ໃນຕອນເຊົ້າຂອງວັນທີ 27 ທັນວາ 2019 ກອງເລຂາຄະນະກຳມະການແມ່ນ້ຳຂອງແຫ່ງຊາດ ໄດ້ໄຂກອງປະຊຸມ ໃຫຍ່ຄັ້ງທີ II ຂອງໜ່ວຍພັກ ຂອງຕົນຂຶ້ນຢ່າງເປັນທາງການໃນທ່າມກາງບັນຍາກາດ ທີ່ທົ່ວພັກ, ທົ່ວກອງທັບ ແລະ ທົ່ວປວງຊົນລາວບັນດາເຜົ່າ ພວມຈັດຕັ້ງປະຕິບັດ ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກປະຊາຊົນປະຕິວັດລາວ, ແຜນພັດທະນາເສດຖະກິດ-ສັງຄົມແຫ່ງຊາດ 05 ປີ ຄັ້ງທີ VIII ແລະ ພວມຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ I ຂອງອົງຄະນະພັກກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ, ຍຸດທະສາດ 10 ປີ (2016-2025), ວິໃສທັດຮອດປີ 2030 ແລະ ແຜນ 05 ປີ 2016-2020 ຂອງຂະແໜງຊັບພະຍາກອນທໍາມະຊາດ ແລະສິ່ງແວດລ້ອມ ໃຫ້ປະກົດຜົນເປັນຈິງ.

ໂດຍການເປັນ ປະທານ ຂອງ ສະຫາຍ ຈັນທະເນດ ບົວລະພາ, ຄະນະພັກກະຊວງ, ເລຂາໜ່ວຍພັກ ກອງເລຂາຄະນະກຳມະການແມ່ນ້ຳຂອງແຫ່ງຊາດ, ໃຫ້ກຽດເຂົ້າຮ່ວມຂອງ ສະຫາຍ ນາງ ບຸນຄຳ ວໍລະຈິດ, ກຳມະການສຳຮອງສູນກາງພັກ, ຄະນະປະຈຳພັກ, ປະທານກວດກາພັກ, ຮອງລັດຖະມົນຕີ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ, ສະຫາຍ ພອນປະເສີດ ພູລິພັນ, ຮອງເລຂາໜ່ວຍພັກ ກອງເລຂາຄະນະກຳມະການແມ່ນ້ຳຂອງແຫ່ງຊາດ, ມີບັນດາເລຂາໜ່ວຍພັກ ແລະ ຕາງໜ້າສາມອົງການຈັດຕັ້ງມະຫາຊົນ ອ້ອມຂ້າງ ທີ່ຂຶ້ນກັບ ອົງຄະນະພັກ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ ພ້ອມທັງຜູ້ແທນກອງປະຊຸມ ຂອງ ກອງເລຂາຄະນະກຳມະການແມ່ນ້ຳຂອງແຫ່ງຊາດ ເຂົ້າຮ່ວມທັງໝົດ ຈຳນວນ 37 ສະຫາຍ, ຍິງ 13 ສະຫາຍ.

ສະຫາຍ ຈັນທະເນດ ບົວລະພາ, ຄະນະພັກກະຊວງ, ເລຂາໜ່ວຍພັກ ກໍ່ຂື້ນຜ່ານບົດລາຍງານການເມືອງການຈັດຕັ້ງປະຕິບັດວຽກງານທີ່ຜ່ານມາວ່າ: ເພື່ອຜັນຂະຫຍາຍແຜນພັດທະນາເສດຖະກິດ-ສັງຄົມແຫ່ງຊາດ 05 ປີ ຄັ້ງທີ VIII ແລະ ແຜນ 05 ປີ ຂອງຂະ ແໜງຊັບ ພະຍາກອນທໍາມະຊາດ ແລະ ສິ່ງແວດລ້ອມ ຮອດປີ 2020, ຍຸດທະສາດ 10 ປີ (2016-2025), ວິໃສທັດຮອດປີ 2030 ໜ່ວຍພັກໄດ້ຊີ້ນຳ-ນຳພາ ການຈັດຕັ້ງປະຕິບັດ ແລະ ມີຜົນສຳເລັດອັນພົ້ນເດັ່ນເປັນຕົ້ນ:

