ໃນວັນທີ 15 ມັງກອນ 2020 ຫ້ອງການກອງທຶນປົກປັກຮັກສາສີ່ງແວດລ້ອມ ໄດ້ຈັດກອງປະຊຸມ ເຜີຍແຜ່ຜົນຂອງການເຮັດວຽກຮ່ວມກັບທະນາຄານໂລກ ໂຄງການ ຄສລ 2 ປະຈຳປີ 2019 ຂຶ້ນຢ່າງເປັນທາງການ ໃນ ທ່າມ ກາງບັນຍາກາດທີ່ທົ່ວພັກ, ທົ່ວລັດ ແລະ ທົ່ວປວງຊົນພາຍໃນຊາດ ກຳລັງອອກແຮງແຂ່ງຂັນຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ X ຂອງພັກ ກໍຄື ມະຕິ 8 ແລະ ມະຕິ 9 ຂອງຄະນະບໍລິຫານງານ ສູນກາງພັກ, ແຜນພັດທະນາ ເສດຖະກິດ-ສັງຄົມ ແຫ່ງຊາດ ຄັ້ງທີ VIII ເວົ້າລວມ ເວົ້າສະເພາະ ກໍແມ່ນວຽກຈຸດສຸມປີ 2019 ຂອງຂະແໜງ ຊັບພະຍາກອນທໍາມະຊາດ ແລະ ສິ່ງແວດລ້ອມ ພວກເຮົາ, ຈິ່ງເຮັດໃຫ້ກອງປະຊຸມໃນຄັ້ງນີ້ ມີຄວາມໝາຍ, ຄວາມສຳຄັນ ຂຶ້ນຕື່ມ.

ໂດຍການເປັນປະທານຂອງ ທ່ານ ໄຊນະຄອນ ອິນທະວົງ, ຮອງລັດຖະມົນຕີ ກະຊວງ ຊັບພະຍາ ກອນທຳມະຊາດ ແລະ ສິ່ງແວດລ້ອມ, ມີຫົວໜ້າກົມ, ຮອງກົມ ແລະ ຄະນະບໍດີ ມຊ ທີ່ເປັນຄະນະຊີ້ນຳໂຄງການຍ່ອຍ ຂອງໂຄງການ ຄສລ 2, ຫົວໜ້າພະແນກ ຮອງພະແນກ ຊສ 7 ແຂວງ, ແລະ ຮອງຫົວໜ້າ ພະແນກກະສິກຳ-ປ່າໄມ້ 2 ແຂວງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ຈຸດປະສົງຕົ້ນຕໍ ຂອງກອງປະຊຸມພວກເຮົາໃນຄັ້ງນີ້ ເພື່ອພ້ອມກັນສະຫຼຸບຕີລາຄາການຈັດຕັ້ງປະຕິບັດໂຄງການ ຄສລ 2 ປະຈຳປີ 2019 ແລະ ທິດທາງແຜນການ ປະຈໍາປີ 2020 ໂດຍສະເພາະ ແມ່ນສຸມໃສ່ການ ປຶກສາຫາລືບັນຫາ ທີ່ພົ້ນເດັ່ນ ກ່ຽວກັບການປະຕິບັດຕົວຊີ້ວັດ ກອບຜົນໄດ້ຮັບ, ບັນດາຄາດ ໝາຍອື່ນໆຂອງໂຄງການ, ການແກ້ໄຂຜົນຂອງການກວດສອບປີຜ່ານມາ, ດ້ານແຜນກິດຈະກໍາ- ແຜນງົບປະມານການເງິນ , ການຈັດຊື້-ຈັດຈ້າງ ແລະ ບັນຫາອື່ນໆ. ພ້ອມກັນນັ້ນ ກໍຈະໄດ້ປຶກສາຫາລື ມີຄຳເຫັນຄົ້ນຄ້ວາ ໃນການຈັດຕັ້ງຜັນຂະຫຍາຍ ເນື້ອໃນຈິດໃຈມະຕິ 9 ສະໄໝ X ເຂົ້າໃນວຽກງານປົກປັກຮັກສາສີ່ງແວດລ້ອມ ຂະແໜງຂອງພວກເຮົາໃຫ້ປະກົດຜົນເປັນຈິງ, ພ້ອມທັງວາງວິທີການ ແລະ ມາດຕະການຕ່າງໆ ທີ່ເໝາະສົມ ໃນການຄຸ້ມຄອງ ຟື້ນຟູບູລະນະຊັບພະຍາກອນທຳມະຊາດ ແລະ ປົກປັກຮັກສາສິ່ງແວດລ້ອມ ໃຫ້ບັນລຸການພັດທະນາແບບຍືນຍົງ ກໍ່ຄືການພັດທະນາ ຕາມທິດສີຂຽວ ແລະ ຍືນຍົງ ເທື່ອລະກ້າວ, ສົ່ງເສີມ ສ້າງຄຸນນະພາບຕົວເມືອງ ຂຽວ ສະອາດ ງາມຕາ, ຫັນໄປຕາມທິດສ້າງບາດກ້າວບຸກທະລຸ 4 ດ້ານ, ທິດສາມສ້າງ, ເຮັດໃຫ້ຮາກຖານ ສາຍຕັ້ງຂອງກະຊວງ ຊັບພະຍາກອນທໍາມະຊາດ ແລະ ສິ່ງແວດລ້ອມ ກໍ່ຄືສາຍຕັ້ງ ຂອງບັນດາ ກົມກອງ ອ້ອມຂ້າງ ກຊສ ໃຫ້ປະກົດຜົນເປັນຈິງ ແລະ ມີຄວາມເຂັ້ມແຂງ ໃນສະເພາະໜ້າ ແລະ ຍາວນານ.

