ໃນຕອນເຊົ້າວັນທີ 18 ມັງກອນ 2020, ທ່ານ ສົມມາດ ພົລເສນາ ລັດຖະມົນຕີ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ, ພ້ອມດ້ວຍຄະນະໄດ້ ເຂົ້າອວຍພອນ ທ່ານ ພົນໂທ ທອງລອຍ ສິລິວົງ ຮອງລັດຖະມົນຕີ, ຫົວຫນ້າກົມໃຫຍ່ການເມືອງ ກະຊວງປ້ອງກັນປະເທດ, ພ້ອມຄະນະເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 71 ປີ.

ການເຂົ້າອວຍພອນຂອງ ຄະນະນໍາກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ ໃນຄັ້ງນີ້ກໍຍ້ອນເຫັນໄດ້ພາລະບົດບາດ, ຄວາມສຳຄັນ ແລະ ຜົນງານອັນໃຫຍ່ຫຼວງທີ່ ກອງທັບປະຊາຊົນລາວ ຍາດມາໄດ້ໃນໄລຍະຜ່ານມາ ທີ່ໄດ້ອຸທິດເຫື່ອແຮງສະຕິປັນຍາໃນພາລະກິດປະຕິວັດ ກໍຄືປົກປັກຮັກສາ ແລະ ສ້າງສາພັດທະນາປະເທດຊາດ ກໍໄດ້ກ່າວອວຍພອນໄຊອັນປະເສີດໃຫ້ແກ່ ທ່ານ ຮອງລັດຖະມົນຕີ ກະຊວງປ້ອງກັນປະເທດ ແລະ ຄະນະນຳກະຊວງປ້ອງກັນປະເທດ, ຕະຫຼອດຮອດພະນັກງານ-ນັກຮົບທີ່ພວມປະຕິບັດໜ້າທີ່ຢູ່ແຕ່ລະບ່ອນປະຈຳການ ຈົ່ງມີສຸຂະພະລະນາໄມສົມບູນແຂງແຮງຕະຫຼອດ ແລະ ສືບຕໍ່ພັດທະນາປົກປັກ ຮັກສາປະເທດຊາດ ໃຫ້ມີຄວາມເຕີບໃຫຍ່ເຂັ້ມແຂງຍິ່ງໆຂຶ້ນໄປ.

ໂອກາດດັ່ງກ່າວ ທ່ານ ພົນໂທ ທອງລອຍ ສິລິວົງ ຮອງລັດຖະມົນຕີ, ຫົວຫນ້າກົມໃຫຍ່ການເມືອງກະຊວງປ້ອງກັນປະເທດ ໃນນາມຕາງໜ້າ ຄະນະນຳກະຊວງ ກໍໄດ້ກ່າວອວຍພອນໃຫ້ ທ່ານ ສົມມາດ ພົລເສນາ ລັດຖະມົນຕີ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ, ພ້ອມດ້ວຍຄະນະຈົ່ງມີຄວາມຜາສຸກ, ມີສຸຂະພາບແຂງແຮງ ແລະ ມີຜົນສຳເລັດໃນໜ້າທີ່ການງານ.