ກ. ກອບການຮ່ວມມືພາຍໃຕ້ສັນຍາແມ່ນໍ້າຂອງປີ 1995 ໄດ້ນໍາພາຈັດຕັ້ງປະຕິບັດສັນຍາແມ່ນໍ້າຂອງ ປີ 1995 ສຸມໃສ່ປະກອບສ່ວນສ້າງ ແລະ ຜັນຂະຫຍາຍ ແຜນຍຸດທະສາດພັດທະນາອ່າງ ຂອງ ຄມສ ສົກປີ 2016-2020 ມາເປັນແຜນການ 05 ປີ 2016-2020 ແລະ ແຜນວຽກປະຈໍາປີ ເຊິ່ງມາສາມາດບັນລຸຜົນສໍາເລັດ ດັ່ງນີ້: - ກະກຽມເນື້ອໃນ ແລະ ເຂົ້າຮ່ວມ ກອງປະຊຸມສຸດຍອດ (ຂັ້ນນາຍົກລົດຖະມົນຕີ) ຄະນະກຳມາທິການແມ່ນ້ຳຂອງສາກົນ ຄັ້ງທີ III; ເຂົ້າຮ່ວມກອງປະຊຸມສະພາມົນຕີ ຄມສ (ຂັ້ນລັດຖະມົນຕີ) ຄັ້ງທີ 22-26 ຕາມລໍາດັບ ແລະ ການເຂົ້າຮ່ວມກອງປະຊຸມຄະນະກໍາມະການຮ່ວມ (ຂັ້ນຄະນະກົມ) ຈໍານວນ 08 ຄັ້ງ. ໃນນັ້ນ ສປປ ລາວ ເຮົາໄດ້ເປັນເຈົ້າພາບ ຈໍານວນ 02 ຄັ້ງ;

- ໄດ້ຊີ້ນໍາ-ນໍາພາສ້າງ, ຮັບຮອງ ແລະ ຊຸກຍູ້ຂະແໜງການຕ່າງໆທີ່ກ່ຽວຂ້ອງ ຈັດຕັ້ງປະຕິບັດແຜນຜັນຂະຫຍາຍຍຸດທະສາດພັດທະນາອ່າງແມ່ນໍ້າຂອງ ສົກປີ 2016-2020, ແຜນປະຕິບັດງານແຫ່ງຊາດ (NIP) ສົກປີ 2016-2020, ແຜນວຽກ 05 ປີ 2016-2020 ຮ່ວມກັບ 03 ປະເທດສະມາຊິກ ຄມສ; - ດຳເນີນຂະບວນການປືກສາຫາລືລ່ວງໜ້າ (PNPCA) ສຳລັບບັນດາໂຄງການພັດທະນາເຂື່ອນໄຟຟ້າພະລັງນ້ຳຕາມລຳນ້ຳ ຂອງ: ປາກແບງ, ປາກລາຍ ແລະ ປະຈຸບັນກຳລັງຈັດຕັ້ງຂະບວນການປຶກສາຫາລືລ່ວງໜ້າ ຂອງເຂື່ອນຫຼວງພະບາງ;

