ກະ​ຊວງ ຊັບ​ພະ​ຍາກ​ອນ​ທຳ​ມະ​ຊາດ ແລະ ສິ່ງ​ແວດ​ລ້ອມ​ໄດ້​ຈັດ​ພິ​ທີ​ປາ​ຖະ​ກະ​ຖາ ເນື່ອງ​ໃນ​ໂອ​ກາດ​ລະ​ນຶກວັນ​ສາ​ກົນ​ຢຸດ​ຕິ​ຄວາມ​ຮຸນ​ແຮງ​ຕໍ່​ແມ່​ຍິງ​ພາຍ​ໃຕ້​ຄຳ​ຂວັນ “ບໍ່​ປະ​ໃຜ​ໄວ້​ເບື້ອງຫຼັງ” ຢຸດ​ຕິ​ຄວາມ​ຮຸນ​ແຮງ​ຕໍ່​ແມ່​ຍິງ ແລະ ເດັກ​ຍິງ​ຂື້ນ​ໃນ​ວັນ​ທີ 3 ມັງ​ກອນ 2018 ທີ່​ຫໍ​ປະ​ຊຸມ ກະ​ຊວງ ຊັບ​ພະ​ຍາ​ກອນ​ທຳ​ມະ​ຊາດ​ແລະ ສິ່ງ​ແວດ​ລ້ອມ  ໂດຍ​ພາຍ​ໃຕ້​ການ​ເປັນ​ປະ​ທານ  ແລະ ໃຫ້​ກຽດ​ປາ​ຖະ​ກະ​ຖາ​ຂອງ​ທ່ານ​ນາງ ບັນ​ດິດ ປະ​ທຸມ​ວັນ ຮອງ​ປະ​ທານ ສູນ​ກາງ​ສະ​ຫະ​ພັນ​ແມ່​ຍິງ​ລາວ, ຮອງ​ປະ​ທານ​ຄະ​ນະ​ກຳ​ມະ​ທິ​ການ​ແຫ່ງ​ຊາດ ເພື່ອ​ຄວາມ​ກ້າວ​ໜ້າ​ຂອງ​ແມ່​ຍິງ ແລະ ແມ່-ເດັກ, ມີ​ທ່ານ ນາງ ບຸນ​ຄຳ ວໍ​ລະ​ຈິດ ຮອງ​ລັດ​ຖະ​ມົນ​ຕີ ກະ​ຊວງ ຊັບ​ພະ​ຍາ​ກອນ​ທຳ​ມະ​ຊາດ ແລະ ສິ່ງ​ແວດ​ລ້ອມ ຜູ້​ຊີ້​ນຳ​ວຽກ​ສົ່ງ​ເສີມ ຄວາມ​ກ້າວ​ໜ້າ​ຂອງ​ແມ່​ຍິງ ແລະ ແມ່-ເດັກ ກ​ຊ​ສ, ມີ​ບັນ​ດາ​ຫົວ​ໜ້າ​ກົມ, ກອງ, ສະ​ຖາ​ບັນ, ສູນ ແລະ ພ້ອມ​ດ້ວຍ​ພະ​ນັກ​ງານ​ພາຍ​ໃນ​ກະ​ຊວງ​ເຂົ້າ​ຮ່ວມ.

ການ​ຈັດ​ຕັ້ງ​ປະ​ຖະ​ກະ​ຖາ​ວັນ​ລະ​ນຶກວັນ​ສາ​ກົນ​ຢຸດ​ຕິ​ຄວາມ​ຮຸນ​ແຮງ​ຕໍ່​ແມ່​ຍິງ ແລະ ເດັກ​ນ້ອຍ ແມ່ນ​ໄດ້​ຈັດ​ຕັ້ງ​ປະ​ຕິ​ບັດ​ທົ່ວ​ປະ​ເທດ​ໃນ​ເດືອນ​ພະ​ຈິກ ຂອງ​ທຸກໆ​ປີ​ເພື່ອ​ໃຫ້​ບັນ​ດາ​ທ່ານ​ໄດ້​ຮັບ​ຮູ້ ແລະ ຮ່ວມ​ກັນ​ປ້ອງ​ກັນ​ການ​ໃຊ້​ຄວາມ​ຮຸນ​ແຮງ​ຕໍ່​ແມ່​ຍິງ ແລະ ເດັກ​ນ້ອຍ​ໃຫ້​ໝົດ​ໄປ​ເທືຶອ​ລະ​ກ້າວ.

ການ​ປາ​ຖະ​ກະ​ຖາ​ໃນ​ຄັ້ງ​ນີ້​​ແມ່ນ​ເພື່ອໃຫ້​ພະ​ນັກ​ງານ-ລັດ​ຖະ​ກອນ​ໄດ້​ເຊື່ອມ​ຊືມ​ບັນ​ດາ​ເອ​ກະ​ສານ ແລະ ສາ​ມາດ​ກຳ​ໄດ້ ແລະ ນຳ​ເອົາ​ເນື້ອ​ໃນ​ຈິດ​ໃຈ​ຂອງ​ການ​ປາ​ຖະ​ກະ​ຖາ​ຄັ້ງ​ນີ້ ໄປ​ຜັນ​ຂະ​ຫ​ຍາຍ​ເຂົ້າ​ໃນ​ການ​ຈັດ​ຕັ້ງ​ປະ​ຕິ​ບັດ​ໜ້າ​ທີ່​ການ​ເມືອງ​ຂອງ​ຕົນ ກໍ່​ຄື​ຄອບ​ຄົວ ເພື່ອ​ໃຫ້​ແມ່​ຍິງ ໄດ້​ມີ​ສ່ວນ​ຮ່ວມ​ໃນ​ການ​ຕັດ​ສິນ​ບັນ​ຫາ​ໃນ​ວຽກ​ງານ​ຕ່າງໆ ແລະ ຫຼິກ​ລ້ຽງ​ບັນ​ຫາ​ການ​ໃຊ້​ຄວາມ​ຮຸນ​ແຮງ​ຕໍ່​ແມ່​ຍິງ​ດ້ວຍ​ຄວາມ​ຮັບ​ຮູ້ ແລະ ເຂົ້າ​ໃຈ​ຂອງ​ຜູ່​ເຂົ້າ​ຮ່ວມ​ຈະ​ເປັນ​ບາດ​ກ້າວ​ສຳ​ຄັນ ເພື່ອ​ເຮັດ​ໃຫ້​ຄວາມ​ຮຸ່ນ​ແຮງ​ຕໍ່​ແມ່​ຍິງ ແລະ ເດັກ​ຍິງ ​ໝົດ​ໄປ​ເທື່ອ​ລະ​ກ້າວ.