ໃນວັນທີ 21 ກຸມພາ 2019 ທີ່​ຫ້ອງ​ປະ​ຊຸມ ກຊສ ກົມ ການ​ເງິນ ກະຊວງ ຊັບພະຍາກອນ​ທຳ​ມະ​ຊາດ ​ແລະ ສິ່ງ​ແວດ​ລ້ອມ ​ໄດ້​ຈັດ​ກອງ​ປະຊຸມ ວິທະຍາສາດ ວຽກ​ງານ ການ​ເງິນ ​ໃນ​ໄລຍະ​ໃໝ່​ຂອງພັກ, ​ໂດຍ​ການ​ເປັນ​ປະທານ​ຂອງ ​ທ່ານ ສີ​ພັນ​ດອນ ສີ​ຫາ​ວົງ, ຫົວໜ້າ​ກົມ ການ​ເງິນ ກຊສ, ​ເຊິ່ງມີ ຮອງ​ກົມ, ຫົວໜ້າ​ພະ​ແນ​ກ, ຮອງ​ພະ​ແນ​ກ ຈາກ ຫ້ອງການ, ກົມ, ກອງ, ສະ​ຖາ​ບັນ ​ແລະ ສູນ ພ້ອມ​ທັງ​ວິຊາ​ການ​ພາຍ​ໃນ​ກົມ ​ເຂົ້າ​ຮ່ວມທັງ​ໝົດ 79 ທ່ານ, ຍິງ 60 ທ່ານ.

ທ່ານ ສີ​ພັນ​ດອນ ສີ​ຫາ​ວົງ, ຫົວໜ້າ​ກົມ  ກໍ່​ໄດ້​ເຜີຍ​ແຜ່ ​ເອກະສານ​ສັງ​ລວມຫຍໍ້ ຂອງ​ທ່ານ ປະທານ ​ໄກສອນ ພົມວິຫານ ຕໍ່​ວຽກ​ງານ​ການ​ເງິນ ​ໃນ​ໄລຍະ​ໃໝ່ ​ແລະ ການ​ຈັດ​ຕັ້ງ ກົດໝາຍ​ວ່າ​ດ້ວຍ ງົບປະມານ​ແຫ່ງ​ລັດ ​ເຂົ້າ​ໃນ​ວຽກ​ງານ​ການ​ເງິນ ກຊສ.

ຈາກ​ນັ້ນ​ກອງ​ປະຊຸມ​ກໍ່​ຍັງ​ໄດ້ ​ເຜີຍ​ແຜ່​ດຳລັດ 78/ລບ ວ່າ​ດ້ວຍ ​ການ​ປະຢັດ ​ແລະ ການ​ຕ້ານ​ການ​ຟຸມ​ເຟືອຍ, ຄໍາສັ່ງ ​ເລກທີ 09/ນຍ ວ່າ​ດ້ວຍ ​ການ​ປະຢັດ​ລາຍ​ຈ່າຍ​ງົບປະມານ, ​ແນະນຳ​ການຈັດ​ຕັ້ງ​ ນິຕິ​ກຳ ກ່ຽວ​ກັບ​ວຽກ​ງານ​ການ​ເງິນ, ​ແນະນຳ​ການຈັດ​ຕັ້ງ​ຜັນ​ຂະຫຍາຍ​ເຜີຍ​ແຜ່ ກົດໝາຍ​ວ່າ​ດ້ວຍ ການຈັດ​ຊື້-ຈັດ​ຈ້າງ ຢູ່​ພາຍ​ໃນ ກຊສ ​ແລະ ​ແນ​ະນຳ ການຈັດ​ຕັ້ງ​ຜັນ​ຂະຫຍາຍ ກົດ​ໝາຍ​ວ່າ​ດ້ວຍ ບັນຊີ ​ແຫ່ງ​ລັດ ​ເຂົ້າ​ໃນ​ການ​ປັບປຸງ ວຽກ​ງານ​ບັນຊີ ກຊສ, ພ້ອມ​ນັ້ນຜູ້​ເຂົ້າ​ຮ່ວມ ​ກອງ​ປະຊຸມ​ກໍ່​ໄດ້ປະກອບ​ຄຳ​ຄິດ​ເຫັນ ​ແລະ ​ແລກປ່ຽນ​ບົດຮຽນ​ ປຶກ​ສາ​ຫາ​ລື​ກັນ​ໃນ​ການ​ຈັດ​ຕັ້ງ​ປະ​ຕິ​ບັດ​ວຽກ​ງານ​ທີ່​ຜ່ານ​ມາ ແລະ ທິດ​ທາງ​ຕໍ່​ໜ້າ​.