ໃນທ່າມກາງບັນຍາກາດທີ່ທົ່ວພັກ, ທົ່ວກອງທັບ  ແລະ ທົ່ວປວງຊົນລາວທັງຊາດພວມພ້ອມກັນ ສືບຕໍ່ຜັນຂະຫຍາຍຈັດຕັ້ງປະຕິບັດມະຕິ ກອງ ປະຊຸມໃຫຍ່ຄັ້ງທີ X ຂອງພັກ ແຜນພັດທະນາ ເສດຖະກິດສັງຄົມ 5 ປີ ຄັ້ງທີ VIII ຂອງລັດ ແລະ ສະເຫຼີມ ສະຫຼອງ ວັນສຳຄັນຕ່າງໆ ຂອງ ຊາດ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມໄດ້ຈັດໃຫ້ມີພິທີ ປາຖະກະຖາຂຶ້ນ ໃນຕອນບ່າຍຂອງວັນທີ 4 ເມສາ 2019 ຢູ່ທີ່ ຫ້ອງປະຊຸມໃຫຍ່ ກຊສ ເນື່ອງໃນໂອກາດວັນ ຕ້ານການສໍ້ລາດບັງຫຼວງສາກົນ ຄົບຮອບ 15ປີ (9 ທັນວາ 2003 - 9 ທັນວາ 2018) ແລະ ວັນສ້າງຕັ້ງອົງການກວດກາພັກລັດ ສປປ ລາວ ຄົບຮອບ 37ປີ.

ເຂົ້າຮ່ວມໃນພິທີດັ່ງກ່າວໂດຍມີ ທ່ານ ສົມມາດ ພົລເສນາ ກຳມະການສູນກາງພັກ, ເລຂາຄະນະ ພັກ, ລັດຖະມົນຕີ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ, ພ້ອມດ້ວຍບັນດາ ຄະນະພັກ, ບັນດາຮອງລັດຖະມົນຕີ, ຫົວໜ້າ ກົມ, ຮອງກົມ, ສະມາຊິກພັກ ພະນັກງານ-ລັດ ຖະກອນໃນທົ່ວກະຊວງເຂົ້າຮ່ວມ. ໂດຍການ ເປັນກຽດຂຶ້ນປາຖະກະຖາຂອງ ທ່ານ ປອ ດາວບົວລະພາ ບາວົງເພັດ ຮອງປະທານກວດກາ ສູນກາງພັກ ເຊິ່ງໃນການປາຖະກະຖາຄັ້ງນີ້ ທ່ານ ໄດ້ຍົກໃຫ້ເຫັນຜົນຮ້າຍຂອງການສໍ້ລາດບັງ ຫຼວງ ເຊິ່ງສົ່ງຜົນກະທົບ ແລະ ກົດ ໜ່ວງຖ່ວງ ດຶງການພັດທະນາເສດຖະກິດສັງຄົມຂອງ ແຕ່ລະປະເທດໃນໂລກ, ການສໍ້ລາດບັງຫຼວງ ແມ່ນສະພາບຫຍໍ້ທໍ້ໜຶ່ງໃນກົງຈັກການຈັດຕັ້ງ ຂອງລັດ ບໍ່ວ່າຈະເປັນປະເທດນ້ອຍ ຫຼືໃຫຍ່, ທຸກຍາກຫຼືຮັ່ງມີ, ກໍລ້ວນແລ້ວແຕ່ມີຜົນກະທົບ ເຊັ່ນດຽວກັນ; ການສໍ້ລາດບັງຫຼວງ ພວມເປັນ ໄພຂົ່ມຂູ່ ເຖິງສະຖຽນລະພາບຂອງການຈັດຕັ້ງ ທັງພາກລັດ ແລະ ເອກະຊົນ, ການສໍ້ລາດບັງ ຫຼວງເປັນການຕັດຮອນເອົາລາຍໄດ້ຂອງຊາດ, ຂອງ ລວມໝູ່ ກໍຄືຂອງພົນລະເມືອງ ດ້ວຍຫຼາຍຮູບແບບ ເຊິ່ງໄດ້ສ້າງຄວາມເສຍຫາຍ ໃຫ້ແກ່ຊັບສິນເງິນ ຄຳຂອງລັດ, ລວມໝູ່ ແລະ ຂອງປະຊາຊົນ ເປັນຈຳນວນມະຫາສານ, ຍ້ອນເຫັນໄດ້ຜົນຮ້າຍ ແລະ ໄພອັນຕະລາຍຂອງການສໍ້ລາດບັງຫຼວງ ປະຊາຄົມໂລກຈຶ່ງໄດ້ມີການຄົ້ນຄິດ ສ້າງຂອບເຂດ, ກຳນົດກົດໝາຍສາກົນ ເປັນບ່ອນອີງໃຫ້ມີ ການພົວພັນຮ່ວມມືລະຫວ່າງປະເທດຕ່າງໆ ຢູ່ໃນຂົງເຂດພາກພື້ນ ແລະ ໃນໂລກ, ເພື່ອພ້ອມ ກັນສະກັດກັ້ນ ແລະ ຕ້ານການສໍ້ລາດບັງຫຼວງ ເຊິ່ງແມ່ນຄວາມຮຽກຮ້ອງຕ້ອງການອັນຈຳເປັນອັນໜຶ່ງຂອງບັນດາວົງຄະນະຍາດສາກົນ. ດັ່ງນັ້ນ, ກອງປະຊຸມໃຫຍ່ ສະຫະປະຊາຊາດ ຈຶ່ງໄດ້ມີ ມະຕິເລກທີ 55/6, ລົງວັນທີ 14 ທັນວາ 2000 ໄດ້ກຳນົດຄວາມຈຳເປັນຕ້ອງມີກົດໝາຍສາກົນ ທີ່ມີຜົນສັກສິດໃນການສະກັດກັ້ນ ແລະ ຕ້ານການສໍ້ລາດບັງຫຼວງຢູ່ໃນໂລກ, ມາຮອດປັດຈຸບັນນີ້ ມີ 186 ລັດພາຄີ, ໃນນັ້ນເປັນສະມາຊິກ 178 ປະເທດ, ສຳລັບ ສປປ ລາວ ໄດ້ລົງນາມ ສົນທິສັນຍາວ່າດ້ວຍການຕ້ານການສໍ້ລາດບັງຫຼວງ ໃນວັນທີ 10 ທັນວາ 2003 ແລະ ໃຫ້ສັດຕະຍາບັນໃນວັນທີ 25 ກັນຍາ 2009. ກອງປະຊຸມສະມັດຊາໃຫຍ່ ສະຫະປະຊາຊາດໃນປີ 2003 ໄດ້ອອກມະຕິ ສະບັບເລກທີ 58/4 ໂດຍກຳນົດເອົາວັນທີ 9 ທັນວາ ຂອງທຸກໆປີ ເປັນວັນຕ້ານການສໍ້ລາດບັງຫຼວງສາກົນ. ນັບແຕ່ນັ້ນມາ ວັນທີ 9 ທັນວາ ໄດ້ກາຍເປັນວັນທີ່ມີຄວາມໝາຍສຳຄັນ ເປັນວັນແຫ່ງຄວາມສາມັກຄີ ຮ່ວມແຮງຮ່ວມໃຈກັນໃນການຕ້ານການສໍ້ລາດບັງຫຼວງ ຂອງບັນດາປະເທດພາຄີ ແລະ ບັນດາປະຊາຊາດ ໃນໂລກ, ເຊິ່ງການສະເຫຼີມສະຫຼອງປີນີ້ ແມ່ນພາຍໃຕ້ຄຳຂວັນ “ຮ່ວມແຮງຮ່ວມໃຈ ຕ້ານການ ສໍ້ລາດບັງຫຼວງ ເພື່ອການພັດທະນາຄວາມຍືນຍົງ ແລະ ຄວາມໝັ້ນຄົງ”.

