ກອງປະຊຸມສຳມະນາວຽກງານແຜນການ, ການເງິນ ແລະ ວຽກງານຮ່ວມມື ປະຈຳປີ 2018 ຂອງຂະແໜງ ຊັບ ພະຍາກອນທຳມະຊາດ ແລະ ສິ່ງແວດລ້ອມ ໄດ້ໄຂຂຶ້ນຢ່າງເປັນທາງການໃນຕອນເຊົ້າຂອງວັນທີ 28 ມີນາ 2019 ທີ່ຫ້ອງປະຊຸມ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ. ພາຍໃຕ້ການເປັນປະທານຂອງ ທ່ານ ພູວົງ ຫຼວງໄຊຊະນະ ວ່າການແທນ ຫົວໜ້າກົມແຜນການ ແລະ ການຮ່ວມມື ແລະ ການເປັນປະທານຮ່ວມຂອງ ທ່ານ ສີພັນດອນ ສີຫາວົງ ຫົວໜ້າກົມການເງິນ ໂດຍມີບັນດາທ່ານຮອງຫົວໜ້າກົມ, ຫົວໜ້າພະແນກ, ຮອງຫົວໜ້າພະແນກ, ຫົວໜ້າຂະແໜງ, ຮອງຫົວໜ້າຂະແໜງ ແລະ ພະນັກງານວິຊາການຫຼັກແຫຼ່ງ ທີ່ຮັບຜິດຊອບວຽກງານແຜນການ-ການເງິນ ແລະ ຮ່ວມມື ຈາກຫ້ອງການ, ກົມ, ກອງ, ສູນ, ສະຖາບັນ, ພຊສ ແຂວງ ແລະ ນະຄອນຫຼວງວຽງຈັນ ເຂົ້າຮ່ວມທັງໝົດຈຳນວນ 97 ທ່ານ ຍິງ 25 ທ່ານ.

ກອງປະຊຸມຄັ້ງນີ້ໄດ້ສຸມໃສ່ການປຶກສາຫາລື ແລະ ແລກປ່ຽນບົດຮຽນ  ກ່ຽວກັບການສະຫຼຸບລາຍງານ, ການສະ  ໜອງຂໍ້ມູນ ຂອງບັນດາຄາດໝາຍ ແລະ ວຽກຈຸດສຸມ ທີ່ຕິດພັນກັບ ຫ້ອງການ, ກົມ, ກອງ, ສະຖາບັນ, ສູນ, ພຊສ ແຂວງ ແລະ ນະຄອນຫຼວງວຽງຈັນ ໃຫ້ທັນກັບກຳນົດເວລາ, ພ້ອມທັງໄດ້ເລັ່ງໃສ່ປຶກສາຫາລື ການຄຸ້ມຄອງໂຄງການລົງທຶນຂອງລັດ ແລະ ການນຳໃຊ້ງົບປະມານໃຫ້ມີປະສິດທິພາບ. ນອກຈາກນັ້ນຍັງໄດ້ຮັບຟັງການລາຍງານ ແລະ ເຜີຍ ແຜ່ຜົນສຳເລັດ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ໃນກາງສະໄໝ ການຈັດຕັ້ງປະຕິບັດ ແຜນພັດທະນາເສດຖະ ກິດ-ສັງຄົມ 5 ປີ ຄັ້ງທີ VIII (2016-2020) ແລະ ການປະຕິບັດແຜນການ ປະຈໍາປີ 2018 ຂອງວຽກງານແຜນການ, ການເງິນ ແລະ ວຽກງານຮ່ວມມື ພ້ອມທັງສະເໜີທິດທາງເຄິ່ງທ້າຍສະໄໝທີ່ຍັງເຫຼືອ ພ້ອມທັງກົນໄກໃນການຈັດຕັ້ງປະ ຕິບັດ ປະຈຳປີ 2019 ຂອງຂະແໜງ ຊັບພະຍາກອນທໍາມະຊາດ ແລະ ສິ່ງແວດລ້ອມ.  ເຊິ່ງໃນນີ້ຍັງໄດ້ຮັບຟັງຄຳຄິດເຫັນ ຈາກຫ້ອງການ, ກົມ, ກອງ, ສະຖາບັນ, ສູນ, ພຊສ ແຂວງ ແລະ ນະຄອນຫຼວງວຽງຈັນ ໃນການຈັດຕັ້ງປະຕິບັດວຽກງານ ເຊິ່ງມີທັງຂໍ້ສະດວກ ແລະ ຂໍ້ຫຍຸ້ງຍາກ ທີ່ຕ້ອງໄດ້ສືບຕໍ່ເອົາໃຈໃສ່ແກ້ໄຂໃນຕໍ່ໜ້າ.

ໃນຕອນທ້າຍຂອງກອງປະຊຸມ ໂດຍໄດ້ຮັບກຽດເຂົ້າຮ່ວມ ແລະ ໂອ້ລົມ ຈາກ ທ່ານ ປອ ໄຊນະຄອນ ອິນທະວົງ, ຮອງລັດຖະມົນຕີ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ ພ້ອມທັງໃຫ້ທິດຊີ້ນຳໃນການຈັດຕັ້ງປະຕິບັດວຽກງານ ແຜນການ, ການເງິນ, ວຽກງານຮ່ວມມື ແລະ ວຽກງານອື່ນໆ ທີ່ກ່ຽວຂ້ອງ.

 ກອງປະຊຸມໄດ້ອັດລົງ ໃນວັນທີ 29 ມີນາ 2019 ດ້ວຍຜົນສໍາເລັດຢ່າງຈົບງາມ.