ກອງ​ປະ­ຊຸມ​ໃຫຍ່ ​ຄັ້ງ​ທີ I ຂອງ​ໜ່ວຍ​ພັກ​ ພະແນກ ຄວບຄຸມມົນລະພິດ, ກົມຄວບຄຸມ ແລະ ຕິດຕາມກວດກາມົນລະພິດ,  ໄດ້​ຈັດ​ຂຶ້ນໃນຕອນເຊົ້າຂອງ ວັນ​ທີ 31 ກໍ­ລະ­ກົດ 2020​ ທີ່​ຫ້ອງປະຊຸມ ກົມຄວບຄຸມ ແລະ ຕິດຕາມກວດກາມົນລະພິດ, ໂດຍ​ໃຫ້​ກຽດ​ເຂົ້າ​ຮ່ວມຂອງ ສະ­ຫາຍ ໄຊຍະເວດ ວິໄຊ, ຄະນະປະຈຳພັກ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ, ມີ​ແຂກ​ຖືກ​ເຊີນຈາກບັນດາຫນ່ວຍພັກອື່ນໆ ອ້ອມຂ້າງ ກຊສ ແລະ ສະ​ມາ​ຊິກ​ພັກຢູ່ພາຍໃນຫນ່ວຍ​ເຂົ້າ​ຮ່ວມ ທັງຫມົດ 20 ສະຫາຍ, ຍິງ 6 ສະຫາຍ.

     ໃນກອງປະຊຸມ ສະຫາຍ ອາລິຍະສັກ ຕຸນາລົມ ເລຂາໜ່ວຍພັກ ພະແນກ ຄວບຄຸມມົນລະພິດ  ໄດ້ຂຶ້ນຜ່ານບົດສະຫຼຸບ ການນໍາພາການເຄື່ອນໄຫວວຽກງານໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ, ໜ່ວຍພັກ ພະແນກ  ຄວບຄຸມມົນລະພິດ ມີສະມາຊິກພັກ ທັງໝົດ 8 ສະຫາຍ, ຍິງ 2 ສະຫາຍ.

   

     ໜ່ວຍພັກ ພຄມ ໄດ້ເອົາໃຈໃສ່ຊີ້ນໍາ-ນໍາພາ ການຈັດຕັ້ງປະຕິບັດວຽກງານສ້າງນະໂຍບາຍ, ຍຸດທະສາດ, ລະບຽບການ ແລະ ຄູ່ມືວິຊາການ ລວມທັງການຈັດຕັ້ງປະຕິບັດບັນດາສົນທິສັນຍາ ແລະ ອະນຸສັນຍາ ທີ່ ສປປ ລາວ ເປັນພາຄີ ແນໃສ່ປ້ອງກັນ, ຄວບຄຸມມົນລະພິດ ແລະ ວຽກງານການຕິດຕາມກວດກາການນໍາໃຊ້ຊັບພະຍາກອນທໍາມະຊາດ ທີ່ກໍ່ໃຫ້ເກີດບັນຫາມົນລະພິດ ແລະ ສົ່ງຜົນກະທົບຕໍ່ສິ່ງແວດລ້ອມສັງຄົມ ແລະ ທໍາມະຊາດ ມາ​ເປັນ​ແຜນ​ຍຸດ​ທະ​ສາດ, ​ແຜນການ, ແຜນ​ງານ​ ແລະ ​ໂຄງການລະອຽດຂອງ​ຕົນ ໃນການຈັດ​ຕັ້ງ​ປະຕິບັດວຽກງານ ​ຕາມລະບຽບ​ຫຼັກການທັງພາຍ​ໃນ ແລະ ສາກົນ ​ໃຫ້ໄດ້​ຮັບໝາກຜົນເປັນຢ່າງດີ ຊຶ່ງເປັນຜົນງານອັນພົ້້ນເດັ່ນ ແລະ ສໍາເລັດໃນຫຼາຍດ້ານດັ່ງນີ້:

