ໃນລະຫວ່າງ ວັນທີ 14-18 ກຸມພາ 2020 ທ່ານ ນ. ບຸນຄໍາ ວໍລະຈິດ, ກໍາມະການສຳຮອງ ສູນກາງພັກ, ຮອງເລຂາຄະນະພັກ, ຮອງລັດຖະມົນຕີ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ ພ້ອມດ້ວຍຜູ້ຕາງໜ້າ ຈາກບັນດາກົມກອງທີ່ກ່ຽວຂ້ອງ ເຊິ່ງປະກອບມີ ກົມຊັບພະຍາກອນນໍ້າ, ກົມທີ່ດິນ, ກົມກວດກາ, ກົມນະໂຍບາຍ ຊັບພະຍາກອນທຳມະຊາດ ແລະ ສິ່ງແວດລ້ອມ, ກົມຄວບຄຸມມົນລະພິດ, ກົມສົ່ງເສີມຄຸນນະພາບສິ່ງແວດລ້ອມ, ສະຖາບັນຄົ້ນຄວ້າ ຊັບພະຍາກອນທຳມະຊາດ ແລະ ສິ່ງແວດລ້ອມ ແລະ ກອງຕິດຕາມກວດກາ ຊັບພະຍາກອນທຳມະຊາດ ແລະ ສິ່ງແວດລ້ອມ, ໄດ້ລົງເຄື່ອນໄຫວຊຸກຍູ້ວຽກງານຮອບດ້ານຂອງຂະແໜງການ ຊັບພະຍາກອນທຳມະຊາດ ແລະ ສິ່ງແວດລ້ອມ ຢູ່ 2 ແຂວງພາກເໜືອ ແຂວງຊຽງຂວາງ ແລະ ແຂວງຫົວພັນ ໂດຍມີການເຄື່ອນໄຫວຄື:

ໃນວັນທີ 14 ກຸມພາ 2020 ຄະນະໄດ້ເຂົ້າພົບ ທ່ານ ບົວສອນ ສີນວນທອງ ຮອງເຈົ້າແຂວງ ແຂວງຊຽງຂວາງ ທີ່ຫ້ອງວ່າການປົກຄອງແຂວງ ເພື່ອລາຍງານແຜນການເຄື່ອນໄຫວຂອງຄະນະ ແລະ ປຶກສາຫາລື ກ່ຽວກັບ ການຊຸກຍູ້ການປະຕິບັດໜ້າທີ່ວຽກງານຂອງຂະແໜງການ ຊສ ຢູ່ ຂັ້ນສູນກາງ ແລະ ທ້ອງຖິ່ນ ໂດຍສະເພາະການຂຶ້ນທະບຽນອອກໃບຕາດິນ, ວຽກງານຈັດສັນທີ່ດິນ ແລະ ຄຸ້ມຄອງຊັບພະຍາກອນທໍາມະຊາດ ແລະ ສິ່ງແວດລ້ອມແບບຮອບດ້ານ. ຈາກນັ້ນ ໄດ້ເຮັດວຽກຮ່ວມກັບ ພະແນກ ຊັບພະຍາກອນທໍາມະຊາດ ແລະ ສິ່ງແວດລ້ອມ ແຂວງຊຽງຂວາງ ແລະ ໄດ້ລົງຊຸກຍູ້ການຈັດຕັ້ງປະຕິບັດວຽກງານ ຢູ່ຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມ ເມືອງພູກູດ ໂດຍໄດ້ພົບປະ ແລະ ເຮັດວຽກຮ່ວມກັບທ່ານ ເຈົ້າເມືອງ ເມືອງພູກູດ ແລະ ຄະນະຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມ ເມືອງພູກູດ. ຫຼັງຈາກນັ້ນ ຄະນະກໍ່ໄດ້ໄປຢ້ຽມຢາມ ໂຄງການກໍ່ສ້າງເຂື່ອນໄຟຟ້ານໍ້າງື່ມ 4 ແລະ ຂຶ້ນໄປຢ້ຽມຊົມຈອມພູກູດ ເຊິ່ງໃນໂອກາດນີ້ ທ່ານ ຮອງລັດຖະມົນຕີ ກໍ່ໄດ້ສົມທົບທຶນຊ່ວຍເຫຼືອເພື່ອເຮັດປ້າຍຈໍານວນ 5 ລ້ານກີບ.

