ໃນລະຫວ່າງ ວັນທີ 27-30  ພຶດສະພາ 2019 ທ່ານ ນ ບຸນຄຳ ວໍລະຈິດ ຮອງລັດຖະມົນຕີ ກະຊວງ ຊັບພະຍາກອນທໍາມະຊາດ ແລະ ສິ່ງແວດລ້ອມ ພ້ອມດ້ວຍຄະນະ ຈາກກົມທີ່ດິນ, ກົມ ນະໂຍບາຍຊັບພະຍາກອນທໍາມະຊາດ ແລະ ສິ່ງແວດລ້ອມ ແລະ ກອງຕິດຕາມກວດກາຊັບພະຍາກອນທໍາມະຊາດ ແລະ ສິ່ງແວດລ້ອມ ໄດ້ລົງເຄື່ອນໄຫວເຂົ້າຮ່ວມກອງປະຊຸມຄະນະຊີ້ນໍາ ໂຄງການເຊປຽນ-ເຊນໍ້ານ້ອຍ ແລະ ຊຸກຍູ້ການເຄື່ອນໄຫວວຽກງານຮອບດ້ານ ຂອງຂະແໜງ ຊັບພະຍາກອນທໍາມະຊາດ ແລະ ສິ່ງແວດລ້ອມ ຢູ່ແຂວງອັດຕະປື, ເຊກອງ ແລະ ສາລະວັນ. ໂດຍໃນວັນທີ  27 ພຶດສະພາ 2019 ໄດ້ລົງຕິດຕາມພາກສະໜາມເຂດກໍ່ສ້າງເຂື່ອນກັ້ນນ້ຳ D ໃໝ່, ການເສີມຄວາມແຂງແກ່ນຂອງເຂື່ອນກັ້ນນໍ້າ E, F ແລະ ເຂດຈັດສັນທີ່ດິນທໍາການຜະລິດ 261 ເຮັກຕາ ໃຫ້ປະຊາຊົນທີ່ຖືກຜົນກະທົບ ຂອງ ໂຄງການເຂື່ອນເຊປຽນ-ເຊນ້ຳນ້ອຍ; ຕອນບ່າຍຂອງວັນດຽວກັນ ໄດ້ເຂົ້າຮ່ວມກອງປະຊຸມ ຄະນະຊີ້ນໍາໂຄງການເຂື່ອນເຊປຽນ-ເຊນໍ້ານ້ອຍ ຮ່ວມກັບ ຄະນະຊີ້ນຳຮ່ວມໂຄງການ ໂດຍການເປັນປະທານຂອງ ທ່ານ ປອ ຄຳມະນີ ອິນທິລາດ, ລັດຖະມົນຕີ ກະຊວງ ພະລັງງານ ແລະ ບໍ່ແຮ່ ທີ່ ເມືອງປາກຊ່ອງ, ແຂວງຈຳປາສັກ.

