ກອງປະຊຸມສະຫຼຸບວຽກງານ ແຜນການ, ການຮ່ວມມື ແລະ ວຽກງານການເງິນ ປະຈໍາປີ 2019, ທິດທາງແຜນການ ປະຈໍາປີ 2020 ແລະ ຜ່ານຮ່າງເບື້ອງຕົ້ນ ແຜນການ 5 ປີ 2021-2025 ຂອງ ຂະ​ແໜງ​ ຊັບ​ພະ​ຍາ​ກອນ​ທຳ​ມະ​ຊາດ ແລະ ສິ່ງ​ແວດ​ລ້ອມ ໄດ້ໄຂຂຶ້ນຢ່າງເປັນທາງການ ໃນວັນ​ທີ 19 ກຸມພາ 2020 ທີ່ ຫໍປະຊຸມ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ ​ ພາຍໃຕ້ການເປັນປະທານຮ່ວມຂອງ ທ່ານ ພູວົງ ຫຼວງໄຊຊະນະ ຫົວໜ້າກົມແຜນການ ແລະ ການຮ່ວມມື ແລະ ທ່ານ ນາງ ຄຳຟອງ ໂສຕາປະເສີດ ຮັກສາການຫົວໜ້າ ກົມການເງິນ. ໃຫ້ກຽດເຂົ້າຮ່ວມ ຂອງ ທ່ານ ສົມມາດ ພົລເສນາ ລັດຖະມົນຕີ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ. ມີບັນດາທ່ານ ຄະນະກົມ, ກອງ ສະຖາບັນ ທີ່ກ່ຽວຂ້ອງພາຍໃນ ກຊສ, ຫົວໜ້າພະແນກ, ຮອງຫົວໜ້າພະແນກ ຊັບພະຍາກອນທຳມະຊາດ ແລະ ສິ່ງແວດລ້ອມ ແຂວງ ພ້ອມດ້ວຍ ຜູ້ປະສານງານ ວຽກງານແຜນການຈາກ ຫ້ອງການ, ກົມ, ກອງ, ສະຖາບັນ ແລະ ພຊສ ແຂວງ/ນະຄອນຫຼວງວຽງຈັນ ເຂົ້າຮ່ວມທັງໝົດ 91 ທ່ານ.

ຈຸດປະສົງ​ຕົ້ນຕໍຂອງ​ກອງ​ປະຊຸມ​​ໃນ​ຄັ້ງ​​ນີ້ ​​ເພື່ອພ້ອມ​ກັນສະຫຼຸບ​ຕີ​ລາຄາ ວຽກງານແຜນການ, ການຮ່ວມມື ແລະ ວຽກງານການເງິນ ປະຈໍາປີ 2019 ​ແລະ ທິດ​ທາງແຜນການ ປະຈໍາປີ 2020 ​ ໂດຍສະເພາະ ​ແມ່ນສຸມໃສ່ການປຶກສາຫາລື ບັນຫາທີ່ພົ້ນເດັ່ນ ກ່ຽວກັບ ທີ່ດິນ, ສິ່ງແວດລ້ອມ, ແຜນການ-ການເງິນ ແລະ ບັນຫາ ປິ່ນອ້ອມອື່ນໆ. ພ້ອມ​ກັນ​ນີ້, ຍັງໄດ້ປຶກສາ​ຫາລືກ່ຽວກັບຮ່າງເບື້ອງຕົ້ນ ແຜນການ 5 ປີ 2021-2025 ຂອງ ຂະແໜງ ຊັບພະຍາກອນທຳມະຊາດ ແລະ ສິ່ງແວດລ້ອມ ທີ່ໄດ້ເນັ້ນໃສ່ສ້າງແຜນການແບບລັກສະນະບຸກບືນ ແລະ ສອດຄ່ອງກັບໜ້າວຽກທີ່ ພັກ ແລະ ລັດຖະບານ ມອບໃຫ້ ເພື່ອບັນລຸ​ການ​ພັດທະນ​າແບບ​ຍືນ​ຍົງ ກໍ່ຄືການພັດທະນາ ຕາມທິດສີຂຽວ ແລະ ຍືນຍົງ ​ເທື່ອລະ​ກ້າວ, ສົ່ງເສີມສ້າງຄຸນນະພາບຕົວເມືອງ ຂຽວ ສະອາດ ງາມ​ຕາ, ຫັນໄປ​ຕາມ​ທິດສ້າງບາ​ດກ້າວບຸກທະລຸ 4 ດ້ານ ແລະ ທິດ ສາມສ້າງ. ນອກຈາກນັ້ນ, ຍັງໄດ້ຮັບຟັງການລາຍງານ ວຽກງານທີ່ພົ້ນເດັ່ນຈາກ ຜູ້ແທນທີ່ເຂົ້າຮ່ວມກອງປະຊຸມ ເປັນຕົ້ນ: ການສ້າງແຜນ ຈັດສັນທີ່ດິນ ແລະ ແຜນຄຸ້ມຄອງສິ່ງແວດລ້ອມແບບຮອບດ້ານຂັ້ນແຂວງ ຈາກ ແຂວງ ຊຽງຂວາງ; ການຕິດຕາມການປະຕິບັດພັນທະດ້ານສິ່ງແວດລ້ອມ ຈາກ ແຂວງ ສະຫວັນນະເຂດ; ການອອກໃບຕາດິນ ໃນເຂດຊົນນະບົດ ຈາກ ແຂວງ ສາລະວັນ; ການແກ້ໄຂບັນຫາດ້ານມົນລະພິດແບບສຸກເສີນ ຈາກ ກົມຄວບຄຸມມົນລະພິດ; ການນຳໃຊ້ລາຍຮັບວິຊາການ ຂອງ ນະຄອນຫຼວງວຽງຈັນ ແລະ ລາຍງານຄວາມຄືບໜ້າ ໃນການເກັບກຳຂໍ້ມູນ ໃນການຊຸກຍູ້ການສ້າງແຜນຈັດສັນທີ່ດິນ ແລະ ແຜນຄຸ້ມຄອງ ສິ່ງແວດລ້ອມ ແບບຮອບດ້ານ ຂັ້ນແຂວງ ຈາກກົມທີ່ດິນ.

ໃນຕອນທ້າຍຂອງກອງປະຊຸມ ໄດ້ຮັບຟັງການໂອ້ລົມ ຈາກ ທ່ານ ສົມມາດ ພົລເສນາ, ລັດຖະມົນຕີ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ. ໂດຍທ່ານໄດ້ໃຫ້ທິດຊີ້ນຳ ໃນການຈັດຕັ້ງປະຕິບັດ ວຽກງານແຜນການ, ການຮ່ວມມື, ແລະ ວຽກງານການເງິນ  ພ້ອມທັງເນັ້ນໜັກໃຫ້ທຸກພາກສ່ວນທີ່ກ່ຽວຂ້ອງ ຈົ່ງເອົາໃຈໃສ່ ໃນການຈັດຕັ້ງປະຕິບັດວຽກງານດັ່ງກ່າວ ແລະ ວຽກງານອື່ນໆທີ່ກ່ຽວຂ້ອງ ໃຫ້ປະກົດຜົນເປັນຈິງ ຕາມຄາດໝາຍທີ່ວາງໄວ້.

ກອງ​ປະຊຸມ​ໄດ້ດຳເນີນເປັນເວລາ 2 ວັນ ແລະ ​ອັດ​ລົງ ​ໃນ​ວັນທີ 20 ກຸມພາ  2020 ດ້ວຍ​ຜົນສຳເລັດຢ່າງຈົບງາມ.