ກອງປະຊຸມດັ່ງກ່າວ ພ້ອມດ້ວຍກອງປະຊຸມປິ່ນອ້ອມອື່ນໆ ໄດ້ເລີ່ມຕົ້ນແຕ່ວັນທີ 20 ຫາ 22 ຕຸລາ 2021 ເຊິ່ງ ໃນວັນທີ 20 ຕຸລາ 2021, ກອງປະຊຸມເຈົ້າໜ້າທີ່ອາວຸໂສອາຊຽນ ດ້ານສິ່ງແວດລ້ອມ ໄດ້ຈັດຂຶ້ນ ເພື່ອປຶກສາຫາລື ໃນການກະກຽມຄວາມພ້ອມທາງດ້ານເນື້ອໃນ ແລະ ຮັບຮອງບັນດາເອກະສານທີ່ສໍາຄັນຕ່າງໆ ເປັນຕົ້ນ: ບົດລາຍງານຄວາມຄືບໜ້າໃນການຈັດຕັ້ງປະຕິບັດກິດຈະກຳ ແລະ ໂຄງການ ຂອງ ບັນດາໜ່ວຍປະຕິບັດງານອາຊຽນດ້ານສິ່ງແວດລ້ອມ, ຮ່າງຖະແຫຼງການຮ່ວມອາຊຽນດ້ານສິ່ງແວດລ້ອມ ເພື່ອຈະລາຍງານ ແລະ ສະເໜີຮັບຮອງຢ່າງເປັນທາງການ ໃນກອງປະຊຸມ ລັດຖະມົນຕີອາຊຽນ ດ້ານສິ່ງແວດລ້ອມ ຄັ້ງທີ 16 ແລະ ກອງປະຊຸມລັດຖະມົນຕີອາຊຽນ ບວກສາມ ດ້ານສິ່ງແວດລ້ອມ (ສປ ຈີນ, ຍີ່ປຸ່ນ ແລະ ສ.ເກົາຫລີ) ຄັ້ງທີ 17, ກອງປະຊຸມລັດຖະມົນຕີອາຊຽນ ພາຍໃຕ້ ສັນຍາມົນລະ ພິດໝອກຄວັນຂ້າມ ຜ່ານຊາຍແດນ ຄັ້ງທີ 16.
     ໃນວັນທີ 21 ຕຸລາ 2021, ກອງປະຊຸມລັດຖະມົນຕີອາຊຽນ ດ້ານສິ່ງແວດລ້ອມ ຄັ້ງທີ 16 ໄດ້ຈັດຂຶ້ນຢ່າງເປັນທາງການ ໂດຍການເປັນປະທານ ຂອງ ທ່ານ ປອ ນາງ ສິຕີ ເນີບາຢາ ບາກາ, ລັດຖະມົນຕີ ກະຊວງ ສິ່ງແວດລ້ອມ ແລະ ກະສິກໍາ, ປະເທດ ອິນໂດເນເຊຍ ທີ່ເປັນເຈົ້າພາບກອງປະຊຸມຕາມກົດບັດຂອງອາຊຽນ. ໃນນັ້ນກອງປະຊຸມໄດ້ເຫັນດີ ເລືອກຕັ້ງເອົາ ທ່ານ ປອ ໄຊນະຄອນ ອິນທະວົງ, ຮອງລັດຖະມົນຕີ, ກະຊວງ ຊັບພະຍາກອນທໍາມະຊາດ ແລະ ສິ່ງແວດລ້ອມ, ສປປ ລາວ ເປັນຮອງປະທານ ກອງປະຊຸມຄັ້ງນີ້ ເຊິ່ງມີລັດຖະມົນຕີ ແລະ ຮອງລັດຖະມົນຕີ ຈາກບັນດາປະເທດ ສະມາຊິກອາຊຽນ ແລະ ທ່ານ ດາໂຕ ລິມຈັອກຮອຍ, ເລຂາທິການໃຫ່ຍອາຊຽນ ເຂົ້າຮ່ວມ. ສຳລັບຄະນະຜູ້ແທນ ສປປ ລາວ ທີ່ໄດ້ເຂົ້າຮ່ວມຕິດຕາມກອງປະຊຸມໃນຄັ້ງນີ້ປະກອບມີ: ຕາງໜ້າເຈົ້າໜ້າທີ່ອາວຸໂສອາຊຽນດ້ານສິ່ງແວດລ້ອມ, ບັນດາຄະນະກົມທີ່ກ່ຽວຂ້ອງ, ບັນດາຜູ້ປະສານງານ ໜ່ວຍປະຕິບັດງານອາຊຽນ ດ້ານສິ່ງແວດລ້ອມ ຂອງ ສປປ ລາວ, ຕາງໜ້າຈາກກົມອາຊຽນ, ກະຊວງ ການຕ່າງປະເທດ ແລະ ກົມປ່າໄມ້, ກະຊວງ ກະສິກຳ ແລະ ປ່າໄມ້ ເຂົ້າຮ່ວມ ກອງປະຊຸມດັ່ງກ່າວ.
