ໃນຕອນເຊົ້າຂອງ ວັນທີ 3 ມີນາ 2020, ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ຈັດກອງປະຊຸມສະຫລຸບວຽກງານຈັດຕັ້ງ, ກໍ່ສ້າງພັກ-ພະນັກງານ ປະຈຳປີ 2019 ແລະ ທິດທາງແຜນການປະຈຳປີ 2020 ຂອງກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ  ໂດຍການເປັນປະທານຂອງ ສະຫາຍ ສົມມາດ ພົລເສນາ ກຳມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ, ມີຄະນະປະຈຳ, ຄະນະພັກກະຊວງ, ຄະນະໜ່ວຍພັກ, ຫົວໜ້າກົມກອງ, ຮອງຫົວໜ້າກົມກອງ, ຕາງໜ້າຈາກຄະນະຈັດຕັ້ງສູນກາງພັກ, ຄະນະພະແນກ, ສະມາຊິກພັກ ແລະ ພະນັກງານຫຼັກແຫຼ່ງ ເຂົ້າຮ່ວມ.

ກອງປະຊຸມດັ່ງກ່າວ ແມ່ນໄດ້ເຜີຍແຜ່ເຊື່ອມຊຶມເອກະສານ: ຄໍາແນະນໍາ ຂອງຄະນະຈັດຕັ້ງສູນກາງພັກ ກ່ຽວກັບ ການຈັດຕັ້ງປະຕິບັດມະຕິຂອງກົມການເມືອງສູນກາງພັກ ວ່າດ້ວຍ ລະບອບການຮໍ່າຮຽນທິດສະດີການເມືອງ; ການສ້າງແຜນກໍ່ສ້າງ-ບໍາລຸງພະນັກງານນໍາພາ-ຄຸ້ມຄອງ ແລະ ຂໍ້ກໍານົດຂອງຄະນະເລຂາທິການສູນກາງພັກ ວ່າດ້ວຍ ການຢັ້ງຢືນລະດັບທິດສະດີການເມືອງ ສະບັບເລກທີ 204/ຄຈສພ, ລົງວັນທີ 5 ພະຈິກ 2019; ຄໍາແນະນໍາ ຂອງຄະນະນໍາ ຂອງຄະນະຈັດຕັ້ງສູນກາງພັກ ກ່ຽວກັບ ການຈັດຕັ້ງປະຕິບັດຄໍາສັ່ງກົມການເມືອງສູນກາງພັກ ວ່າດ້ວຍ ວຽກຂະຫຍາຍພັກ ສະບັບເລກທີ 201/ຄຈສພ, ລົງວັນທີ 29 ຕຸລາ 2019 ແລະ ບົດໂອ້ລົມຂອງສະຫາຍ ຈັນສີ ໂພສີຄໍາ, ກໍາມະການກົມການເມືອງ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ຕໍ່ກອງປະຊຸມສະຫຼຸບວຽກງານຈັດຕັ້ງ, ກໍ່ສ້າງພັກ-ພະນັກງານ ປະຈໍາປີ 2019 ຊຶ່ງແມ່ນ  ສະຫາຍ   ບຸນມີ ພຸດທະວົງ, ຮອງເລຂາຄະນະພັກ, ຮອງລັດຖະມົນຕີ ກຊສ ເປັນຜູ້ເຜີຍແຜ່, ແລະ ຍັງໄດ້ສະເໜີບົດສະຫລຸບວຽກງານຈັດຕັ້ງ, ກໍ່ສ້າງພັກ-ພະນັກງານ ປະຈຳປີ 2019 ແລະ ທິດທາງແຜນການ ປະຈຳປີ 2020 ຂອງ ກຊສ.

ໃນຕອນທ້າຍຂອງກອງປະຊຸມດັ່ງກ່າວ ຍັງໄດ້ ມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2019 ໃຫ້ບັນດາໜ່ວຍພັກທີ່ຂຶ້ນກັບອົງຄະນະພັກກະຊວງ ໄດ້ຈໍານວນ 9 ໜ່ວຍພັກ.