ກົມ ອຸ​ຕຸ​ນິ​ຍົມ ແລະ ອຸ​ທົກ​ກະ​ສາດ ໄດ້​ຈັດ​ຝຶກ​ອົບ​ຮົມ ​ກ່ຽວ​ກັບ​ການ​ແຈ້ງ​ເຕືອນ​ໄພ​ລ່ວງ​ໜ້າ​ທາງ​ດ້ານ​ທຳ​ມະ​ຊາດ ຂື້ນ​ທີ່​ຫ້ອງ​ປະ​ຊຸມ ​ສູນ​ເຕືອນ​ໄພ​ລ່ວງ​ໜ້າ​ແຫ່ງ​ຊາດ ຂອງ​ກົມ ອຸ​ຕຸ​ນິ​ຍົມ ແລະ ອຸ​ທົກ​ກະ​ສາດ, ຄັ້ງ​ວັນ​ທີ 22 ຕຸ​ລາ 2018, ໂດຍ​ໃຫ້​ກຽດ​ເປັນ​ປະ​ທານ​ຂອງ ນາງ ອຸ​ທອ​ນ ເພັດຫຼວງ​ສີ ຮອງ​ຫົວ​ໜ້າ​ກົມ ອຸ​ຕຸ​ນິ​ຍົມ ແລະ ອຸ​ທົກ​ກະ​ສາດ, ທ່ານ ອີ​ລອ​ສ ຄິດ​ສະ​ຕຽນ (Eliot Christian) ຄູ​ຝຶກ​ຈາກ​ອົງ​ການ ​ອຸ​ຕຸ​ນິ​ຍົມ​ໂລກ, ມີ​ນັກ​ສຳ​ມະ​ນາ​ກອນ​ຈາກ  ຫ້ອງ​ການ, ກົມ​, ກ​ອງ ພາຍ​ໃນ ກ​ຊ​ສ, ຈາກ​ສະ​ຖາ​ນີ​ວິ​ທະ​ຍຸ ແລະ ໂທ​ລະ​ພາບ​ແຫ່ງ​ຊາດ ເຂົ້າ​ຮ່ວມ.

    ວຽກ​ງານ​ດ້ານ​ອຸ​ຕຸ​ນິ​ຍົມ ແລະ ອຸ​ທົກ​ກະ​ສາດ ແມ່ນ​ວຽກ​ງານ​ວິ​ທະ​ຍາ​ສາດ ຂອງ​ຂະ​ແໜງ​ການ​ໜຶ່ງ​ທີ່ດ​ຳ​ເນີນ​ການ​ດຳ​ເນີນ​ການ​ປະ​ຕິ​ບັດ​ວຽກ​ງານ​ຢ່າງ​ເປັນ​ເອ​ກະ​ພາບ​ໃນ​ຂອບ​ເຂດ​ທົ່ວ​ປະ​ເທດ ແລະ ມີ​ຄວາມ​ຈຳ​ເປັນ​ຮອບ​ດ້ານ ໃນ​ການ​ປະ​ກອບ​ສ່ວນ​ເຂົ້າ​ໃນ​ວຽກ​ງານ​ພັດ​ທະ​ນ​ເສດ​ຖະ​ກິດ-ສັງ​ຄົມ ໂດຍ​ສະ​ເພາະ​ກໍ່​ສ້າງ​ພື້ນ​ຖານ​ໂຄງ​ລ່າງ ແລະ ທັງ​ເປັນ​ການ​ແຈ້ງ​ເຕືອນ​ໄພ​ລ່ວງ​ໜ້າ​ໃຫ້​ແກ່​ສັງ​ຄົມ​ໃຫ້​ທັນ​ກັບ​ສະ​ພາບ​ການ ເພື່ອຫຼຸດ​ຜ່ອນ​ຜົນ​ເສຍ​ຫາຍ​ທີ່​ເກິດ​ຂື້ນ​ຈາກ​ໄພ​ທຳ​ມະ​ຊາດ  ຊຶ່ງ​ໃນ​ປັດ​ຈຸ​ບັນ​ສະ​ພາບ​ອາ​ກາດ​​ໄດ້ມີ​ການ​ປ່​ຽນ​ແປງ ເປັນ​ຕົ້ນ ໄພ​ນ້ຳ​ຖ້ວມ (ຖ້ວມ​ຊຸ, ຖ້ວມ​ຍຶ່ງ), ໄພ​ແຫ້ງ​ແລ້ງ, ລົມ​ພາ​ຍຸ, ໄພ​ໜາວ ແລະ ອື່ນໆ ນັບ​ມື້​ນັບ​ຮຸນ​ແຮງ ແລະ ຖີ່​ຂື້ນ​ເລື້ອຍໆ ຊຶ່ງ​ປະ​ເທດ ແລະ ບັນ​ດາ​ປະ​ເທດ​ຢູ່​ໃນ​ໂລກ ພວມ​ປະ​ເຊີນ​ໜ້າ​ກັບ​ໄພ​ຂົ່ມ​ຂູ່​ດັ່ງ​ກ່າວ. ສຳ​ລັບ​ລະ​ບົບ​ການ​ແຈ້ງ​ເຕືອນ​ໄພ​ເຫັນ​ວ່າ​ມີ​ຄວາມ​ສຳ​ຄັນ ແລະ ເປັນ​ບູລິ​ມະ​ສິດ​ສຳ​ຄັນ ຂອງວຽກ​ງານ​ອຸ​ຕຸ​ນິ​ຍົມ ແລະ ອຸ​ທົກ​ກະ​ສາດ ຊຶ່ງ​ມີ​ການ​ພັດ​ທະ​ນາ​ຢ່າງ​ຕໍ່​ເນື່ອງ ເປັນ​ຕົ້ນ ສຳ​ເລັດ​ການ​ສ້າງ​ສູນ​ເຕືອນ​ໄພ​ລ່ວງ​ໜ້າ​ແຫ່ງ​ຊາດ, ປະ​ກອບ​ວັດ​ຖຸ​ອຸ​ປະ​ກອນ​ໄອ​ທີ ແລະ ລະ​ບົບ​ການ​ຕິດ​ຕາມ​ສະ​ພາບ​ປາ​ກົດ​ການ​ຕ່າງໆ​ຂອງ​ອາ​ກາດ ນອກນັ້ນ ​ຍັງ​ສຳ​ເລັດ​ການ​ສ້າງ​ກົດ​ໝາຍ​ວ່າ​ດ້ວຍ​ອຸ​ຕຸ​ນິ​ຍົມ ແລະ ອຸ​ທົກ​ກະ​ສາດ ຊຶ່ງ​ເປັນ​ນິ​ຕິ​ກຳ​ທີ່​ສຳ​ຄັນ​ໃນ​ການ​ສ​ະ​ໜັບ​ສະ​ໜູນ​ແກ່​ວຽກ​ງານ​ເຕືອນ​ໄພ.

     ສ​ປ​ປ ລາວ ເປັນ​ປະ​ເທດ​ໜຶ່ງ​ທີ່​ເຂົ້າ​ເປັນ​ສະ​ມາ​ຊິກ​ຂອງ​ອົງ​ການ​ອຸ​ຕຸ​ນິ​ຍົມ​ໂລກ​ໃນ​ປີ 1955 ເປັນ​ຕົ້ນ​ມາ ແລະ ໄດ້​ຮັບ​ການ​ສະ​ໜັບ​ສະ​ໜູນຫຼາຍ​ຢ່າງບໍ່​ວ່າ​ຈະ​ເປັນ​ເລື່ອງ ພັດ​ທະ​ນາ​ຊັບ​ພະ​ຍາ​ກອນ​ມະ​ນຸດ, ການກໍ່​ສ້າງ​ບັນ​ດາສະ​ຖາ​ນີໃນ​ທົ່ວ​ປະ​ເທດ ແລະ ອັນ​ອື່ນໆ​ທີ່​ສຳ​ຄັນ ໃນ​ໄລ​ຍະ​ຜ່ານ​ ຊຶ່ງ​ເຫັນ​ເປັນ​ສິ່ງ​ສຳ​ຄັນ ແລະ ມະ​ຫານ​ສານ​ແກ່ ສ​ປ​ປ ລາວ.