ທ່ານ ສົມ​ມາດ ພົ​ນເສນາ ລັດຖະມົນຕີ ກະຊວງ ​ຊັບ​ພະຍາ​ກອນ​ທໍາ​ມະ​ຊາດ ແລະ ສິ່ງແວດລ້ອມ (ກຊສ) ພ້ອມ​ຄະນະໄດ້​ພົບ​ປະ​ເຮັດ​ວຽກກັບ ທ່ານ ຣາ​ເດັກ ວອນ​ດຣາ​ເຊັກ (Radek Vondracek)  ປະທານສະພາ​ຜູ້​ແທນ​ລາ​ສະ​ດອນ ແຫ່ງ ສາທາລະນະ​ລັດ ເຊັກ, ທ່ານ ຣີ​ຊາດ ບຣາ ​ເບັກ  (Richard  BRABEC) ລັດຖະມົນຕີ​ ກະຊວງ ​ສິ່ງແວດລ້ອມ ສາທາລະນະລັດ ເຊັກ ພ້ອມ​ດ້ວຍ​ຄະນະໃນ​ວັນ​ທີ 20 ກຸມພາ ​ຜ່ານ​ມາທີ່ ​ກົມອຸຕຸນິຍົມ ແລະ ອຸ​ທົກ​ກະ​ສາດ,  ໃນ​ໂອກາດ​ທີ່​ຄະນະ​ຜູ້​ແທນດັ່ງກ່າວ​ເດີນທາງ​ມາ​ຢ້ຽມຢາມ  ແລະ ເຮັດ​ວຽກ​ຢູ່ ສປປ ລາວ ຢ່າງ​ເປັນ​ທາງ​ການຕາມ​ຄໍາເຊີນຂອງ ສະພາ​ແຫ່ງ​ຊາດ ສປປ ລາວ. 

ການ​ພົບ​ປະ​ຄັ້ງ​ນີ້ ທັງ​ສອງ​ຝ່າຍ​ໄດ້​ມີ​ການສົນທະນາ​ແລກປ່ຽນ​ບົດຮຽນ ແລະ ປະສົບ​ການ​ໃນ​ການ​ຄຸ້ມຄອງຊັບພະຍາກອນ​ທໍາ​ມະ​ຊາດ ແລະ ສິ່ງແວດລ້ອມ ແລະ ບັນຫາທີ່ທັງສອງຝ່າຍຕ່າງ​ກໍ​ມີ​ຄວາມ​ສົນໃຈ​ຮ່ວມ​ກັນ, ກ່ອນຈະຮ່ວມລົງນາມໃນ​ບົດບັນທຶກຄວາມເຂົ້າໃຈກ່ຽວ​ກັບການ​ຮ່ວມມື​ດ້ານສິ່ງແວດລ້ອມ ຈໍາ​ນວນສອງ​ສະບັບຄື:  

1. ບົດ​ບັນທຶກ​ຄວາມເຂົ້າໃຈກ່ຽວກັບການ​ຮ່ວມ​ມື​ດ້ານສິ່ງແວດລ້ອມ ລະຫວ່າງ ກະຊວງ ຊັບພະຍາ​ກອນ​ທໍາ​ມະ​ຊາດ ແລະ ສິ່ງແວດລ້ອມ ແຫ່ງ ສາທາລະນະ​ລັດ ປະຊາທິປະໄຕ ປະຊາຊົນ​ລາວ ແລະ  ກະຊວງ ສິ່ງແວດລ້ອມ ແຫ່ງ ສາທາລະນະ​ລັດ ເຊັກ;


2. ບົດ​ບັນທຶກ​ຄວາມເຂົ້າໃຈການ​ຮ່ວມ​ມື​ດ້ານ​ສິ່ງແວດລ້ອມລະຫວ່າງ ກົມ​ແຜນການ ແລະ ການຮ່ວມມື ກະຊວງ​ ຊັບພະຍາກອນ ແລະ ສິ່ງແວດລ້ອມ ແຫ່ງ ສາທາລະນະ​ລັດ ປະຊາທິປະໄຕ ປະຊາຊົນລາວ ແລະ ບໍລິສັດ Cristof Industry ຫຸ້ນ​ສ່ວນຈໍາ​ກັດ ຈາກ ສາທາລະນະ​ລັດເຊັກ.


ການ​ຮ່ວມ​ມື​ດ້ານ​ສິ່ງແວດລ້ອມ​ໃນ​ຄັ້ງ​ນີ້ຖື​ເປັນ​ຂີດ​ໝາຍ​ອັນ​ສໍາ​ຄັນ​ແຫ່ງ​ການ​ເລີ່ມຕົ້ນການ​ຮ່ວມ​ມື  ແລະ ການ​ຊ່ວຍເຫຼືອ​ຊຶ່ງ​ກັນ ແລະ ກັນໃນ​ຂົງເຂດ​ຊັບ​ພະຍາ​ກອນ​ທໍາມະຊາດ ແລະ ສິ່ງແວດລ້ອມ ໂດຍ​ສະເພາະ​ໃນ​ດ້ານການ​ຄຸ້ມ​ຄອງຊັບ​ພະຍາ​ກອນ​ນໍ້າ, ການ​ປ່ຽນແປງ​ດິນ​ຟ້າ​ອາກາດ ແລະ ການ​ປ້ອງ​ກັນ ແລະ ຄວບ​ຄຸມ​ມົນລະພິດລະຫວ່າງ​ສອງ​ປະ​ເທດ.