- ໄດ້ຍາດແຍ່ງທຶນຊ່ວຍເຫຼືອຈາກລັດຖະບານເຢຍລະມັນ ຈຳນວນ 02 ລ້ານຢູໂລ ໃຫ້ແກ່ໂຄງການຄຸ້ມຄອງ ແລະ ປົກປັກຮັກ ສາດິນບໍລິເວນນ້ຳ ຢູ່ຂົງເຂດອ່າງແມ່ນ້ຳຂອງຕອນລຸ່ມ, ບຶງກຽດໂງ້ງ, ແຂວງຈໍາປາສັກ; ໂດຍມອບໃຫ້ພະແນກຊັບພະຍາ ກອນທໍາມະຊາດ ແລະ ສິ່ງແວດລ້ອມ ແຂວງຈໍາປາສັກ ເປັນຜູ້ຈັດຕັ້ງປະຕິບັດ; - ຍາດແຍ່ງງົບປະມານ ເພື່ອສະໜັບສະໜູນໃຫ້ຂະແໜງການທີ່ກ່ຽວຂ້ອງຈັດຕັ້ງປະຕິບັດບັນດາໜ້າວຽກ. ຂ. ກອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ແມ່ນວຽກງານບູລິມະສິດໜື່ງທີ່ສໍາຄັນ, ເຊິ່ງເປັນການຜັນຂະຫຍາຍບັນດາຖະແຫຼງການ ຂອງ 06 ປະເທດສະມາຊິກ ໄດ້ຕົກລົງຮ່ວມກັນຜ່ານມາ ເຊິ່ງມີຜົນສໍາເລັດເຊັ່ນ: - ສ້າງແຜນປະຕິບັດງານ 05 ປີ (2018-2022) ສຳລັບການຄຸ້ມຄອງທາງດ້ານຊັບພະຍາກອນນ້ຳ; - ຍາດແຍ່ງການຊ່ວຍເຫຼືອຈາກກອງທຶນພິເສດ ຈຳນວນ 01 ໂຄງການ ໃນປີ 2017; 04 ໂຄງການ ໃນປີ 2018 ແລະ 07 ໂຄງການ ໃນປີ 2019.

ນອກນີ້, ຍັງໄດ້ມີການຮ່ວມມືກັບອົງການຈັດຕັ້ງສາກົນ ເພື່ອສົ່ງເສີມການເຊື່ອມໂຍງກັບອະນຸພາກພື້ນ ກໍ່ຄືການສົ່ງເສີມພັດທະນາແບບຍືນຍົງໃນພາກພື້ນແມ່ນໍ້າຂອງ ແນໃສ່ຊຸກຍູ້ການພັດທະນາເສດຖະກິດ-ສັງຄົມ ເພື່ອຍົກລະດັບຊີວິດການເປັນຢູ່ຂອງປະຊາຊົນລາວ ໃຫ້ທຽບທັນກັບບັນດາປະເທດອື່ນໆໃນພາກພື້ນ ເພື່ອປະກອບສ່ວນເຂົ້າໃນການພັດທະນາຕາມທິດສີຂຽວ ຢູ່ໃນອ່າງແມ່ນໍ້າຂອງໃຫ້ມີຄວາມຍືນຍົງ. ພ້ອມດຽວກັນນັ້ນ ກອງປະຊຸມ ກໍໄດ້ປ່ອນບັດເລືອກຕັ້ງເອົາ ຄະນະໜ່ວຍພັກ ຊຸດໃໝ່ ຊຶ່ງມີຜູ້ລົງສະໝັກເລືອກຕັ້ງ 5 ສະຫາຍ ແລະ ເລືອກໄດ້ 3 ສະຫາຍ ປະກອບດ້ວຍ.

1.  ສະຫາຍ ຈັນທະເນດ ບົວລະພາ ເປັນເລຂາໜ່ວຍພັກ ເປັນຜູ້ຊີ້ນຳ;

2.  ສະຫາຍ ພອນປະເສີດ ພູລິພັນ ເປັນຮອງເລຂາໜ່ວຍພັກ ທັງເປັນປະທານກວດກາພັກ;

3. ສະຫາຍ ອຸດົມສັກ ພິລາວົງ ເປັນກຳມະການໜ່ວຍພັກ.

ພ້ອມກັນນັ້ນ ກອງປະຊຸມກໍ່ຍັງໄດ້ເລືອກເອົາຜູ້ແທນສົມບູນ ແລະ ສຳຮອງ ເພື່ອເຂົ້າຮ່ວມກອງປະຊຸມໃຫຍ່ຄັ້ງທີ II ຂອງ ອົງຄະນະພັກ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ ຈຳນວນ 12 ສະຫາຍ ແລະ ສຳຮອງ 2 ສະຫາຍນຳອີກ.