ໃນວັນທີ 15 ມີນາ 2019 ທີ່ປະເທດໄນໂລບີ, ຫົວ​ໜ້າ​ຄະ​ນະ​ຜູ້​ແທນ​ຈີນ, ທ່ານ Zhao Yingmin, ຮອງລັດຖະມົນຕີ ກະຊວງ ນິ​ເວດ ແລະ ສິ່ງແວດລ້ອມ ແລະ ທ່ານ Joyce Msuya ຮັກ​ສາການຫົວຫນ້າ ອົງການສະຫະປະຊາດ ເພື່ອສິ່ງແວດລ້ອມ, ໄດ້ຮ່ວມກັນປະກາດວ່າ ສປ ຈີນ ຈະເປັນເຈົ້າພາບໃນການສະຫຼອງ ວັນສິ່ງແວດລ້ອມໂລກ ວັນທີ 5 ມິຖຸນາ 2019 ພາຍໃຕ້ຫົວຂໍ້ ທີ່ກ່ຽວຂ້ອງກັບ ມົນລະພິດທາງອາກາດ.

ແຕ່ລະປີມີ​ຄົນຢູ່​ໃນໂລກ ເສຍຊີວິດກ່ອນໄວອັນຄວນ ປະມານ 7 ລ້ານຄົນ ຈາກມົນລະພິດທາງອາກາດ, ໃນ​ນັ້ນ ປະມານ 4 ລ້ານຄົນ ແມ່ນເສຍຊີວິດຢູ່ໃນພາກ​ພື້ນອາຊີປາຊີຟິກ. ວັນສິ່ງແວດລ້ອມໂລກປີ 2019 ໄດ້​ປຸກລະດົມ​ພາກ ລັດ, ອຸດສາຫະກໍາ, ຊຸມຊົນ ແລະ ພາກ​ເອ​ກກະຊົນ ຈົ່ງຮ່ວມກັນເພື່ອນຳ​ໃຊ້ພະລັງງານທົດແທນ, ເຕັກໂນໂລຊີສີຂຽວ ແລະ ປັບປຸງຄຸນນະພາບອາກາດຢູ່ໃນຕົວເມືອງ ແລະ ພາກພື້ນ ໃນທົ່ວໂລກ.

ລັດຖະບານ ສ​ປ ຈີນ ໄດ້ໃຫ້​ຄຳ​ໝັ້ນ ຈະຈັດການສະຫຼອງວັນສິ່ງແວດລ້ອມໂລກ ຢູ່ຫຼາຍ​ຕົວເມືອງ ຂອງແຂວງຫາງໂຈວ​, ຊຶ່ງ ແຂວງຈີຈຽງ ຈະເປັນເຈົ້າພາບຫຼັກ​ໃນ​ການຈັດກິດຈະກຳດັ່ງກ່າວ.

ການ​ປະ​ກາດ​ໃນ​ຄັ້ງ​ນີ້​ແມ່ນ​​ໄດ້ສະ​ເໜີໃນ​ເວ​ລາ​ທີ່ ບັນດາລັດຖະມົນຕີ ສິ່ງ​ແວດລ້ອມມາ​ເຂົ້າຮ່ວມກອງປະຊຸມ​ສິ່ງ​ແວດ​ລ້ອມ​ ໃນລະດັບສູງ​ຂອງໂລກ ທີ່ ໄນ​ໂຮ​ບີ. ຊື່ງ​ແມ່ນກອງປະຊຸມສະໄໝສາມັນ ຄັ້ງທີ 4 ຂອງສະຫະປະຊາຊາດ ເພື່ອສິ່ງແວດລ້ອມ​ ແຕ່ວັນທີ 11-15 ມີນາ, ​ເພື່ອແກ້ໄຂບັນຫາທີ່ສໍາຄັນ ເຊັ່ນ: ຢຸດຕິສິ່ງ​ເສດ​ເຫຼືອ​ຈາກອາຫານ ແລະ ເສີມຂະ​ຫ​ຍາຍການນຳໃຊ້ລົດ​ເມໄຟຟ້າ. ນອກຈາກນີ້, ຍັງມີການ​ພີມເຜີຍແຜ່ບົດລາຍງານ 20 ປີກ່ຽວ​ກັບການຄວບຄຸມມົນລະພິດທາງອາກາດ ຢູ່ປັກກິ່ງ