ຈາກນັ້ນ ທ່ານກໍໄດ້ຍົກໃຫ້ເຫັນຄວາມສຳຄັນ ແລະ ມູນເຊື້ອວັນສ້າງຕັ້ງອົງການກວດກາພັກ-ລັດ ເນື່ອງໃນໂອກາດຄົບຮອບ 37 ປີ ເຊິ່ງຈຸດປະສົງ ໃນການປາຖະກະຖາຄັ້ງນີ້ກໍເພື່ອເປັນການໂຄສະນາສຶກສາອົບຮົມໃຫ້ສະມາຊິກພັກ, ພະນັກງານ, ທະຫານ, ຕຳຫຼວດ ແລະ ປະຊາຊົນ ໃນທົ່ວສັງຄົມຮັບຮູ້, ເຂົ້າໃຈກ່ຽວກັບພາລະບົດບາດຄວາມສຳຄັນ, ການເຕີບໃຫຍ່ຂະຫຍາຍຕົວ ແລະ ຜົນງານການເຄື່ອນໄຫວຂອງອົງການກວດກາພັກ-ລັດ ແຕ່ລະໄລຍະຢ່າງເລິກເຊິ່ງກວ້າງຂວາງ. 

ພ້ອມກັນນັ້ນກໍເພື່ອແນໃສ່ປຸກລະດົມ ແລະ ສ້າງຈິດສຳນຶກໃຫ້ແກ່ພະນັກງານທີ່ເຮັດວຽກ ກວດກາມີຄວາມຮັກໃນອາຊີບຂອງຕົນດ້ວຍ ຄວາມບໍລິສຸດໃຈ ແລະ ເປັນການສ້າງຂະບວນການແຂ່ງຂັນ “ຮັກຊາດ ແລະ ພັດທະນາ” ຂອງ ຄະນະພັກກໍຄືອົງການປົກຄອງຂັ້ນຂອງຕົນວາງອອກໃຫ້ປະກົດຜົນເປັນຈິງ.