ກອງປະຊຸມດັ່ງກ່າວ ໄດ້ຮັບຟັງການລາຍງານຈາກ ປະທານເຈົ້າໜ້າທີ່ອາວຸໂສອາຊຽນ ດ້ານສິ່ງແວດລ້ອມ ແລະ ກອງເລຂາອາຊຽນ ກ່ຽວກັບ ຜົນສຳເລັດ, ຂໍ້ລິເລີ້ມ ແລະ ບັນຫາຕ່າງໆ ແລະ ທິດທາງແຜນການເຄື່ອນໄຫວ ແລະ ຈັດຕັ້ງປະຕິບັດໃນຕໍ່ໜ້າ ພາຍໃຕ້ຂອບການຮ່ວມມື, ຍຸດທະສາດ ແລະ ຖະແຫຼງການອາຊຽນທີ່ກ່ຽວຂ້ອງ ດ້ວຍບັນຍາກາດອັນດີ ແລະ ບັນລຸຜົນສຳເລັດຕາມຄາດໝາຍ ໂດຍຮັບຟັງການລາຍງານ ຈາກບັນດາປະເທດສະມາຊິກອາຊຽນ ແລະ ມີການປຶກສາຫາລືໃນຫລາຍບັນຫາ ຄື: ໄດ້ຮັບເອົາ ຖະແຫຼງການອາຊຽນ ວ່າດ້ວຍ ການປ່ຽນແປງ ດິນຟ້າອາກາດ ຕໍ່ ກອງປະຊຸມລັດພາຄີ ຂອງ ສົນທິສັນຍາ ວ່າດ້ວຍ ການປ່ຽນແປງດິນຟ້າອາກາດ ຄັ້ງທີ 26 (COP26) ທີ່ມີແຜນຈັດຂຶ້ນຢູ່ທີ່ ສະຫະລາຊະອານາຈັກອັງກິດ ແລະ ອຽກລັງເໜືອ ໃນລະຫວ່າງວັນທີ 31 ຕຸລາ ຫາວັນທີ 12 ພະຈິກ 2021, ຮັບຮອງທາງດ້ານຫຼັກການ ກ່ຽວກັບ ແຜນດໍາເນີນງານຊາວໜຸ່ມອາຊຽນ ວ່າດ້ວຍ ການປ່ຽນແປງດິນຟ້າອາກາດ, ການຮັບຮູ້ ແລະ ມີຄໍາເຫັນຕໍ່ກັບ ການຮັບຮອງຖະແຫຼງການຮ່ວມອາຊຽນ ວ່າດ້ວຍ ສົນທິສັນຍາຊີວະນາໆພັນ ຄັ້ງທີ 15 ແລະ ຖະແຫຼງການຮ່ວມອາຊຽນ ວ່າດ້ວຍ ສານເຄມີ ແລະ ສິ່ງເສດເຫຼືອ ຕໍ່ ກອງປະຊຸມ ສົນທິສັນຍາບາເຊວ ແລະ ຣອດເຕີດໍາ, ການຮັບຮູ້ຄວາມຄືບໜ້າ ຂອງການຈັດຕັ້ງປະຕິບັດ ກອບດໍາເນີນງານອາຊຽນ-ແມ່ຂອງ, ຄຽງຄູ່ກັນນີ້ ກໍ່ໄດ້ມີພິທີມອບລາງວັນຕົວເມືອງທີ່ມີຄວາມຍືນຍົງທາງ ດ້ານສິ່ງແວດລ້ອມອາຊຽນ ຄັ້ງທີ 5 ເຊິ່ງຕາງໜ້າ ສປປ ລາວ ໄດ້ຮັບ 2 ລາງວັນຄື: 1. ເມືອງ ຊໍາເໜືອ, ແຂວງ ຫົວພັນ ໄດ້ຮັບໂລ້ລາງວັນຕົວເມືອງທີ່ມີຄວາມຍືນຍົງທາງດ້ານສິ່ງແວດລ້ອມ ພາຍໃຕ້ຫົວຂໍ້ ອາກາດສະອາດ ແລະ 2. ນະຄອນໄກສອນພົມວິຫານ, ແຂວງ ສະຫວັນນະເຂດ ໄດ້ຮັບໃບຢັ້ງຢືນຕົວເມືອງ ທີ່ມີອາກາດສະອາດ ຄັ້ງທີ 4 ເຊິ່ງຕາງໜ້າ ສປປ ລາວ ຂຶ້ນຮັບລາງວັນ ໂດຍ ສະຖານທູດລາວ ປະຈຳ ປະເທດອິນໂດເນເຊຍ.
     ໃນວັນທີ 22 ຕອນເຊົ້າ ຄະນະຜູ້ແທນ ຂອງ ສປປ ລາວ ກໍໄດ້ສືບຕໍ່ເຂົ້າຮ່ວມກອງປະຊຸມລັດພາຄີ ຕໍ່ສັນຍາອາຊຽນ ວ່າດ້ວຍ ມົນລະພິດໝອກຄວັນຂ້າມຜ່ານຊາຍແດນ ຄັ້ງທີ 16. ກອງປະຊຸມໄດ້ຮັບຟັງຂໍ້ມູນຈາກ ສູນຊ່ຽວຊານອຸຕຸນິຍົມ ອາຊຽນ ກ່ຽວກັບ ບັນຫາມົນລະພິດໝອກຄວັນທີ່ເກີດຂຶ້ນໃນຊ່ວງລະດູແລ້ງ ຢູ່ຂົງເຂດປະເທດ ລຸ່ມແມ່ນໍ້າຂອງ ອັນເນື່ອງ ມາຈາກສະພາບອາກາດທີ່ແຫ້ງ ບວກກັບ ກະແສລົມພັດຄ່ອຍ ຈາກທິດຕາເວັນອອກສ່ຽງເໜືອ, ການຈູດເຜົາເພື່ອ ການກະສິກໍາ, ໄຟໄຫມ້ປ່າ, ຖາງປ່າ-ເຮັດໄຮ່; ການຈູດເຜົາ ສິ່ງເສດເຫຼືອຈາກ ສະໜາມກໍາຈັດຂີ້ເຫຍື້ອ, ອຸດສາຫະກໍາ ແລະ ຄົວເຮືອນ. ພ້ອມທັງ ໄດ້ຮັບຟັງຄວາມຄືບໜ້າ ຂອງການຈັດຕັ້ງປະຕິບັດ ແຜນດໍາເນີນງານສະບັບສຸດທ້າຍ ກ່ຽວກັບ ການຮ່ວມມືໃນການຄວບຄຸມ ມົນລະພິດ ແລະ ເພື່ອຮັບປະກັນ ການຈັດຕັ້ງປະຕິບັດໃຫ້ບັນລຸວິໄສທັດອາຊຽນປາສະຈາກ ໝອກຄວັນ.
