນແມ່ຍິງສາກົນ 8 ມີນາ ຄົບຮອບ 110 ປີ, ທັງເປັນການສ້າງຂະບວນການ ຕ້ອນຮັບກອງປະຊຸມໃຫຍ່ຜູ້ແທນແມ່ຍິງ ກຊສ ຄັ້ງທີ II ແລະ ກອງປະຊຸມໃຫຍ່ຄັ້ງທີ II ຂອງອົງຄະນະພັກ ກະຊວງ ທີ່ຈະໄຂຂຶ້ນໃນມໍ່ໆນີ້, ທີ່ຫ້ອງປະຊຸມໃຫຍ່ ກຊສ. ໃຫ້ກຽດເຂົ້າຮ່ວມໂດຍ ທ່ານ ສົມມາດ ພົລເສນາ, ກຳມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ. ໃຫ້ກຽດບັນລະຍາຍເອກະສານ ໂດຍທ່ານ ນາງ ປອ ນິນປະເສີດ ໄຊຍະພອນສີ ຫົວໜ້າກົມ ພັດທະນາແມ່ຍິງລາວ, ສູນກາງສະຫະພັນແມ່ຍິງລາວ. ມີຄະນະປະຈຳພັກ ກະຊວງ, ຮອງລັດຖະມົນຕີ, ບັນດາຫົວໜ້າກົມ, ຜູ້ຕາງໜ້າຈາກ 3 ອົງການຈັດຕັ້ງມະຫາຊົນ ພາຍໃນ ກຊສ, ຄະນະບໍລິຫານ ງານສະຫະພັນແມ່ຍິງກະຊວງ ພ້ອມດ້ວຍເອື້ອຍນ້ອງແມ່ຍິງ ອ້ອມຂ້າງກະຊວງ ເຂົ້າຮ່ວມ ຢ່າງພ້ອມພຽງ.

ກອງປະຊຸມສຳມະນາວິທະຍາສາດ ໃນຄັ້ງນີ້ ໄດ້ຮັບຟັງການນຳສະເໜີ ຜົນງານການຈັດຕັ້ງເຄື່ອນໄຫວ ຂອງສະຫະພັນແມ່ຍິງ ກຊສ ໃນໄລຍະຜ່ານມາ ໂດຍການນຳສະເໜີຂອງ ທ່ານ ນາງ ທອງຈັນ ອະຄະມະເຂດ, ຮອງປະທານ ສະຫະພັນແມ່ຍິງ ກຊສ. ນອກຈາກນັ້ນ ກໍ່ຍັງໄດ້ຮັບຟັງການບັນຍາຍຂອງ ທ່ານ ນາງ ປອ ນິນປະເສີດ ໄຊຍະພອນສີ ຫົວໜ້າກົມ ພັດທະນາແມ່ຍິງລາວ, ສູນກາງສະຫະພັນແມ່ຍິງລາວ ໃນຫົວຂໍ້: “ແມ່ຍິງກັບການຈັດຕັ້ງປະຕິບັດຄຳຂວັນ 3 ດີ ຄື: ພົນລະເມືອງດີ, ພັດທະນາດີ, (ພັດທະນາຕົນເອງ, ພັດທະນາ ປະເທດຊາດ) ແລະ ຄອບຄົວດີ”.

ທັງນີ້ກໍເພື່ອເປັນການສົ່ງເສີມໃຫ້ເອື້ອຍນ້ອງແມ່ຍິງໄດ້ຮຽນຮູ້ ແລະ ເຂົ້າໃຈ ກ່ຽວກັບ ວຽກງານ 3 ດີ ໃຫ້ຫຼາຍຂຶ້ນ ເພື່ອນໍາເອົາຄວາມຮູ້ດັ່ງກ່າວນໍາໄປ ໝູນໃຊ້ເຂົ້າໃນຊິວິດປະຈໍາວັນ ເພື່ອເປັນເຈົ້າການ ໃນການຈັດຕັ້ງປະຕິບັດ ຂໍ້ແຂ່ງຂັນດັ່ງກ່າວ ໃຫ້ເປັນຂະບວນການຟົດຟື້ນ ແລະ ໃຫ້ສຳເລັດຜົນຕາມຄາດໝາຍທີ່ ສະຫະພັນແມ່ຍິງ ກະຊວງ ໄດ້ກຳນົດໄວ້. ໃນໂອກາດດຽວກັນ, ຍັງໄດ້ ມີການປຶກສາຫາລື ແລະ ສົນທະນາແລກປ່ຽນປະສົບການ ຊຶ່ງກັນ ແລະ ກັນ.