ໃນຕອນເຊົ້າຂອງວັນທີ 06 ສິງຫາ 2020 ທີ່ໂຮງແຮມລາວພລາຊາ, ນະຄອນຫຼວງວຽງຈັນ ໄດ້ມີການຈັດກອງປະຊຸມ ເຜີຍແຜ່ບົດປະເມີນຜົນກະທົບຕໍ່ສິ່ງແວດລ້ອມແບບລະອຽດ ໂຄງການໄຟຟ້າພະລັງງານຄວາມຮ້ອນຖ່ານຫີນ ເມືອງລະມາມ ແຂວງເຊກອງ ຂຶ້ນ, ໂດຍການໃຫ້ກຽດເປັນປະທານຮ່ວມຂອງ ທ່ານ ນາງ ບຸນຄຳ ວໍລະຈິດ ຮອງລັດຖະມົນຕີ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ, ທ່ານ ຈັນສອນ ແສນບຸດຕະລາດ ຮອງລັດຖະມົນຕີກະຊວງ ພະລັງງານ ແລະ ບໍ່ແຮ່, ທ່ານ ບຸນຫຼາຍ ບຸດທິ ຄະນະນຳແຂວງ ເຊກອງ ແລະ ທ່ານ ມະນີໂສ ຊາມຸນຕີ ຮອງປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ,

ສະພາແຫ່ງຊາດ ແລະ ມີຫົວໜ້າກົມ, ຮອງກົມ, ເຈົ້າເມືອງ, ຮອງເຈົ້າເມືອງ, ຫົວໜ້າພະແນກການ ທີ່ກ່ຽວຂ້ອງຂອງແຂວງ, ກະຊວງທີ່ກ່ຽວຂ້ອງ, ຜູ້ຕາງໜ້າຈາກອົງການຈັດຕັ້ງສາກົນ, ຕາງໜ້າເຈົ້າຂອງໂຄງການ ກໍຄື ບໍລິສັດ ທີເອັສບີພີ (TSBP) ເຊກອງພະລັງງານໄຟຟ້າ ແລະ ແຮ່ທາດ ຈຳກັດ ແລະ ຕາງໜ້າ ບໍລິສັດ ທີ່ປຶກສາສິ່ງແວດລ້ອມແບບຍືນຍົງ ຈໍາກັດຜູ້ດຽວ ເຂົ້າຮ່ວມ.

     ໂຄງການດັ່ງກ່າວ ຕັ້ງຢູ່ ບ້ານ ຕອກອົງແກ້ວ, ເມືອງລະມາມ ແຂວງເຊກອງ ຫ່າງຈາກເທດສະບານແຂວງໄປທາງທິດຕາເວັນອອກສ່ຽງເໜືອ ປະມານ 25 ກິໂລແມັດ, ກວມເນື້ອທີ່ດິນທັງໝົດ 228 ກິໂລຕາແມັດ ໃນນັ້ນມີເນື້ອທີ່ສໍາຫຼວດຂຸດຄົ້ນ 68 ກິໂລຕາແມັດ ແລະ ຄາດວ່າຈະມີປະລິມານຖ່ານຫີນ 194 ລ້ານໂຕນ (ຂຸດຄົ້ນແບບບໍ່ເປີດ ແລະ ໃຕ້ດິນ), ມີກໍາລັງການຕິດຕັ້ງ 700 ເມກາວັດ ໂດຍນໍາໃຊ້ເຕົາ 2 ໜ່ວຍ (ໜ່ວຍລະ 350 ເມກາວັດ). ພະລັງງານໄຟຟ້າທີ່ຜະລິດໄດ້ທັງໝົດ ແມ່ນຈະສົ່ງຂາຍໃຫ້ປະເທດກຳປູເຈຍ ດ້ວຍລະບົບສາຍສົ່ງ 500 ກິໂລໂວນ ຍາວ 260 ກິໂລແມັດ ຈາກໂຮງງານໄຟຟ້າ ຫາຊາຍແດນກຳປູເຈຍ.

     ໃນກອງປະຊຸມ ໄດ້ຮັບຟັງການລາຍງານໂດຍຕາງໜ້າບໍລິສັດທີ່ປຶກສາດ້ານສິ່ງແວດລ້ອມ ກ່ຽວກັບ ເນື້ອໃນ ບົດປະເມີນຜົນກະທົບຕໍ່ສິ່ງແວດລ້ອມແບບລະອຽດ, ແຜນຄຸ້ມຄອງ ແລະ ຕິດຕາມກວດກາສິ່ງແວດລ້ອມ ເປັນຕົ້ນ ຂໍ້ມູນພື້ນຖານທາງດ້ານສິ່ງແວດລ້ອມສັງຄົມ ແລະ ທຳມະຊາດເຂດໂຄງການ ແລະ ເຂດໃກ້ຄຽງ; ຜົນກະທົບທີ່ອາດເກີດຂຶ້ນຈາກກິດຈະກໍາ ແລະ ວຽກງານຂອງໂຄງການ; ມາດຕະການປ້ອງກັນ, ຫຼຸດຜ່ອນ ແລະ ແກ້ໄຂຜົນກະທົບ ແລະ ແຜນຄຸ້ມຄອງສິ່ງແວດລ້ອມ. ພ້ອມນັ້ນກໍ່ໄດ້ຮັບຟັງໂດຍຫຍໍ້ ກ່ຽວກັບ ບົດປະເມີນຜົນກະທົບທາງດ້ານສຸຂະພາບ (HIA).

     ກອງປະຊຸມໄດ້ປຶກສາຫາລື ແລະ ປະກອບຄໍາເຫັນຮ່ວມກັນ ຢ່າງກົງໄປກົງມາ ແລະ ໃນຕອນທ້າຍ ຄະນະປະທານກໍ່ໄດ້ໃຫ້ທິດຊີ້ນໍາ ເພື່ອໃຫ້ເຈົ້າຂອງໂຄງການ ນໍາຄໍາເຫັນຂອງກອງປະຊຸມໄປຄົ້ນຄວ້າ ແລະ ປັບປຸງບົດລາຍງານການປະເມີນຜົນກະທົບຕໍ່ສິ່ງແວດລ້ອມແບບລະອຽດ ແລະ ແຜນຄຸ້ມຄອງຕິດຕາມກວດກາສິ່ງແວດລ້ອມ ເພື່ອໃຫ້ໄດ້ເນື້ອໃນທີ່ຄົບຖ້ວນສົມບູນ, ໄດ້ຕາມມາດຕະຖານສາກົນ ແລະ ສາມາດນຳໄປຈັດຕັ້ງປະຕິບັດໄດ້ ຢ່າງມີປະສິດທິຜົນສູງ, ທັງນີ້ກໍ່ເພື່ອຮັບປະກັນໃຫ້ການພັດທະນາ ໄປຕາມທິດສີຂຽວ ແລະ ຍືນຍົງ ຕາມທິດທີ່ລັດຖະບານກຳນົດໄວ້.