ໃນຕອນບ່າຍ ຄະນະຜູ້ແທນ ສປປ ລາວ ກໍ່ໄດ້ເຂົ້າຮ່ວມກອງປະຊຸມລັດຖະມົນຕີອາຊຽນ ບວກ ສາມ (ສປ ຈີນ, ຍີ່ປຸ່ນ ແລະ ສ.ເກົາຫລີ) ຄັ້ງທີ 17 ກອງປະຊຸມຄັ້ງນີ້ ໄດ້ຮັບຟັງການລາຍງານຄວາມຄືບໜ້າ ການຈັດຕັ້ງປະຕິບັດວຽກງານ ໃນຂອບ ການຮ່ວມມືອາຊຽນບວກສາມ ດ້ານສິ່ງແວດລ້ອມ ພາຍໃຕ້ຂໍ້ລິເລີ້ມ, ແຜນງານ ແລະ ຍຸດທະສາດ, ຖະແຫຼ່ງການຮ່ວມ ດ້ານສິ່ງແວດລ້ອມ, ເຊິ່ງ ສປປ ລາວ ກໍໄດ້ຖືເອົາໂອກາດດັ່ງກ່າວ ສະແດງຄວາມຂອບໃຈ ແລະ ຊົມເຊີຍ ຕໍ່ຜົນສຳເລັດ ແລະ ການສະໜັບສະໜູນຂອງ ບັນດາປະເທດບວກສາມ (ສປ ຈີນ, ຍີ່ປຸ່ນ ແລະ ສ. ເກົາຫຼີ) ເປັນຕົ້ນແມ່ນ ການສະໜັບສະໜູນ ໃຫ້ແກ່ ໂຄງການ ຄຸ້ມຄອງຊັບພະຍາກອນນໍ້າ ແບບປະສົມປະສານ, ການສົ່ງເສີມການຜະລິດ ແລະ ການຊົມໃຊ້ແບບຍືນຍົງ ແລະ ການສ້າງເສດຖະກິດໝູນວຽນ ໃນ ສປປ ລາວ ພ້ອມທັງສະເໜີ ຂົງເຂດຄວາມເປັນໄປໄດ້ໃນການຮ່ວມມື ເພື່ອຍາດແຍ່ງ ເອົາການ ສະໜັບສະໜູນໃນການຈັດຕັ້ງປະຕິບັດວຽກງານອື່ນໆໃນຕໍ່ໜ້າ ເປັນຕົ້ນ: ວຽກງານການສ້າງຄວາມເຂັ້ມແຂງ ທາງ ດ້ານ ເຕັກນິກວິຊາການ ໃນຂົງເຂດການຫັນເປັນເສດຖະກິດໝູນວຽນ ເພື່ອຫຼຸດຜ່ອນຜົນກະທົບ ຂອງການປ່ຽນແປງດິນຟ້າ ອາກາດ, ການຈັດການສິ່ງເສດເຫຼືອ, ການເຕີບໂຕສີຂຽວ ແລະ ການຄວບຄຸມ ແລະ ປ້ອງກັນມົນລະພິດ.
ຈາກບັນດາກອງປະຊຸມໃນຄັ້ງນີ້ ໄດ້ມີການເຫັນດີໂດຍປະຕິບັດຕາມກົດບັດ ກໍ່ຄືລະບຽບການ ຂອງອາຊຽນ ເປັນເອກະພາບໃຫ້ ປະເທດ ສິງກະໂປ ເປັນເຈົ້າພາບກອງປະຊຸມລັດຖະມົນຕີອາຊຽນດ້ານມົນລະພິດໜອກຄວັນຂ້າມຜ່ານຊາຍແດນ ຄັ້ງທີ 17 ໃນປີ 2022 ແລະ ສປປ ລາວ ເຮົາ ເປັນເຈົ້າພາບກອງປະຊຸມລັດຖະມົນຕີອາຊຽນ ດ້ານສິ່ງແວດລ້ອມ ຄັ້ງທີ 17 ແລະ ກອງປະຊຸມລັດຖະມົນຕີອາຊຽນດ້ານມົນລະພິດໝອກຄວັນຂ້າມຜ່ານຊາຍແດນ ຄັ້ງທີ 18 ໃນປີ 2023.