ໃນວັນທີ 7 ມັງກອນ 2019 ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ຈັດກອງປະຊຸມ ເຜີຍແຜ່ ມະຕິກອງປະຊຸມ ຄົບຄະນະບໍລິຫານງານສູນກາງພັກ ຄັ້ງທີ 9 (ສະໄໝທີ X) ແລະ ກອງປະຊຸມ ວິທະຍາສາດ ພາຍໃນກະຊວງ. ໂດຍການເປັນປະທານ ຂອງ ສະຫາຍ ສົມມາດ ພົລເສນາ, ກຳມະການສູນກາງພັກ, ເລຂາຄະນະພັກກະຊວງ, ລັດຖະມົນຕີ ກະຊວງ ຊັບພະຍາກອນ ທຳມະຊາດ ແລະ ສິ່ງແວດລ້ອມ, ມີ ຄະນະປະຈຳພັກ, ຄະນະພັກ, ເລຂາຄະນະພັກຮາກຖານ, ບັນດາເລຂາໜ່ວຍພັກພ້ອມຄະນະ, ສະມາຊິກພັກສົມບູນ, ສຳຮອງ, ພ້ອມທັງພະນັກງານລັດຖະກອນພາຍໃນກະຊວງເຂົ້າຮ່ວມ.

ສະຫາຍ ສົມມາດ ພົລເສນາ ກຳມະການສູນກາງພັກ, ເລຂາຄະນະພັກກະຊວງ, ລັດຖະມົນຕີ ກະຊວງ ໄດ້ເຜີຍແຜ່ ມະຕິກອງປະຊຸມ ຄົບຄະນະບໍລິຫານງານສູນກາງພັກ ຄັ້ງທີ 9 (ສະໄໝທີ X) ທີ່ໄດ້ດໍາເນີນຢ່າງເປັນທາງການ ແຕ່ວັນທີ 14 ເຖິງວັນທີ 23 ຕຸລາ 2019 ທີ່ສໍານັກງານສູນກາງພັກ ປະຊາຊົນປະຕິວັດລາວ, ນະຄອນຫຼວງວຽງຈັນ. ພາຍໃຕ້ການເປັນປະທານຂອງ ສະຫາຍ ບຸນຍັງ ວໍລະຈິດ, ເລຂາທິການໃຫຍ່ຄະນະບໍລິຫານງານສູນກາງພັກ.

ສະຫາຍ ໄດ້ຍົກໃຫ້ເຫັນເຖິງຈຸດປະສົງ, ຄາດໝາຍ, ຄວາມໝາຍ, ຄວາມສຳຄັນ ແລະ ຜົນສຳເລັດ ຂອງກອງປະຊຸມຄົບຄະນະ ຂອງຄະນະບໍລິຫານງານສູນກາງພັກ ຄັ້ງທີ 9. ບັນຫາສຳຄັນຈຳນວນໜຶ່ງໃນຂົງເຂດເສດຖະກິດ-ສັງຄົມ, ຂົງເຂດຄວາມໝັ້ນຄົງ, ວຽກງານແນວໂຮມ ແລະ ມະຫາຊົນຂອງພັກ, ການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນ ຂອງພັກ ແລະ ການກະກຽມເນື້ອໃນກອງປະຊຸມໃຫຍ່ ຄັ້ງທີ XI ຂອງພັກ; ນອກນັ້ນ ຄະນະບໍລິຫານງານສູນກາງພັກ ຍັງໄດ້ດຳເນີນຊີວິດການເມືອງ, ສໍາຫຼວດລວມໝູ່ ແລະ ຂອງສະຫາຍກໍາມະການສູນກາງພັກ ປະຈໍາປີ 2019. ໂດຍສະຫາຍໄດ້ຍົກໃຫ້ຮູ້ກ່ຽວກັບການຈັດຕັ້ງປະຕິບັດ ແຜນພັດທະນາ ເສດຖະກິດ-ສັງຄົມ,ແຜນງົບປະມານ ແລະ ແຜນເງິນຕາ ປະຈຳປີ 2019 ແລະ ທິດທາງແຜນການ ປະຈຳປີ 2020 ເຊິ່ງກອງປະຊຸມໄດ້ເປັນເອກະພາບຕີລາຄາວ່າ ໃນໄລຍະຜ່ານມາ ດ້ວຍຄວາມບຸກບືນ ສູ້ຊົນຂອງທົ່ວພັກ, ທົ່ວລັດ ແລະ ທົ່ວປວງຊົນ ໄດ້ເຮັດໃຫ້ແຜນພັດທະນາ ເສດຖະກິດ-ສັງຄົມ, ແຜນງົບປະມານ ແລະ ແຜນເງິນຕາ ສ່ວນໃຫຍ່ບັນລຸໝາກຜົນ ຕາມຄາດໝາຍທີ່ວາງໄວ້, ເສດຖະກິດສືບຕໍ່ຂະຫຍາຍຕົວໃນລະດັບ 6,4%, ຂະແໜງກະສິກຳ, ຂະແໜງອຸດສາຫະກຳ, ຂະແໜງບໍລິການ, ການລົງທຶນ ສືບຕໍ່ຂະຫຍາຍຕົວຢ່າງຕໍ່ເນື່ອງ, ຄຽງຄູ່ກັນນັ້ນ, ການແກ້ໄຂບັນຫາພື້ນຖານ ທາງດ້ານເສດຖະກິດ ຍັງບໍ່ທັນສ້າງການຫັນປ່ຽນຢ່າງຈະແຈ້ງ, ກົນໄກການເຄື່ອນໄຫວບໍ່ທັນຊັດເຈນ ແລະ ອື່ນໆ. ພ້ອມນັ້ນ, ກອງປະຊຸມໄດ້ເປັນເອກະພາບ ຊີ້ໃຫ້ເຫັນເຖິງບັນດາສາເຫດ ອັນທີ່ເປັນພື້ນຖານ ແລະ ອັນທີ່ເປັນຕົ້ນຕໍຈຳນວນໜຶ່ງ.

ຈາກນັ້ນ ກອງປະຊຸມ ກໍ່ຍັງໄດ້ເຜີຍແຜ່ທິດທາງແຜນການເຄື່ອນໄຫວ ຈັດຕັ້ງປະຕິບັດວຽກງານປະຈຳປີ 2020 ຂອງ ຄະນະປະຈຳພັກກະຊວງ ຮອງລັດຖະມົນຕີ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ ໃນແຕ່ລະຂົງເຂດ ທີ່ຕົນຊີ້ນຳ-ນຳພາ ນຳອີກ.