ໃນ​ການ​ປະ​ກາດວັນ​ສຸກ ທ່ານ​ Joyce Msuya ໄດ້​ເວົ້າ​ວ່າ “ ສປ ຈີນ ຈະ​ໄດ້​ເປັນ​ເຈົ້າ​ພາບຂອງ​ໂລກ​ ໃນ​ການ​ສະຫຼອງວັນ​ສິ່ງ​ແວດ​ລ້ອມ​ໂລກ ປີ 2019”. “ຜູ້​ນຳ​ບັນ​ດາ​ປະ​ເທດ​ຕ່າງໆ ຄວນ​ເອົາ​ໃຈ​ໃສ່​ຢ່າງຈິງຈັງ ໃນການແກ້ໄຂບັນ ຫາມົນລະພິດທາງອາກາດ​ຢູ່ພາຍໃນປະເທດ. ຊຶ່ງການຈັດຕັ້ງປະຕິບັດດັ່ງກ່າວ ຈະສາມາດ ຊ່ວຍ ໃຫ້ໂລກຂອງເຮົາດີ ຂຶ້ນເລື້ອຍໆ. ມົນລະພິດທາງອາກາດເປັນບັນຫາສຸກ​ເສີນ​ຂອງໂລກ ຊຶ່ງມີຜົນກະ​ທົບຕໍ່ທຸກໆ ຄົນ. ປະຈຸບັນ ສປ ຈີນ ຈະ​ນຳ​ພາ ຊຸກ​ຍູ້ ແລະ ປຸກລະດົມ ​ການ​ປະ​ຕິ​ບັດ​ໃນ​ໂລກ ເພື່ອຮັກສາຊີວິດຫຼາຍລ້ານຄົນຢູ່ໃນໂລກ "

ສປ ຈີນ ເປັນຜູ້ນຳໜ້າໃນການຂະຫຍາຍຂະແໜງພະລັງງານສີຂຽວ, ຈີນເປັນປະ ເທດທີ່ ນຳໃຊ້ພາຫະນະໄຟຟ້າກວມ ເຄິ່ງໜຶ່ງຂອງໂລກ ແລະ 99 % ແມ່ນລົດເມໄຟຟ້າຂອງ​ໂລກ, ໂດຍການເປັນເຈົ້າພາບໃນການສະຫຼອງວັນສິ່ງແວດລ້ອມ ໂລກ​ປີ 2019, ລັດຖະບານຈີນຈະສະແດງໃຫ້ເຫັນນະວັດຕະກຳໃໝ່ ແລະ ຄວາມກ້າວຫນ້າ ເພື່ອກ້າວສູ່ສະພາບສິ່ງ ແວດລ້ອມທີ່ສະອາດ.

ອີງຕາມບົດລາຍງານລ້າສຸດ ຂອງອົງການສະຫະປະຊາຊາດ ກ່ຽວກັບ ມົນລະພິດທາງອາກາດ ຢູ່ພາກພື້ນອາຊີປາຊີຟິກ, ການຈັດ​ຕັ້ງປະຕິບັດ 25 ນະໂຍບາຍ ກ່ຽວ​ກັບເຕັກໂນໂລຊີ ສະແດງໃຫ້ເຫັນເຖິງ ການຫຼຸດຜ່ອນການ​ປ່ອຍທາດອາຍ ກາກໂບນິກ 20 % ແລະ ການຫຼຸດຜ່ອນການປ່ອຍທາດອາຍເມຕານ 45 % ເພື່ອຮັກສາພາວະການຮ້ອນຂື້ນຂອງ ໂລກ ໄດ້ເຖິງ 3 ອົງສາ.