ໃນວັນທີ 28 ພຶດສະພາ 2019 ໄດ້ເຄື່ອນໄຫວ ຢູ່ແຂວງອັດຕະປື ເຊິ່ງໄດ້ເຂົ້າພົບກັບ ທ່ານ ເລັດ ໄຊຍະພອນ, ເຈົ້າແຂວງ ແຂວງອັດຕະປື ທີ່ຫ້ອງວ່າການປົກຄອງແຂວງອັດຕະປື ເພື່ອລາຍງານແຜນການ ເຄື່ອນໄຫວຂອງຄະນະ ແລະ ປຶກສາຫາລື ກ່ຽວກັບການຊຸກຍູ້ ການປະຕິບັດໜ້າທີ່ວຽກງານ ຊັບພະຍາກອນທໍາມະຊາດ ແລະ ສິ່ງແວດລ້ອມ ຢູ່ ຂັ້ນສູນກາງ ແລະ ທ້ອງຖິ່່ນ ໂດຍສະເພາະ ການຂຶ້ນທະບຽນອອກໃບຕາດິນ, ການຈັດສັນທີ່ດິນ, ການເຊົ່າ-ສໍາປະທານທີ່ດິນ, ການຄຸ້ມຄອງສິ່ງ ແວດລ້ອມ, ການປະເມີນຜົນເສຍຫາຍ ແລະ ຟື້ນຟູຊີວິດການເປັນຢູ່ ທີ່ໄດ້ຮັບຜົນເສຍຫາຍ ຈາກເຫດການເຂື່ອນກັ້ນນໍ້າ D ຂອງໂຄງການ ເຂື່ອນເຊປຽນ-ເຊນໍ້ານ້ອຍແຕກພັງ. ຈາກນັ້ນ ໄດ້ເຮັດວຽກຮ່ວມກັບ ພະແນກ ຊັບພະຍາກອນ ທໍາມະຊາດ ແລະ ສິ່ງແວດລ້ອມ ແຂວງອັດຕະປື ແລະ ລົງຊຸກຍູ້ການຈັດຕັ້ງປະຕິບັດວຽກງານ ຊັບພະຍາກອນທໍາມະຊາດ ແລະ ສິ່ງແວດລ້ອມ ຢູ່ ເມືອງພູວົງ, ໂດຍໄດ້ພົບປະ ແລະ ເຮັດວຽກ ຮ່ວມກັບ ທ່ານ ບຸນນາວ ຈັນດອນ, ເຈົ້າເມືອງ ເມືອງພູວົງ ແລະ ຫົວໜ້າຫ້ອງການ ຊັບພະຍາກອນທໍາມະຊາດ ແລະ ສິ່ງແວດລ້ອມ ເມືອງ ພູວົງ ພ້ອມຄະນະອົງການປົກຄອງເມືອງ. ຄະນະຍັງໄດ້ລົງຢ້ຽມຢາມ ໂຮງງານຜະລິດນ້ຳຕານ ຂອງ ບໍລິສັດ TTC ສສ. ຫວຽດນາມ, ໂຄງການ ປູກກ້ວຍຂອງບໍລິສັດ ຮວ່າງແອງຢາລາຍ ຢູ່ເມືອງ ພູວົງ ແລະ ເຂດຈັດສັນທີ່ດິນກະສິກຳ ໃຫ້ແກ່ ປະຊາຊົນຜູ້ຖືກຜົນກະທົບ ຈາກເຂື່ອນກັ້ນນໍ້າ D ໂຄງການເຊປຽນ-ເຊນໍ້ານ້ອຍແຕກພັງ ທີ່ເມືອງ ສະໜາມໄຊ.

ໃນວັນທີ 29 ພຶດສະພາ 2019  ໄດ້ເຄື່ອນໄຫວວຽກງານ ຢູ່ແຂວງເຊກອງ ໂດຍໄດ້ໄປຢ້ຽມຢາມ ເຂດບ້ານຈັດສັນ ບ້ານຫ້ວຍດຳໃໝ່ ຂອງໂຄງ ການເຂື່ອນຫ້ວຍລຳພັນໃຫຍ່ ທີ່ເມືອງ ທ່າແຕງ ແຂວງເຊກອງ ແລະ ຢ້ຽມຢາມຕົວເຂື່ອນ ຂອງໂຄງການໄຟຟ້ານໍ້າຕົກຫ້ວຍລຳພັນໃຫຍ່  ທີ່ ເມືອງທ່າແຕງ ແຂວງເຊກອງ ເຊິ່ງແມ່ນ ບໍລິສັດ ຜະລິດ-ໄຟຟ້າລາວມະຫາຊົນ ເປັນເຈົ້າຂອງໂຄງການ. ຈາກນັ້ນ ໃນຕອນບ່າຍໄດ້ເຂົ້າຮ່ວມປະຊຸມ ແລະ ເຮັດວຽກຮ່ວມກັບ ອົງການປົກຄອງແຂວງ, ພະແນກ ຊັບພະຍາກອນທໍາມະຊາດ ແລະ ສິ່ງແວດລ້ອມ ແຂວງເຊກອງ ແລະ ອົງການ ປົກຄອງເມືອງທ່າແຕງ ແລະ ຫ້ອງການຊັບພະຍາກອນ ທໍາມະຊາດ ແລະ ສິ່ງແວດລ້ອມ ເມືອງທ່າແຕງ ໂດຍມີ ທ່ານ ເຫຼັກໄຫຼ ສີວິໄລ, ຮອງເຈົ້າແຂວງ ແຂວງເຊກອງ ໃຫ້ກຽດເປັນປະທານຮ່ວມ.

