ພິທີປະກາດແຕ່ງຕັ້ງຮອງລັດຖະມົນຕີ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມຄົນໃໝ່ ໄດ້ຈັດຂຶ້ນໃນຕອນບ່າຍວັນທີ  17 ທັນວາ 2018 ທີ່ຫ້ອງປະຊຸມໃຫຍ່ ກຊສ ໂດຍເປັນກຽດເຂົ້າຮ່ວມຂອງ ທ່ານ ສົມມາດ ພົລເສນາ ກຳມະການສູນກາງພັກ, ລັດຖະມົນຕີ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ, ມີບັນດາ ຮອງລັດຖະມົນຕີ, ຫົວໜ້າກົມ, ຮອງກົມ, ກອງ, ສູນ, ສະຖາບັນ ແລະ ຄະນະພະແນກ ພາຍໃນ ກຊສ ເຂົ້າຮ່ວມ.

          ໃນພິທີ ທ່ານ ນາງ ບຸດສະດີ ທະນາເມືອງ ຫົວໜ້າກົມຄຸ້ມຄອງພະນັກງານ, ຄະນະຈັດຕັ້ງສູນກາງພັກກໍໄດ້ຂຶ້ນຜ່ານ ດຳລັດຂອງນາຍົກລັດຖະມົນຕີ ສະບັບ  ເລກທີ 350/ນຍ, ລົງວັນທີ 23 ພະຈິກ 2018 ວ່າດ້ວຍການແຕ່ງຕັ້ງ ຮອງລັດຖະມົນຕີ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ ໂດຍອີງໃສ່ຄວາມຮຽກຮ້ອງຕ້ອງການ ຂອງໜ້າທີ່ວຽກງານ ຢູ່ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ ເພື່ອຮັບປະກັນໃນການເຄື່ອນໄຫວ ປະຕິບັດຕາມພາລະບົດບາດ, ໜ້າທີ່ ທີ່ພັກ-ລັດ ມອບໝາຍໃຫ້ ໂດຍສະເພາະແມ່ນການປັບປຸງວຽກງານຢູ່ຂະແໜງ ຊັບພະຍາກອນທຳມະຊາດ ແລະ ສິ່ງແວດລ້ອມ ໃຫ້ມີແບບແຜນ ແລະ ທັນສະໄໝຍິ່ງຂຶ້ນໂດຍໄດ້ແຕ່ງຕັ້ງ ທ່ານ ປອ ໄຊນະຄອນ ອິນທະວົງ ເປັນຮອງລັດຖະມົນຕີ ກຊສ.

         ໃນໂອກາດດັ່ງກ່າວ, ທ່ານລັດຖະມົນຕີ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ ກໍໄດ້ສະແດງຄວາມຊົມເຊີຍພ້ອມກັບເນັ້ນໜັກໃຫ້ ທ່ານ ຮອງລັດຖະມົນຕີ ຄົນໃໝ່ ຈົ່ງສືບຕໍ່ປະຕິບັດໜ້າທີ່ການເມືອງ ແລະ ຍົກສູງຄວາມຮັບຜິດຊອບຂອງຕົນຕາມທີ່ພັກ-ລັດມອບໝາຍໃຫ້ໄດ້ຮັບຜົນດີ ໂດຍສະເພາະ ແມ່ນການຍົກສູງຄວາມຮັບຜິດຊອບໃນການຮັບໃຊ້ຊາດ, ຮັບໃຊ້ປະຊາຊົນເວົ້າລວມ, ເວົ້າສະເພາະແມ່ນການປະກອບສ່ວນເຂົ້າໃນການຈັດຕັ້ງປະຕະບັດວຽກງານຂອງ ຂະແໜງຊັບພະຍາກອນທຳມະຊາດ ແລະ ສິ່ງແວດລ້ອມ ໃຫ້ສຳເລັດຕາມລະດັບຄາດໝາຍທີ່ວາງໄວ້.

       ໃນໂອກາດດຽວກັນ, ທ່ານ ປອ ໄຊນະຄອນ ອິນທະວົງ ໄດ້ຂຶ້ນກ່າວຮັບຄຳໂອວາດ ເຊິ່ງໄດ້ສະແດງຄວາມຮູ້ບຸນຄຸນ, ສະແດງຄວາມຂອບໃຈຕໍ່ການນຳພັກ-ລັດ ແລະ ພະນັກງານທົ່ວ ກຊສ ທີ່ໄດ້ໃຫ້ການສະໜັບສະໜູນ, ໃຫ້ໂອກາດໃນການຮຽນຮູ້ ເຝິກຝົນຫຼໍ່ຫຼອມຕົນເອງ ແລະ ໃຫ້ການຮ່ວມມື ໃນການປະຕິບັດໜ້າທີ່ວຽກງານ ດ້ວຍດີສະເໝີມາ. ຄຽງຄູ່ກັນນັ້ນກໍຈະສືບຕໍ່ ທຸ້ມເທ ສະຕິປັນຍາ, ຄວາມຮູ້, ຄວາມສາມາດ, ເຫື່ອແຮງຂອງຕົນ ເຂົ້າໃນການເສີມຂະຫຍາຍມູນເຊື້ອອັນດີງາມຂອງ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ ກໍຄືການປະຕິບັດໜ້າທີ່ ວຽກງານທີ່ຂັ້ນເທິງໄດ້ມອບໝາຍໃຫ້ດ້ວຍຄວາມຮັບຜິດຊອບສູງ ແລະ ມີຜົນສຳເລັດເປັນກ້າວໆ.