ໃນຕອນເຊົ້າຂອງວັນທີ 9 ສິງຫາ 2019 ຜ່ານມານີ້ ຢູ່ທີ່ຫ້ອງປະຊຸມຂອງພະແນກການເງິນ ແຂວງຫຼວງນໍ້າທາ ໄດ້ຈັດກອງປະຊຸມຂຶ້ນ ກ່ຽວກັບການປຶກສາຫາລືໃນການກວດກາຄືນບັນດາໂຄງການເຊົ່າ ແລະສຳປະທານທີ່ດິນ ແລະ ວຽກງານວາງແຜນຈັດສັນທີ່ດິນ ແລະ ສິ່ງແວດລ້ອມຮອບດ້ານ ຢູ່ພາຍໃນແຂວງ, ໂດຍການເປັນປະທານ ຂອງທ່ານ ຄຳໄຫຼ ສີປະເສີດ ກຳມະການປະຈຳພັກແຂວງ ຫົວໜ້າພະແນກກະສິກຳ ແລະປ່າໄມ້ແຂວງ, ເປັນກຽດເຂົ້າຮ່ວມກອງປະຊຸມຄັ້ງນີ້ມີ ທ່ານ ສົມມາດ ພົລເສນາ ກຳມະການສູນກາງພັກ ລັດຖະມົນຕີກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ມີຄະນະທິມງານຈາກກະຊວງຊັບພະຍາກອນທຳມະຊາດ ແລະສິ່ງແວດລ້ອມ "ກຊສ", ມີ ບັນດາຫົວໜ້າພະແນກການອອ້ມຂ້າງແຂວງ, ມີ ທ່ານ ຮອງເຈົ້າເມືອງ 5 ເມືອງ ແລະ ຫົວໜ້າ-ຮອງຫົວໜ້າຫ້ອງການຊັບພະຍາກອນທຳມະຊາດ ແລິ່ງແວດລ້ອມ 5 ເມືອງ ຕະຫຼອດຮອດພະນັກງານວິຊາການພາຍໃນ ພະແນກຊັບພະຍາກອນທະມະຊາດ ແລະສິ່ງແວດລ້ອມ"ພຊສ" ເຂົ້າຮ່ວມຢ່າງພ້ອມພຽງ.

ກອງປະຊຸມໄດ້ມີການປຶກສາຫາລື ແລະທາງຄະນະທິມງານຈາກ "ກຊສ" ໄດ້ຊີ້ແຈງຈຸດປະສົງ ແລະເຫດຜົນໃນການກວດກາຄືນບັນດາໂຄງການລົງທຶນໃນການເຊົ່າ ແລະສຳປະທານ ພ້ອມທັງໃຫ້ບັນດາຂະແໜງການຂັ້ນແຂວງ ແລະ ຂັ້ນເມືອງ ຕອບສະໜອງຂໍ້ມູນລະອຽດໃຫ້ຄະນະທິມງານ ເພື່ອເກັບກຳຂໍ້ມູນຄືນ ຂອງບັນດາໂຄງການລົງທຶນເຊົ່າ ແລະສຳປະທານທີ່ດິນໃຫ້ຄົບຖ້ວນ.

ສຳລັບວຽກງານວາງແຜນຈັດສັນທີ່ດິນ ແລະສິ່ງແວດຮອບດ້ານຂັ້ນແຂວງ ແມ່ນໃຫ້ແຕ່ລະພະແນກການພາຍໃນແຂວງ ແລະເມືອງ ແຕ່ງຕັ້ງຄະນະຮັບຜິດຊອບຂອງພະແນກການຕົນ ເພື່ອກະກຽມເຂົ້າໃນການຕອບສະໜອງຂໍ້ມູນໃຫ້ຄະນະທິມງານຂຽນແຜນແມ່ບົດການຈັດສັນທີ່ດິນ ແລະ ສິ່ງແວດລ້ອມຮອບດ້ານຂັ້ນແຂວງ.

ບັນດາຜູ່ແທນກອງປະຊຸມກໍໄດ້ປຶກສາຫາລື ແລະລາຍງານການຈັດຕັ້ງປະຕິບັດໃນການອອກອະນຸຍາດ ແລະຄຸ້ມຄອງບັນດາໂຄງການລົງທຶນຢູ່ຂັ້ນເມືອງ ແລະ ຂັ້ນແຂວງ ພ້ອມທັງຂໍ້ສະດວກ, ຂໍຫຍຸ້ງຍາກ ແລະທິດທາງແກ້ໄຂໃນຕໍ່ໜ້າ.

ໃນວາລະໂອກາດດັ່ງກ່າວ ທ່ານ ສົມມາດ ພົລເສນາ ກຳມະການສູນກາງພັກ ລັດຖະມົນຕີ "ກຊສ" ກໍໄດ້ໂອ້ລົມ ແລະໃຫ້ທິດຊີ້ນຳໃນການຈັດຕັ້ງປະຕິບັດກ່ຽວກັບການຕິດຕາມກວດການບັນດາໂຄງການເຊົ່າແລະສຳປະທານທີ່ດິນ ຢູ່ພາຍໃນແຂວງ ໃຫ້ຖືກຕ້ອງ, ສອດຄ່ອງ ແລະໃຫ້ປະຕິບັດຕາມເງື່ອນໄຂຕົວຈິງໂດຍຕິດພັນກັບນິຕິກຳ, ລະບຽບ ແລະກົດໝາຍຢ່າງເຂັ້ມງວດ ແລະແກ້ໄຂໃຫ້ທັນເວລາ ພ້ອມທັງຮຽກຮ້ອງໃຫ້ບັນດາຂະແໜງການຕ່າງໆ ໃຫ້ເອົາໃຈໃສ່ຂອດປະສານງານລະຫວ່າງສາຍຕັ້ງ, ສາຍຂວາງ ແລະ ພະແນກການພາຍໃນແຂວງໃຫ້ກົມກຽວຢ່າງເລິກເຊິງ ເພື່ອແນ່ໃສ່ໃນການກວດກາຕິດຕາມ ແລະແກ້ໄຂບັນຫາຮ່ວມກັນໃຫ້ຖືກຕ້ອງແລະທັນເວລາ.

ພາຍຫຼັງສຳເລັດກອງປະຊຸມແລ້ວ ຄະນະທິມງານຈາກ "ກຊສ" ຈະໄດ້ສົມທົບກັບ "ພຊສ" ພ້ອມກັບພະແນກການກ່ຽວຂ້ອງ ເພື່ອລົງເກັບກຳຂໍ້ມູນຕົວຈິງຢູ່ບັນດາເມືອງໃຫ້ສຳເລັດຕາມແຜນການທີ່ວາງໄວ້.

ກອງປະຊຸມໄດ້ປິດລົງໃນເວລາ 11:45 ໂມງ ຂອງວັນດຽວກັນ.