ໃນວັນດຽວກັນໄດ້ມີພິທີເຊັນສັນຍາ ສະໜອງທຶນ ລະຫວ່າງ ກອງທຶນປົກປັກຮັກສາສິ່ງແວດລ້ອມ (ກປສ) ແລະ ຜູ້ຮັບທຶນຈາກ ພະແນກກະສິກໍາ-ປ່າໄມ້ (2 ໂຄງການ),ກະຊວງກະສິກໍາ ແລະ ປ່າໄມ້, ພະແນກ ຊັບພະຍາກອນທໍາມະຊາດ ແລະ ສິ່ງແວດລ້ອມ (7 ໂຄງການ), ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ, ມະຫາວິທະຍາໄລແຫ່ງຊາດ (1 ໂຄງການ) ແລະ ກະຊວງພະລັງງານ ແລະ ບໍ່ແຮ່ (1 ໂຄງການ) ລວມທັງໝົດ 11 ໂຄງການ ( 1 ໂຄງການ ແມ່ນ ສະໜອງທຶນໃໝ່ ແລະ 10 ໂຄງການແມ່ນສະໜອງທຶນເພີ້ມ) ລວມມູນຄ່າທັງໝົດ 10,122,723,900 ກີບ ຫຼື ເທົ່າກັບ 1,250,000 ໂດລາສະຫະລັດ ພິທີດັ່ງກ່າວ ແມ່ນໄດ້ຈັດຂື້ນທີ່ ສະໂມສອນ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ໃຫ້ກຽດເຂົ້າຮ່ວມເປັນສັກຂີພິຍານ ໂດຍທ່ານ ສົມມາດ ພົລເສນາ, ລັດຖະມົນຕີກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ,ປະທານສະພາບໍລິຫານກອງທຶນປົກປັກຮັກສາສິ່ງແວດລ້ອມ ພ້ອມດ້ວຍ ບັນດາຫົວໜ້າກົມ ແລະ ຮອງກົມ ຈາກ ກົມກອງທີ່ກ່ຽວຂ້ອງ ລວມໄປເຖິງ ຄະນະຊີ້ນໍາໂຄງການ ແລະ ຫົວໜ້າໂຄງການ ເພື່ອເຂົ້າຮ່ວມເປັນສັກຂີພິຍານ ລວມທັງໝົດປະມານ 112 ທ່ານ.

ໃນພິທີເຊັນສັນຍາດັ່ງກ່າວແມ່ນໃຫ້ກຽດລົງນາມເຊັນສັນຍາໂດຍ ນາງ ບຸນພາມາ ໂພທິສານ, ຮອງຫົວໜ້າຫ້ອງການ ກອງທຶນປົກປັກຮັກສາສິ່ງແວດລ້ອມ (ຕາງໜ້າຜູ້ໃຫ້ທຶນ) ແລະ ຜູ້ຕາງໜ້າຈາກ 11 ໂຄງການ. w