ໃນວັນທີ 15 ກຸມພາ 2020 ໄດ້ເດີນທາງໄປຢ້ຽມຢາມ ເຂດອະນຸສອນສະຖານສໍານັກງານສູນກາງຊີ້ນໍາການປະຕິວັດເຂດຊຽງຂວາງ ທີ່ບ້ານຕ້າຍ, ເມືອງແປກ, ແຂວງຊຽງຂວາງ ແລະ ໃນວັນທີ 16 ກຸມພາ 2020 ໄດ້ເດີນທາງໄປຢ້ຽມຢາມຄ້າຍທະຫານເຂດຜາຖີ່ ເຊິ່ງເປັນເຂດຍຸດທະສາດການທະຫານ ດິນແດນວີລະຊົນ ທີ່ເມືອງຊໍາເໜືອ ແຂວງຫົວພັນ ແລະ ໄດ້ມອບເງິນສະໜັບສະໜູນ ຈໍານວນ 2 ລ້ານກີບ ໃຫ້ອ້າຍນ້ອງທະຫານທີ່ປະຈໍາຢູ່ເຂດດັ່ງກ່າວ. ໃນວັນທີ 17 ກຸມພາ 2020 ຄະນະໄດ້ເດີນທາງໄປເມືອງຊ່ອນ ແຂວງຫົວພັນ ໂດຍໄດ້ເຮັດວຽກຮ່ວມກັບ ທ່ານ ວາສະນູ ສໍອິນໄຊ ຮອງເຈົ້າເມືອງ ເມືອງຊ່ອນ ແລະ ຄະນະຈາກຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມ ເມືອງຊ່ອນ, ໄດ້ປຶກສາຫາລື ແລະ ຮັບຟັງການລາຍງານກ່ຽວກັບ ຂໍ້ສະດວກ ແລະ ຂໍ້ຫຍຸ້ງຍາກໃນການຈັດຕັ້ງປະຕິບັດວຽກງານ ຊສ ໃນໄລຍະຜ່ານມາ ແລະ ບັນດາຂໍ້ສະເໜີຕ່າງໆ ເພື່ອແລກປ່ຽນຖອດຖອນບົດຮຽນກັບຄະນະຈາກສູນກາງ ໃນການຈັດຕັ້ງປະຕິບັດວຽກງານໃນຕໍ່ໜ້າ. ໃນຕອນບ່າຍຂອງວັນດຽວກັນ ໄດ້ເດີນທາງໄປເຮັດວຽກກັບ ທ່ານ ແພງສີ ຊ່ອນສຸພັດ ຮອງເຈົ້າເມືອງ ເມືອງຮ້ຽມ ທ່ານ ສອນ ພົມມາຈັນ ຮັກສາການຫົວໜ້າ ຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມ ເມືອງຮ້ຽມ ພ້ອມດ້ວຍຄະນະວິຊາການ ແລະ ຄະນະຈາກຫ້ອງການຄຸ້ມຄອງປ່າສະຫງວນນໍ້າແອດ-ພູເລີຍ ທີ່ຫ້ອງປະຊຸມຂອງຫ້ອງວ່າການປົກຄອງເມືອງ.

ໃນວັນທີ 18 ກຸມພາ 2020 ໄດ້ເຂົ້າພົບທ່ານ ວັນໄຊ ແພງຊຸມມາ ກຳມະການສູນກາງພັກ ເລຂາພັກແຂວງ, ເຈົ້າແຂວງ ແຂວງຫົວພັນ ທີ່ຫ້ອງວ່າການປົກຄອງແຂວງ ເຊິ່ງທ່ານ ຮອງລັດຖະມົນຕີ ກໍ່ໄດ້ລາຍງານຜົນການໄປເຄື່ອນໄຫວຄັ້ງນີ້ຂອງຄະນະໃຫ້ທ່ານເຈົ້າແຂວງຮັບຊາບ ແລະ ໄດ້ປຶກສາຫາລື ກ່ຽວກັບ ການຈັດຕັ້ງປະຕິບັດວຽກງານ ຊສ ລວມທັງການແກ້ໄຂບັນຫາສິ່ງແວດລ້ອມດ້ານຕ່າງໆ. ຫຼັງຈາກນັ້ນ, ກໍ່ໄດ້ປະຊຸມເພື່ອແລກປ່ຽນຖອດຖອນບົດຮຽນ ຢູ່ທີ່ຫ້ອງປະຊຸມຂອງ ພະແນກ ຊັບພະຍາກອນທໍາມະຊາດ ແລະ ສິ່ງແວດລ້ອມ ແຂວງຫົວພັນ ເຊິ່ງໃນໂອກາດນີ້ ໄດ້ຮັບຟັງການລາຍງານຜົນການເຮັດວຽກໃນໄລຍະຜ່ານມາ ແລະ ບັນດາຂໍ້ຫຍຸ້ງຍາກ, ຂໍ້ສະດວກ ແລະ ຂໍ້ສະເໜີຕ່າງໆ ຈາກຂະແໜງວິຊາການອ້ອມຂ້າງ ພຊສ ແຂວງ ແລະ ໃນຕອນທ້າຍຂອງກອງປະຊຸມ ທ່ານ ຮອງລັດຖະມົນຕີ ກໍໄດ້ໃຫ້ທິດຊີ້ນໍາເພື່ອນໍາໄປຜັນຂະຫຍາຍ ແລະ ຈັດຕັ້ງປະຕິບັດວຽກງານໃນຕໍ່ໜ້າ.

ໃນໂອກາດທີ່ໄດ້ໄປເຄື່ອນໄຫວໃນຄັ້ງນີ້ ທ່ານ ນ. ບຸນຄໍາ ວໍລະຈິດ ພ້ອມດ້ວຍຄະນະ ກໍ່ໄດ້ມອບເອກະສານ ແລະ ນິຕິກຳຈໍານວນໜຶ່ງ ພ້ອມດ້ວຍເຄື່ອງອຸປະກອນຮັບໃຊ້ຫ້ອງການໃຫ້ ບັນດາ ພຊສ ແລະ ຫຊສ ເມືອງ ຂອງແຂວງຊຽງຂວາງ ແລະ ແຂວງຫົວພັນ ເຊິ່ງປະກອບມີ ຄອມພິວເຕີຕັ້ງໂຕະ 5 ໜ່ວຍ, ໂນດບຸກ 1 ໜ່ວຍ, ເຄື່ອງປຣິ້ນເຕີ 6 ໜ່ວຍ ແລະ ຊຸດລົງຕິດຕາມກວດກາສິ່ງແວດລ້ອມພາກສະໜາມ 2 ຊຸດ ລວມມູນຄ່າປະມານ 36 ລ້ານກີບ. ນອກຈາກນັ້ນ, ຄະນະກໍ່ໄດ້ໄປຢ້ຽມຊົມ ຕາດສະເຫຼີ້ຍ, ບໍ່ນໍ້າຮ້ອນ ແລະ ຕາດໂກ່ນ ທີ່ແຂວງຫົວພັນ.