  • ໄດ້ນໍາພາເກັບກໍາຂໍ້ມູນ ມົນລະພິດທາງອາກາດ ແລະ ນໍ້າ ພ້ອມທັງປະສານກັບຂະແໜງການທີ່ກ່ຽວຂ້ອງ ເພື່ອສ້າງບົດລາຍງານສະພາບມົນລະພິດໃນ ສປປລ ໃຫ້ສໍາເລັດພາຍໃນປີ 2020;
  • ໄດ້ນໍາພາປັງປຸງການສ້າງຄູ່ມືແນະນໍາຕ່າງໆ ເຊັ່ນ: ຄູ່ມືວິຊາການ ກ່ຽວກັບ ການຄວບຄຸມມົນລະພິດທາງອາກາດ ແລະ ຄູ່ມືວິຊາການ ກ່ຽວກັບ ການຄວບຄຸມມົນລະພິດທາງນໍ້າ;
  • ໄດ້ນໍາພາເກັບກໍາຂໍ້ມູນ ແລະ ສ້າງເປັນກໍລະນີສຶກສາ ການປ່ອຍມົນລະພິດທາງອາກາດຈາກບັນດາໂຮງງານສີມັງໃນຂອບເຂດທົ່ວປະເທດ;
  • ໄດ້ນໍາພາເກັບກໍາຂໍ້ມູນ ແລະ ສ້າງເປັນກໍລະນີສຶກສາ ຄຸນນະພາບນໍ້າ ໃນນະຄອນຫຼວງວຽງຈັນ ໂດຍໄດ້ເລີ້ມຈັດຕັ້ງປະຕິບັດ ນໍ້າຮ່ອງແຊງເປັນກໍລະນີທໍາອິດ;
  • ໄດ້ນໍາພາຄົ້ນຄວ້າເອກະສານ ແລະ ລົງພາກສະໜາມຕົວຈິງ ເພື່ອພິຈາລະນາ ກ່ຽວກັບ ການຂໍອະນຸຍາດການປ່ອຍນໍ້າເປື້ອນຈາກບັນດາໂຄງລົງທຶນຕ່າງໆທົ່ວປະເທດ ໄດ້ຈໍານວນ 04 ໂຄງການ;
  • ໄດ້ນໍາພາ ຄະນະສະເພາະກິດ ທີ່ປະກອບຈາກຂະແໜງທີ່ກ່ຽວຂ້ອງຂັ້ນສູນກາງ ແລະ ທ້ອງຖິ່ນ ລົງຕິດຕາມ​ກວດກາ ແລະ ແກ້ໄຂກໍລະນີເຫດການສຸກເສີນດ້ານ​ສິ່​ງ​ແວດ​ລ້ອມ ໄດ້ຈໍານວນ 12 ຄັ້ງ

ຈາກນັ້ນ ກອງ​ປະ­ຊຸມ​ ​ໄດ້​ຜ່ານ​ບົດ​ສຳ­ຫຼວດ​ການ​ນຳ­ພາ​ຂອງ​ຄະ­ນະ​ໜ່ວຍ​ພັກຊຸດເກົ່າ ແລະ ປ່ອນ​ບັດ​ເລືອກ​ຕັ້ງ​ເອົາ​ຄະນະ​ໜ່ວຍພັກ​ຊຸດ​ໃໝ່ ເຊິ່ງມີຜູ້ລົງສະຫມັກ ຈໍານວນ 3 ສະຫາຍ. ກອງ​ປະ­ຊຸມ​ຄັ້ງ​ປະຖົມ​ມະ­ລຶກ ໄດ້​ເປັນ​ເອ­ກະ​ພາບ​ເລືອກ​ເອົາ:

  1. ສະຫາຍ ອາລິຍະສັກ ຕຸນາລົມ             ເປັນເລຂາ;
  2. ສະຫາຍ ວັນໄຊ ຜິວມະນີວອນ            ເປັນຮອງເລຂາ, ປະທານກວດກາ.

 

  ໃນ​ໂອ­ກາດ​ດັ່ງ­ກ່າວ, ສະ­ຫາຍ ໄຊຍະເວດ ວິໄຊ, ຄະນະປະຈຳພັກ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ, ໄດ້​ສະ­ແດງ​ຄວາມ​ຍ້ອງ­ຍໍຊົມ­ເຊີຍ​ຕໍ່​ຄະ­ນະໜ່ວຍພັກ ​ ພະແນກ ຄວບຄຸມມົນລະພິດ ​ຊຸດ​ເກົ່າ ​ທີ່ໄດ້​ຊີ້​ນໍາ - ນໍາ​ພາ​ສະ­ມາຊິກ​ພັກ, ພະ­ນັກ­ງານ ​ປະ­ຕິ­ບັດ​ໜ້າ­ທີ່​ການ­ເມືອງ ສາ­ມາດ​ຍາດ​ໄດ້ ­ຜົນ​ງານ​ໃນ​ຫຼາຍໆ​ດ້ານ ແລະ ມີ​ທິດ​ຊີ້​ນໍາ​ໃນ​ແຕ່​ລະ​ວຽກ​ງານ​ຢ່າງ​ພາ­ວະ​ວິ­ໄສ ແລະ ມີ​ຈຸດ​ສຸມ. ຄະນະ​ໜ່ວຍພັກ​ຊຸດ​ໃໝ່ ຕ້ອງໄດ້ ສຶກສາອົບຮົມກໍ່ສ້າງ ສະມາຊິກພັກ ພະແນກຄວບຄຸມມົນລະພິດ ໃຫ້ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ມີຫົວຄິດປະດິດສ້າງພັດທະນາຄວາມຮູ້ຄວາມສາມາດປະກອບສ່ວນເຂົ້າໃນການປະຕິບັດໜ້າທີ່ວຽກງານວິຊາສະເພາະ, ມີແບບແຜນວິທີເຮັດວຽກ ແລະ ແບ່ງຄວາມຮັບຜິດຊອບໃຫ້ແຕ່ລະສະຫາຍຢ່າງລະອຽດຈະແຈ້ງ  ພ້ອມກັນປະຕິບັດໜ້າທີໃຫ້ມີຜົນສໍາເລັດເປັນຢ່າງດີ ແລະ ເຕົ້າໂຮມຄວາມຮັກແພງສາມັກຄີໃຫ້ເປັນປຶກແຜນແໜ້ນໜາ.