ກອງປະຊຸມ ໄດ້ຮັບຟັງການລາຍງານວຽກງານ ການຈັດຕັ້ງ-ພະນັກງານ ຂອງຂະແໜງ ຊັບພະຍາກອນທໍາມະຊາດ ແລະ ສິ່ງແວດລ້ອມ ຂອງ ແຂວງເຊກອງ, ວຽກງານກວດກາ ແລະ ວຽກງານວິຊາສະເພາະ ໂດຍສະເພາະວຽກງານ ຂຶ້ນທະບຽນອອກໃບຕາດິນ, ວຽກງານຈັດສັນທີ່ດິນ, ວຽກງານຄຸ້ມຄອງ ແລະ ຕິດຕາມກວດກາສິ່ງແວດລ້ອມ ຂອງໂຄງການລົງທຶນ ແລະ ອື່ນໆ.

ໃນວັນທີ 30 ພຶດສະພາ 2019  ຄະນະ ໄດ້ເຄື່ອນໄຫວເຮັດວຽກ ຢູ່ ແຂວງສາລະວັນ ໂດຍໄດ້ເຂົ້າລາຍງານ ແລະ ຢ້ຽມຢາມ ທ່ານ ສີສຸວັນ ວົງຈອມສີ, ເຈົ້າແຂວງ ແຂວງສາລະວັນ ເພື່ອລາຍງານການການເຄື່ອນໄຫວຂອງຂະແໜງ ຊັບພະຍາກອນທໍາມະຊາດ ແລະ ສິ່ງແວດລ້ອມ ໂດຍສະເພາະການປະຕິບັດຄາດໝາຍສູ້ຊົນ ການຂຶ້ນທະບຽນອອກໃບຕາດິນ, ການຈັດສັນທີ່ດິນ ແລະ ການສ້າງແຜນຄຸ້ມຄອງສິ່ງແວດລ້ອມ ແບບຮອບດ້ານ, ການປົກປັກຮັກສາສິ່ງແວດລ້ອມ ແລະ ການຄຸ້ມຄອງໂຄງການລົງທຶນ, ພ້ອມນັ້ນ ກໍ່ໄດ້ ຮ່ວມເຮັດວຽກກັບ ພະແນກ ຊັບພະຍາກອນທໍາມະຊາດ ແລະ ສິ່ງແວດລ້ອມ ແຂວງ ສາລະວັນ ໂດຍໄດ້ຮັບຟັງການລາຍງານ ແລະ ມີຄໍາເຫັນຊີ້ນໍາໃນການຈັດຕັ້ງປະຕິບັດມະຕິກອງປະຊຸມໃຫຍ່ ກໍ່ຄືການປະຕິບັດພາລະບົດບາດ ຂອງ ຂະແໜງ ຊັບພະຍາກອນທໍາມະຊາດ ແລະ ສິ່ງແວດລ້ອມ. ໃນໂອກາດເຮັດວຽກຢູ່ ແຂວງສາລະວັນ ຍັງໄດ້ມີໂອກາດ ໄປຢ້ຽມຊົມການພັດທະນາ ແລະ ປົກປັກຮັກສາແຫຼ່ງທ່ອງທ່ຽວທໍາມະຊາດ ແບບອະນຸລັກ ພູຜາສຸກ; ໄດ້ພົບປະກັບທ່ານຮອງເຈົ້າເມືອງ ເມືອງເລົ່າງາມ ແລະ ຢ້ຽມຢາມໂຄງການປູກພືດສະໝຸນໄພ ຂອງ ບໍລິສັດ ລາວສຶມຸລະ ທີ່ເມືອງເລົ່າງາມ ແຂວງ ສາລະວັນ.