ວັນສິ່ງແວດລ້ອມໂລກ ແມ່ນກິດຈະກໍາທົ່ວໂລກຂອງອົງການສະຫະປະຊາຊາດເພື່ອສິ່ງແວດລ້ອມ, ເຊິ່ງຈັດຂຶ້ນໃນວັນທີ 5 ມິຖຸນາ ຂອງທຸກໆປີ ແລະ ສະຫຼອງໂດຍຫຼາຍພັນປະຊາຄົມ ໃນທົ່ວໂລກ. ​ຊື່ງ​ໄດ້​ເລີ້ມ​ແຕ່​ປີ 1972 ແລະ ໄດ້​ກາຍ​ເປັນ​ການ​ສະຫຼອງ​ອັນ​ນື່ງ​ທີ່​ຍິ່ງ​ໃຫ​ຍ່​ຂອງ​ສິ່ງ​ແວດ​ລ້ອມໃນ​ແຕ່​ລະ​ປີ.

ຜົນ​ກະ​ທົບ​ຂອງມົນລະພິດທາງອາກາດ:

  • ປະຊາກອນທົ່ວໂລກ 92 % ບໍ່ໄດ້ຫາຍໃຈເອົາອາກາດທີ່ບໍລິສຸດ;

  • ມົນລະພິດທາງອາກາດ​ເຮັດ​ໃຫ້​ສູນ​ເສຍມູນຄ່າທາງດ້ານເສດຖະກິດຂອງໂລກ 5 ພັນຕື້ໂດລາຕໍ່ປີ ໃນການໃຊ້ຈ່າຍທາງດ້ານສະຫວັດດີການ;

  • ຄາດຄະເນວ່າມົນລະພິດຂອງຊັ້ນໂອໂຊນຢູ່ໜ້າດິນ ຈະເຮັດໃຫ້ຜົນຜະລິດຂອງພືດຫຼຸດລົງເຖິງ 26 % ໃນປີ 2030.

 

ອົງການສະຫະປະຊາຊາດເພື່ອສິ່ງແວດລ້ອມ:

ອົງການສະຫະປະຊາຊາດເພື່ອສິ່ງແວດລ້ອມແມ່ນ ກະບອກສຽງນໍາພາ ກ່ຽວກັບສິ່ງແວດລ້ອມ ໃນທົ່ວໂລກເຊິ່ງເປັນຜູ້ ນຳ ແລະ ປຸກລະດົມຄູ່ຮ່ວມງານ ໃນການຈັດຕັ້ງປະຕິບັດ ວຽກງານສິ່ງແວດລ້ອມ ໂດຍການກະຕຸກຊຸກຍູ້, ແຈ້ງຂໍ້ມູນ ແລະ ເຮັດໃຫ້ ປະຊາຊາດ ແລະ ປະຊາຊົນ ມີ​ການສົ່ງເສີມຄຸນນະພາບຊີວິດ ໂດຍປາສະຈາກຜົນກະທົບຕໍ່ຄົນລຸ້ນ ຕໍ່​ໄປໃນອະນາຄົດ. ອົງການສະຫະປະຊາຊາດເພື່ອສິ່ງແວດລ້ອມ ເຮັດວຽກຮ່ວມກັບ​ພາກ​ສ່ວນລັດ, ພາກສ່ວນເອກະຊົນ, ອົງການຈັດຕັ້ງທາງສັງຄົມ ແລະ ບັນ​ດາອົງການສະຫະປະຊາຊາດອື່ນໆ ລວມທັງ ອົງການຈັດຕັ້ງສາກົນ​ຢູ່​ໃນ​ໂລກ.